Fundargerð Bæjarstjórnar 68

68. fundur

Fundur haldinn í Bæjarstjórn Hornafjarðar, fimmtudaginn 4. desember 2003, kl. 16:00 í Ekru.
Mætt voru: Halldóra B. Jónsdóttir, Björn E. Traustason, Einar Karlsson, Elín Magnúsdóttir, Reynir Arnarson, Ólafur Sigurðsson og Kristín Gestsdóttir. Einnig Albert Eymundsson, Ásta H. Guðmundsdóttir, Helgi Már Pálsson, Stefán Ólafsson og Inga Jóna Halldórsdóttir,

Glærukynning Bæjarstjórnarfundar 4.des.2003 

Gengið var til dagskrár.

1. Fundargerðir
Bæjarráð Hornafjarðar 228. fundur fimmtudaginn 30. október 2003
• Heilbrigðisnefnd Austurlands 40. fundur 29. september 2003 til kynningar.
• Ársreikningur Haust 2002- sendur út í tölvupósti.
Halldóra spurði um eignaskiptasamning sem er í vinnslu fyrir Nýheima. Bæjarstjóri sagði samninginn í kynningu hjá öðrum eignaraðilum hússins og vonast væri til að hægt verði að ganga frá honum fljótlega.
Fundargerð samþykkt.
Bæjarráð Hornafjarðar 229. fundur fimmtudaginn 13. nóvember 2003
• Félagsmálaráð Hornafjarðar 100. fundur 4. nóvember 2003.
• Húsnæðisnefnd Hornafjarðar 54. fundur 29. október 2003.
• Heilbrigðisnefnd Austurlands aðalfundur fundur 30. október 2003 ásamt skýrslu stjórnar til kynningar.
• Samband ísl. sveitarfélaga 707. stjórnarfundur 17. október 2003 til kynningar.
Fundargerð samþykkt.
Bæjarráð Hornafjarðar 230. fundur fimmtudaginn 20.nóvember 2003
• Umhverfisnefnd Hornafjarðar 39. fundur 10.nóvember 2003.
Fundargerð samþykkt.
Bæjarráð Hornafjarðar 231. fundur fimmtudaginn 27. nóvember 2003.
• Skólanefnd Hornafjarðar 55. fundur 19. nóvember 2003.
Fundargerð samþykkt.


Bæjarstjórn Hornafjarðar 67. fundur fimmtudaginn 30. október 2003, áður samþykkt.


2. Fjárhagsáætlun 2004 – fyrri umræða

Bæjarstjóri fylgdi áætlanagerðinni úr hlaði með eftirfarandi greinargerð :

Sveitarfélagið Hornafjörður
FJÁRHAGSÁÆTLUN 2004
Bæjarsjóður Hornafjarðar
Vatnsveita
Húsnæðismál
Hornafjarðarhöfn

I. INNGANGUR

Fjárhagsáætlun bæjarsjóðs Hornafjarðar fyrir árið 2004 er hér tekin fyrir til fyrri umræðu. Þetta er í annað sinn sem fjárhagsáætlun er unnin samkvæmt nýjum lögum og reglum um bókhald og reikningsskil sveitarfélaga sem tóku gildi í ársbyrjun 2002.

Með fjárhagsáætlun bæjarsjóðs A-hluta fylgja fjárhagsáætlanir fyrir B-hluta fyrirtæki þ.e. hafnarsjóðs, vatnsveitu og félagslega húsnæðiskerfið. Fjárhagsáætlun Heilbrigðisstofnunar Suðausturlands verður tekin fyrir síðar og afgreiðslu verður lokið fyrir tilsettan tíma en stofnunin er sér fyrirtæki vegna þjónustusamnings um reksturinn.

Samkvæmt lögum eiga að fara fram tvær umræður um fjárhagsáætlun í bæjarstjórn með minnst viku millibili. Seinni umræðan verður á bæjarstjórnarfundi 18. desember nk. Rétt er að taka fram að samkvæmt sveitarstjórnarlögum þarf að ljúka fjárhagsáætlunargerð fyrir janúarlok.

Á þessu ári hafa áætlanir um staðgreiðslu útsvars ekki staðist og tekjur dregist saman. Ekki hefur verið gerð nákvæm úttekt á ástæðum þess en þessi staðreynd gerir það að verkum að í áætlun næsta árs er gert ráð fyrir lægri tekjum en væntingar stóðu til. Þetta leiðir óhjákvæmilega til samdráttar í rekstri og framkvæmdum. Við undirbúning fjárhagsáætlunar hefur verið samstaða um að draga ekki úr almennri þjónustu. Samdráttur í tekjum mun fyrst og fremst koma niður á framkvæmdum og stofnbúnaði sem hægt er að fresta um ár eða lengur.

