Fjárhagsáætlun 2004 | Helstu atriði og tölur

Fjárhagsáætlun Sveitarfélagsins Hornafjarðar fyrir árið 2004 var samþykkt í bæjarstjórn 19. desember sl.

Heildarvelta sveitarfélagsins og fyrirtækja þess er áætluð um 1,5 milljarður árið 2004 og skiptist þannig:

   
Helstu tölulegar stærðir bæjarsjóðs eru þessar:

Fræðslumálin eru lang stærsti málaflokkurinn eins og hér sést og tekur til sín 58% af skatttekjunum. Launakostnaður er afgerandi útgjaldaþáttur hjá stofnunum sveitarfélagsins (A-sjóði), eða um 65,5% af skatttekjum.

Miklar framkvæmdir undangenginna ára svo og aukinn rekstrarkostnaður vegna þeirra dregur úr framkvæmdagetu á meðan skuldir eru lækkaðar. Áætlað er að skuldir bæjarsjóðs lækki um 15 mkr. milli ára.

Þrátt fyrir lítið svigrúm er gert ráð fyrir að framkvæma fyrir hátt í 200 mkr. Þar af eru 51 mkr. framkvæmdir fjármagnaðar af bæjarsjóði og rúmlega 140 mkr. af hafnarsjóði. Hafnarsjóður fær um 90 mkr. endurgreiddar frá ríkissjóði og til að fjármagna hlut hafnarsjóðs, sem ekki fæst frá framlegð, er áætlað að taka 40 mkr. lán.

Áætlað er að hefja framkvæmdir við fyrsta áfanga í fráveitumálum. Til þess verkefnis verður varið 37.5 mkr. en heildarkostnaður við að koma fráveitumálum í gott horf er áætlaður yfir 200 mkr. Í þessum fyrsta áfanga á að sameina allar útrásir á vesturströnd bæjarins í eina, suður af Leiðarhöfða. Með þessari framkvæmd næst að létta á mengaðasta svæðinu vegna fráveitunnar.

Helstu verkefnin hafnarsjóðs eru endurbygging Krosseyjarbakka fyrir 76,4 mkr. (nýtt stálþil, þekjan verður steypt 2005) og dýpkun á Grynnslunum fyrir utan Ósinn með fjárveitingu uppá 56,9 mkr.

Heilbrigðisstofnun Suðausturlands starfar nú samkvæmt þjónustusamningi sem var gerður í framhaldi af reynsluverkefninu. Allir hafa verið sammála um jákvæðan árangur af reynsluverkefninu. Það er þó ekkert launungarmál að breyttar forsendur hafa veikt grundvöll núverandi samnings. Í framhaldi af því hefur sveitarstjórn óskað eftir endurskoðun samningsins eins og ákvæði í honum gera ráð fyrir.

Eins og að framan greinir eru launagreiðslur hátt hlutfall af útgjöldum sveitarfélagsins eða yfir 700 mkr. Heimild er fyrir 195 stöðugildum hjá öllum stofnunum sveitarfélagsins en um 290 manns eru á launaskrá. Um helmingur þeirra er vegna fræðslumála, tæplega 100 stöðugildi, vegna heilbrigðisstofnunarinnar eru 56 stöðugildi og rúmlega 50 stöðugildi vegna annarra málaflokka. Við þetta bætist vinnuskólinn yfir sumartímann með allt að rúmlega 100 starfsmönnum.

Eins og sést á þessu yfirliti er starfsemi sveitarfélagsins umfangsmikil og hefur aukist mjög á seinni árum þ.m.t. stjórnsýslan. Vegur þar þyngst sameining sýslunnar í eitt sveitarfélag og flutningur grunnskólans til sveitarfélaganna. Sömuleiðis þjónustusamningar við ríkið um heilbrigðis- og öldrunarmál og málefni fatlaðra sem önnur sveitarfélög eru ekki almennt með á sinni könnu.

Vegna þessarar þróunar er mikilvægt að bæjarstjórn og starfsfólk sveitarfélagsins nýti fjármagn vel án þess að þjónusta við íbúana skerðist og er það markmið fjárhagsáætlunar fyrir þetta ár.

Albert Eymundsson,
bæjarstjóri