Fundargerð bæjarstjórnar 150

150. fundur

Fundur haldinn    í Bæjarstjórn Hornafjarðar, fimmtudaginn 10. desember 2009 kl. 16:00 í Nýheimum.

Mætt voru:    Reynir Arnarson, forseti bæjarstjórnar, Árni Rúnar Þorvaldsson, Sigurlaug Gissurardóttir, Elín Magnúsdóttir, Guðrún Ingimundardóttir,  Björk Pálsdóttir og Björn Ingi Jónsson.  Einnig: Hjalti Þór Vignisson bæjarstjóri, Stefán Ólafsson framkvæmdastjóri fræðslu- og félagssviðs, Ásta Halldóra Guðmundsdóttir, framkvæmdastjóri fjármálasviðs og Haukur Ingi Einarsson framkvæmdastjóri tækni- og umhverfissviðs.

Forseti setti fund og bauð fundarmenn velkomna.

1.        Fundargerðir

·         Bæjarráð Hornafjarðar 483. fundur , 9. nóvember 2009.

Guðrún gerði að umtalsefni forvarnarmál ungmenna og gerði grein fyrir fyrirkomulagi forvarna og hlutverk skóla, menningar- og tómstundanefndar og félagsmálayfirvalda í málaflokknum.

Björk ræddi Fjarskiptafélags Öræfinga og velti upp þeirri spurningu hvort samningar sveitarfélagsins þess vegna geti verið fordæmisgefandi. Þá óskaði hún upplýsinga um af hvaða lið fjármagn vegna samningsins væru teknar. Björk ræddi forgangsröðun framkvæmda og gerði við þær athugasemdir. Einnig ræddi hún teppaflísar og hliðartjöld í íþróttahúsi á Höfn. Einnig ræddi hún forvarnamálin og lagði áherslu á að við breytingar séu skýr hlutverk þeirra sem að þeim koma.

Hjalti tók undir þau orð að ekki hafi verið rætt nægilega um forvarnir á vegum sveitarfélagsins með breyttri nefndaskipan. Gerði hann og grein fyrir hlutverkum og skyldum stofnana í þessum málaflokki. Þá benti hann á að ástand í t.d. áfengisneyslu ungmenna sé breytilegt eftir tímum, stundum mjög gott en í annan tíma verra. Hjalti lagði áherslu á aðstöðu ungmenna til fjölbreytts tómstundastarfs. Hjalti tók undir orð Bjarkar um að hyggja að hag heimilanna og framkvæmdum á vegum sveitarfélagsins. Hann lagði áherslu á að gervigrasvöllur skipti miklu máli fyrir mikinn fjölda ungmenna. Þá benti hann á að gjaldskrár séu óbreyttar á milli ára. Hjalti sagði fé vegna samninga um Fjarskiptafélag Öræfa séu teknir af óráðstöfuðu fé þessa árs og hluti fari yfir á næsta ár. Hann sagði aðkomu sveitarfélagsins vera fordæmisgefandi. Þá ræddi hann viðburði og ráðstefnur og aðkomu sveitarfélagsins að þeim. Gerði hann grein fyrir samtölum við menn í atvinnulífinu sem haft hafa áhyggjur af of mikilli aðkomu sveitarfélagsins að þessum viðburðum. Hjalti gerði að umtalsefni smáframleiðslu matvæla og handverks og lýsti yfir ánægju með stöðu þessarar framleiðslu í dag. Þá ræddi hann stuðning sveitarfélagsins og samstarf við Matís við matvælaframleiðsluna. Sagði Hjalti að sveitarfélagið þurfi einnig að koma með sambærilegum hætti að handverksframleiðslu.

Sigurlaug óskaði Öræfingum og íbúum vestasta hluta Suðursveitar til hamingju með bætt fjarskipti. Hún ræddi málefni ferðaþjónustunnar og viðburði og ráðstefnur á svæðinu. Tók hún undir orð Hjalta um þau mál. Hún sagði vinnu við vöruþróun og framleiðslu hafa skilað góðum árangri en það vantaði upp á markaðssetninguna, hana þurfi að bæta.

Björn Ingi ræddi Markaðsstofu Suðurlands. Sagðist hafa ákveðnar efasemdir um það mál. Hann var ánægður með stuðning við Ríki Vatnajökuls en samningur um það væri að renna sitt skeið. Lagði hann áherslu á að við fengjum eitthvað í stað þess sem við legðum til Markaðsstofu Suðurlands. Þá lagði hann áherslu á að ekki mætti dreifa fjármagni of víða en sagðist ekki vera á móti markaðsstofu á Suðurlandi. Þá ræddi hann leigusamning um Hrollaugsstaði og fagnaði honum. Leigutekjur gætu svo orðið grundvöllur viðhalds við húsið eins og rætt hafi verið í bæjarráði.