Heildarvelta bæjarsjóðs og stofnana sveitarfélagsins er um 1,2 milljarður króna sem sýnir mikið umfang og mikla starfsemi. Áætlanirnar hafa fengið umfjöllun í bæjarráði svo og viðeigandi nefndum.
Mest af tekjum og útgjöldum sveitarfélagsins fara í lögboðin verkefni. Umfangsmesti og útgjaldafrekasti málaflokkurinn er fræðslu- og uppeldismál sem tekur til sín 58,01% af skatttekjum. Launakostnaður er afgerandi eða um 65,5% af skatttekjum.

Eðlilegt er að skiptar skoðanir og mismunandi áherslur komi fram um skiptingu þess fjármagns sem raunverulega er til ráðstöfunar.

Það á engum að blandast hugur um að ekki er auðvelt að velja og hafna þegar ekki er hægt að framkvæma allt sem nauðsynlegt er né verða við öllum óskum.

Helstu niðurstöður í áætluninni eru í samanteknum upphæðum:
• Skatttekjur 706,7 mkr
• Rekstargjöld, fjármagnsgjöld og afskriftir fastafjármuna 714,2 mkr
• Rekstrarhalli 7,5 mkr
• Afskriftir fastafjármuna 46,0 mkr
• Reiknaðar lífeyrisskuldbindingar 16,0 mkr
• Framkvæmdir 51,0 mkr (þar af 37,5 mkr vegna fráveitumála)
• Afborganir langtímalána 109,2 mkr
• Lækkun langtímaskulda milli ára 10,0 mkr

Vegna mikilla fjárfestinga á mörgum sviðum undanfarin ár hefur rekstrar- og fjármagnskostnaður aukist verulega sem hefur áhrif til framtíðar. Á þetta við um Menningarmistöðina (Nýheima), leikskólana (Krakkakot), grunnskólana (ný handmenntaaðstaða), slökkviliðið (húsnæði og bílar) o.fl. Allt eru þetta mikilvæg verkefni sem áríðandi er að standa vel að. ccc

Fjárhagsáætlunin er unnin sem rammaáætlun en flest stærri sveitarfélög á landinu hafa á síðustu árum tekið upp þetta vinnulag. Rammaáætlun er unnin á þann hátt að fjárveitingar til einstakra málaflokka eru ákveðnar í upphafi. Upphæðunum er því næst skipt niður á einstakar deildir, en forstöðumenn deilda gera síðan tillögur um skiptingu á einstaka bókhaldsliði.

Almennar rekstrarstærðir í stofnunum okkar eru vel þekktar og ef í ljós koma frávik frá þeim fer það ekki framhjá starfsfólki. Eftir sem áður er mikilvægt að halda vöku sinni og það er skylda allra að sýna ráðdeildarsemi og aðhald í rekstri sveitarfélagsins.

Þegar rætt er um fjárhagsáætlun sveitarfélagsins og stofnana þess er hollt að leiða hugann að hlutverki sveitarfélaga sem og eðli verkefna og starfsemi þeirra almennt. Í langflestum tilfellum er um lögbundna þjónustu að ræða og samningsbundin útgjöld þar sem launagreiðslur vega þungt vegna eðli starfseminnar. Af þeirri ástæðu eru ekki miklir möguleikar á stórfelldum breytingum eða miklum tilfærslum nema með uppsögnum starfsfólks og skertri þjónustu.

Þegar öllu er á botninn hvolft er mikilvægast er að ná „ásættanlegu“ jafnvægi á milli tekna og útgjalda. Um leið verður að tryggja áfram góða þjónustu og taka tillit til mismunandi þarfa og ólíkra væntinga íbúa sveitarfélagsins. Flestir eru sjálfum sér næstir þegar kemur að umræðu um þessi mál og finnst ekki nóg að gert í málaflokkum sem þeir tengjast eða hafa áhuga á.

II. FJÁRHAGSÁÆTLUN 2004

Áætlunin gerir ráð fyrir að skatttekjur aukist um 5%.

