Fundargerð bæjarstjórnar 130

130. fundur

Fundur haldinn í Bæjarstjórn Hornafjarðar, mánudaginn 5. maí 2008, kl. 16:15 í Nýheimum

Mætt voru: Árni Rúnar Þorvaldsson forseti bæjarstjórnar, Ásgrímur Ingólfsson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson og Halldóra B. Jónsdóttir. Einnig Hjalti Þór Vignisson bæjarstjóri, Stefán Ólafsson og Ásta H. Guðmundsdóttir .        

 Forseti setti fund og bauð fundarmenn velkomna. Bar hann upp tillögu um að 4. liður á dagskrá verði felldur út og var það samþykkt án athugasemda.

1.        Fundargerðir

Bæjarráð Hornafjarðar, 413. fundur, 31. mars 2008.

Hjalti ræddi þjónustusamning um heilbrigðismál og greindi frá samskiptum við ráðuneyti þau sem að samningnum koma. Sagði hann lítið hafa þokast undanfarið en gerði sér von um að málið kláraðist í vor. Breyting á verkaskiptingu milli félagsmálaráðuneytis og heilbrigðisráðuneytis væri snúnara mál en búist hafi verið við. Þá ræddi Hjalti um nýtingu á Friðsæld til efnistöku og greindi frá samtölum við starfsmann í landbúnaðarráðuneyti út af því máli. Gerði hann sér von um lausn á því máli þannig að nýta mætti námuna að vissu marki.

Halldóra þakkaði upplýsingar um stöðu mála vegna þjónustusamnings. Þá óskaði hún eftir upplýsingum um breytingar á greiðsluþátttöku Tryggingastofnunar vegna sérstakrar talþjálfunar barna. Halldóra ræddi sumarlokanir á leikskólum og minnti á að þrátt fyrir að samkvæmt lögum um leikskóla væri leikskólinn talinn fyrsta skólastigi yrði að líta til þess að ekki væri skólaskylda fyrir börn í leikskóla. Vistun barna á þessu skólastigi væri líka úrræði fyrir foreldra sem stunda vinnu. Gæsluvelli hefur verið lokað. Sumarið er annatími hjá mörgum foreldrum og gerði fjögurra vikna lokun mörgum þeirra erfitt fyrir því ekki gætu allir tekið frí á sama tíma.  Hún lagði fram eftirfarandi tillögu:

Bæjarstjórn Hornafjarðar samþykkir að lokun leikskóla í sumar verði einungis tvær vikur í stað fjögurra og unnið verði að því að skipuleggja leikskólastarf yfir sumarmánuðina þannig að foreldrar hafi meira val um hvenær börn þeirra taki sumarfrí frá og með næsta ári.

Sigurlaug ræddi samstarfssamning um Nýsköpunarmiðstöð á Hornafirði. Þá óskaði hún upplýsinga um hvort starfsemi stofnunarinnar skaraðist við vinnu Atvinnuþróunarfélagsins. Sigurlaug fagnaði áhuga hóps sem vill gera bæinn að áhugaverðum útivistarstað. Greindi hún frá samtölum við þennan hóp sem hún hafi hvatt til að koma með nákvæmari tillögur um þetta mál. Benti hún einnig á að eðlilegt væri að ferðaþjónustuaðilar kæmu að þessu. Þá fagnaði Sigurlaug frekari jarðhitaleit og óskaði eftir frekari upplýsingum um málið. Hún ræddi einnig tillögu um styttingu á lokun á leikskólum að sumri. Sagði hún nauðsynlegt að skoða það mál og benti á að munstur sumarfría hafi breyst. Þá benti hún á mikinn annatíma í ferðaþjónustu á þessum tíma. Hvatti hún til þess að þetta verði skoðað.

Elín ræddi sumarlokun leikskóla. Sagði þetta ekki nýja umræðu. Greindi hún frá könnun meðal foreldra leikskólabarna sem sýnt hafi að mikill meirihluti foreldra hafi verið sammála núverandi lokunartíma skólanna. Sagðist hún þó vera fyllilega sammála því að þetta verði skoðað og spurði hvort menn gætu samþykkt að vísa þessu máli til stýrihóps um fjölskyldustefnu.