Árni ræddi aðkomu sveitarfélagsins að Fjarskiptafélagi Öræfinga. Sveitarfélagið hafi með þeim samningi vísað veginn ef til fleiri sams konar verkefna kemur í sveitarfélaginu. Árni ræddi forvarnarmálin og sagði öflugt tómstunda- og félagsstarf skipti þar mestu máli. Sagði hann hér vera öflugt félags- og tómstundastarf.

Hjalti svaraði fyrirspurn um hliðartjöld í íþróttahúsi. Sagði hann kostnað vegna þeirra verða tekinn af liðnum óráðstafað. Einnig ræddi hann teppaflísar og hugmyndir um að gera íþróttasalinn að hátíðarsal. Þá benti hann á hugmyndir um dansgólf sem færa mætti á milli húsa. Hann þakkaði umræðu um markaðsmál sem fram hafi farið fyrr á fundinum. Lagði hann áherslu á að menn ynnu saman en einnig mikilvægi þess að vera hluti að stærri heild.

Fundargerð samþykkt.

·         Bæjarráð Hornafjarðar 484. fundur , 16. nóvember 2009.

Björk ræddi umsögn sveitarfélagsins um lög um persónukjör og óskaði eftir skoðun meirihlutans á hugmyndum um persónukjör.

Hjalti greindi efnislega frá umsögninni um persónukjör til Alþingiskosninga. Sagði í umsögninni hafi verið tekið undir meginmarkmiðið um aukna þátttöku og vægi almennings. Þá fjallaði hann um aukna aðkomu íbúa að málefnum sveitarfélaga. Persónukjör gæti verið hluti af aukinni þátttöku þeirra en ekki eina leiðin.

Árni gerði að umtalsefni sömu mál og Hjalti og tók undir orð hans. Hann sagði það okkar hér inni (bæjarfulltrúa) að móta stefnuna í þessum málum.

Reynir ræddi persónukjör og aukna þátttöku almennings í stjórnun sveitarfélaga.

Fundargerð samþykkt.

·         Bæjarráð Hornafjarðar 485. fundur, 23. nóvember 2009.

Hjalti gerði að umtalsefni skuldir vegna kaupleigukerfisins. Þessa hluti þurfi að skoða. Til að lækka þessar skuldir þurfi að fækka íbúðum í eigu sveitarfélagsins. Hann fagnaði sölu á þeim íbúðum sem þegar hafa verið seldar.

Björn Ingi ræddi drög að reglum menningar- og tómstundanefndar vegna styrkveitinga og framkvæmd þeirra til þessa. Lagði hann áherslu á að menn komi sér upp góðum og gagnsæjum reglum þar að lútandi sem hvettu félög til að standa fyrir stórum menningarviðburðum. Þá ræddi hann flutning á málefnum fatlaðra til sveitarfélaga frá ríkinu og mikilvægi þess að okkar sveitarfélag verði sérstakt þjónustusvæði en ekki hluti af öðru stærra.

Hjalti fór yfir yfirfærslu á málefnum fatlaðra og þeirri vinnu sem fram færi hjá starfsmönnum og félagsmálaráði. Mikilvægt sé að við ræðum stöðu Hornafjarðar og sérstöðu hans landfræðilega séð. Við þurfum að halda mjög vel á okkar spilum og halda vel utan um það sem áunnist hefur í þessum málum sem öðrum, svo sem í atvinnu- og menntamálum, sagði Hjalti. Það sé verkefni næsta árs að gæta hagsmuna okkar. Þá greindi hann frá fundi sem hann átti í iðnaðarráðuneytinu vegna ákveðinna þátta í atvinnumálum.

Guðrún ræddi drög að reglum um styrki á vegum menningar- og tómstundanefndar og greindi frá stöðu þess máls í nefndinni.

Árni ræddi rekstur á málefnum fatlaðra sem hér hafi tekist mjög vel. Miðað við það gætum við farið með þann málaflokk áfram án þess að vera hluti af stærri heild. Þá ræddi hann samstarf við önnur sveitarfélög um önnur mál sem almennt hafi verið mjög jákvæð, svo sem um menningarmál.  Hann taldi að við höfum þokkalegan skilning á sérstöðu okkar og landfræðilegri legu. Þá ræddi hann hugmyndir um frekari sameiningu sveitarfélaga og hver staða Hornafjarðar verði ef til slíkra sameininga kemur.