Við fjárhagsáætlunargerð þarf að ná samræmi á milli útgjalda - tekna - og lántöku. Ef sveitarfélagið nýtti sér að fullu heimildir tekjustofnalaga væri auðveldara að ná endum saman. Flestir eru sammála um að fara milliveg og það er gert að þessu sinni. Það koma upp atvik þar sem erfitt er að meta aðstæður og við teljum okkur tæpast hafa efni á að framkvæma hluti en um leið gerir maður sér grein fyrir að við höfum ekki frekar efni á að standa aðgerðalaus og bíða framvindunnar. Þetta þekkið þið sveitarstjórnarfólkið vel af reynslunni.
Tekjustofnar 2004
Álagningarreglur og gjaldskrár:
Útsvar 13,03%
Fasteignaskattur
íbúðarhúsnæði 0,50%
atvinnuhúsnæði 1,62%

Lóðarleiga
íbúðarlóðir (kr/m2) 3,50
iðnaðarlóðir (kr/m2) 7,00
aðrar lóðir (kr/m2) 10,50

Holræsagjald 0,30%
Vatnsgjald 0,18%

Sorphreinsigjald (kr/ein 10.500
Sorpurðunargjald (kr/ein) 5.200

Hundaleyfisgjald 7.000

Leikskólagjald frá 1.1 2004 17.616 m.v. 8 tíma vistun

Tónskólagjöld frá 1.9 2004 19.118 m.v. önn


Skatttekjur og velta
Skatttekjur bæjarsjóðs eru áætlaðar alls. 706,7 mkr. Skatttekjurnar eru aðeins hluti af rekstrartekjum sveitarfélagsins. Heildarvelta sveitarfélagsins og tengdra fyrirtækja er um 1,2 milljarður kr. Aðrar tekjur, um 500,0 mkr, eru sértekjur sem færast á málaflokka, s.s. holræsa- og sorpgjöld, tekjur olíumalarstöðvar o.s.frv. að viðbættum tekjum:
Hafnarsjóðs 81,2 mkr
Vatnsveitu 19,0 mkr
Leiguíbúða 19,6 mkr

Útsvarstekjur 2004
Útsvar er áætlað samtals 438 mkr sem er 61,97 % af skatttekjum.

Fasteignaskattar
Reiknað er með að fasteignaskattur og lóðarleiga verði um 94,2 m.kr. (13,32% af skatttekjum) að teknu tilliti til lækkana til aldraðra og staðgreiðsluafsláttar. Í þessari tölu hefur ekki verið tekið tillit til hækkunar á fasteignamati. Í þessu sambandi má geta þess að af heildarmati fasteigna vegur íbúðahúsnæði u.þ.b. 75% en atvinnuhúsnæði 25%.
Álagning fasteignaskatta sveitarfélagsins er nálægt landsmeðaltali en fullnýting leyfilegra tekjustofna gæfu bæjarsjóði auknar tekjur sem nema talsverðum upphæðum. Með þessu hefur sveitarstjórn viljað koma til móts við fólk sem vill byggja og búa í eigin húsnæði og ekki síður að íþyngja ekki fyrirtækjum sem búa við mismunandi aðstæður hvað húsnæðisþörf varðar. Eftir sem áður verður sveitarstjórnarfólk alltaf að gera það upp við sig hvort nýta eigi markaða tekjustofna eða greiða minna af skuldum og jafnvel draga úr þjónustu eins og ég hef vikið að áður.

Jöfnunarsjóður sveitarfélaga
Reiknað er með 174,3 mkr. (24,66% af skatttekjum) tekjum úr Jöfnunarsjóði sveitarfélaga á næsta ári. Framlög Jöfnunarsjóðs eru fyrst og fremst þessi:
Útgjaldaframlög eru ætluð til að mæta kostnaði við ýmsa þjónustu, s.s. öldrunarþjónustu, leikskóla, skólaakstur o.s.frv. Þau eru tengd íbúafjölda og íbúasamsetningu.
Tekjujöfnunarframlög koma til ef tekjur í sveitarfélaginu eru lægri en meðaltekjur í landinu.
Grunnskólaframlög eru tengd fjölda skólabarna, stærð skóla og fjölda þeirra.
Jöfnunarsjóður greiðir einnig framlag vegna greiðslu á húsaleigubótum.

Lóðarleiga
Lóðarleiga er áætluð rúmlega 4 mkr á næsta ári. Þessi liður hefur lengi verið óbreyttur. Ástæðan er sú að það er nokkuð flókið mál að gera breytingar þar sem í gildi eru ólíkir samningar frá ýmsum tímum. Gert er ráð fyrir að gerðir verðið nýir og samræmdir lóðarleigusamningar á næsta ári og er unnið að því af fullum krafti.

