Fundargerð bæjarstjórnar 139

139. fundur

Fundur haldinn í Bæjarstjórn Hornafjarðar, fimmtudaginn 18. desember 2008, kl. 16:00 í Nýheimum.

 

Mætt voru: Reynir Arnarson, forseti bæjarstjórnar, Árni Rúnar Þorvaldsson, Elín Magnúsdóttir, Sigurlaug Gissurardóttir, Guðrún Ingimundardóttir,  Halldóra B. Jónsdóttir og Björn Ingi Jónsson.  Einnig: Hjalti Þór Vignisson bæjarstjóri, Ásta H. Guðmundsdóttir framkvstj. fjármálasviðs,  Stefán Ólafsson framkvstj. fræðslu- og félagssviðs og Haukur Ingi Einarsson framkvstj. tækni- og umhverfissviðs.

 

Forseti setti fund og bauð fundarmenn velkomna.  Þá bar hann undir fundinn að tekin verði til umræðu og afgreiðslu undir 444. fundargerð bæjarráðs tillaga að auglýsingu á grenndarkynningu sem snýr að óverulegri breytingu á deiliskipulagi vegna breytinga á Hafnarskóla og staðsetningu færanlegra kennslustofa á lóð skólans. Var það samþykkt.

1.        Fundargerðir

Bæjarráð Hornafjarðar, 443 fundur, 8. desember 2008.

Fundargerð samþykkt.

Bæjarráð Hornafjarðar, 444. fundur, 15. desember 2008 – send út í tölvupósti að fundi loknum.

Árni Þorvaldsson bar upp eftirfarandi tillögu að bókun

Bæjarstjórn felur tækni- og umhverfissviði að auglýsa grenndarkynningu sem snýr að óverulegri breytingu á deiliskipulagi vegna færslu á færanlegum kennslustofum, staðsetningu þeirra á nýjum stað við Hafnarskóla og þeim breytingum sem áformaðar eru á skólahúsnæðinu. 

Halldóra gerði að umtalsefni endurvinnslu úrgangs. Fagnaði hún áformum um að nýta lífrænan úrgang sem áburð og benti á þátt MATÍS í því sambandi sem hún taldi mikilvægan. Þá ræddi hún grenndargámstöðvar á Höfn og fjölda þeirra. Dró í efa að þessar gámastöðvar væru allar nauðsynlegar, taldi að frekar ætti að lengja opnunartíma gámaports. Óskaði hún eftir því að menn endurskoðuðu áform um fjölgun gámastöðva.

Hún spurði um stofn- og rekstrarkostnað vegna grenndargámastöðvanna.

Sigurlaug sagðist sammála Halldóru um hvað einstaklingar og fyrirtæki væru meðvituð um meðferð úrgangs. Hún ræddi flokkun úrgangs, sagði hana hafa verið tekna í smáum skrefum. Minnti einnig á tilboð um minni sorptunnur til heimila. Hún sagði skiptar skoðanir um fjölda grenndargámastöðva og nauðsyn á þeim. Sagðist sjálf vera þar af gamla skólanum. Eftir yfirferð umhverfisnefndar hafi þessi tillaga um fjölda grenndargámastöðva verið niðurstaðan. Sigurlaug sagði kostnað við hverja grenndargámastöð, þ.e. innkaup á efni vera um 100 þúsund, uppsetning ekki innifalin.

Hjalti ræddi förgun lífræns úrgangs. Sagði hugmynd að nýtingu hans hafa komið úr ráðhúsinu. Sagði hann aðkomu MATÍS einnig mikilvæga. Þá sagði hann alla flokkun úrgangs vera mikilvæga. Þannig mætti draga úr magni urðaðs sorps sem sparaði bæði land og ekki síður mikla fjármuni. Einnig ræddi hann ýmsar aðrar aðferðir við flokkun sorps, svo sem þriggja tunnu kerfi, sem hann taldi ekki endilega vera heppilega leið. Þá tók hann undir orð fyrri ræðumanna um árangur við flokkun sorps.

Undir þessum lið las Halldóra upp eftirfarandi bókun vegna samnings um tækniþjónustu:

Undanfarin ár hefur tæknifræðingur ekki verið starfandi hjá sveitarfélaginu.  Við teljum að nú sé tækifæri að fá tæknimenntað fólk til starfa vegna breyttra aðstæðna í þjóðfélaginu. Það er í anda okkar sjálfstæðismanna að verkefnum sé úthýst í þessum málaflokki sem öðrum. En gæta verður þess að það hafi hagræðingu í för með sér og þegar gerðir eru samningar, s.s. sem um tækniþjónustu, þarf að gæta þess að hún sé vel skilgreind og auki ekki kostnað fyrir sveitarfélagið.

Þá ræddi hún sorpmálin og spurði um heildarkostnað við grenndargámastöðvar, þ.e. efniskaup, uppsetningu og tæmingu þeirra. Taldi hún mikilvægt að upplýsa íbúana um hvað verður um sorpið og jafnframt að nýta fyrst og fremst gámaportið. Hún rifjaði upp að fyrir um áratug þegar gámastöðin var sett upp og til stóð að flokka sorp í endurnýtingu, þá hafi fljótlega markaðir lokast.

Hjalti sagðist taka undir flest það sem fram kemur í bókuninni. Þá sagði hann frá samningsferli við Verkfræðiþjónustuna ehf. Sagði væntanlegan samning eiga að standa í eitt ár. Að þeim tíma loknum mætti endurskoða ákvörðun um þessi mál. Þá ræddi hann kosti við að hafa hér verkfræðistofu og taldi að sú þjónusta gæti vaxið. Hjalti sagði ekki hafa verið tekna ákvörðun um grenndargámastöðvarnar. Taldi meginkostnaðinn liggja í því efni sem þyrfti að kaupa til stöðvanna. Starfsmenn gámaports sæju síðan um að tæma stöðvaranar.