Björn Ingi sagði að við þurfum að vera með öfluga hagsmunagæslu. Gerði að umtalsefni sameiningu sveitarfélaga og stór þjónustusvæði fyrir einstök verkefni, svo sem málefni fatlaðra. Björn Ingi sagðist alls ekki vera að draga í efa störf menningarmálanefndar.

Árni ræddi umræður um breytingar á stjórnkerfinu og mikla fækkun og stækkun sveitarfélaga. Hann sagði ekki bara ríkisvaldið tala um fækkun sveitarfélaga það gerðu einnig fjölmargir sveitarstjórnarmenn með það að leiðarljósi að efla sveitarstjórnarstigið.

Fundargerð samþykkt.

·         Bæjarráð Hornafjarðar 486. fundur , 30. nóvember 2009.

Björk ræddi fundargerð skólanefndar og viðbyggingu við Lönguhóla. Spurði hún hvort ekki hafi verið kannaðir allir möguleikar í stöðunni. Hún spurðist fyrir um sorpmál í sveitum og hugsanlegar lagfæringar á þeim. Óskaði upplýsingar um ráðstefnu á vegum Sambands ísl. sveitarf. um húsnæðismál. Þá óskaði hún upplýsinga um lagfæringu á Hrollaugsstöðum og um hitaveitu í Öræfum.

Elín gerði grein fyrir viðbyggingu við Lönguhóla. Sagði hún ýmsa möguleika hafa verið skoðaða í þessu sambandi. Eftir þá skoðun hafi umrædd viðbygging verið niðurstaða skólanefndar.

Björn Ingi ræddi hugmynd sína um samnýtingu árskorts hjóna og útskýrði hvað hann ætti við og hvernig það yrði útfært. Þá ræddi hann leikskólamál og spurði hvort ekki mætti skoða að gera Lönguhóla að 5 deilda leikskóla og taka Krakkakot til annarra nota, svo sem fyrir þjónustu við aldraða.

Hjalti sagði væntanlega viðbyggingu við Lönguhóla verða færanlega ef til þess kæmi síðar meir. Þá gerði hann grein fyrir ástæðu þeirrar framkvæmdar. Hjalti greindi frá lagfæringum á sorpmálum í sveitum til að koma til móts við íbúa og fyrirtæki í dreifbýli. Þá greindi hann frá ferð starfsmanna áhaldahúss um sveitirnar og söfnun starfsmanna á geymum o.fl. Þá greindi hann frá þeim breytingum sem orðið hafa á sorpmálum í sveitum og mikla minnkun á urðuðu magni sem þaðan kemur. Þá sagði hann fyrirspurn Bjarkar um lýsingu að flugvelli verða beint til flugstoða. Hann sagði engan hafa farið frá sveitarfélagi á ráðstefnu um fjármál heimilanna. Hann greindi frá hvað gert verði í lagfæringu á Hrollaugsstöðum, forgangsröðun verkefna og hvernig þau verða fjármögnuð, m.a. af leigutekjum hússins.

Árni ræddi leikskólamál og sagðist skilja hugmynd Björns Inga svo að hann vildi vera með einn leikskóla. Þá benti hann á að aðrir skólar hafi verið sameinaðir. Það sé e.t.v. komið að þeim tímapunkti að málefni leikskólanna verði rædd með svipuðum hætti og málefni grunnskólanna.

Björn Ingi sagði gaman þegar menn túlka orð hans. Hann sagði að skoða mætti með fækkun nemenda breytingar á þessu sviði og benti á fækkun nemenda á grunnskóla í því sambandi.

Björk óskaði svara um hitaveitu í Öræfum.

Hjalti greindi frá stöðu leitar og nýtingar á heitu vatni í Öræfum og þeim breytingum sem ræddar hafa verið, þ.e. að dæla heitu vatni úr Skaftafelli í Svínafell ef nægjanlegt vatn finnst í stað þess að leita með ófyrirsjáanlegum árangri að vatni í Svínafelli. Þessa þætti væri verið að skoða nánar áður en lengra verði haldið.

Árni ræddi leikskólamálin og sagðist hafa verið að benda á að með tveimur deildum til viðbótar við Lönguhóla yrði hér einn leikskóli miðað við núverandi aðstæður.

Fundargerð samþykkt.

·         Bæjarstjórn Hornafjarðar 148. fundur, 5. nóvember 2009. Áður samþykkt.

2.        Endurskoðuð skólastefna sveitarfélagsins

Formaður skólanefndar, Elín Magnúsdóttir, fór yfir þær breytingar sem skólanefnd hefur lagt til að gerðar verði á skólastefnunni. Hún gerði grein fyrir ástæðum þessara breytinga sem að stórum hluta stafa af breyttum lögum og reglugerðum um leik- og grunnskóla og breytingar á skólum sveitarfélagsins. Elín þakkaði öllum þeim sem komu að þessari vinnu við endurskoðun skólastefnunnar.