Hjalti greindi frá því að flestir talmeinafræðingar hafi sagt upp samningi við Tryggingastofnun vegna sérstakrar talþjálfunar. Það hafi í kjölfarið leitt til þess að framlag Tryggingastofnunar vegna þessa hafi lækkað og kostnaði þar með velt yfir á foreldra.  Lagði hann til að fara þurfi yfir kostnað sem af tillögunni um leikskólann hljótist. Þá tók hann undir orð Elínar að vísa málinu til stýrihóps um fjölskyldustefnu. Hann ræddi stoðkerfi atvinnulífsins í framhaldi af umræðu Sigurlaugar og velti upp hvort allir sem að þeim málum koma væru að vinna að sömu markmiðum. Þá greindi hann frá breytingu á kostnaðarskiptingu við jarðhitaleit sem skiptist orðið jafnt (50/50) á milli ríkis og sveitarfélaga.

Ásgrímur ræddi fund hafnarstjórnar. Benti á að níu mánuðir liðu á milli mælinga á Grynnslunum. Sagði hann of langt líða á milli mælinga og óskaði eftir því að menn verði duglegri að mæla.

Halldóra sagðist ekki átta sig á því hvernig menn hygðust afgreiða tillögu þá sem hún lagði fram. Sagði jafnframt að það ætti ekki að vera flókið að stýra starfinu þannig að rýmka mætti sumarlokun leikskóla. Þá ræddi hún ákv. breytingu á tillögunni.

Hjalti taldi ekki hægt að taka afstöðu til tillögunnar á þessum fundi, til þess vantaði ýmsar upplýsingar. Lagði til að tillögunni verði vísað til umræðu í stýrihóp um fjölskyldustefnu, það væri eðlileg málsmálferð.

Greidd atkvæði um að vísa tillögu Halldóru um sumarlokun leikskóla til umræðu í stýrihópi um fjölskyldustefnu. Var það samþykkt með 5 atkvæðum, 2 á móti.

Fundargerð samþykkt samhljóða.

Bæjarráð Hornafjarðar, 414. fundur, 10. apríl 2008.

Halldóra óskaði eftir upplýsingum um  hvort biðlisti sé eftir félagslegum íbúðum. Sé biðlisti óskaði hún eftir upplýsingum um hversu langur hann væri. Einnig ræddi hún vinnustaðagreininguna sem gerð hefur verið meðal starfsmanna sveitarfélagsins og sagði fátt hafa komið sér þar á óvart og nú hlytu starfsmenn að einhenda sér í að laga það sem miður er. Hún benti á að þær stofnanir sem við rekum samkvæmt þjónustusamningi komi best út í þessari könnun. Hún lýsti samt efasemdum sínum á að í svona fámennu samfélagi fengist rétt mynd af ástandinu í könnun sem þessari þar sem yfirmaður sveitarfélagsins sér sjálfur um að vinna úr gögnum. Sagði að án þess að á nokkurn sé hallað geti verið erfitt fyrir fólk að segja hug sinn á fámennum vinnustöðum.

Sigurlaug spurðist fyrir um umsókn um skólavist utan lögheimilissveitarfélags og óskaði eftir upplýsingum um málið. Spurðist fyrir um hvort um þetta væru til skýrar reglu. Ef ekki hvort ekki væri þá rétt að setja slíkar reglur.

Guðrún greindi frá stöðu í húsnæðismálum. Sagði hún að umsóknir væru mun fleiri en framboð á lausum íbúðum. 15 umsóknir og hægt að úthluta 2 íbúum í júní.

Hjalti sagðist taka undir með Halldóru að oftúlka niðurstöður könnunarinnar. Tilboð hafi komið frá fyrirtæki upp á rúmlega 2 milljónir. Þekking og reynsla á nauðsynlegu forriti væri til staðar í ráðhúsinu. Því hafi verið ákveðið að bæjarstjóri og félagsmálastjóri sæju um hana. Þá sagði hann ástæðu þess að gögn um vinnustaðagreiningu sem bæjarstjórnarmenn fengu hafi verið merkt sem trúnaðarmál vegna þess að þannig hafi það verið kynnt fyrir Persónuvernd sem sent var erindi um málið.  Hjalti sagði að fordæmi hafi ráðið niðurstöðu bæjarráðs við afgreiðslu á umsókn um námsvist utan lögheimilissveitarfélags. Engar reglur væru til um það mál en e.t.v. væri rétt að setja þær.

Fundargerð samþykkt

Bæjarráð Hornafjarðar, 415. fundur, 14. apríl 2008.