Sigurlaug sagði núverandi umhverfisnefnd vera meðvitaða um þann árangur sem áður hefði náðst í sorpflokkun. Því hefði nefndin ákveðið að taka eitt skref í einu. Þá sagði hún peninga skila sér til baka fyrir flokkað sorp. Héðan hefðu nú farið um 130 þús. kíló af flokkuðu sorpi. Einnig minnti hún á grenndargámastöðvar sem þegar eru til staðar. Ekki félli til stofnkostnaður þeirra vegna. Sigurlaug sagðist vera stolt af þeim smáu skrefum sem stigin hafa verið og því að þetta hafi allt verið unnið á heimavelli. Einnig ræddi hún bókun umhverfisnefndar vegna tröllasmiðs, bókun sem hún taldi vera lélega. Hún sagði friðlýsingu tröllasmiðs geta verið verðmæta en margs þurfi að gæta áður en slíkt verði ákveðið.

Árni ræddi bókun sjálfstæðismanna og sagðist geta tekið undir flest það sem þar kemur fram. Sagðist ánægður með hvað bæjarstjórnarmenn væru í raun sammála um það mál. Hann lýsti yfir ánægju með árangur í sorpmálum og flokkun sorps.

Björn Ingi taldi sig koma frá heimili sem flokkaði vel rusl. Hann sagðist setja spurningu við fjölda grenndargámastöðva og nauðsyn á þeim. Minnti á að það þurfi að tæma núverandi stöðvar sem væru ýmist fullar eða þær ekki til staðar. Hann sagði grundvallaratriði að fá fram hversu mikið magn fari um grenndargámastöðvarnar. Þá sagði hann mikilvægt að það komi fram að í dag fari ekki allt sorp í stóra holu í Lóni.

Hjalti taldi fólk vera orðið vel meðvitað um hvert sorp fari. Þá benti hann á söfnun bænda á rúlluplasti til endurvinnslu sem gott dæmi um árangur.

Tillaga Árna Þorvaldsson að bókun borin undir atkvæði og hún samþykkt samhljóða.

Fundargerð samþykkt.

Bæjarstjórn Hornafjarðar 137. fundur 4. desember  2008 fundargerð áður samþykkt.

2.        Fjárhagsáætlun 2009 – fyrri umræða

Bæjarstjóri fylgdi áætluninni úr hlaði og sagði m.a. að erfitt væri að gera fjárhagsáætlun nú vegna aðstæðna í þjóðfélaginu og að gert væri ráð fyrir að fjárhagsáætlunin  verði endurskoðuð ársfjórðungslega.  Fór hann yfir ýmsa þætti sem áhrif hafa á fjárhag sveitarfélagsins og helstu áhersluþætti í rekstri sveitarfélagsins á næsta ári.

Helstu niðurstöðutölur fjárhagsáætlunar 2009 við fyrri umræðu eru þessar:

A-hluti:

Skatttekjur bæjarsjóðs eru áætlaðar 1.066,5 m.kr., aðrar tekjur 178,0 m.kr. Tekjur samtals eru því kr. 1,244,5 m.kr. Rekstur málaflokka er áætlaður um 1.200 m.kr. Fjármagnsliðir eru 22,7 m.kr. Mismunur tekna og gjalda A-sjóðs sveitarfélagsins er því afgangur  um 21,6 m.kr. Handbært fé frá rekstri eru 124,7 m.kr., fjárfestingar 200 m.kr., afborganir langtímalána 91,2 m.kr. og handbært fé í árslok er áætlað 343,7 m.kr.

B-hluti:
Hornafjarðarhöfn:  Gert er ráð fyrir að tekjur verði 103 m.kr. en rekstrargjöld 79,9 m.kr. Tekjur umfram gjöld verði því um 23,1 m.kr. Fjármagnsgjöld eru 18,3 m.kr. Tekjur umfram gjöld eru því um 4,8 m.kr. Handbært fé frá rekstri 21,4 m.kr., fjárfestingar 22,6 m.kr., tekin ný langtímalán 32 m.kr., afborganir langtímalána 9,5 m.kr. og handbært fé í árslok 0,6 m.kr.

 

Hornafjarðarveitur:   Gert er ráð fyrir að tekjur verði 57,1 m.kr., rekstrargjöld 31,2 m.kr. fjármagnsgjöld eru 28,8 m.kr. Tekjur umfram gjöld verði um 2,3 m.kr.  Handbært fé frá rekstri 27,1 m.kr. og  fjárfestingar 24,5 m.kr.

 

Leiguíbúðir:  Gert er ráð fyrir að tekjur verði um 28,8 m.kr.  en rekstrargjöld um 21,9 m.kr. fjármagnsgjöld eru um 33,5 m.kr.  gjöld umfram tekjur verði um 26,6 m.kr.  Handbært fé frá rekstri 0,9  m.kr. og afborganir langtímalána 8,5 m.kr.

 

Forseti bæjarstjórnar las upp álagningarreglur 2009 sem eru eftirfarandi:

 

Útsvar                                                  13,28%

Fasteignaskattur á íbúðahúsnæði           0,50% af fasteignamati

Fasteignaskattur á atvinnuhúsnæði         1,62% af fasteignamati

Lóðaleiga                                             1,00% af fasteignamati

Holræsagjöld                                        0,30% af fasteignamati

Vatnsgjöld                                            0,18% af fasteignamati

Sorphreinsigjald kr./pr.einingu   12.500.-

Sorpurðunargjald kr./pr.einingu   6.200.-

Sorpurðunargjald  ½ kr./pr.einingu          3.100.-

Hunda- og kattaleyfisgjöld í samræmi við reglugerð.

Gjaldskrár þjónustugjalda hækka ekki á milli ára.

 

Björn Ingi las upp eftirfarandi bókun sjálfstæðismanna vegna fyrri umræðu um fjárhagsáætlun 2009:

Tekjur sveitarfélagsins samanstanda af skatttekjum og þjónustugjöldum frá íbúunum. Þetta eru fjármunir fólksins sem býr í sveitarfélaginu og því ber bæjarstjórn að gæta aðhalds og nýta fjármuni vel og veita íbúunum sem besta  þjónustu. Bæjarfulltrúar starfa í umboði fólksins.