Björn Ingi þakkaði fyrir þessa vinnu og að hún væri skilmerkilega fram sett. Hann ræddi kaflann um næringu. Sagði vanta punkt um samskipti við verktaka. Lagði til að skólanefndin skoðaði það. Þá hefði hann viljað sjá það að tíminn sem börn eru í skólabíl á hverjum degi verði sem stystur. Sagði þetta m.a. hafa komið fram á fundi með íbúum á Mýrum.

Elín þakkaði Birni Inga fyrir ábendingarnar og sagði þær verða teknar til skoðunar í skólanefndinni. Þá greindi hún frá hugmyndum um breytingar á skólaakstri til að stytta tíma sem fer í aksturinn.

Björk benti á svipuð atriði og fram hafa komið í umræðunni um næringu.

Sigurlaug ræddi skólaaksturinn og gremju íbúa á Mýrum með að ekki sé jafnræði á meðal íbúanna hvað þennan akstur varðar.

Björn Ingi sagðist ekki vilja setja þetta í uppnám, sagðist treysta skólanefnd til að ræða næringarmálin og lagði til að skólaaksturinn verði sérstaklega tekinn til umræðu í bæjarráði.

Árni tók undir tillögu Björns Inga um skólaaksturinn og sagðist styðja hana.

Sigurlaug sagðist vilja sjá orðið jafnræði inni í kaflanum um skólaakstur  ef mönnum þætti á sér brotið.

Hjalti fór yfir málið og greindi frá þeim breytingum sem gerðar hafa verið á skólahaldi í sveitarfélaginu. Í því sambandi sé mikilvægt að koma til móts við íbúana. Hann sagði að það ætti að vera kappsmál að tíminn í skólabíl verði ekki langur. Þá sagði hann hugsanlegt að setja mætti um þetta ákvæði í fjölskyldustefnu. Þá benti hann á að við værum innan marka reglugerðar um skólaakstur hvað varðar tíma sem börn eiga lengst að vera í skólabíl.

Elín sagðist styðja hugmynd Sigurlaugar um jafnræðið og tillögu Björns Inga um að taka aksturinn til umfjöllunar í skólanefnd.

Björk sagði að sér litist vel á stefnuna, hún styddi hana en fannst vanta tímalega og mælanleg markmið og framtíðarsýn.

Reynir las upp aðra málsgrein í stefnu um skólaakstur með tillögu Sigurlaugar að breytingu á malsgreininni og hljóðar hún svo: Öryggi, vellíðan og jafnræði barna í akstri skal tryggja eins og kostur er.

Tillagan borin undir atkvæði og samþykkt samhljóða.

Reynir las upp eftirfarandi tillögu Björns Inga að bókun: Bæjarstjórn felur bæjarráði að fara yfir skipulag skólaaksturs í sveitarfélaginu í ljósi breytts skólahalds og þeirra athugasemda sem fram hafa komið um skólaaksturinn.

Endurskoðuð skólastefna borin undir atkvæði, með þeirri breytingu sem samþykkt var á fundinum og hún samþykkt með 7 greiddum atkvæðum.

3.        Gjaldskrá fyrir sorphirðu og sorpeyðingu 2010

Formaður umhverfisnefndar, Sigurlaug Gissurardóttir, fór yfir tillögur að nýrri gjaldskrá og sagði að ný gjaldskrá tæki mið af samþykkt nr. 104/2000 um sorphirðu í Sveitarfélaginu Hornafirði.  Meginmarkmið nýrrar gjaldskrár fyrir sorphirðu og sorpeyðingu væri að stuðla að gegnsæi í gjaldtöku til einstaklinga og fyrirtækja og hvetja til flokkunar endurvinnanlegs úrgangs sem skilaði sér í lágmörkun kostnaðar við málaflokkinn fyrir alla aðila.  Þannig væri heimilum gert kleift að velja á milli tveggja mismunandi stærða sorpíláta.  Fyrirtæki greiddu fast umsýslu- og rekstrargjald sorpstöðvar og síðan eftir magni óflokkað úrgangs sem félli til við rekstur.  Fyrirtækjum yrði gert kleift að koma með án kostnaðar ákveðna úrgangsflokka í gámaport við Áhaldahús og þannig gætu þau dregið úr kostnaði við urðun úrgangs.  Þannig minnkaði magn úrgangs sem fer til urðunar og líftími urðunarstaðar lengdist sem væri mikilvægt fyrir rekstur málaflokksins til lengri tíma litið. 

