Stefnuskrá

Stefnuskrá XB 2010

Stefnuskrá Framsóknarmanna og stuðningsmanna þeirra fyrir sveitastjórnarkosningarnar 29. maí 2010.

Banner_XB_val

Velferðarmál

Fjölskyldan er mikilvægasta eining hvers samfélags. Margskonar samsetning og ólíkar þarfir kalla á sveigjanlega þjónustu í fræðslu-, heilbrigðis, íþrótta- og æskulýðsmálum.

Leiðarljós okkar er samábyrgð um velferð fjölskyldunnar í samfélagi án aðgreiningar.

Skólamál

Á Hornafirði er rekið metnaðarfullt skólastarf á öllum skólastigum, þar sem áhersla er lögð á samfellu í námi, námsárangur, vellíðan og jákvæð samskipti.

Leiðarljós okkar í skólamálum er virðing, samvinna og samkennd.

Við leggjum áherslu á að:

fylgt verði eftir þeim breytingum sem gerðar hafa verið í leik- og grunnskóla og starfsemi þeirra styrkt enn frekar
framtíðarsýn verði mótuð um list- og verkgreinahús
mörkuð verði stefna um viðhald Heppuskóla og vinna hafin
breytingum á tónskólanum verði lokið svo að húsnæðið nýtist sem best fyrir starfssemina
stefnt verði að áframhaldandi lækkun í gjaldtöku fyrir leikskóla, lengda viðveru, skólamáltíðir og íþrótta- og tómstundaiðkun barna og unglinga.

Málefni fatlaðra, heilbrigðis- og öldrunarmál

Forræði yfir heilbrigðismálum er á hendi sveitarfélagsins og góð samvinna er við aðrar heilbrigðisstofnanir. Grunnþjónusta er veitt á sviði heilbrigðis- og fötlunarmála með miklum sóma og vel er hugað að nýtingu fjármuna.

Leiðarljós okkar í heilbrigðismálum eru lífsgæði.

Við leggjum áherslu á að:

gerður verði þjónustusamningur um rekstur HSSA á grundvelli þess samnings sem unnið er eftir í dag með það markmið að viðhalda núverandi þjónustustigi
halda forræði sveitarfélagsins í málefnum fatlaðra
HSSA verði leiðandi á sviði lýðheilsu íbúa sveitarfélagsins
efla heimaþjónustu og tryggja sjálfstæða búsetu sem lengst
unnin verði stefnumótun í málefnum aldraðra
þrýst verði á framkvæmdir við fyrirhugaða viðbyggingu við hjúkrunar- og sjúkradeild
brugðist verði við þeirri þjónustuþörf sem upp kann að koma í málefnum sjúkra, aldraðra og fatlaðra.

Íþrótta- og æskulýðsmál

Forvarnagildi íþrótta og lýðheilsu er mikið. Með upptöku tómstundakorts hafamöguleikar barna og unglinga til þátttöku í íþrótta- og tómstundastarfi verið jöfnuð. Bylting hefur orðið í aðstöðu til íþróttaiðkunnar á síðustu árum s.s. með tilkomu nýrrar sundlaugar, uppbyggingar á Sindravöllum, mótokrossbrautar og reiðskemmu við Stekkhól.

Leiðarljós okkar er fjölbreytt aðstaða til íþrótta og tómstundaiðkunar fyrir alla fjölskylduna.

Við leggjum áherslu á að:

móta stefnu í æskulýðs- og tómstundamálum með eflingu í huga
efla forvarnarstarf á breiðum grunni með þátttöku íbúa
auka samstarf milli félagsmiðstöðvar, skóla, félagasamtaka og foreldra
að stuðlað verði að festu og samfellu í skipulagi skóla-, íþrótta- og tómstundastarfs
stutt verði áfram við tómstundaiðkun barna og unglinga með eflingu tómstundakorts

Atvinna og nýsköpun

Traust og ábyrg fyrirtæki sem bjóða fjölbreytt atvinnutækifæri eru hornsteinn byggðar í hverju samfélagi. Hlutverk sveitarfélagsins er að skapa aðstæður til þróunar og eflingar atvinnulífs á jafnræðisgrunni. Slíkt hefur verið gert m.a. með stuðningi við stofnanir, samstarfs- og frumkvöðlaverkefni, með stofnun Atvinnu- og rannsóknarsjóðs

Leiðarljós okkar er fjölbreytt atvinnutækifæri fyrir ólíka einstaklinga á öllum aldri í sjálfbæru samfélagi.