Halldóra ræddi staðsetningu á nýjum kirkjugarði og var með ákveðnar efasemdir um staðsetningu sem rædd hefur verið undanfarið sem er norðan vegar á leið út á Ægissíðu.  Einnig ræddi hún um skipulag á göngustígum og bréf frá áhugahópi um þau mál sem kom fyrir skömmu. Hún taldi að vinna ætti að gerð göngustígs meðfram strandlengjunni vestan við bæinn frá hafnarsvæðinu og inn að Stekkhólanesi. Sá göngustígur myndi nýtast mörgum, ekki síst fuglaáhugafólki. Ef niðurstaðan verður að ný þjónustumiðstöð við þjóðgarðinn verði á Stekkhólanesi er rétt að stefna að því að göngustígur liggi þangað frá þéttbýlinu. Halldóra spurði hvenær lóðir á Leirusvæði yrðu tilbúnar til úthlutunar en hún telur að þessi vinna hafi tekið allt of langan tíma.

Hjalti sagði að vinna að lóðum á Leirusvæði hafi tekið sinn tíma. Hann taldi að bráðlega verði hægt að hefja vinnu við að hækka landið sem um er rætt. Einnig þurfi að taka með í reikninginn að ljúka þurfi við veitukerfi á svæðinu, þar væri töluvert verk óunnið. Þá tók hann undir fram komnar hugmyndir um göngustíga sem hér hafa verið til umræðu og fagnaði þessum hugmyndum.

Árni tók undir það að vinna við staðsetningu nýs kirkjugarðs hafi tekið of langan tíma en taldi ekki togstreitu á milli sóknarnefndar og skipulags- og byggingarnefndar. Þá greindi hann frá þeirri vinnu sem fram hefur farið. Sagði hann rétt að þessi mál verði einnig skoðuð við vinnu að aðalskipulagi. Einnig ræddi hann hugmyndir um stígagerð sem hann tók undir.

Fundargerð samþykkt samhljóða.

Bæjarráð Hornafjarðar, 416. fundur, 21. apríl 2008.

Sigurlaug vakti athygli á umræðum á fundi atvinnumálanefndar þar sem m.a. væru þrjár hugmyndir um fundi/ráðstefnur á Hornafirði sem allar snúa að atvinnulífi og nýsköpun. Sagði hún vel fara á að þessar hugmyndir væru til umræðu.

Björn Ingi ræddi fundargerð atvinnumálanefndar, m.a. stöðuna á fasteignamarkaði. Þá ræddi hann skort á leiguíbúðum. Minnti á samtöl við verktaka á því sviði og benti á lausar íbúðir í eigu Íbúðalánasjóðs sem þyrfti að koma í leigu. Þá ræddi hann hugmyndir um atvinnuþróunarsjóð sveitarfélagsins og fagnaði honum. Lagði áherslu á að ríkið kæmi einnig með sinn hlut af söluandvirði Nesjaskóla í sjóðinn.

Ásgrímur tók undir með Sigurlaugu og Birni Inga um atvinnuþróunarsjóð sveitarfélagsins sem gæti stutt vel við jákvæða þróun, ekki síst í dreifbýli.

Hjalti lýsti yfir ánægju með þá umræðu sem fram hefur farið um fundargerð atvinnumálanefndar. Hann ræddi samskipti sín við verktaka sem sótt hafa hér um lóðir til íbúðabygginga og annan sem lýst hefur yfir áhuga á að byggja en ekki sótt um lóðir enn. Þá ræddi hann hvernig sveitarfélagið gæti komið að þessu máli. Hjalti lagði áherslu á að fyrirhugaður atvinnu- og rannsóknarsjóður gæti nýst í öllu sveitarfélaginu og fagnaði umræðu um sjóðinn.

Sigurlaug ræddi möguleika á því að byggja upp leiguhúsnæði í Öræfum. Taldi fulla ástæðu til að halda áfram umræðu sem á sínum tíma hófst um það mál.

Fundargerð samþykkt samhljóða

Bæjarráð Hornafjarðar, 417. fundur, 28. apríl 2008.

 Fundargerð samþykkt samhljóða umræðulaust.

Bæjarstjórn Hornafjarðar 127. fundur 2. mars 2008 áður samþykkt.