Við sjálfstæðimenn höfum stutt þau verkefni sem við teljum rétt að vinna. Má þar nefna sölu á Nesjaskóla og að flytja allt skólahald Grunnskóla Hornafjarðar til Hafnar. Þetta er eðlileg ráðstöfun þar sem nemendum hefur fækkað umtalsvert og fyrirsjáanlegt er að þeim mun fækka enn frekar á næstu árum. Með þessum breytingum verður mikil hagræðing. Það er afar mikilvægt að bæjarsjóður selji og losi sig við það húsnæði sem ekki er fyrirsjáanlegt að þurfi fyrir reksturinn um ókomin ár. Með því vinnst tvennt, fjármunir sparast og húsnæði nýtist þeim sem það kaupir og eflir annan atvinnurekstur í héraðinu.

Þegar meirihlutinn ákvað að skólastjórnendur yrðu 3 í Grunnskóla Hornafjarðar árið 2006 var stjórnendum fækkað úr 6 í 5 og ekkert dregið úr stjórnunarkostnaði við skólana. Hægt hefði verið að dragar úr þeim kostnaði  um 13.7 milljónir á ári, sem gerir 41 milljón á þriggja ára tímabili. Núverandi fyrirkomulag var samþykkt af meirihlutanum þrátt fyrir að bæði Samband ísl.  sveitarfélaga og Kennarasamband Íslands hafi mælt eindregið gegn þessu. Þessa fjármuni hefði verið hægt að nýta í innra starf skólans.

Nú stendur til að fækka skólastjórum. Við sjálfstæðismenn teljum að rétt sé að einn skólastjóri verði yfir Grunnskólanum og leggjum áherslu á að stjórnunarstöður verði auglýstar.  Í nýsamþykktri starfsmannastefnu segir í kaflanum  „Ráðning, móttaka og starfslok“: „Það er markmið sveitarfélagsins að ráða ávallt sem hæfasta starfsmenn. Í því skyni að tryggja ofangreint markmið hefur sveitarfélagið sett sér reglur um auglýsingu starfa“.  Þegar skipulagsbreytingar eru gerðar er almennt  talið að um nýtt starf sé að ræða og því sanngjarnast gangvart öllum þeim sem breytingarnar taka til að þeir hafi möguleika á að sækja um. Góður skóli byggir á góðu starfsfólki bæði stjórnendum og öðrum.

Í ljósi efnahagsástandsins er mikilvægt að aðhalds sé gætt í rekstri sveitarfélagsins en jafnframt að ekki sé skorið niður þeir liðir sem geta stutt við atvinnu, nýsköpun og félagstarf frjálsra félaga í sveitarfélaginu. Mikilvægt er að þeir fjármunir sem þarna um ræðir séu nýttir af skynsemi.

Nú er ljóst að framlög til verkefna frá ríki verða minnkuð verulega á árinu 2009 og sveitarsjóður verður að vera í stakk búinn til að leggja ákveðnum verkefnum lið tímabundið,  frekar en sjá á bak starfsemi sem verið hefur að eflast undanfarin ár. Má þar nefna starfsemi Háskólasetursins sem nú er í mikilli óvissu.

Björn Ingi sagði það sína skoðun að sveitarfélagið liggi með fasteignir sem það hefur ekkert við að gera. Því sé ekki skynsamlegt að leggja fé til endurbóta á húsnæði sem rétt væri að selja.

Árni lagði áherslu á sérstakar aðstæður í þjóðfélaginu og sagði við ramman reip að draga í efnahagsmálum þjóðarinnar. Taldi hann tvö mögur ár framundan í efnahagsbúskap þjóðarinnar. Í þessu andrúmslofti væri okkar fjárhagsáætlun lögð fram og bæri hún þess merki. Minnti m.a. á lækkandi framlög Jöfnunarsjóðs sem hefðu áhrif á tekjur sveitarfélagsins. Hann taldi okkur (Íslendinga) standa eins nálægt þjóðagjaldþroti og hugsast getur. Þá ræddi hann stöðu Háskólasetursins og Heilbrigðisstofnunar Suðausturlands og að e.t.v. þurfi sveitarfélagið að leggja meira í þann rekstur. Hann sagði mega þakka fyrir að skuldastaða sveitarfélagsins sé nokkuð góð og ekki hafa verið reistir hurðarásar um öxl á undanförnum árum. Árni sagði að þegar búið verði að flytja alla kennslu Grunnskóla Hornafjarðar á Höfn hafi náðst mikil hagræðing. Hann ræddi breytingar á skólastjórn og sagði að sá sem væri í hverju skólahúsi þurfi að hafa skýrt umboð til að stýra daglegum rekstri. Sú leið hafi verið mörkuð 2007 og áform um að halda henni og þá með því að skólastjórum fækki um einn. Hann benti á að í yfirstjórn skólamála hafi verið í heild 8 manns en stefnt að því að þeir verði 4 sem hann taldi góðan árangur í hagræðingu.

Hjalti sagði margt ágætt í bókun sjálfstæðismanna. Hann fór yfir hagræðingu í rekstri grunnskólans, bæði með flutning skólahalds á Höfn og fækkun stjórnenda. Hann sagði þennan árangur hafa náðst í góðri sátt. Hann sagði ekki vera að myndast ný staða hvað varðar skólastjóra, einn þeirra muni einfaldlega hætta. Þá hafi verið ákveðið að fækka deildarstjórum úr tveimur í einn. Sú staða muni verða auglýst. Hjalti sagði mikilvægt að fara yfir málefni Háskólaseturs og greindi frá vinnu sem þegar hefur farið fram um það mál. Ræddi um möguleika á tímabundnu framlagi frá sveitarfélaginu vegna þess.

