Fundargerð bæjarstjórnar 127

127. fundur

Fundur haldinn     í Bæjarstjórn Hornafjarðar, miðvikudaginn 2. apríl 2008, kl. 16:10 í Nýheimum

Mætt voru:           Árni Rúnar Þorvaldsson forseti bæjarstjórnar, Reynir Arnarson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson og Björk Pálsdóttir.  Einnig Hjalti Þór Vignisson bæjarstjóri, Stefán Ólafsson og Haukur Ingi Einarsson.        

Forseti setti fund og bauð fundarmenn velkomna. Bar hann upp tillögu um að 3. liður á dagskrá verði felldur út og var það samþykkt samhljóða.

1.        Fundargerðir

Bæjarráð Hornafjarðar, 412. fundur, dags. 17. mars  2008

· Hafnarstjórn Hornafjarðarhafnar 100. fundur, 22. febrúar 2008.

· Menningarmálanefnd Hornafjarðar, 98. fundur 11. mars 2008.

· Stýrihópur vegna fjölskyldustefnu Hornafjarðar, 1. fundur 19. febrúar, 2. fundur 27. febrúar,  3. fundur 5. mars og 4. fundur 12. mars. 2008.

Elín ræddi 3. lið á dagskrá bæjarráðs, tillögu um breytingar á  æskulýðs- og tómstundamálum. Vitnaði hún m.a. í greinargerð starfshóps sem vann tillögur um þennan málaflokk. Benti hún m.a. á aðskilnað skóla og félagsmiðstöðvar, sbr. tillögu. Sagði Elín að sér litist vel á tillögur hópsins og jafnframt að tómstundafulltrúi verði starfsmaður Menningarmiðstöðvar. Það gæti orðið spennandi að vinna með Menningarmiðstöð að æskulýðs- og tómstundamálum. Þá fjallaði Elín um bréf frá Risör kommune, einum af vinabæjum sveitarfélagsins. Þar kemur fram ósk um að þessu samstarfi verði slitið enda farið að fækka í hópi vinabæjanna. Sagði Elín eðlilegt að verða við þessu. Tímarnir hafi breyst og slíkt vinabæjarsamstarf ekki jafnmikilvægt og áður var.

Hjalti þakkaði umræðu um breytingar á æskulýðs- og tómstundamálum. Benti m.a. á að tillaga að breytingum hafi orðið til í framhaldi af vinnu stýrihóps um æskulýðs- og tómstundamál. Hjalti greindi frá umræðum í þremur nefndum um þessi mál og kom fram að ekki séu allar nefndir sammála um fram komna tillögu að breytingum. Lagði hann áherslu á að sveitarfélagið ætti að hugsa um alla aldurshópa þegar kemur að tómstundastarfi.

Árni fagnaði umræðunni og tók undir það sem sagt hefur verið af fyrri ræðumönnum. Sagði hann hugsanlegt að þessar breytingar kynnu að kalla á breytingar á nefndakerfi sveitarfélagsins. Hugsanlega sæju menn fyrir sér menningar- og tómstundanefnd þó ekki hafi neitt verið ákveðið um það.

Björn Ingi tók undir flest það sem komið hefur fram en gerði að umtalsefni þá hugmynd að tómstundafulltrúi færi undir Menningarmiðstöð. Velti því fyrir sér hvort slíkt kalli ekki á breytingar á nefndarkerfi. Taldi hann að við óbreytt nefndakerfi ætti tómstundafulltrúi að vera undir æskulýðs- og tómstundaráði hvað sem síðar yrði í kjölfar breytinga á nefndum.

Björk tók undir það sem fram hefur komið og sagðist sammála Birni Inga um hvar vista eigi tómstundafulltrúa. Þá gerði hún markaðsmál að umtalsefni og velti fyrir sér hvernig sveitarfélagið eigi að kynna sig.