Við leggjum áherslu á að:

vinna áfram að þróunar- og samstarfsverkefnum sem ýtt hefur verið úr vör s.s. í ferðaþjónustu, smáframleiðslu matvæla, skapandi greinum og fleiri sviðum atvinnulífsins
halda áfram rannsóknarvinnu í samstarfi við Siglingastofnun og Verkís á sviði orkuöflunnar
halda áfram rannsóknum á jarðhita og hagnýtingu hans
áframhaldandi vinnu við undirbúning vatnsútflutnings í samstarfi við Rolf Johansen hf
endurmeta stuðning við ferðaþjónustuna og samþætta starfsemi Upplýsingamiðstöðvar
vinna heildstæða markaðs og kynningaráætlun fyrir sveitarfélagið
einstaklingar fyrirtæki og stofnanir verði hvött til þess að flytja hingað starfssemi sína eða hluta hennar eða stofna til nýrra
áframhaldandi vinnu við þróun og hagnýtingu tækifæra samfara stofnun Vatnajökulsþjóðgarðs
unnið verði markvisst að flutningi stöðu framkvæmdastjóra Vatnajökulsþjóðgarðs heim í hérað
efnt verði til átaksverkefna fyrir atvinnuleitendur í samstarfi við Vinnumálastofnun
að framtíð Atvinnu- og rannsóknasjóðs metin með hliðsjón af árangri

Hafnarmál

Höfnin er lífæð sjávarútvegsins, eins af grunnatvinnuvegum sveitarfélagsins. Rekstur hafnarinnar stendur styrkum fótum. Jafnt og þétt hefur verið unnið að viðhaldi og endurbótum hafnarmannvirkja og rannsóknum á innsiglingu. Hafin er markaðssetning hafnarinnar með móttöku farþegaskipa í huga.

Leiðarljós okkar er framsækin höfn í þágu atvinnulífs.

Við leggjum áherslu á að:

rannsóknarvinnu á Grynnslum haldið áfram í samstarfi við Siglingastofnun með það að markmiði að auka dýpi og siglingaöryggi
áfram verði fylgst grannt með dýpi innan hafnarinnar svo umferð sé ávallt hindrunarlaus
halda áfram lagfæringu á umhverfi hafnarinnar

Skipulags- og umhverfismál

Skipulagsmál

Aðalskipulag er skipulagsáætlun sveitarstjórnar þar sem kemur fram stefna um landnotkun, samgöngu- og þjónustukerfi, umhverfismál og þróun byggðar og aðgengis að þjónustu í sveitarfélaginu, án þess að ganga á rétt komandi kynslóða. Með kortlagningu náttúruauðlinda m.a. samhliða gerð verndaráætlunar fyrir Vatnajökulsþjóðgarð hefur verið lagður grunnur að skynsamlegri nýtingu náttúruauðlinda.

Leiðarljós okkar er virðing fyrir stórbrotinni náttúru, starfi genginna kynslóða og að skapa svigrúm fyrir fjölbreytta búsetu og framsækna atvinnusköpun.

Við leggjum áherslu á að:

ljúka vinnu við endurskoðun á aðalskipulagi með þátttöku íbúa
Höfn haldi sérstöðu sinni hvað varðar landslag, víkur og flóa
forgangsmál er að breyta legu þjóðvegar í þéttbýli og færa af Hafnar- og Víkurbraut
stemma stigu við hraðakstri í þéttbýli
framkvæmdir við nýjan kirkjugarð við Réttarkletta verði hafnar á árinu 2011
varðveita sérstakt landslag og ræktunarland í sveitarfélaginu
landeigendur vinni deiliskipulag vegna mannvirkjagerðar og byggingarframkvæmda
staðið verði við gefin loforð varðandi framkvæmdir við Hornafjarðarfljót og þær hefjist svo fljótt sem unnt er
unnið verði að nauðsynlegum undirbúningi vegna gerðar jarðganga undir Lónsheiði og þrýst á um framkvæmdir
þrýst verði á framkvæmdir við fækkun einbreiðra brúa í sveitarfélaginu
vinnu við girðingar meðfram þjóðvegi 1 verði haldið áfram í samstarfi við Vegagerðina
hjóla- og gönguleiðir ásamt reiðvegum verði hafðar í huga við skipulagsgerð
allir íbúar í dreifbýli eigi kost á háhraðatengingum á jafnræðisgrunni
grannt verði fylgst með landbroti af völdum sjávar og jökulvatna

Umhverfismál

Með markvissri fræðslu um verðmæti óspilltrar náttúru, umgengni um náttúruauðlindir og nýtingu þeirra, ásamt úrbótum í móttöku á hvers konar úrgangi, hefur verið stuðlað að vitundarvakningu meðal íbúa og fyrirtækja. Ferðaþjónusta, landbúnaður og sjávarútvegur byggja tilvist sína öðru fremur á hreinu og ómenguðu umhverfi. Fjölbreyttir möguleikar til útivistar, jafnt í þéttbýli sem dreifbýli, auka á lífsgæði.

