Atvinna
Atvinna er eitt af því sem hefur verið tekið sem sjálfsögðum hlut undanfarin ár, en nú er ekki endilega hægt að ganga að því vísu að hafa vinnu.
Atvinnuleysi er staðreynd sem erfitt er að sætta sig og ýmis teikn á lofti um að ástandið geti jafnvel versnað á næstu misserum . Þetta getur haft bein áhrif á tekjur sveitarfélagsins í formi lækkandi útsvars. Aukin félagsþjónusta leggst á sveitarfélagið en þar er um gjaldaaukningu að ræða. Því er mikilvægt að unnið sé markvisst að því að efla atvinnutækifæri og möguleika íbúa sveitarfélagsins til vinnu. Þetta réttlætir að fjármunir séu lagðir í þennan málaflokk.
Á næsta kjörtímabili er mikilvægt að lögð sé rækt við atvinnumálin til að sveitarfélagið verði í fararbroddi hvað varðar framsækna hugsun og skapi aðstöðu og hvetjandi umhverfi fyrir fyrirtæki. Bæði þau sem fyrir eru sem og ný sem setjast myndu vilja að í sveitarfélaginu. Sú fjölbreytni í atvinnumöguleikum sem nú er til staðar í umhverfi okkar er ekki sjálfgefin. Hvert fyrirtæki sem hverfur heggur stórt skarð í möguleika okkar til að vera áfram sveitarfélag sem horft er til sem fyrirmyndarsveitarfélags. Gleymum ekki því að hvert starf rennir stoðum undir rekstur annarra fyrirtækja. Ef við nýtum ekki þjónustu sem í boði er, er hætta á að ekki svari kostnaði að halda úti þjónustufyrirtækjum sem þá leggja upp laupana og þar með er komin af stað keðjuverkun sem krefst mikillar vinnu og fjármuna að snúa við, auk þess sem þjónusta við íbúana skerðist . Því er mikilvægt að styðja við þá starfsemi sem þegar er á svæðinu.
Undanfarin ár hefur margt gott verið unnið í þessum málaflokki en betur má ef duga skal. Fáir geta hugsað þá hugsum til enda ef Nýheimar hefðu ekki verið reistir. Atvinnu- og rannsóknasjóður sem sveitarfélagið kom á fót hefur stutt við frumkvöðlastarf og er gott dæmi um hvað hægt er að gera. Hann er kjörinn vettvangur til að veita nýjum hugmyndum brautargengi. Efling hans er leið til að styðja betur við ný tækifæri. Stofnfé sjóðsins 20 milljónir króna kom af söluandvirði Nesjaskóla.
Matarklasi sem hér hefur verið starfandi hefur sannað gildi sitt og sama má segja um ferðaþjónustuklasann. Innan þessara hópa hafa kviknað góðar hugmyndir og margar af þeim eru nú þegar farnar að skapa atvinnu.
Landbúnaður, sjávarútvegur og ferðaþjónusta eru grunnatvinnuvegir í sveitarfélaginu og verða það áfram. Möguleikar í afþreyingu fyrir ferðamenn tel ég að séu miklu meiri en við erum að nýta, þar sem stórbrotin náttúra á svæðinu gefur mörg tækifæri. Með því að koma á meiri samvinnu ferðaþjónustuaðila, landeigenda og fólks sem áhuga hefur á ferðatengdri atvinnustarfssemi munu hugmyndir kvikna.
Auk þess sem að ofan er talið tel ég æskilegt að koma hér upp vinnustað sem tengist ekki ofangreindum atvinnuvegum. Þetta er oft nefnt smáiðnaður en það myndi stórauka þá flóru sem úr er að velja hér á svæðinu og draga nýja þekkingu inn í samfélagið sem síðan leiðir af sér meiri fjölbreytni. Til að ýta undir að þetta geti orðið eigum við að endurskoða skipulag á iðnaðarlóðum til að geta tekið á móti slíkri starfsemi. Auk þess þarf að kortleggja það húsnæði sem til er innan sveitarfélagsins og meta til hvaða nota það gæti nýst. Fara síðan í skipulagða vinnu við að sækja fyrirtæki inn á svæðið.
Sveitarfélagið eitt og sér gerir engin kraftaverk og því er mikilvægt að samskipti og upplýsingarflæði milli fyrirtækja og sveitarfélagsins séu góð.
Björn Ingi Jónsson oddviti sjálfstæðismanna í Austur Skaftafellssýslu