2.        Ársreikningar

Bæjarstjóri fylgdi ársreikningum úr hlaði.  Í máli hans kom fram að samkvæmt rekstrarreikningi námu rekstrartekjur í samanteknum ársreikningi sveitarsjóðs 1.508,6 milljónum króna, en þar af voru rekstrartekjur A-hluta stofnana 1.352,4 milljónir króna. Rekstrarniðurstaða í samanteknum reikningsskilum var jákvæð um 360,2 milljónir króna. Í A-hluta var rekstrarniðurstaðan jákvæð um 341,7 milljónir króna en jákvæð um 18,5 milljónir króna hjá B-hluta stofnunum. Heildareignir samkvæmt samanteknum ársreikningi voru 2.588,2 milljónir króna, en heildareignir sveitarsjóðs voru 2.102,4 milljónir króna. Eigið fé samkvæmt samanteknum ársreikningi var 1.405,6 milljónir króna og hlutfall eiginfjár af heildareignum var 54,3%.  Eigið fé sveitarsjóðs var 1.275,4 milljónir króna og eiginfjárhlutfall 60,7 %. Samkvæmt sjóðstreymi var handbært fé í lok árs 476,2 í A hluta.  Hjalti benti á að Jöfnunarsjóður hafi komið mörgum sambærilegum sveitarfélögum til góða undanfarin ár, okkar sveitarfélag væri ekkert einsdæmi. Hjalti fór yfir skýrslu endurskoðenda. Endurskoðendur sveitarfélagsins telja að allar kennitölur í rekstri beri með sér trausta fjárhagsstöðu og rekstur. Hann ræddi einnig ávöxtun á handbæru fé sveitarfélagsins og sagði að endurskoðendur hafi bent á að gætt hafi verið varúðar við þá ávöxtun.

Halldóra gerði að umtalsefni stöðu bæjarsjóðs og segir skýringuna á því að handbært fé er orðið tæpur hálfur milljarður króna vera hærri framlög frá Jöfnunarsjóði og að annað árið í röð hafi ekki verið farið í framkvæmdir sem ákveðnar hafi verið við gerð fjárhagsáætlunar. Benti á að meðal  framlaga frá Jöfnunarsjóði væru framlög vegna mótvægisaðgerða ríkisstjórnarinnar sem hafi verið hugsuð til að efla samfélagið allt.  Hún telur umhugsunarvert hvernig fjármunum bæjarsjóðs sé varið. Sagðist vera hugsi yfir að þeim sé safnað á þennan hátt. Halldóra vekur athygli á að tekjur hafnarinnar hafi aukist milli áranna 2006 og 2007 og segir það ánægjulegt en bendir á að engin dæling hafi átt sér stað á síðasta ári sem hafi áhrif á rekstrarniðurstöðu. Hún óskaði eftir upplýsingum um hvort einhverjar ábyrgðarskuldbindingar væru til sem hefðu áhrif á reikningsskilin. Hún benti á athugasemd endurskoðenda um að æskilegt væri að fyrir liggi skrifleg stefna um hvernig ávaxta skuli handbært fé. Jafnframt óskaði hún eftir upplýsingum um hver ávöxtun á handbæru fé hefði verið á síðasta ári. Halldóra spurði hvenær vænta megi þess að ársreikningar HSSA liggi fyrir. Þau gögn þyrftu að liggja fyrir mun fyrr því afar mikilvægt er að staða stofnunarinnar liggi fyrir sem fyrst í lok hvers uppgjörstímabils því stofnunin er starfrækt eftir þjónustusamningi. Hún telur fráleitt að  uppgjör hennar sé látið mæta afgangi eins og nú virðist vera. Halldóra spurði hvenær vænta megi umsagnar skoðunarmanna. Halldóra upplýsti að sjálfstæðismenn myndu leggja fram bókun við síðari umræðu um ársreikninga sveitarfélagsins.

Hjalti sagði að vaxtatekjur sveitarfélagsins væru samtals um 40,2 milljónir króna á árinu 2007. Sagði hann einkum ávaxtað í peningabréfum. Hann sagði ársreikninginn hafa verið sendan til skoðunarmanna til yfirferðar.

Samþykkt samhljóða að vísa ársreikninga til síðari umræðu í bæjarstjórn.