Halldóra fór yfir vinnu við gerð fjárhagsáætlunar. Sagði hóp hafa verið valinn til að fara yfir fjárhagsáætlun og hafi sjálfstæðismenn verið tilbúnir í þá vinnu. Hún sagðist ekki sjá að mikil breyting hafi orðið á fjárhagsáætlun frá fyrstu umræðu í október. Hún sagði menn hafa búið við gríðarlegt góðæri undanfarin ár og að Jöfnunarsjóður hafi vaxið úr um 25% af tekjum sveitarfélagsins í 36% og jafnvel verið að nálgast 40%. Halldóra sagði rekstrarniðurstöðu fjárhagsáætlunar vera um 2 millj. í afgang. Þá ræddi hún breytingar á skólastjórn grunnskólans og benti á nemendaþróun frá 1995. Hún sagði um 5 milljónir hafa verið settar aukalega á ári í skólastjórnina þrátt fyrir fækkun skólastjórnenda því laun hafi hækkað. Þá ræddi hún stjórn leikskólanna og sagði núverandi meirihluta vera mjög tengdan skólasamfélaginu. Halldóra segir að verið sé að breyta stjórnfyrirkomulaginu ekki bara fækka. Hún sagðist vel geta tekið á sig að í a.m.k. einum skóla hafi ekki verið auglýst staða skólastjóra og bætti við að sennilega hafi staða skólastjóra ekki verið auglýst í um tvo áratugi við Grunnskóla Hornafjarðar. Halldóra sagðist hafa áhyggjur af því hvað reksturinn tæki stóran hluta skatttekna. Þá ræddi hún möguleika á frekari niðurskurði af hálfu ríkisins umfram það sem kynnt hefur verið í fjárlögum. Hún ræddi viðhald fasteigna og lagði áherslu á að það viðhald nýtist samfélaginu sem best. Benti á áætlanir um endurbætur á húsnæði í sveitum í því tilliti. Gerði m.a. athugasemdir við áætlaðar 10 millj. til endurbóta á Holti. Sagði húsið ekki verða söluhæfara við það. Þá sagði hún að sala Nesjaskóla muni skila miklu fyrir viðkomandi samfélög. Halldóra sagði mikilvægt að halda utan um allt atvinnulíf og ekki síst um fjölskyldur í samfélaginu.

Hjalti sagði að stefnt væri að því að verja atvinnulíf og fjölskyldur og ekki að segja upp starfsfólki. Hann sagði sveitarfélagið hafa safnað í sjóði í góðæri undanfarinna ára. Því værum við betur í stakk búin til að takast á við þann vanda sem við blasir. Þá benti hann einnig á sölu eigna sem einnig hafi hjálpað til. Hann ræddi félagsheimili í sveitum og sagði fólkið sem þar bjó hafa byggt þau. Sagðist t.d. ekki hafa trú á að í Nesjum væri sátt um að selja Mánagarð. Þessi hús væru að verulegu leyti byggð af sjálfboðaliðum. Viðhaldið hafi hins vegar skort. Hjalti spurði hvort okkur væri treystandi til að reka þetta sveitarfélag. Sagði næstu ár muni sveitarsjóður skila afgangi. Ekki stæði til að skera hér niður opinbera þjónustu. Hjalti sagði lykilatriði að hlusta á skólasamfélagið á breytingatímum og einnig foreldra. Þá greindi hann frá vinnu við breytingar á stjórnun skólanna og fundi um þau mál. Spurði hvort menn hafi orðið vör við mikil átök um þau mál í samfélaginu og benti í því sambandi á mikil átök um skólamál 1996. Hjalti spurði aftur hvort bæjarstjórn og starfsmönnum væri treystandi til að stjórna þessu sveitarfélagi og sagði svarið liggja í augum uppi.

Árni taldi Halldóru hafa farið með staðlausa stafi eða dylgjur þegar hún ræddi um tengsl bæjarstjórnarmanna við skólasamfélagið. Sagðist ekki geta fallist á orð hennar. Hann sagði það ekki standast skoðun að menn veigruðu sér við að taka ákvarðanir. Þá lýsti hann ánægju með umræðu um félagsheimili í sveitum og sagði sveitarfélagið bera skyldu til þess að viðhalda þeim húsum. Árni sagði það vera ákveðið áhyggjuefni hversu hlutdeild Jöfnunarsjóðs í tekjum sveitarfélagsins hafi hækkað undanfarin ár.

Halldóra sagðist sátt við að Björn Ingi væri talinn betri ræðumaður en hún. Hún sagði þrjá bæjarfulltrúa meirihlutans starfa í skólum. Það væri hennar skoðun að því væri erfiðara fyrir það fólk að taka ákvörðun um skólamál. Halldóra sagði sveitarfélagið ekki hafa gert neitt í góðærinu og benti meðal annars á langan byggingartíma sundlaugar. Halldóra svaraði spurningu Hjalta og sagði sjálfstæðismönnum vera betur treystandi til að stjórna sveitarfélaginu.

Árni sagði að því hafi aldrei verið leynt hvaða bæjarfulltrúar vinni í skólum sveitarfélagsins. Sagði þá staðreynd hins vegar ekki hafa nein áhrif á þær ákvarðanir sem teknar hafa verið um skólamál, og ítrekaði að slíkar ákvarðanir hafa verið teknar.

Sigurlaug gerði að umtalsefni þær framkvæmdir sem unnar hafa verið á vegum sveitarfélagsins. Þá benti hún á að hér hafi verið byggð upp atorka sem væri okkar mesta auðlegð. Þá sagðist hún vera ánægð með breytingar í skólamálum og hvernig til hafi tekist. Sagðist vona að niðurskurður hjá Heilbrigðisstofnun Suðausturlands verði unnin í jafnmikilli sátt og breytingar á skólamálum. Þá ræddi hún félagsheimili í sveitum. Sagði ekki nóg að húsin verði falleg heldur þurfi þar öflugt starf og að það muni verða raunin.

Björn Ingi sagði það vera djúpt í árinni tekið hjá bæjarstjóra að taka eigi félagsheimilin af íbúum sveitanna. Benti á 200 milljóna tekjusamdrátt hjá sveitarfélaginu og það þurfi að hafa í huga við áætlaðar endurbætur. Hann lagði áherslu á breytta tíma og fjölda sala sem risið hafa í sveitum. Spurði hvort félagsheimili eigi að keppa við þá sali.

Hjalti lagði áherslu á að vinna við félagsheimilin verði unnin í sátt við nærsamfélagið. Hann sagði Jöfnunarsjóð hafa verið um 35% af tekjum 2007 en áætlað að það hlutfall verði um 29% árið 2009. Hins vegar muni framlög Jöfnunarsjóðs lækka um 30% á milli ára samkvæmt áætluninni.

Forseti bar álagningareglur vegna fárhagsáætlunar 2009 undir atkvæði og voru þær samþykktar samhljóða.

Bæjarstjórn samþykkir samhljóða að vísa fjárhagsáætlun 2009 til annarrar umræðu í bæjarstjórn.