Björn Ingi sagðist ekki reikna með að við ætluðum að rukka sorphirðugjald af sumarhúsum ef ekki ætti að ná í sorpið. Einnig fór hann yfir ýmsa þætti aðra í tillögu að gjaldskránni.

Hjalti þakkaði umhverfisnefnd og framkvæmdastjóra tækni- og umhverfissviðs fyrir góða vinnu við gjaldskrána og ræddi ýmsa þætti sem tengjast gjaldskránni.

Björk sagði að sér litist vel á gjaldskrána en var með ákveðnar spurningar um ákveðna liði. Velti meðal annars upp hvort ekki þurfi að greiða fyrir spilliefni til að þau skiluðu sér.

Björn Ingi sagðist hafa staðið í þeirri meiningu að gjaldskrá ætti að ná til raunkostnaðar þó hann efaðist um að það næðist.

Hjalti svaraði fyrir þær athugasemdir sem fram hafa komið í umræðunni.

Tillaga að gjaldskrá fyrir sorphirðu/sorpeyðingu borin undir atkvæði með tilfærslu einnar málsgreinar í gjaldskránni og var hún samþykkt með 7 atkvæðum.

4.        Fjárhagsáætlun 2010  - seinni umræða

Bæjarstjóri fylgdi áætlun úr hlaði og sagði að enn væri nokkur óvissa um þróun efnahagsmála sem gerði áætlanagerð erfiðari.  Þó bæru fréttir og aðrar heimildir það með sér að uppgangur hefjist á næsta ári og jafnvel fyrr en seinna.  Fjárhagsstaða sveitarfélagsins er ágæt sem gerir sveitarfélaginu kleift að halda úti nær óbreyttri þjónustu við íbúa og töluverðum framkvæmdum á næsta ári.  Þá gerði bæjarstjóri grein fyrir helstu áherslum á árinu 2010, framkvæmdum og verkefnum sem ráðist verður í. Framkvæmdir verða eftirfarandi:

A-    Hluti                                                                    200,0 m.kr.

• Viðbygging við Lönguhóla og lóð                              30,0 m.kr.
• Skólalóð við Grunnskóla Hornafjarðar                         7,0 m.kr.
• Endurbætur á Tónskóla Hornafjarðar (Sindrabæ)       20,0 m.kr.
• Gervigrasvöllur                                                       72,0 m.kr.
• Svavar Guðnason – sýningarsalur                              3,0 m.kr.
• Endurbætur á Ráðhúsi                                             2,0 m.kr.
• Leirusvæði                                                              2,5 m.kr.
• Þjónustustöð                                                          4,0 m.kr.
• Opin svæði / malbikun / lýsing í dreifbýli                  29,5 m.kr.
• Reiðskemma                                                        25,0 m.kr.
• Óráðstafað                                                             5,0 m.kr.

B-     Hluti                                                                       92,0 m.kr.

• Varnargarður í Sílavík                                                  7,0 m.kr.
• Hafnarvog – vigt                                                        20,0 m.kr.
• Malbik og umhverfi hafnarinnar                                   20,0 m.kr.
• Bræðslubryggja, Grynnsli, landbrot                              6,5 m.kr.
• Vatnsveituframkvæmdir                                               8,5 m.kr.
• Fráveituframkvæmdir                                                 30,0 m.kr.

Samtals:                                                                        292,0 m.kr.

Bæjarstjóri gerði grein fyrir helstu breytingum frá fyrri umræðu og eru þær eftirfarandi:

A-hluti:

Tekjur verða 1.248,5 m.kr. lækka um 2,450 þús. kr. Rekstur málaflokka lækkar um sömu upphæð og  verða 1.210,5 m.kr.  Mismunur tekna og gjalda A-sjóðs sveitarfélagsins er því afgangur  um 10,5 m.kr.   Handbært fé frá rekstri er 104,4 m.kr., fjárfestingar 200 m.kr., afborganir langtímalána 110,7 m.kr. og handbært fé í árslok um 215,0 m.kr. 

Helstu niðurstöðutölur við seinni umræðu

A og B -hluti:

Tekjur 1,449,0 m.kr. Laun og launatengd gjöld verða 766,4 m.kr., annar rekstrarkostaður 491,3 m.kr. og afskriftir 67,2 m.kr. Fjármagnskostnaður er 86,9 m.kr. og rekstrarniðurstaða 36,9 m.kr. afgangur.   Handbært fé frá rekstri 190,2 m.kr., fjárfestingar 292,0 m.kr., afborganir langtímalána 127,4 m.kr., ný langtímalán 7 m.kr. og handbært fé í árslok 215,0 m.kr.