3.        Samstarf sveitarfélaga - skýrsla

Bæjarstjóri fylgdi málinu úr hlaði og fór yfir greinargerð um samstarf Sveitarfélagsins Hornafjarðar við sveitarfélög á Suðurlandi og sveitarfélög á Austurlandi. Sagði hann þessa vinnu til komna vegna þess að sveitarfélagið væri í Suðurkjördæmi en væri í samstarfi við sveitarfélög í Norðausturkjördæmi. Sagði hann SSA og SASS á margan hátt lík enda systursamtök. Nokkur munur væri þó á skipan nefnda, einkum fastanefnda, þó að þær ynnu með svipuðum hætti. Hjalti benti á að vægi Hornfirðinga væri minna miðað við íbúatölu í SASS en í SSA. Hann fór yfir fjármál sem tengjast starfsemi þessara landshlutasamtaka og greiðslur Sveitarfélagsins Hornafjarðar vegna þeirrar þátttöku. Þá fór hann yfir annað samstarf sem tengist með ýmsum hætti þessum landshlutasamtökum. Hann taldi m.a. ekki gefið að Hornafjörður tæki þátt í atvinnuþróunarfélagi á Suðurlandi ef farið yrði í SASS og minnti í því sambandi á stöðugt vaxandi starfsemi í Nýheimum. Einnig ræddi hann starfsemi í menningarmálum og í Þekkingarneti Austurlands. Hann sagði það ekki þurfa að hafa áhrif á áframhaldandi þátttöku Hornfirðinga innan Þekkingarnetsins ef til breytinga kæmi á samstarfi sveitarfélagsins. Einnig ræddi hann vaxtarsamninginn o.fl. mál þessu tengd. Hjalti greindi frá vinnu og umræðum við aðila eystra og syðra vegna þessa máls sem og samstarfs við heimamenn, einkum í Nýheimum. Hjalti taldi það aðeins spurningu um hvort en ekki hvenær Hornfirðingar sæktu um aðild að SASS og byggði þá skoðun sína á veru sveitarfélagsins í Suðurkjördæmi. Þá velti hann upp spurningunni um hugsanlegan áhuga Austfirðinga á samstarfi við samtök sveitarfélag á Norðurlandi. Hann sagði samstarf í austur eða vestur ekki snúast um peninga.

Guðrún sagði að færa mætti rök fyrir því að böndin austur hafi trosnað og benti á vilja Hornfirðinga sem fram kom í skoðanakönnun um það mál. Sagði hún okkar hagsmunum best komið með samstarfi við sveitarfélög sem aðild eiga að SASS þó vissulega væri þetta sagt með söknuði yfir samstarfinu austur ef það mundi rofna.

Halldóra sagði að flestum hafi átt að vera það kunnugt að hún hafi frekar viljað vera í sama kjördæmi og Austfirðingar en að vera með Sunnlendingum og minntist í því sambandi á skoðanakönnun þá sem fram fór í sínum tíma. Þar taldi hún okkur helst hafa átt samherja til að vinna með á sveitarstjórnastigi. Halldóra  ræddi þau samstarfsverkefni sem sveitarfélagið hefur tekið þátt í með sveitarfélögum á Austurlandi undanfarin ár og fór yfir aðdraganda þeirra. M.a. ræddi hún stuðning Austfirðinga við Háskólasetrið, Frumuna, Þekkingarnetið og samning við Menntamálaráðuneytið um menningarmál. Án stuðnings Austfirðinga við stofnun Háskólaseturs á Höfn og stofnun Frumkvöðlasetursins hefðu Nýheimar aldrei orðið til í þeirri mynd sem þeir eru í dag. Halldóra sagðist hafa áhyggjur af þeim samstarfsverkefnum sem við tökum þátt í í dag. Hún telur að fara eigi varlega í að slíta sig frá samstarfi við SSA betra sé að lofa þessu að þróast áfram eins og verið hefur eftir kjördæmabreytingu. Hafði m.a áhyggjur af núverandi samstarfsverkefnum. Auk þess sagði hún enn afar margt óljóst varðandi flutning úr SSA í SASS sem þarf að skýra betur áður en ákvörðun er tekin. Hornfirðingar þurfi alltaf að vinna með sveitarfélögum bæði í vestur- og austurátt og sækja á eigin forsendum ýmis hagsmunamál. Hún telur að það skipti litlu varðandi tengsl við þingmenn hvorum samtökunum Hornafjörður tilheyri, samskipti við þá eru að langmestu leyti eftir öðrum leiðum. Velti m,.a. upp spurningu um hvað þingmenn sem hér hafa átt lögheimili hafi gert sérstaklega fyrir okkar svæði. Halldóra sagði það geta verið að það komi að þeim tímapunkti að ástæða sé að sækja um aðild að SASS en ekki væri ástæða til að gera það núna. Þá fór hún yfir skipan stjórnar og benti á stóran hlut Árnessýslu og Árborgar. Vegna staðsetningar okkar yrðum við útnári í SASS ef þangað yrði farið.

Halldóra lagði fram eftirfarandi bókun:

Við undirrituð fulltrúar D-lista teljum að ekki sé tímabært að taka ákvörðun um að sveitarfélagið segi sig úr SSA og sæki um inngöngu í SASS. Bæði sé óljóst hvaða áhrif það hafi á þau verkefni sem við tökum þátt í  og einnig er enn of margt óljóst hvaða ávinning sveitarfélagið hefði af að þátttöku í SASS. Því leggjum við til að ákvörðun verði frestað um að minnsta kosti eitt ár.

