Fundargerð bæjarstjórnar 147

147. fundur

Fundur haldinn    í Bæjarstjórn Hornafjarðar, fimmtudaginn 8. október 2009 kl. 16:00 í Hofgarði.

Mætt voru:    Árni Rúnar Þorvaldsson, varaforseti bæjarstjórnar, Sigurlaug Gissurardóttir, Elín Magnúsdóttir, Guðrún Ingimundardóttir,  Björk Pálsdóttir og Björn Ingi Jónsson.  Einnig: Hjalti Þór Vignisson bæjarstjóri, Stefán Ólafsson framkvæmdastjóri fræðslu- og félagssviðs og Haukur Ingi Einarsson framkvæmdastjóri tækni- og umhverfissviðs.

Forseti setti fund og bauð fundarmenn velkomna. Bar hann undir fundinn að 3. liður í útsendri dagskrá, málefni Hestamannafélagsins Hornfirðings, verði felldur út. Var það samþykkt samhljóða.         

1.        Fundargerðir

·         Bæjarráð Hornafjarðar, 474. fundur, 7. september 2009.

 Björk gerði að umtalsefni endurskoðun á samþykktum sveitarfélagsins og spurði hvort ástæða væri til að gera það svo skömmu fyrir kosningar. Einnig ræddi hún hugmyndir um gervigrasvöll og velti fyrir sér hvort það væri nauðsynleg framkvæmd núna. Minnti jafnframt á hugmyndir sjálfstæðismanna um að hafa gervigras á aðalleikvanginum. Betur hefði verið hlustað á það á sínum tíma. Þá sagði hún þessa framkvæmd ekki vera mannaflsfreka og því ekki góða fyrir hagkerfi okkar við núverandi aðstæður.

Hjalti taldi við hæfi að bæjarstjórn sem er að fara frá vinni að endurskoðun á samþykktum sveitarfélagsins. Það verði svo nýrrar bæjarstjórnar að ákveða hvort eftir þeim tillögum verði unnið. Minnti á að þetta mál þurfi tvær umræður í bæjarstjórn og síðari umræðan fari fram eftir að ný bæjarstjórn hafi tekið við. Þá ræddi hann forgangsröðun framkvæmda og einnig hvernig gras eigi að vera á aðalleikvangi og sagði að hann teldi gras vera betra en gervigras, þannig nýttist völlurinn betur. Hjalti sagði að með nýjum gervigrasvelli létti á íþróttahúsinu þar sem knattspyrnan færi nánast öll út. Þrátt fyrir að benda mætti á að framkvæmdin væri ekki mjög vinnuaflsfrek væri rétt að fara í þessa framkvæmd. Benti á að jarðvegsverktakar fengju þarna töluverða vinnu en iðnaðarmenn reyndar hlutfallslega minna við þetta verk..

Árni ræddi samþykktir sveitarfélagsins og fyrirhugaða endurskoðun á þeim. Þá tók hann undir orð Bjarkar um að bæði aðal- og varabæjarfulltrúar komi að þeirri vinnu. Árni fór yfir þá miklu gerjun sem á sér stað í íslenskum stjórnmálum og um leið endurmat. Gerði í því sambandi að umtalsefni hugmyndir um mikla fækkun sveitarfélaga í kjölfar sameininga. Sagði hann mikilvægt að við verðum vakandi í þeirri umræðu og fylgjumst vel með. Árni ræddi gervigrasvöll og ábendingu Bjarkar um að í þessa framkvæmd sé ekki rétt að fara á þessari stundu. Hann taldi nýjan gervigrasvöll hins vegar muni hleypa miklu lífi í alla íþróttaiðkun.

Hjalti sagði að gert væri ráð fyrir umtalsverðum framkvæmdum fyrir utan gervigrasvöll og benti á ýmsar framkvæmdir væru fyrirhugaðar. Einnig ræddi hann nýtingu aðalvallar og sagði að menn hefðu fyrst og fremst viljað nýta hann til keppni. Sagði hann marga hafa sagt þennan íþróttavöll vera með þeim betri sem fyrirfinnast á landinu.