 

3.        Breytingar á aðalskipulagi vegna nýs hringvegar yfir Hornafjarðarfljót – fyrri umræða

Árni Þorvaldsson kynnti breytingartillögu á aðalskipulagi og lagði fram eftirfarandi tillögu að bókun um málið:

Í ljósi úrskurðar Umhverfisráðuneytisins 11. maí 2007, í kæru Vegagerðarinnar vegna ákvörðunar Skipulagsstofnunar um matsáætlun vegna mats á umhverfisáhrifum lagningar Hringvegar um Hornafjarðarfljót, sér bæjarstjórn ekki ástæðu til þess að taka afstöðu til leiða 4 og 5 sem fjallað er um í Umhverfisskýrslunni.

Auk þess telur bæjarstjórn leiðir 4 og 5 ekki koma til greina vegna þess að þær uppfylla síður kröfur um styttingu á hringvegi, styttingu á vegalengdum innan sveitarfélagsins og bætt umferðaröryggi. Valið stendur því á milli fjögurra leiða;1, 2, 3 og 3b. 

Bæjarstjórn er sammála um að leið 2 hafi umtalsverða ókosti í för með sér. Í fyrsta lagi hefur leiðin umtalsverð áhrif á landslag á austasta hluta leiðarinnar, þ.e. eftir að hún tekur land við Dilksnes. Gert er ráð fyrir að hún liggi í gegnum stór klapparholt sem eru einkennandi fyrir landslag á þessum slóðum. Ennfremur liggur hún meira yfir sjávarfitjar en leiðir 3 og 3b. Á leið 2 um Skógey og á Mýrum liggur hún á votlendisgróðri. Bæjarstjórn hafnar því að leið 2 verði farin og lítur svo á að valið standi fyrst og fremst á milli leiða 1, 3 og 3b.

Bæjarstjórn telur einsýnt að leiðir 3 og 3b hafi minni áhrif á landslag en leið 2 auk þess að leiðir 3 og 3b skera jarðir landeigenda í sveitarfélaginu minna en leiðir 1 og 2. Á hinn bóginn liggja leiðir 3 og 3b ekki í sama mæli yfir sjávarfitjar og leið 2.

Ljóst er að leið 1 mun á heildina litið hafa minni áhrif á náttúrfar en leiðir 2, 3 og 3b. Ákveðnir annmarkar eru þó á þeirri leið. Lega leiðarinnar sker t.d. í sundur ræktunarlönd auk þess sem hún skerðir núverandi félags- og útivistarsvæði í Nesjum. Umhverfisáhrif leiðar 1 eru talin minni í Hornafirði, Skógey og á Mýrum en umhverfisáhrif leiða 2, 3 og 3b. Á móti kemur að leið 1 styttir vegalengdir að þjónustukjarna sveitarfélagsins mun minna en leiðir 2, 3 og 3b. Munurinn er 3,3 – 3,5 km. á leiðum 3 og 3b annars vegar og leið 1 hins vegar. Leið 2 er 2,6 km. styttri en leið 1.

Stytting vegalengda að þjónustukjarna sveitarfélagsins á Höfn er forsenda áframhaldandi byggða- og atvinnuþróunar á Mýrum, Suðursveit og Öræfum. Að stytta leiðir að þjónustukjarna sveitarfélagsins styður við þá viðleitni að gera sveitarfélagið að einu búsetu- og atvinnusvæði. Jákvæð samfélagsleg áhrif yrðu því mest fyrir Sveitarfélagið Hornafjörð ef farin verður annaðhvort leið 3 eða 3b.

Í greinargerð gildandi aðalskipulags Sveitarfélagsins Hornafjarðar kemur m.a. fram að markmiðið með lagfæringum á þjóðvegi 1 sé „einkum að stytta akstursleiðir og leggja af krókótta og blinda kafla á þjóðvegi 1 og fækka brúm. Það leiðir til aukins umferðaröryggis.“  Leiðir 3 og 3b leiða til aukins umferðaröryggis fram yfir aðrar leiðir vegna fækkunar vegtenginga við þjóðveg og til verður tvöfalt vegakerfi þar sem gömlu vegirnir verða fáfarnari innansveitarvegir, sem munu m.a. höfða til ferðamanna.

Í samráðsferli við gerð umhverfisskýrslunnar voru haldnir nokkrir borgarafundir. Á fundi, sem haldinn var í Holti á Mýrum, kom fram mikill vilji íbúa að valin yrði sú leið sem stytti vegalengdina til Hafnar sem mest. Sömu sjónarmið voru ríkjandi á borgarafundi á Höfn sem og á fundi með samgönguráðherra sem haldinn var í Nýheimum. Skiptar skoðanir voru um málið á borgarafundi, sem haldinn var í Mánagarði í Nesjum og þar komu m.a. fram áhyggjur hjá nokkrum landeigendum á áhrifin sem veglagning myndi hafa á náttúrufar sem og á starfsemi þeirra, hvort heldur um er að ræða ferðaþjónustu eða landbúnað. 

Bæjarstjórn er sammála um að stytting vegalengda og þar með bætt aðgengi að þjónustukjarna sveitarfélagsins, bætt umferðaröryggi og greiðfærni eigi að  vera grundvallarmarkmið í aðalskipulagi sveitarfélagsins vegna nýlagningar vegar yfir Hornafjarðarfljót. Þeim markmiðum verður best náð með því að fara leið 3 eða 3b. Þrátt fyrir að leið 1 hafi á heildina minni neikvæð umhverfisáhrif en leiðir 3 og 3b, þá er sú stytting á vegalengdum innan sveitarfélagsins, sem leiðir 3 og 3b skila umfram leið 1, það mikil að bæjarstjórn telur að þau jákvæðu samfélagslegu áhrif, sem hljótast af leiðum 3 og 3b með bættu aðgengi að þjónustukjarnanum á Höfn, vegi þyngra en minni neikvæð umhverfisáhrif á leið 1.

Leiðir 2, 3 og 3b hafa það allar sammerkt að stór hluti Nesjasveitar liggur ekki lengur í alfaraleið. Bæjarstjórn telur mikilvægt að merkingar og auglýsingar verði settar upp við gatnamót þjóðvegar og Hafnarvegar þar sem þjónusta í sveitarfélaginu verði auglýst. Ennfremur er mikilvægt að við framkvæmd verksins verði gætt að fullum vatnsskiptum undir brýr sem byggðar verða í tengslum við framkvæmdina og þannig komið til móts við þær áhyggjur sem fram hafa komið.