Elín sagðist ekki ætla að þreyta fundinn á langlokum. Sagðist styðja þá hugmynd að sækja um aðild að SASS. Sagði það ekki vera viðsnúning eins og vart hafi orðið við hjá sumum í minnihlutanum. Hún sagðist hafa fundið að viðhorf sveitarstjórnarmanna til okkar hafa breyst og oft heyrt þá spurningu hvers vegna Hornfirðingar sæktu ekki suður. Þá sagði hún afstöðu minnihlutans oft minna á Vinstrigræna, bara að vera á móti.

Sigurlaug sagði að hér væri verið að ræða hvort slíta eigi áratuga samvinnu við sveitarfélög eystra. Hún sagði þá umræðu byggja á því að við tilheyrðum nú Suðurkjördæmi. Minnti á að þáverandi sveitarstjórn hafi ákveðið að vísa því til íbúanna með skoðanakönnun hvaða kjördæmi við ættum að tilheyra. Það hafi verið gert vegna þess að þáverandi meirihluti hafi ekki komið sér saman um hvernig staðið skyldi að þessu máli. Sveitarstjórnin hafi getað tekið sjálf ákvörðun en hafi kosið að vísa málinu til íbúa. Sigurlaug sagðist vita að margvíslegt samstarf við þingmenn ætti sér stað á sveitarfélagagrunni og benti á nokkur dæmi sínu til stuðnings. Hún taldi að verkefni sem upp hafi verið talin sem samstarfsverkefni hafi fyrst og fremst hafi orðið vegna starfs okkar sjálfra. Þá sagðist hún mótmæla því að þingmenn búsettir hér hafi ekki komið að mörgum mikilvægum málum. Minnti á að þáverandi meirihluti hafi m.a. komið að máli við minnihlutann og fá hann til að ræða við ákveðinn þingmann. Sigurlaug minntist á ákveðin verkefni sem ekki hafi gengið í samstarfi við Austfirðinga. Þá sagði hún sveitarstjórnarmenn eystra halla sér stöðugt meira að Norðlendingum. Lagði áherslu á að við eigum að byggja á samstarfi suður og halda okkar hlut í því samstarfi. Það væri engin ástæða til að draga lengur að taka um það ákvörðun.

Árni fór yfir málið og sagði engan vafa á því að pólitískum hagsmunum okkar væri betur borgið með samstarfi við sveitarfélög í Suðurkjördæmi. Það væri engin ástæða til að draga lengur að stíga það skref. Hann sagðist ekki gera lítið úr samstarfi sem við höfum átt við Austfirðinga. Sagði hann okkur muni eiga áfram í margvíslegu samstarfi austur og benti m.a. á Afl starfsgreinafélag í því sambandi. Árni taldi okkur vera eina sveitarfélagið sem starfaði ekki með sveitarfélögum innan kjördæmis. Með áframhaldandi óbreyttri stöðu yrðum við smám saman að hornreku í samstarfi við önnur sveitarfélög. Sagði pólitískum hagsmunum okkar til lengri tíma litið best borgið með að vinna með sveitarflögum innan kjördæmisins.

Björn Ingi sagði að sér fyndist ósmekklegt að talað væri um suma þegar vitað væri að við sig væri átt. Þá sagði hann að hann hefði fullt frelsi til að skipta um skoðun. Hann hafi farið að efast eftir fundi sem farið hafa fram með fulltrúum SASS. Sagðist ekki sjá það sem rök hvar kjördæmalínan liggur.

Ásgrímur sagði samstarfið austur vera barn síns tíma. Hann sagðist fyrst og fremst hafa komið til að lýsa yfir ánægju með ræðu flokkssystra sinnar.

Halldóra sagðist hafa verið hálfhvumsa með ræðu Elínar. Ljóst væri hvað hún vildi en ekki kæmu fram nein rök með skoðun hennar. Þá sagðist hún ekki kannast við að sjálfstæðismenn hafa verið á móti neinu máli það sem af er þessum fundi. Halldóra sagði að skoðun manna á í hvaða kjördæmi menn vildu vera um aldamótin hafa verið þvert á flokka. Þá minntist hún á viðsnúning framsóknarmanna í kjördæmamálinu á sínum tíma. Hún sagði þingmenn (í Suðurkjördæmi) hafa reynst okkur vel. Halldóra taldi sig þekkja allvel til í pólitíkinni vegna starfa sinna á pólitískum vettvangi í Suðurkjördæmi en þrátt fyrir það vildi hún ekki breyta úr SSA í SASS.