Bæjarstjóri  las upp álagningarreglur 2010 sem eru eftirfarandi:

Útsvar                                              13,28%

Fasteignaskattur á íbúðahúsnæði        0,50% af fasteignamati

Fasteignaskattur á atvinnuhúsnæði     1,62% af fasteignamati

Lóðaleiga                                            1,00% af fasteignamati

Holræsagjöld                                      0,30% af fasteignamati

Vatnsgjöld                                          0,18% af fasteignamati

Sorphreinsigjald kr./pr.einingu            10.000.-

Sorpurðunargjald kr./pr.einingu           10.000.-

Sorpurðunargjald  ½ kr./pr.einingu        5.000.-

Sorpurðunargjald fyrirtækja                10.000.-

Hunda- og kattaleyfisgjöld í samræmi við reglugerð.

Gjaldskrár þjónustugjalda hækka ekki á milli ára.

Fjárhagsáætlun Heilbrigðisstofnunar Suðausturlands 2010

Bæjarstjóri fór yfir helstu tölur og sagði m.a. að  framlög ríkis  til hjúkrunarsviðs vera um 291,5 m.kr. og heildartekjur 297, 3 m.kr.  Laun og launatengd gjöld hjúkrunarsviðs eru um 216,3 og annar rekstrarkostnaður er um 69,1 m.kr.  Hjúkrunarsvið skila því um 11,9 m.kr. afgangi.  Framlög ríkis til heilsugæslusviðs er 118,0 m.kr.  aðrar tekjur um 11,8 m.kr. laun og launatengd gjöld eru 104,5 og annar rekstrarkostnaður um 42 m.kr.  Heilsugæslusvið er rekið með um 16,7  m.kr. halla.

Heildarframlög ríkis eru 409,5 m.kr. aðrar tekjur er 17,6 m.kr. Tekjur samtals 427,1 m.kr.               laun og launatengd gjöld eru um 320,9 m.kr.  annar kostnaður er um 111,1 m.kr.  Gjöld samtals 431,9 m.kr.  Niðurstaðan er því rúmlega 4,8 m.kr. í halla. Bæjarstjóri vísaði síðan í neðangreinda bókun heilbrigðis- og öldrunaráðs sem samþykkt var áfundi ráðsins 26. nóvember sl.:

HÖR þakkar starfsfólki HSSA fyrir góðan rekstur og öflugt starf á yfirstandandi ári þar sem reyndi verulega á að ná endum saman.  Þær leiðir sem farið var til hagræðingar stefnir í að skili sér í jákvæðri rekstrarniðurstöðu HSSA.  HÖR samþykkir framlagða áætlun fyrir árið 2010 þrátt fyrir að gert sé ráð fyrir tapi af rekstri stofnunarinnar.  Til langs tíma verður að ná niður rekstrarkostnaði þannig að endar nái saman.  HÖR felur starfsmönnum HSSA að leggja fram tillögur og kynna þær fyrir 1. febrúar til hagræðingar þar sem einstakir þjónustuþættir stofnunarinnar verði skoðaðir.

Bæjarstjóri þakkaði öllum sem komið hafa að gerð fjárhagsáætlunar fyrir árið 2010 fyrir samstarfið og lagði til að hún verð samþykkt.

Björn Ingi sagði stöðu sveitarsjóðs vera góða en minnti á ýmsa óvissu sem enn er í ríkisfjármálum.

Björn Ingi las upp bókun sjálfstæðismanna við samþykkt fjárhagsáætlunar ársins 2010

Nú þegar fjárhagsáætlun fyrir árið 2010 er til samþykktar teljum við sjálfstæðismenn rétt að benda á að sjaldan eða aldrei hefur verið ríkari nauðsyn á að endurskoða rekstur með tilliti til breyttra aðstæðna í þjóðfélaginu. Það er áhyggjuefni að ekki skuli hafa verið leitað meiri hagræðingar í rekstrinum árið 2009 fyrir utan sameiningu grunnskólans sem var löngu fyrirsjáanleg vegna fækkunar nemenda á grunnskólaaldri.

Þegar litið er til rekstrar Aðalsjóðs er hann rekinn með 4,6 miljóna tapi fyrir fjármagnsliði og verður það að teljast áhyggjuefni. Þessu til samanburðar má geta að í fjárhagsáætlun 2008 var afgangur uppá 130 milljónir. Vissulega hefur orðið bankahrun á þessum tíma og ýmislegt öðruvísi en áður var. En með þessu er verið að ganga á sjóði sveitarfélagsins mun meira en stærri framkvæmdir gefa tilefni til.

Vegna þeirra ákvörðunar sem teknar voru við uppbyggingu íþróttamannvirkja á íþróttasvæði af núverandi meirihluta þarf nú að útbúa æfingasvæði sem er orðið margfalt dýrari lausn en ef farin hefði verið sú leið sem við sjálfstæðismenn lögðum til í upphafi kjörtímabilsins um uppbyggingu íþróttamannvirkja.