Fundargerð samþykkt.

Bæjarráð Hornafjarðar, 475. fundur,14. september 2009.

Fundargerð samþykkt.  

Bæjarráð Hornafjarðar, 476. fundur, 21. september 2009.

Hjalti sagðist vilja lýsa yfir ánægju með framkvæmdir við Álaugareyjarbryggju, vel hafi tekist til og verktakar eigi hrós skilið.

Fundargerð samþykkt.  

Bæjarráð Hornafjarðar, 477. fundur, 28. september 2009.

Björk ræddi endurskoðun fjárhagsáætlunar og ræddi þar á meðal launaáætlun. Óskaði hún skýringa á ýmsum liðum sem hækkað hafi eða farið fram úrupphaflegri áætlun.

Hjalti skýrði breytingar á launaáætlun og benti m.a. á að til starfa í leik- og grunnskólum hafi fjölgað starfsmönnum með full kennsluréttindi og þannig hækkað laun. Þá fór hann yfir framkvæmdir og hækkanir á þeim. Sagði m.a. að framkvæmdir við sundlaug hafi færst á milli ára. Þá sagði hann upphaflegar tölur frá verkfræðingum og hönnuðum við Grunnskóla Hornafjarðar hafi verið mun lægri en þær sem endanlega hafi komið  í ljós sem væri ekki óalgengt í endurbótum sem þessum. Það kæmi margt í ljós þegar hönnun væri lokið og einnig kæmi ýmislegt fram á framkvæmdatímanum sem ekki hafi verið fyrir séð.

Fundargerð samþykkt.  

Bæjarráð Hornafjarðar, 478. fundur,5. október 2009.

Fundargerð samþykkt.  

·         Bæjarstjórn Hornafjarðar 146. fundur 3. september 2009, fundargerð áður samþykkt.

2.        Endurskoðun fjárhagsáætlunar

Bæjarstjóri fór yfir endurskoðaða fjárhagsáætlun fyrir árið 2009 sem bæjarráð vísaði til afgreiðslu í bæjarstjórn.  Helstu breytingar á fjárhagsáætluninni eru:

·         Skatttekjur í A-B hluta hækka um 16,2 m.kr., fyrst og fremst vegna hækkunar á útsvari.  Heildarupphæð skatttekna er því um 1.059,5 m.kr. og tekjur samstæðunnar rúmlega 1.442 m.kr.

·         Útgjöldin til rekstrar aukast um 50 m.kr. og munar þar mest um hækkanir á launum um 25 m.kr., þ.m.t. hækkun tryggingargjalds og annar rekstrarkostnaður hækkar um 23,8 m.kr. 

·         Helstu liðir sem hækka eru skólaakstur um 4,5 m.kr., fyrirframgreiðsla á styrk til Golfklúbbs Hornafjarðar að upphæð 6,3 m.kr., jarðhitaleit í dreifbýli alls 7,3 m.kr. og niðurgreiddur matur í Grunnskóla Hornafjarðar hækkar um 2,2 m.kr.

·         Gert er ráð fyrir að uppfæra langtímalán um 6,5% á árinu en við fyrri endurskoðun var gert ráð fyrir 4,5% hækkun.  Stafar þetta af því að verðbólga hefur haldist hærri en áður var talið og gengi krónunnar veikst en ekki styrkst eins og spáð hafði verið.

·         Heildarupphæð gjalda samstæðunnar án fjármagnsliða er um 1.355 m.kr. en fjármagnsliðir eru um 87,8 m.kr.   

·         Rekstrarafgangur A-hluta verður samkvæmt endurskoðaðri áætlun jákvæður um 13,1 m.kr., hafnarsjóðs um 9,3 m.kr., Hornafjarðarveitna um 5 m.kr. en halli á rekstri kaupleiguíbúða er 27,7 m.kr. Rekstrarafgangur samanlagt fyrir A- og B hluta er því neikvæður um 293 þús.kr. sem er um 2,8 m.kr. verri  afkoma en fyrri áætlun gerði ráð fyrir.  