Þjónustugjöld
Holræsa-, vatns-, sorpurðunar- og sorphirðugjöld eru öll tekjufærð sem þjónustugjöld í viðkomandi málaflokkum, en ekki sem almennar skatttekjur.

Málaflokkar

Félagsmál
Félagsþjónustan á að kosta 42,0 mkr. (5,95% af skatttekjum) á næsta ári, en til þessa málaflokks teljast meðal annars: heimilishjálp, félagsráðgjöf, þjónusta við fatlaða, fjárhagsaðstoð, húsnæðismál, húsaleigubætur, framlag í varasjóð viðbótalána o.fl. Einnig er hér færður þjónustusamningur um málefni fatlaðra.

Fræðslumál
Fræðslu- og uppeldismálin eru sem fyrr langstærsti málaflokkur í rekstri sveitarfélagsins. Málaflokkurinn mun kosta um 409,9 mkr (58,01% af skatttekjum). Þess má geta að næsti málaflokkur er innan við 15% af skatttekjum sem sýnir vel hátt hlutfall fræðslumálanna. Undir þennan málaflokk heyra einnig leikskólar. Gert er ráð fyrir 5% hækkun leikskólagjalda frá og með 1. janúar nk. Leikskólagjöld hafa um alllangt skeið verið miðuð við að tekjur standi undir 40% útgjalda en nú dekka leikskólagjöld um 25% af rekstrarkostnaði. Ég hygg að við þurfum að venja okkur við þá staðreynd að þróun í leikskólamálum verður með sama hætti og í grunnskólum. Þá á ég við að viðvera hvers nemenda lengist og leikskólarnir verða meira og minna einsetnir eftir nokkur ár. Það segir sig sjálft að slík þróun mun kalla á aukin útgjöld sveitarsjóðs og hugsanlega foreldra einnig.
Gert er ráð fyrir að hætta rekstri leikskólans Óla Priks um mitt næsta ár.

Menningarmál
Menningarmál kosta 33,2 mkr. (4,70% af skatttekjum) á næsta ári. Hér er fyrst og fremst um starfsemi Menningarmiðstöðvarinnar að ræða sem fær 28,7 mkr Menningarmiðstöðin aflar sjálf yfir 11 mkr með styrkjum og sölu.

Æskulýðs- og íþróttamál
Málaflokkurinn tekur til sín um 52,6 mkr (7,45% af skatttekjum) þar af eru styrkir til æskulýðs- og íþróttamála 11,9 mkr

Brunamál og almannavarnir
Málaflokkurinn kostar alls um 11,2 mkr Brunavarnafélag A-Skaft. fær 9,3 mkr og 1,9 mkr fara til almannavarna og öryggisgæslu.

Hreinlætismál
Málaflokkurinn, aðallega sorphirða og sorpurðun kostar 27 mkr á næsta ári, en tekjur eru um 19 mkr Enn er langt í land með að málaflokkurinn standi undir sér. Hlutfall neytenda í heildarkostnaði er 30% en var 34% á síðasta ári.

Skipulags- og byggingarmál
Áætlunin gerir ráð fyrir 12,7 mkr í þennan málaflokk. Þyngst vegur rekstur tæknideildar.

Götur, vegir og umferðarmál
Tekjur vegna gatnagerðar og holræsagjalda eru áætlaðar 22,8 mkr. Kostnaður vegna viðhalds og reksturs gatna, holræsa og gangstétta er áætlaður tæpar 11,2 mkr. Gert er ráð fyrir að rafmagnskostnaður við götulýsingu verði 5,9 mkr og að snjómokstur og hálkueyðing kosti 2,0 mkr Endurbætur á Hafnarbraut eru áætlaðar 5,0 mkr.

Almenningsgarðar og útivistarsvæði
Kostnaður er áætlaður 12,8 mkr sem fyrst og fremst er varið í viðhald og endurbætur opinna svæða, s.s. slátt, hreinsun og snyrtingu. Vinnuskólinn sér um stóran hluta þessara verkefna. Hækkun á þessum málaflokk er vegna aukinnar eftirspurnar eftir störfum í vinnuskólanum.