Helsti munur á milli leiða 3 og 3b felst í því að leið 3 liggur yfir Flóa í Skarðsfirði sem er á náttúruminjaskrá en 3b gerir það ekki. Leið 3b hefur því minni neikvæð umhverfisáhrif í för með sér en leið 3.

Það er því niðurstaða bæjarstjórnar að mæla með því að gerð verði breyting á gildandi aðalskipulagi Sveitarfélagsins Hornafjarðar, sem miðar að því að leið 3b verði sett inn á aðalskipulag. Helstu rökin fyrir þeirri niðurstöðu eru umtalsverð stytting á þjóðvegi 1, meiri stytting vegalengda innan sveitarfélagsins samanborið við aðra valkosti sem skoðaðir eru, stórbætt aðgengi íbúa að þjónustukjarna sveitarfélagsins, aukið umferðaröryggi og greiðfærni auk þess að leið 3b hefur í för með sér minni neikvæð umhverfisáhrif en leið 3.

Árni lagði til að þessi bókun verði samþykkt og henni vísað til Umhverfisráðuneytis. Þetta væri hins vegar aðeins eitt skref af mörgum á þeirri leið sem stefnt er að í þessu máli. Hann sagði það hafa verið töluverð vonbrigði þegar Vegagerðin á sínum tíma mælti með Leið 1. Sagði hann allar forsendur vera til þess að við getum verið sátt við það skref sem við erum að stíga í dag.

Halldóra ræddi um breytingu á veglínu og sagði að einnig væri verið að taka þverbraut út af skipulagi. Taldi hún mikilvægt að til framtíðar sé mikilvægt að gert verði ráð fyrir þverbraut á aðalskipulagi.

Halldóra las upp eftirfarandi tillögu að bókun sjálfstæðismanna vegna aðalskipulags sem hún óskaði eftir að forseti bæri undir atkvæði á fundinum:

Í ljósi mikilvægis  þess að möguleiki sé á að þverbraut við Hornafjarðarflugvöll geti komið síðar leggur bæjarstjórn Hornafjarðar áherslu á að land það sem Flogstoðir eiga nú og ekki er í notkun flugvallarins verði ekki selt heldur nýtt til makaskipta á landi þegar nákvæm lega nýrrar þverbrautar hefur verið ákveðin.

Halldóra benti á að það land sem gamla þverbrautin lá áður væri eign Flugstoða samkvæmt þeim upplýsingum sem hún hefði. 

Árni tók undir bókun sjálfstæðismanna og sagði mikilvægt að þverbraut verði fundinn staður.

Tillaga sjálfstæðismanna borin undir atkvæði og hún samþykkt samhljóða.

Tillaga Árna um að auglýst verði breytingartillaga á aðalskipulagi eins og gert er ráð fyrir í skipulags- og byggingarlögum borin undir atkvæði og hún samþykkt samhljóða.

4.        Samningur milli Sveitarfélagsins Hornafjarðar og Rolf Johansen & Co. um átöppun á vatni og sölu innanlands og utan

Hjalti kynnti samninginn sem unnið hefur verið að síðan í haust.  Gert væri ráð fyrir að nýta vatnslind við Grjótbrú í Hólalandi sem sveitarfélagið réði yfir. Hjalti sagði að viðsemjendur hafi óskað eftir trúnaði um ákveðna þætti samningsins, svo sem um ákveðin verð. Samningurinn gerir ráð fyrir að innan fjögurra ára verði hafin uppbygging á átöppunarverksmiðju og innan fimm ára verði hafinn starfsemi.  Gerði Hjalti grein fyrir ýmsum þáttum er snúa að sveitarfélaginu sem er t.d. að rennslismæla lindina sem fyrirhugað er að taka vatnið úr og mæla gæði vatnsins.  Upplýsti Hjalti að lágmarki yrðu um fimm störf að ræða sem gætu orðið fleiri ef sala á vatninu gengur eins vel og fyrirtækið leggur upp með.  Brýndi Hjalti fólk um að gera sér ekki of miklar væntingar til þessa samnings en hins vegar væri verið að skoða mjög áhugavert verkefni sem styrkt gæti hér atvinnulíf og aukið fjölbreytni. Hjalti taldi áhættu sveitarfélagsins vegna þessa samnings í reynd ekki vera neina. Lagði hann til að samningurinn verði afgreiddur í dag í bæjarstjórn og skrifað undir hann fyrir áramót.

Halldóra sagði samninginn vera merktan trúnaðarmál og því ekki auðvelt að fjalla um hann. Hún sagði samninginn vera bindandi fyrir framtíðina. Sagði það ákaflega gleðilegt að fyrirtæki hefði áhuga á að reisa hér vatnsverksmiðju. Athugasemdir hennar sneru því ekki að því að hún væri á móti slíkri atvinnustarfsemi. Hún taldi tímann til að ljúka þessum samningi vera skamman. Sagðist frekar hafa viljað sjá bindandi yfirlýsingu um málið og bæjarráði síðan falið að ljúka því. Þá gerði hún ákveðnar athugasemdir við orðalag samningsins sem hún taldi óljóst og lagði ríka áherslu á að vel verði vandað til samningsgerðar sem þessarar. Hún lagði til að bæjarráð yrði falið að ljúka gerð samningsins.

Sigurlaug lýsti því yfir að hún treysti starfsmönnum og bæjarráði vel fyrir þessu máli. Hún fagnaði þessum áformum um vatnsútflutninginn og sagðist leyfa sér að tengja þessi áform við Vatnajökulsþjóðgarð og þá hreinu ímynd sem fælist í tilvist hans. Sagðist trúa því að fleiri fyrirtæki muni horfa í þessa átt.

Hjalti sagði hér stórt mál vera til umræðu. Hann treysti sér fullkomlega til að standa við þennan samning. Sagði að hægt verði að laga orðalag ef það væri á einhvern hátt ekki ljóst. Sagði hann þennan samning vera ólíkan hugmyndum Þjóðverja sem kaupa vildu héðan vatn hvað ábyrgð sveitarfélagsins snerti. Hann sagðist taka undir að það geti verið erfitt fyrir bæjarfulltrúa að taka ákvörðun í þessu máli.