Hjalti sagðist vona að ný heimasíða opnaði innan tíðar. Ákveðið hafi verið að markaðsmálin væru tekin til skoðunar í framhaldi af því. Hann sagði nýsköpun og frumkvöðlastarf vera eitt af sérkennum þessa samfélags. Þá ræddi hann þátt fjölskyldustefnu í þessu samhengi. Þá greindi hann frá heilsíðuauglýsingu nokkurra stofnana sem staðsettar eru í sveitarfélaginu. Taldi þá auglýsingu hafa vakið athygli á sveitarfélaginu. Sagðist hann fagna umræðu um markaðs- og kynningarmál.

Björn Ingi ræddi ályktanir frá aðalfundi Sindra 2008. Spurði hann hvort því bréfi hafi verið svarað og þá einkum fyrirspurn um 2. áfanga við sundlaug.

Reynir ræddi um annan áfanga við sundlaug. Hann taldi byggingu sem tengdi sundlaug við íþróttahús vera næsta áfanga. Sagði fulla ástæðu að fara yfir þetta mál en sagði þennan áfanga ekki vera á fjárhagsáætlun 2008. Þá ræddi hann framkvæmdir við höfnina og það rask og umferðatafir sem því muni fylgja.

Hjalti ræddi tengibyggingu sundlaugar og íþróttahúss. Taldi hana mjög mikilvæga og benti á að 100 millj. væru settar í tengibyggingu - 2. áfanga - á 3ja ára áætlun. Þá ræddi hann ályktanir Sindra og sagði ekki hafa tíðkast að svara ályktunum en sagði þessar ályktanir vera mikilvægt innlegg í umræðuna.

Fundargerð samþykk samhljóða.

Bæjarstjórn Hornafjarðar 126. fundur 13. mars 2008 áður samþykkt.

2.        Samrekstur stofnana sveitarfélagsins

Hjalti fór yfir útsend gögn og gerði grein fyrir markmiðum með breytingum sem kynntar voru. Samkvæmt þeim verði Áhaldahús, Hornafjarðarhöfn og Hornafjarðarveitur sameinaðar undir eina stjórn. Ráðinn verði einn verkstjóri yfir þessa starfsemi alla. Lagði hann áherslu á að klára þetta mál. Þrátt fyrir þessa fyrirhuguðu breytingar muni starfsemi þessara stofnana ekki breytast í grundvallaratriðum. Með þeim væri hins vegar verið að búa í haginn fyrir framtíðina. Lagði hann til að þessar breytingar verði samþykktar.

Björn Ingi sagði að honum litist vel á þessa tillögur. Sagðist hann gera ráð fyrir að þetta leiddi til hagræðingar, e.t.v. ekki strax en vonandi þegar til lengri tíma væri litið. Spurði hvort fjárhagsleg hagræðing hafi verið skoðuð. Þá spurði hann hvort umræddur verkstjóri verði starfsmaður á plani eða á skrifstofu. Sagði að sér litist ekki á að þetta verði „starfsmaður án staðsetningar”, sbr. athugasemd úr sal.

Hjalti sagði þennan verkstjóra vera staðsettan í Áhaldahúsi. Þá gerði hann hagræðingu að umtalsefni. Benti á að reglugerðir gætu stundum gert erfitt fyrir að ná fram hagræðingu eins og dæmin sanna. Þá sagði hann stefnumörkun hinnar nýju stofnunar vera eitt af því sem biði hins nýja verkstjóra.

Björn Ingi sagði að sér litist vel á þann lið í tillögunum sem kveður á um útboð. Benti á að hér væru fyrirtæki og einyrkjar sem gætu unnið þessi verk sem gæti verið hagur bæði sveitarfélagsins og þeirra sem verkin ynnu.

Tillaga um samrekstur stofnana borin undir atkvæði og hún samþykkt samhljóða.

3.        Samþykkt um fráveitur í Sveitarfélaginu Hornafirði  - síðari umræða

Liður felldur út.

4.        Fyrirspurnir

Engar fyrirspurnir hafa borist.

Fundi slitið kl. 17:10