Útgjöld vegna atvinnumála
Kostnaður er áætlaður 17,8 mkr. Þessi kostnaður er vegna reiknaðrar húsaleigu í Nýheimum, samnings um rekstur Háskólaseturs í Nýheimum, rekstur Frumkvöðlaseturs Austurlands, veiðilauna og framlags til Atvinnuþróunarsjóðs Austurlands.

Sameiginlegur kostnaður
Sameiginlegur kostnaður er áætlaður 97,6 mkr sem er 13,81% af skatttekjum. Stærstu útgjöld eru vegna yfirstjórnar, skrifstofu, reiknaðra lífeyrisskuldbindinga 13 mkr, í ár er fært á launabreytingareikning 20 mkr. vegna nýrra kjarasamninga á næsta ári, á óráðstafað er fært 4,2 mkr og 4 mkr vegna stofnbúðar sem enn á eftir að deila út til deilda.

Fjármagnskostnaður og afborganir langtímalána
Fjármagnskostnaður er áætlaður 49,1 mkr sem er 6,95% af skatttekjum og afborganir lána 109,2 mkr sem er um 15,45% hlutfall af skatttekjum.

Eignasjóður
Gert er ráð fyrir að rekstur á fasteignum sé um 52,0 mkr og eru 17,0 mkr vegna meiriháttar viðhalds. Reiknuð húsaleiga á málaflokka er 119,1 mkr og afskriftir 44,1 mkr.

Þjónustustöð
Undir rekstur þjónustustöðvar færist áhaldahús, vélamiðstöð og olíumalarstöð og er kostnaður áætlaður 11,5 mkr.

Samanburður
Eðlilegt er að kostnaður sveitarfélaga með sambærilegan rekstur sé borinn saman. Varhugavert er þó að meðtaka þennan samanburð athugasemdalaust því misjafnar forsendur geta legið að baki talnanna. Samt sem áður er hollt að viðhafa naflaskoðun reglulega,enda er það gert.

III. FRAMKVÆMDIR OG FJÁRFESTINGAR

Rekstrarafgangi 44,3 mkr ásamt lántökum er í meginatriðum varið með eftirfarandi hætti:
Stofnbúnaður 8,6 mkr þar af í rekstrarramma 4,6 mkr vegna tölvusamninga.
Framkvæmdir 51,0 mkr (gerð sérstök skil síðar)
Samtals kosta verkefnin 59,6 mkr.

Styrkir
Styrkir til ýmissa félaga og samtaka hafa alla tíð verið töluverðir hjá sveitarfélaginu en óskir og þarfir eru miklu meiri en unnt er að mæta. Að þessu sinni er 14,1 mkr. ráðstafað í styrki og hafa þeir verið færðir í rekstrarramma.
Gert er ráð fyrir að styrkjunum sé skipt þannig niður í meginatriðum:
Til æskulýðs- og tómstundamála 11,9 mkr.
Til menningarmála 1,3 mkr.
Ýmsir styrkir 900 þ.kr.
Auglýst er eftir umsóknum um styrkveitingar og er gert ráð fyrir að viðkomandi nefndir og ráð geri tillögur um frekari skiptingu fjárins.
Auk þessara styrkja er gert ráð fyrir framlögum vegna Stígamóta, Kvennaathvarfs, Orlofssjóðs húsmæðra o.fl. í rekstrarramma.

Framkvæmdir og fjárfestingar
Samtals eru fjárfestingar 51,0 mkr.

Fráveitumál
Bæjarráð hefur tekið ákvörðun um að halda áfram undirbúningsvinnu vegna hreinsimannvirkis og útrása fráveitunnar. Næsta skref er að keyra svokallað mengunarlíkan með straumlíkani verkfræðistofunnar Vatnaskila til að fullgera frumhönnunarskýrslu. Skýrslan er undirstaða þess að framkvæmdir teljist styrkhæfar að kröfu Fráveitunefndar ríkisins. Síðan tekur við hönnun fráveitukerfisins en sú hönnun verður væntanlega í höndum verkfræðistofunnar Línuhönnunar. Fyrsti áfangi vesturhlutans, þ.e. svæðið frá Silfurbraut að Sandbakka verður tekið saman í eitt sniðræsi sem með dælingum verður komið í núverandi lögn í Sandbakkaveg og hleypt út í endurbætta útrás við Leiðarhöfðann. Kostnaður við þennan hluta er áætlaður um 37 mkr.
Heildarupphæð er áætluð um 200 mkr en var áður áætlað allt að kr. 300 - 400 mkr.