Elín sagði það sitt einkamál hvort hún noti orðið ?sumir?. Þá sagði hún að það væri að kasta steini úr glerhúsi þegar sagt væri að hún væri með aðdróttanir.

Árni þakkaði fyrir málefnalega umræðu um mikilvægt mál. Hann sagðist skilja áhyggjur sjálfstæðismanna ef af flutningi yrði. Þó fannst honum vanta hjá þeim ákveðna grundvallarskoðun, spurði hvar þeir sjái hag okkar best borgið. Það sé ekki bara best að fresta málinu.

Hjalti sagði þetta hafa verið ágæta umræðu. Hann sagði þetta á vissan hátt vera samræðu á milli fortíðar og framtíðar. Benti hann á að SASS væri á margan hátt öflug samtök rétt eins og SSA. Hjalti taldi gott að taka ákvörðun núna um hvar við eigum að vera, SASS eða SSA. Sagði að reyndar hafi átt að taka þessa umræðu við kjördæmabreytinguna. Sagði hann að það hnígi mörg rök í þá átt að taka upp samvinnu suður. Þá fór hann yfir ýmis mál þar sem sveitarfélög velja sér sjálf hvort þau verði í samstarfi við önnur og benti m.a. á skólaskrifstofur í því sambandi. Þá sagði hann að Náttúrustofa Suðausturlands væri í höfn. Þá greindi hann frá samtölum við sveitarstjórnarmenn á Suðurlandi og við starfsmenn og stjórnarmenn Þekkingarnetsins. Ekkert hafi komið fram annað en að Hornfirðingar geti áfram verið aðilar að Þekkingarnetinu ef sveitarfélagið færi í SASS. Þá sagði hann þingmenn Suðurkjördæmis hafa á fundi með sveitarstjórnarmönnum héðan hafa fagnað umræðu um þessi mál.

Sigurlaug ræddi það sem rætt hafi verið um kúvendingu framsóknarmanna. Sagði það alrangt, bæði að sveitarstjórnarmenn framsóknar hafi ekki talið rétt að vera í Norðausturkjördæmi og að þeir hafi ekki fengið skipun að ofan í því máli. þá ræddi hún sinnaskipti sveitarstjórnamanna eystra þegar koma að stuðningi þeirra við að framkvæmdastjóri Vatnajökulþjóðgarðs yrði búsettur á Hornafirði, þau sinnaskipti hafi henni þótt slæm.

Halldóra sagði að sjálfstæðismenn leggi til að ákvörðun í þessu máli verði frestað og lagði áhersla á að það sé skoðun. Hún sagðist engu nær eftir þessa umræðu hvaða ávinning og hag við höfum að því að skipta. Það geti vel verið að hún skipti um skoðun ef rök liggi fyrir því. Lagðist gegn því að fara bara til aða fara.

Hjalti sagði það meginrökin að hagsmunum sveitarfélagsins væri betur gætt og rödd samfélagsins heyrðist hærra með að aðild að SASS.

Árni sagði rökin fyrir því að fara í SASS vera þau að með þessari breytingu tengjumst við okkar kjördæmi betur og það nægi honum.  Við munum efla og styrkja samtök sveitarfélag á Suðurlandi rétt eins og við höfum gert í samstarfi innan SSA.

4. Breyting á aðalskipulag vegna knattspyrnuhús

Samþykkt var í upphafi fundar að fella þennan dagskrárlið niður.

5. Breyting á deiliskipulag vegna knattspyrnuhús

Deiliskipulagsreiturinn afmarkast af Víkurbraut til austurs, brekkufæti Garðshóls (húsa við Bogaslóð og Garðsbrún) til vesturs, íþróttavelli til norðurs, og lóðamörkum ?Lönguvitleysu? við Víkurbraut og Víkurbrautar 5 til suðurs. Skipulagssvæðið er hluti af malarfyllingu á leirum austan Garðshóls. Í gildandi aðalskipulagi er þar svæði fyrir þjónustustofnanir og miðsvæði, og óbyggt svæði á rönd í brekkufætinum. Ekki er í gildi deiliskipulag fyrir svæðið, en á því standa þrjú hús, verkstæði, geymsluhús, og skrifstofur:

• Víkurbraut 7 landnúmer 160031, sem skiptist í vörugeymslu frá 1964, stærð 200m2 og vörugeymslu / skrifstofu frá 1983, stærð 227,1m2.
• Trésmíðaverkstæði við Víkurbraut (Leifshús), landnúmer 160035, byggingarár 1962, stærð 142,5m2.