Markmiðið til framtíðar á að vera aðstaða til fjölbreyttrar þjónustu sem tekur mið af sem hagkvæmustum rekstri.

Fjárhagsáætlun hafnarinnar gerir ráð fyrir tekjuafgangi uppá 37.8 milljónir króna og teljum við ánægjulegt að rekstur hennar skuli vera jafn sterkur og þessi áætlun gefur til kynna.  

Sveitarfélagið þarf að sníða sér stakk eftir vexti.

Hjalti sagði að lýsa mætti fjárhag sveitarfélagsins sem góðum. Tók hann undir orð Björns Inga um óvissu með fjárhagslega stöðu landsins. Hann sagði að ef fara eigi í frekari hagræðingu kallaði það á skerta þjónustu og uppsagnir starfsfólks. Þá fór hann yfir rekstrarkostnað sveitarfélagsins borið saman við rekstarkostnað sveitarfélaga á öllu landinu. Í þessum liðum hafi rekstrarkostnaður hækkað mun minna hér en að meðaltali á landinu. Þá benti hann á að eiginfjárhlutfall í A-hluta væri um 60% sem væri mjög gott. Staða veitu og hafnarsjóðs væri einnig mjög sterk. Þá ræddi Hjalti ýmsa þætti sem skoðaðir hafa verið í rekstri, svo sem launatengda þætti o.fl. Hjalti sagðist geta tekið undir ýmislegt í bókun sjálfstæðismanna en vera ósammála öðru, svo sem um 4,6 milljóna króna tap af rekstri aðalsjóðs. Hjalti fór yfir gróskumikið íþróttastarf sem hér er á vegum Sindra. Sagði hann tölur m.a. sýna að bæta þurfi vetraraðstöðu fyrir knattspyrnu. Bætt aðstaða fyrir æskulýð og ungmenni væri í takt við það sem gert hafi verið á kjörtímabilinu.

Björn Ingi sagði bókhald oft vera leik að tölum og vitnaði til orða bæjarstjóra. Hann sagði uppgangssvæði skekkja meðaltalstölur. Hann sagðist ekki væna neinn um að vera of alinn af sínum launum. Hann benti á að við höfum minni tekjur og við þurfum að sníða okkur stakk eftir því. Hann sagði tekjur og gjöld í aðalsjóði verða að koma út á pari. Sagði hann e.t.v. ekki marga liði vera til að skera niður á.

Hjalti sagðist sammála um að við þurfum að leggjast yfir þann veruleika sem við okkur blasir næstu 3 – 4 árin. Við þurfum að skoða framtíðina og hvernig við ætlum að mæta henni. Hann tók undir með Birni Inga að ýmsar stærðir hafi breyst til hins verra síðustu ár. Þá benti hann á að t.d. þurfi færa úr aðalsjóði í eignarsjóð um 50 millj. á ári vegna nýju sundlaugarinnar í stað smá upphæðar fyrir gömlu laugina. Það væri mikil breyting. Þá benti hann á að við værum ekki að leigja sundlaugina af einhverju fasteignafélagi, peninga sem færu út úr sveitarfélaginu.

Björk ræddi framkvæmdir og sagði að sér fyndist ekki að aðstæður bjóði upp á gervigrasvöll, hann ætti að setja á bið. Frekar ætti að setja fé til atvinnumála og Hafnarvíkur – Heppu.

Hjalti ræddi atvinnumálin og gerði grein fyrir aðkomu sveitarfélagsins að þeim, áherslum sem verið hafa og hugmyndum hans um næstu skref. Hann sagði aldrei nóg gert, við þyrftum alltaf vera á tánum, bæði í atvinnumálum og velferðarmálum. Hann sagði mikilvægt að styðja við fjölbreytni í atvinnulífinu. Þá greindi hann frá fundi með forstöðumanni Vinnumálastofnunar á Austurlandi þar sem m.a. var rætt um atvinnuleysi í sveitarfélaginu sem ekki gæti talist mikið. Hjalti taldi að fyrst ætti að leggja áherslu á starfsemina í Hafnarvík – Heppu, koma síðar að endurbótum á húsnæði.