Sorphreinsun, sorpurðun, endurvinnsla , endurnýting
Áfram þarf að gera ráð fyrir fjármagni til að mæta samþykktum reglum Úrvinnslusjóðs um endurvinnslu og endurnýtingu, en á þesssu ári gengu í gildi reglur um söfnun og meðhöndlun á fernum og dekkjum og í kjölfarið fylgja síðan svipuð ákvæði um meðhöndlun á plastefnum og næloni og umbúðum s.s. pappír og pappa.
Byggt verður skýli yfir kurlarann á þessu ári þannig að auðveldara verður að kurla pappír, pappa og timbur á öllum árstímum. Kurlaður pappír og timbur verður notað í jarðvegsþekju í Fjárhúsavík þar sem áfram verður haldið með tilraunir í moltugerð og meðhöndlun á óvirkum úrgangi. Kannaðir verða möguleikar á að safna saman landbúnaðarplasti í dreifbýli, en skemmst er að minnast stórátaks í söfnun brotajárns þar og í þéttbýlinu, en alls var yfir þúsund tonn að ræða.
Áfram þarf að taka nýjar gryfjur fyrir sorp á urðunarsvæðinu og vinna að ýmsum úrbótum, m.a. eftirliti svæðisins og mengunar- og gasmælingum.

Endurbætur á götum og gangstéttum
Haldið verður áfram við að endurbæta Hafnarbrautina og uppi eru hugmyndir um útlitsbreytingu á aðalgötunni sem koma til með að breyta ásýnd hennar talsvert. Væntanlega verður olíumöl sett á götuna eða byrjað á fyrsta áfanga á endurbótum sem myndu ná frá Litlubrú og norður fyrir húsnæði Sýslumannsembættis
Einnig verður áfram unnið að endurbótum á slitlagi á götum og lélegar gangstéttir endurnýjaðar, en á síðustu árum hefur verið unnið markvisst að þessum málum.

Opin svæði.
Auk hefðbundinna verka bæði í þéttbýli og dreifbýli verður fyllt í tvo skuði innan bæjarmarkanna á Höfn, en það eru skurðir á Leirusvæðinu og sunnan við tjaldstæðið.


IV. FJÁRMAGNSYFIRLIT
Helstu niðurstöður í fjármálayfirliti eru að skatttekjur, að frádregnum vöxtum af veltufé, skila afgangi upp á 44,2 mkr. Greiðslubyrði lána er um 145 mkr. Fjárfestingar eru samtals 55 mkr og greiðsluafkoman því neikvæð um 155,7 mkr. Þegar tekið er tillit til annarra liða sem áhrif hafa á veltufé s.s afskriftir fastafjármuna og reiknaðra lífeyrisskuldbindinga samtals 62 mkr verður niðurstaðan neikvæð um 93,6 mkr. Tekið var 100 mkr lán 2003 vegna hagstæðra vaxta til að mæta halla fjárhagsáætlunar 2004. Gert er ráð fyrir því í þessari fjárhagsáætlun að langtímalán verði greidd niður um 10 mkr.

V. HORNAFJARÐARHÖFN
Samkvæmt áætlun sem fjallað hefur verið um í hafnarstjórn eru rekstrartekjur samtals 81,1 mkr. og rekstrargjöld 64,6 mkr. Rekstrarafgangur til framkvæmda er 16,6 mkr. Stærstu rekstrarþættir hafnarinnar eru:
Sameiginlegur kostnaður um 17 mkr.
Björn lóðs 4 mkr.
Dýpkunarpramminn Soffía, gert er ráð fyrir að tekjur af dælingu verði 8,6 mkr og að þær dugi fyrir rekstri.
Hafnarvogin 3 mkr.

Samkvæmt áætlun eru fyrirhugaðar miklar framkvæmdir við höfnina á næstu árum. Verið er að undirbúa útboð vegna endurbyggingar á Krosseyjarbakka. Heildarkostnaður þeirrar framkvæmdar getur orðið 100 - 150 mkr. Jafnframt er gert ráð fyrir dýpkun á Grynnslunum sem gætu kostað um 30 - 50 mkr. Hlutur hafnarsjóðs er 40% í hafnarbakkanum en 25% varðandi dýpkun. Til viðbótar kemur svo árleg viðhaldsdýpkun innan hafnar sem kostar 8,8 mkr og er hlutur hafnarinnar 2,2, mkr.
Gert er ráð fyrir að Hornafjarðarhöfn taki 40 mkr. lán til framkvæmdanna, langtímalán verða því um 60 mkr. í árslok 2004.