·         Fjárfestingar hækka um 40,3 m.kr. m.a. vegna þess að fjárveiting vegna byggingu sundlaugar færðist milli ára.    

·         Handbært fé í ársbyrjun er áætlað um 687,9 m.kr. sem er um 79,2  m.kr. hærra en fyrri áætlun gerði ráð fyrir og handbært fé í árslok er áætlað um 390,8 m.kr. sem er um 12,9 m.kr. hærra en fyrri áætlun gerði ráð fyrir.

Hjalti gerði grein fyrir að vinna við fjárhagsáætlun 2010 taki mið af gríðarlegum niðurskurði á vegum ríkisins og miklum tekjusamdrætti sem leiddi til rýrnunar jöfnunarsjóðs.  Taldi hann fjárhag sveitarfélagsins vel undirbúinn til að takast á við erfiða tíma og vísaði bæði til þess að rekstargjöld eru um 100 m.kr. lægri en rekstrartekjur, eiginfjárhlutfall afar sterkt og handbært fé frá rekstri gott.  Þá lagði hann til að endurskoðuð fjárhagsáætlun verði samþykkt.

Björn Ingi taldi að niðurskurður í okkar sveitarfélagi hafi verið lítill. Óttaðist hann að það gæti orðið brött brekka að fara ef við þurfum að fara í niðurskurð. Þetta liti vel út í dag en sagði að við þurfum að fara að horfa til þess að staðan geti versnað.

Árni sagði ánægjulegt hversu sterkt okkar sveitarfélag á þessum erfiðu tímum. Hann sagði ánægjulegt að útsvarstekjur væru meiri en áætlað var. Hann tók undir orð Björns Inga um að við þurfum að vera vel vakandi í rekstrinum og vera tilbúin að hagræða þar.

Árni lagði fram eftirfarandi bókun:

Bókun vegna fyrirhugaðs niðurskurðar í ríkisstofnunum

Stoðkerfi atvinnulífs, sýslumaður og önnur opinber starfsemi

·         Við breytingar sem fyrirhugaðar eru á opinberri starfsemi er mikilvægt að hafa í huga hversu langt er fyrir íbúa á Suðausturlandi að sækja þjónustu í önnur héruð.  Frá Höfn eru 300 km á Mið-Austurland og 400 km á Selfoss sem eru tveir næstu stóru þjónustukjarnar frá Höfn í Hornafirði.

·         Fyrir liggur að embættum sýslumanna og lögreglustjóra verði breytt, stoðkerfi atvinnulífs endurskipulagt og umræða um sameiningu sveitarfélaga er í deiglunni.

·         Í öllum þessum verkefnum má aldrei gleyma að tryggja verði að opinber þjónusta og starfsemi verði aðgengileg fyrir alla landsmenn.

·         Opinber þjónusta og starfsemi er grundvallaratriði í daglegu lífi fólks og niðurskurður sem blasir við má ekki bitna á íbúum einstakra byggðarlaga.  

Árni sagði mikilvægt að við höldum þessu til haga, við þurfum að halda vöku okkar og halda okkar sjónarmiðum á lofti.

Hjalti þakkaði Birni Inga fyrir hans ábendingar um óvissu þá sem við blasir. Hann minnti á að framlag Jöfnunarsjóðs hafi lækkað um 150 millj. Lagði áherslu á að lækkun á magni þjónustu geti blasað við til að ná fram lækkun á rekstrarútgjöldum. Þá minnti hann á að breytingar á Grunnskóla Hornafjarðar skili okkur verulegum fjárhæðum í lækkuðum rekstri. Þá sagði hann vera ákveðna vinnu í gangi hjá starfsmönnum við endurskoðun á rekstri. Hjalti sagði að árið 2011 munum við komast í góð mál með þau lán sem sveitarfélagið hefur tekið.

Bókun sem Árni bar fram borin undir atkvæði og var hún samþykkt samhljóða.

Endurskoðuð fjárhagsáætlun borin undir atkvæði og samþykkt með fjórum atkvæðum, tveir sátu hjá.  

3.        Fyrirspurnir  

Engar fyrirspurnir bárust.

Fundi slitið kl. 17:30