Heimilað er að rífa eldra vörugeymslu-húsið, og rífa trésmíðaverkstæðið eða fjarlægja og

flytja á aðra lóð.

Umhverfis skipulagssvæðið eru skólalóðir, íþróttavöllur, íbúðarsvæði vestan og norðan við, geymsluskemma (?Langavitleysa?) sunnan við, og verkstæði, verslunar- og þjónustuhús austan við, meðfram Víkurbraut.

Markmið deiliskipulagsins er að skilgreina lóð og byggingarreit fyrir knattleikjahús og

tilheyrandi þjónustubyggingu á Höfn.  Lóðin liggur vel við skóla- og íþróttamannvirkjum og verður auðsótt skólabörnum.

Lóðin er á malarfyllingu sem gerð var yfir leirur. Hverfandi líkur eru á að framkvæmdir,

skv. deiliskipulaginu, raski fornminjum, en verði þeirra vart skal fara að þjóðminjalögum

Skilgreind er ný lóð fyrir Knattleikjahús, 9280m2, þar sem heimilað er að reisa eftirtaldar

byggingar:

A: Knattleikjahús á einni hæð að hámarki 4000m2. Hámarkshæð er gefin í kennisniði og miðast hún við gólfkóta aðalhæðar sem gefinn er á mæliblaði ? hæð langveggja skal ekki meiri en 7,5m og mænishæð skal ekki hærri en 12m. Í stað knatthúss er heimilt að reisa svokallað dúkhús / tjald, þ.e. burðarvirki með ástrengdum dúk, svo lengi sem öllum skilyrðum um fullnægjandi brunavarnir, fjarlægðir milli húsa, aðkomu slökkviliðs o. fl. er fullnægt og húsið/ tjaldið fær úttekt byggingaryfirvalda.

B: Þjónustubyggingu fyrir knatthús sem inniheldur, salerni, miðasölu, veitingasölu, kaffistofu starfsfólks o. fl. Hámarksstærð byggingarinnar er 300m2 og hámarkshæð er gefin í kennisniði og miðast hún við gólfkóta aðalhæðar sem gefinn er á mæliblaði ? hæð langveggja skal ekki meiri en 3,5m og mænishæð skal ekki hærri en 5m.

Nýtingarhlutfall nýrrar lóðar er 0,46.

Hjalti lagði til að þessi tillaga fari í hefðbundið kynningarferli. Var það borið undir atkvæði og samþykkt samhljóða.

6.        Sameining nefnda

Bæjarstjóri lagði fram tillögu um breytingu á nefndaskipan Sveitarfélagsins Hornafjarðar.  Nefndum verði fækkað úr 11 í 10. Breytingin felst í að menningarmálanefnd og æskulýðs- og tómstundaráð sameinast.  Í máli bæjarstjóra kom fram að breytingin er gerð vegna breytinga á skipan tómstundamála hjá sveitarfélaginu en nýverið var samþykkt að forstöðumaður félagsmiðstöðvar heyrði undir Menningarmiðstöð.

Einnig var lögð fram tillaga að nýjum erindisbréfum.  Annars vegar fyrir hina nýju nefnd, menningar- og tómstundanefnd og hins vegar skólanefnd sem fær aukið hlutverk er varðar rekstur íþróttamannvirkja.

Halldóra sagði ekki vera að mótmæla neinu í þessu sambandi. Vildi samt benda á að ákveðin hentistefna ríkti. Hér væri verið að breyta atriðum sem snerta fjölskyldustefnu án þess að vísa því til stýrihóps um þau mál.

Sigurlaug sagði þetta vera framhald af umræðu um málefni ungmenna. þá benti hún á ákv. breytingu á erindisbréfi.

Hjalti sagðist vísa á bug að hér væri um hentistefnu að . Þessi tillaga byggði á grunni þeirrar vinnu sem starfshópur um félagslíf grunnskólanema lagði til og því rímaði það vel að vísa tillögu sjálfstæðismanna um leikskólann til stýrihóps um mótun fjölskyldustefnu.  Það væri því ekki um hentistefnu að ræða heldur um opinn og lýðræðisleg vinnubrögð.

Tillaga um breytingu á nefndaskipan og erindisbréfum samþykkt með 5 atkv., 2 sátu hjá og vísað til annarrar umræðu í bæjarstjórn.

7.        Fyrirspurnir

Engar fyrirspurnir hafa borist.

Fundi slitið kl. 20.30