Samkvæmt nýjum hafnarlögum breytist rekstrarlegt umhverfi hafna á landinu mikið á næstu árum. Skiptir þar mestu að ætlast verður til að stærri hafnir séu "sjálfbærar" þ.e. afli sér tekna með gjaldtöku bæði vegna rekstrarins og til framkvæmda. Hornafjarðarhöfn flokkast í dag undir þennan flokk. Framkvæmdir eru styrkhæfar af ríkinu eins og fram hefur komið. Í framhaldi af nýsamþykktum hafnalögum gaf samgönguráðuneytið út nýja samræmda gjaldskrá 1. júlí sl. þar sem aflagjaldið er hækkað verulega. Þessi hækkun skiptir sköpum um að höfnin geti sinnt þokkalegri þjónustu og viðhaldið mannvirkjum. Aftur á móti munu áhrif nýju laganna setja hafnarsjóð í vanda í framtíðinni, nema til komi breyttar forsendur, þegar kemur að stærri viðhaldsverkum s.s. endurbyggingu Álaugareyjarbryggju og byggingu nýrra mannvirkja.

VI. VATNSVEITAN
Tekjur vatnsveitu eru áætlaðar 19,0 mkr og er gert ráð fyrir að veitan skili um 10,9 mkr upp í stofnkostnað, afskriftir og vexti . Áætlaður stofnkostnaður í ár er 7 mkr.
Nú þegar hafa gamlar asbestlagnir í Hafnarbraut milli Litlubrúar og Víkurbrautar verið endurnýjaðar ásamt heimæðum og haldið verður áfram við að endurnýja þær asbestlagnir sem eftir eru en þær eru í Hafnarbrautinni frá Litlubrú við gamla vatnsdæluskúrinn og Víkurbraut Kirkjubraut. Heimtaugar verða endurnýjaðar samhliða þessari framkvæmd.
Unnið er að gæðaeftirliti vatnsveitunnar og reiknað er með að þeirri vinnu ljúki á næsta ári.

VII. ÍBÚÐAKERFIÐ
Kaupleigukerfið er gert upp með 2,8 mkr. halla. Ekki er gert ráð fyrir innlausnarkostnaði og erfitt er að áætla sölu íbúða úr kerfinu sem hugsanlega þarf að greiða með. Gert er ráð fyrir að farið verði í meiriháttar viðhald að upphæð 2 m.kr.

VIII. HEILBRIGÐISSTOFNUN SUÐAUSTURLANDS
Eins og ég vék að í upphafi verður áætlun HSSA tekin fyrir síðar. Rétt er þó að geta þess að rekstur stofnunarinnar er eins og annarra sambærilegra stofnana á landinu þungur.

IX. BREYTILEGT UMHVERFI
Þegar unnið er að fjárhagsáætlun lítum við í kringum okkur og reynum að átta okkur á hvað er að gerast í umhverfinu sem getur haft áhrif á niðurstöður vinnunnar.

Svo lengi sem ég man og hef tekið þátt í umræðu um sveitarstjórnarmál hafa alltaf verið til einstaklingar með nokkuð háværar og neikvæðar hrakspár sem ekki hafa gengið eftir. Sveitarstjórnarmenn verða að gæta sín og taka ekki þátt í slíkri umræðu. Sömuleiðis verða bæjarfulltrúar að vera meðvitaðir um að fjárhagsáætlun er ekki eingöngu stjórntæki, í henni felast líka skilaboð út í samfélagið, jákvæð eða neikvæð eftir atvikum. Þess vegna þarf að vanda framsetningu á fjárhagsáætlun bæjarfélagsins.

Það hefur verið staðreynd undanfarin ár að afkoma bæjarsjóðs hefur verið betri en fjárhagsáætlanir gerðu ráð fyrir og munar þar mestu um aukaframlög úr Jöfnunarsjóði. Ekki er gert ráð fyrir þessum framlögum nú og ef ekki kemur annað fjármagn í staðinn áhrifa þess gæta á næstu árum.

X. AFGREIÐSLA
Lagt er til að bæjastjórn vísi framlagðri tillögu að fjárhagsáætlun bæjarsjóðs Hornafjarðar fyrir árið 2004 til 2. umræðu.
Bæjarstjórn samþykkir jafnframt að önnur umræða fari fram 18. desember
Bæjarstjórn felur bæjarráði að vinna frekar að einstökum þáttum áætlunarinnar og úrvinnslu þeirra athugasemda sem kunna að berast.