Forseti bæjarstjórnar las uppeftirfarandi bókun sveitarfélagsins:

Allt útlit er fyrir að afkoma Sveitarfélagsins Hornafjarðar árið 2009 verði með ágætum og áætlun fyrir árið 2010 sýnir einnig jákvæða rekstrarniðurstöðu. Það hversu vel hefur tekist til með rekstur sveitarfélagsins í þeim hremmingum sem skekið hafa þjóðlífið í kjölfar fjármálahruns og grundvallarbreytinga í rekstri ríkisins má þakka ábyrgri og traustri fjármálastjórn.  Bæjarstjórn Hornafjarðar þakkar nefndarmönnum og starfsmönnum fyrir samstarfið um að standa vörð um fjárhag sveitarfélagsins og þar með velferð íbúa í sveitarfélaginu.

Framkvæmdir Sveitarfélagsins Hornafjarðar á næsta ári verða talsvert miklar í samanburði við önnur ár.  Stór hluti framkvæmdafjárins fer í uppbyggingu gervigrasvallar á Sindravöllum og reiðhöll Hestamannafélagsins Hornfirðings.  Að þessum tveimur framkvæmdum viðbættum má segja að stórkostlegt átak hafi átt sér stað á yfirstandandi kjörtímabili í uppbyggingu mannvirkja og aðstöðu fyrir íþrótta- og æskulýðsstarf.  Auk þess verður ráðist í endurbætur á stofnunum sveitarfélagsins, svo sem viðbyggingu og endurbætur á leikskólanum Lönguhólum og áframhaldandi endurbætur á húsnæði Tónskólans í Sindrabæ, annan áfanga í fráveituframkvæmdum, áframhaldandi viðhald félagsheimila í sveitum og lagfæringar á bryggjum.

Reynir ítrekaði að staða okkar væri mjög viðunandi og hún væri þeim að þakka sem að þessum málum hafi komið, starfsmönnum sveitarfélagsins og bæjarstjórnarmönnum. Það mikilvægasta sé að við getum tekist á við þá stöðu sem nú er í landinu í stað þess að geta ekkert gert vegna óhófs fyrri ára. Þá velti Reynir upp hugmynd hvort við ættum að taka að okkur ungmennalandsmót 2010. Þá þakkaði Reynir öllum sem komið hafa að vinnu við gerð fjárhagsáætlunar. Að lokum óskaði hann starfsmönnum, bæjarfulltrúum og íbúum öllum gleðilegra jóla.

Árni tók undir þakkir til allra þeirra sem komu að gerð fjárhagsáætlunar 2010. Hann sagði að fyrir nokkrum árum hafi menn í okkar bæjarstjórn litið öfundaraugum til þeirra sveitarstjórna þar sem mest var  framkvæmt. Taldi jafnframt að margar sveitarstjórnir vildu nú vera í okkar sporum. Þá ræddi hann áhrif kreppunnar og minnkandi framlög Jöfnunarsjóðs. Hann sagði tekjuafgang fyrri ára hefði verið auðvelt að gera að engu ef framkvæmt hefði verið fyrir allt handbært fé sveitarsjóðs á þeim tíma. Við þurfum að halda vöku okkar og grípa öll þau tækifæri sem gefast til hagræðingar. Þá minnti hann á þá miklu hagræðingu sem náðst hefur með breytingum á Grunnskóla Hornafjarðar.

Fjárhagsáætlun ársins 2010 borin undir atkvæði og samþykkt með 5 atkvæðum, 2 sátu hjá.

5.        Þriggja ára áætlun 2011-2013 – fyrri umræða

Hjalti fór yfir þriggja ára áætlun og gerði grein fyrir helstu stærðum. Sagði hann efnahaginn áfram verða sterkan miðað við fyrirliggjandi áætlun. Lagði Hjalti til að 3ja ára áætlun verði vísað til frekari vinnu í bæjarráð og annarrar umræðu í bæjarstjórn.

Forseti bæjarstjórnar las eftirfarandi bókun:

Þriggja ára áætlun er háð mikilli óvissu vegna þróunar efnahagsmála á Íslandi, stöðugleika í stjórnmálum og ríkisrekstri.  Gert er ráð fyrir óbreyttum tekjum og gjöld eru óbreytt.  Samkvæmt þriggja ára áætlun verður hægt að framkvæma fyrir u.þ.b. 150 m.kr. í A hluta á hverju ári.  Slíkt kallar hins vegar á lántöku á vegum sveitarfélagsins tvö síðustu ár áætlunarinnar.  Öll árin er gert ráð fyrir nægu handbæru fé frá rekstri til að standa undir skuldbindingum sveitarfélagsins. Áætlunin ber með sér að þrátt fyrir að harðnað hafi á dalnum sé fjárhagur sveitarfélagsins áfram traustur.

Forseti lagði til að þriggja ára áætlun verði vísað til síðari umræðu.  Samþykkt með 5 atkvæðum, 2 sátu hjá.

6.        Fyrirspurnir

 Engar fyrirspurnir hafa borist.

Fundi slitið kl. 20.10