Björn Ingi sagði þetta vissulega vera mjög stórt mál. Hann sagðist hafa verið á móti hugmyndum Þjóðverjanna sem hér voru á ferð. Hann sagði það skipta miklu máli að þessi samningur stæðist alla skoðun til framtíðar. Varaði hann við ákveðnum hættum sem fælust í verðþróun vatns samkvæmt samningnum. Einnig ræddi hann ákveðið orðalag í samningnum sem gæti orkað tvímælis þegar horft er til framtíðar.

Hjalti sagðist ítreka það sem hann hafði sagt um möguleika á endurskoðun á verði vatnsins samkvæmt samningnum. Hjalti benti á að við værum ekki að nota þetta vatn í dag. Sagðist hann geta fallist á að bæjarstjórn framselji til bæjarráðs að klára samninginn á næsta fundi ráðsins sem verður fyrir jól. Bæjarstjórn þyrfti að gera sér grein fyrir því að taka þurfi afstöðu til meginatriða þessa samnings.

Reynir sagðist líta svo á að samningurinn verði í meginatriðum tilbúinn þegar hann hefur verið afgreiddur hér í dag.

Halldóra sagðist menn vera sammála um það að ganga til samninga. Hennar tillaga væri að fela bæjarráði að klára samninginn og breyta ákveðnum greinum hans ef þurfa þykir. Mörg atriði þurfi að fara ofan í saumana á. Vanda þurfi samningsgerðina, sagði Halldóra.

Reynir sagðist ekki vita hverjir væru hræddir við að klára þetta mál. Ekki væri hræðsla við það að ljúka samningnum hér í bæjarstjórn. Ef það væri til að leysa málið mætti fela bæjarráði að klára málið.

Árni sagðist geta samþykkt samninginn hér í bæjarstjórn. Sagðist einnig geta komið til móts við hræðslu minnihlutans og vísa samningnum til afgreiðslu í bæjarráð að því gefnu að þar verði hann kláraður.

Björn Ingi sagðist vona að það sé orðin ákvörðun að samningurinn verði kláraður í bæjarráði á Þorláksmessu.

Árni sagði það sinn skilning að bæjarráð hafi ekki umboð til mikilla breytingar á samningunum við sína afgreiðslu.

 

Forseti bar tillögu um  að fela bæjarráði að ljúka samningi milli Sveitarfélagsins Hornafjarðar og Rolf Johansen & Co. um átöppun á vatni og sölu innanlands og utan. Var það samþykkt samhljóða.

5.        Fyrirspurnir   

Halldóra B. Jónsdóttir lagði fram eftirfarandi fyrirspurn (skáletrað):

Ljóst virðist að Samvinnutryggingar/Gift fjárfestingarfélag er á leið í gjaldþrot, ef marka má skrif fjölmiðla. Gríðarlegir fjármunir voru í sjóðum félagsins sem til stóð að greiða til eigenda þess á síðastliðnu ári. Líklegt er að þessir fjármunir séu nú tapaðir.

Í  fréttablaðinu Austurglugganum föstudaginn 28. nóvember sl. er grein þar sem haft er eftir sveitarstjórum Vopnafjarðar og Djúpavogs að Vopnfirðingar hafi tapað allt að 120 milljónum króna og Djúpavogshreppur milli 60 og 80 milljónum.  Hornafjörður er mun stærra sveitarfélag  en þessi tvö og Samvinnutryggingar og síðar Vátryggingarfélag Íslands hafa haft hér stóran, ef ekki stærstan, hluta af viðskiptum við fyrirtæki og einstaklinga um árabil. Hornfirðingar hafa því átt stórar fjárhæðir í sjóðum félagsins ásamt fjölmörgum öðrum Íslendingum. Margir einstaklingar höfðu væntingar um allnokkra fjárhæðir úr sjóðum þessum, sumir um vel á annað hundrað þúsunda króna. Fyrirtæki hafa mörg hver átt mun hærri upphæðir.

 

Hvað  munu Hornfirðingar tapa miklum fjármunum á gjaldþroti Giftar fjárfestingarfélags miðað við að þessir fjármunir hefðu verið greiddir út á síðastliðnu ári?

 

Hvað tapar bæjarsjóður miklum fjármunum?

 

Veit bæjarstjóri hvað tap Kaupfélags A-Skaftfellinga er mikið?

 

Hjalti lagði fram eftirfarandi svar:

Hvað  munu Hornfirðingar tapa miklum fjármunum á gjaldþroti Giftar fjárfestingarfélags miðað við að þessir fjármunir hefðu verið greiddir út á síðastliðnu ári?

Upplýsingar um hlut einstaklinga í Gift er mjög óljósar en tap þeirra getur verið umtalsvert.  Forsendur útreiknings eru einnig óljósar meðal annars vegna raunverulegrar eignar Giftar.  Fjölmargir einstaklingar og fyrirtæki hafa gert sér væntingar um töluverða fjármuni þegar fréttir bárust að slíta ætti Gift. Þetta tjón bætist því ofan á það sem fólk hefur orðið fyrir vegna hruns bankakerfisins og birtist í tapi í peningamarkaðssjóðum og hlutabréfum.

 

Hvað tapar bæjarsjóður miklum fjármunum?

Á sínum tíma var nokkuð mismunandi hvar hrepparnir sem nú mynda Sveitarfélagið Hornafjörð keyptu tryggingar sínar. Almennt stóð til boða að tryggja annaðhvort hjá Samvinnutryggingum eða Brunabótafélaginu.   Hafnarhreppur var með allar húseigna- og innbústryggingar hjá Brunabótafélaginu. Ekki liggur fyrir staðfesting á því hvar bifreiðar Hafnarhrepps voru tryggðar en það kann að vera að hluti þeirra hafi verið tryggður hjá Samvinnutryggingum.   Nesjahreppur, Mýrahreppur og Bæjarhreppur voru með tryggingar sínar hjá Brunabótafélaginu en Hofshreppur og Borgarhafnarhreppur hjá Samvinnutryggingum.  Sveitarfélagið hefur því hagsmuna að gæta innan Samvinnutrygginga og þar af leiðandi Giftar því eina eign Samvinnutryggingar er 37,7% hlutur í Gift sem eru fjórir miljarðar að nafnvirði.  Sveitarfélagið Hornafjörður mun því gera tilkall til fjármuna vegna fyrirhugaðra slita þess félags en það er óljóst hversu hár hlutur sveitarfélagsins er í Samvinnutryggingum.   Það ber þó að upplýsa að hlutur sveitarfélagsins í hinu gömlu tryggingarfélögum var umtalsvert meiri í Brunabótarfélaginu en Samvinnutryggingum þar sem Hafnarhreppur, Nesjahreppur, Bæjarhreppur og Mýrarhreppur voru með nær allar sínar tryggingar þar.  Hlutur Sveitarfélagsins Hornafjarðar í Brunabót er nú alls 1,608%.