XI. LOKAORÐ
Í lokin vil ég færa starfsfólki sveitarfélagsins þakkir fyrir vel unnin störf við fjárhagsáætlunina. Mest hefur mætt á framkvæmdastjórum sviða og er þeim sérstaklega þakkað. Bæjarráðsfulltrúum þakka ég sömuleiðis góða samvinnu. Góð og öflug þjónusta við bæjarbúa hlýtur að vera sameiginlegt markmið okkar allra með það að leiðarljósi að íbúum sveitarfélagsins líði vel og að sem flestir velji sér búsetu í héraðinu. Ég er jafn bjartsýnn á framtíð Hornafjarðar nú og ég hef alltaf verið. Við höfum alla burði til að halda áfram að byggja hér upp gott og gjöfult samfélag og sveitarfélagið hefur möguleika til að vaxa og dafna.

Halldóra sagði lækkun tekna vera vandamál sem mörg sveitarfélög standi nú frammi fyrir en varaði við of mikilli svartsýni. Hún mælti með því að snemma verði byrjað að huga að fjárhagsáætlanagerð 2005 svo enn meiri tími verði til að fara vel ofan í öll mál. Halldóra sagði sveitarfélagið hafa komið ásættanlega út úr greiðslum frá Jöfnunarsjóði en greiðslur til margra sveitarfélaga hafa skerst verulega.
Reynir þakkaði greinagóða framsetningu fjárhagsáætlunar. Hann ræddi framkvæmdir sem áætlaðar eru 51 mkr á næsta ári og hvort hugsanlegt sé að fresta einhverjum framkvæmdum en nýta fjármunina frekar til viðhalds. Reynir ræddi einnig fyrirhugaðar framkvæmdir við höfnina.
Forseti óskaði eftir því að fá að bera upp 3ja lið á dagskrá áður en 2. liður dagskrárinnar verður afgreiddur og var það samþykkt.
Forseti vísaði fjárhagsáætlun 2004 til annarar umræðu 18. desember nk.

--------------------

3. Ákvörðun um álagningarprósentu
Forseti bar upp tillögu um að bæjarstjórn samþykki álagningarreglur og gjaldskrá sem kynnt var í framsögu bæjarstjóra.
Bæjarstjórn samþykkir tillöguna með 6 atkvæðum, 1 sat hjá.

4. Ákvörðun um vinabæjasamstarf við Sisimiut
Forseti sagði frá aðdraganda málsins.
Halldóra sagði frá grænlenska bænum Sisimiut og hugmyndum um vinabæjartengsl við hann. Þessi vinabæjartengsl eru hugsuð á nokkuð öðrum nótum en þau sem fyrir eru því fyrst og fremst er verið að huga að samstarfi á milli stofnana og fyrirtækja, m.a. á sviði ferðamála, sjávarútvegs, skólamála o.s.frv. Horft er til þess að starfsmenn bæjarskrifstofa á báðum stöðum verði milligöngumenn um að afla upplýsinga og aðstoða við að mynda tengsl og að tæknin verði nýtt sem best til að auðvelda samskiptin.
Forseti bar upp tillögu þess efnis að mynduð verði vinabæjartengsl við Sisimiut á Grænlandi.
Bæjarstjórn samþykkti tillöguna samhljóða..

5. Kosningar – breyting á skipan varafulltrúa í bæjarstjórn
Forseti bar upp tillögu þess efnis að Aðalheiður Fanney Björnsdóttir taki sæti að nýju, að loknu fæðingarorlofi, sem varabæjarfulltrúi B-lista. Hún tekur við stöðunni af Margréti Ingólfsdóttur.
Bæjarstjórn samþykkir breytinguna samhljóða.

6. Fyrirspurnir
Engar.
Bæjarstjóri vakti athygli á útgáfu á Félagsvininum, riti Ungmennafélags Öræfa sem gefið er út af tilefni 70 ára afmæli félagsins. Hann sendi þeim hamingjuóskir.


Fundi slitið kl. 17:50

Halldóra B. Jónsdóttir,
Björn E. Traustason,
Einar Karlsson,
Elín Magnúsdóttir,
Reynir Arnarson,
Ólafur Sigurðsson
Albert Eymundsson,
Ásta H. Guðmundsdóttir,
Helgi Már Pálsson,
Stefán Ólafsson
Inga Jóna Halldórsdóttir,

Kristín Gestsdóttir.