Leiðarljós okkar er skynsamleg nýting náttúruauðlinda, hreint og ómengað umhverfi með fjölbreyttum möguleikum til útivistar fyrir alla. Í umhverfismálum bera allir ábyrgð.

Við leggjum áherslu á að:

unnin verði umhverfisstefna fyrir sveitarfélagið og stofnanir þess
haldið verði áfram útfærslu á frekari flokkun og móttöku á endurvinnanlegum úrgangi
haldið verði áfram fyrirhuguðum framkvæmdum við fráveitu á Höfn og fyrir Nesjahverfi
opnum svæðum og fasteignum í eigu sveitarfélagsins verði sýndur sómi með gróðursetningu, betri umhirðu, viðhaldi og uppsetningu leiktækja
áfram verði unnið að lagfæringu og gerð áningarstaða og gönguleiða í sveitarfélaginu
gerð verði áætlun um viðhald og lagfæringu gangstétta í þéttbýli með aðgengi fyrir alla í huga
opinbera hreinsunardaga í sveitafélaginu
ljúka vinnu við endurskoðun deiliskipulags við Tjarnarlund, svæðisins sunnan sundlaugar, það tengt íþróttasvæði og gert aðlaðandi með bekkjum, leiktækjum og gróðri

Stjórnun og fjármál

Traust og örugg fjármálastjórnun er forsenda framkvæmda. Sveitarfélagið Hornafjörður er kraftmikið, velrekið sveitarfélag. Virðing er borin fyrir vinnu starfsmanna og athöfnum íbúa. Greining tækifæra, stefmótun með þátttöku starfsmanna og íbúa og markviss miðlun upplýsinga eykur á trúverðugleika og skipar sveitarfélaginu í hóp framsækinna sveitarfélaga sem eru eftirsótt til búsetu og lífsgæði eru mikil.

Leiðarljós okkar er traust og örugg fjármálastjórn, hagsýni og ráðdeild

Við leggjum áherslu á að:

Hjalti Þór Vignisson, núverandi bæjarstjóri verði ráðinn bæjarstjóri næsta kjörtímabil
verja eins og kostur er hag fjölskyldna og fyrirtækja í gegnum þrengingar í efnahagslífi Íslands
áfram verði stuðst við rammaáætlanir við rekstur sveitarfélagsins
skipting skatttekna milli ríkis og sveitarfélaga verði í stöðugri endurskoðun
að unnið verði að flutningi vænlegra verkefna frá ríki heim í hérað og nægt fjármagn fylgi með
að unnið sé markvisst eftir innkaupareglum sveitarfélagsins

Framkvæmdir og eignir

Stýringu framkvæmda sveitarfélagsins þarf að haga með þeim hætti að ekki ríki stöðnun á vinnumarkaði. Íbúðir og aðrar fasteignir í eigu sveitarfélagsins taki mið af þörfum hverju sinni.

Leiðarljós okkar er að ásýnd eigna sveitarfélagsins verði til sóma og öðrum til eftirbreytni

Við leggjum áherslu á að:

undirbúningur verklegra framkvæmda sé vandaður
að viðhaldsáætlanir verði uppfærðar reglulega og unnið samkvæmt þeim
skoðað verði hvernig auka megi framboð á íbúðarhúsnæði á frjálsum leigumarkaði
kannaðir verði kostir þess að ráðast í tengibyggingu milli íþróttahúss og sundlaugar
haldið verði áfram sölu eigna ef hagkvæmt þykir

Menningar og tómstundamál

Mikill auður er fólginn í öflugu starfi félagasamtaka og einstaklinga á sviði menningar og lista. Menningarmiðstöð Hornafjarðar er þjónustustofnun, sem m.a. í samstarfi við einstaklinga, atvinnulíf og félagasamtök varðveitir menningararf og stuðlar að fjölbreyttu lista og tómstundalífi og gerir aðgengilegt fyrir íbúa og gesti.

Leiðarljós okkar er öflugt og skapandi menningarstarf og fjölbreytt úrval viðburða fyrir alla aldurshópa, sem gefur ólíkum einstaklingum tækifæri til samvistar, vaxtar og þroska

Við leggjum áherslu á að:

efla lista- og tómstundastarf ungs fólks
efla menningartengsl við erlenda íbúa sveitarfélagsins
Svavarssafn, Listasafn Hornafjarðar verði opnað í nýjum sýningarsal árið 2011
vinna að framgangi hugmyndar um “Hafnarvík – Heppu” í samstarfi við einkaaðila
Eldsmiðjan; Menningar- og hagleikssetur á Mýrum verði að veruleika í samvinnu við íbúa
Varðveita og skrá þá þekkingu, sem safnað hefur að undanförnu með varanlegum hætti