Lögfræðingur Sambands íslenskra sveitarfélaga vinnur nú að því að afla upplýsinga fyrir sveitarfélög sem eiga hagsmuna að gæta varðandi Gift.  Þann 10. desember 2008 voru eftirfarandi spurningar sendar til formanns skilanefndar:

1.      Hvaða sveitarfélög eru í hópi eigenda niðurstöðu skilanefndar og hvert er eignarhlutfall þeirra?

2.      Eiga viðkomandi sveitarfélög, eða Samband íslenskra sveitarfélaga fyrir þeirra hönd, kost á að senda áheyrnarfulltrúa á fulltrúaráðsfundinn?

3.      Gefst viðkomandi sveitarfélögum, eða Sambandi íslenskra sveitarfélaga fyrir þeirra hönd, kostur á að kynna sér og gera athugasemdir við tillögur sem lagðar verða fyrir fulltrúaráðsfundinn?

 

Málaleitan hans hefur ekki enn borið árangur og hann telur nú að nánast engar líkur verði að sveitarfélög fái upplýsingar um málið frekar en aðrir á þessu stigi máls.   Ljóst er að hart verður sótt að draga fram upplýsingar um þá atburðarrás sem leiddi til þess að hlutafé í Gift varð verðlaust og til dæmis hefur Samband íslenskra samvinnufélaga samþykkt að skipa sérstaka rannsóknarnefnd um málið samkvæmt frétt í Morgunblaðinu þann 29. nóvember sl.

 

Upplýst skal vegna þess að sveitarfélagið hefur ríkari hagsmuna að gæta í Brunabót en Samvinnutryggingum að þá kemur fram í bréfi frá stjórnendum félagsins dags 12. desember sl. að tap félagsins vegna fjármálakreppunnar sé verulegt en eignir þess eru nú um 3.600 miljónir og skuldir á félaginu eru engar.  Í óstöðugleika síðustu mánaða hafa tapast 2.700 m.kr.   Brunabót mun áfram hafa það að leiðarljósi að ávöxtun félagsins renni til sveitarfélaganna í formi ágóðahlutar en gera má ráð fyrir að hann verði rýrari en undanfarinn ár.   Á síðustu 10 árum hafa sveitarfélaginu borist alls 47 m.kr., þ.a. 29 m.kr. á síðustu fjórum árum.

 

Veit bæjarstjóri hvað tap Kaupfélags Austu-Skaftfellinga er mikið?

Í samtali við Pálma Guðmundsson, Kaupfélagsstjóra, kemur fram að upplýsingar hafi ekki enn borist um raunverulegan hlut einstakra aðila né verðmæti þeirra.   Samkvæmt frumvarpi til úthlutunar vegna slita á Eignarhaldsfélaginu Samvinnutryggingar er hlutur Kaupfélags Austur-Skaftfellinga 0,36% í Gift en óljóst er um hlut Kaupfélagsins í Samvinnutryggingum sem eiga 37,17% hlut í Gift.

Bent er á að eðlilegt sé að beina fyrirspurn til þeirra fyrirtækja og einstaklinga sem menn vilja forvitnast um hvernig fjárhag þeirra hafi reitt af í fjármálaóstöðugleika síðustu mánaða til viðkomandi aðila.

 

Halldóra þakkaði bæjarstjóra fyrir svar hans við fyrirspurn. Sagðist ekki hafa fengið neinar tölur upp eins og hún hafi vonað. Sagðist hún vænta þess að bæjarstjóri fylgdi þessu máli eftir. Taldi hún að samfélagið hér hafi átt inni í umræddu félagi að lágmarki 300 – 400 milljónir ef tekið væri mið af þeim 30 milljörðum í nettóeign sem það átti haustið 2007 þegar til stóð að greiða út fjármunina.

Hjalti sagði sveitarfélagið hafa átt meiri hagsmuna að gæta hjá Brunabótarfélaginu en hjá Samvinnutryggingum. Benti á að málið væri að hluta til hjá lögfræðingi Sambands ísl. sveitarfélaga. Hann sagði að sveitarstjóri Djúpavogshrepps hafi upplýst í samtali við sig að þær tölur sem hann nefndi í Austurglugganum væru ekki byggðar á neinum vísindalegum grunni. Sagðist draga í efa allar tölur sem nefndar hafi verið.

 

Fundi slitið kl. 20:30

 

 

 

 

 Bókun vegna samnings um tækniþjónustu.

 Undanfarin ár hefur tæknifræðingur ekki verið starfandi hjá sveitarfélaginu.  Við teljum að nú sé tækifæri að fá tæknimenntað fólk til starfa vegna breyttra aðstæðna í þjóðfélaginu. Það er í anda okkar sjálfstæðismanna að verkefnum sé úthýst í þessum málaflokki sem öðrum. En gæta verður þess að það hafi hagræðingu í för með sér og þegar gerðir eru samningar s.s. sem um tækniþjónustu þarf að gæta þess að hún vel skilgreind og auki ekki kostnað fyrir sveitarfélagið.

 

 

 

 

 

Bókun vegna aðalskipulags.

Í ljósi mikilvægis  þess að möguleiki sé á að þverbraut við Hornafjarðarflugvöll geti komið síðar leggur bæjarstjórn Hornafjarðar áherslu á að land það sem Flogstoðir eiga nú og ekki er í notkun flugvallarins verði ekki selt heldur nýtt til makaskipta á landi þegar nákvæm lega nýrrar þverbrautar hefur verið ákveðin.