Fundargerð bæjarstjórnar 125

125. fundur

Fundur haldinn      í Bæjarstjórn Hornafjarðar, miðvikudaginn 6. febrúar 2008, kl. 16:00 í Nýheimum

 

Mætt voru:           Árni Rúnar Þorvaldsson forseti bæjarstjórnar, Reynir Arnarson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson og Halldóra B. Jónsdóttir.  Einnig Hjalti Þór Vignisson bæjarstjóri, Ásta H. Guðmundsdóttir, Stefán Ólafsson og Haukur Ingi Einarsson.        

 

Forseti setti fund og bauð fundarmenn velkomna.

1.        Fundargerðir

Bæjarráð Hornafjarðar, 401.  fundur, dags. 3. desember  2007.

·         Stjórn Gjafa og minningarsjóðs Skjólgarðs, 37. fundur 21. nóvember 2007.

·         Skólanefnd Hornafjarðar 98. fundur 28. nóvember 2007.

·         Félagsmálaráð Hornafjarðar 173. fundur 27. nóvember 2007.

·         Svæðisráð Vatnatjökulsþjóðgarðs – Suðursvæði, 3. fundur 26. nóvember 2007.

Sigurlaug fagnaði því að kominn er vísir að kennslu á ferðamálabraut í FAS. Sagði hún okkur ávallt þurfa að halda vöku okkar í þessum efnum. Þá ræddi hún nauðsyn á  landvarðanámi og hvatti til þess að það verði einnig tekið upp við skólann. Þá lýsti hún yfir vonbrigðum með að ekki hafi náðst samstaða um að framkvæmdastjóri þjóðgarðsins yrði staðsettur á Hornafirði.

Halldóra sagðist geta tekið undir orð Sigurlaugar með staðsetningu yfirmanns þjóðgarðsins og spurði hvað meirihlutinn hafi gert í því máli. (Hjalti vék af fundi undir umræðu um vatnsréttindi) Halldóra spurðist fyrir um viljayfirlýsingu vegna vatnsafnota. Sagðist enn og aftur gera athugasemd við að hafa ekki fengið þau gögn sem lögð eru fram á bæjarráðsfundum í hendur. Sagðist hún óska eftir að farið verði yfir þessa yfirlýsingu og hvað hún þýddi. Halldóra spurðist fyrir um fund með þingmönnum Suðurkjördæmis vegna vegstæðis yfir Hornafjarðarfljót, sbr. bókun á 401. fundi bæjarráðs.

Reynir fjallaði um staðsetningu yfirmanns þjóðgarðsins og hvað gert hafi verið, m.a. á vettvangi SSA. Sagði hann menn eystra hafa stutt Hornfirðinga framan af í þessu máli en sá stuðningur hafi ekki enst til enda þess máls. Um vatnið sagði Reynir að það vatn sem má taka til Seljavalla o.fl. bæja eigi ekki að hafa áhrif á vatnsveituna í heild, magnið sé ekki slíkt. Varðandi möguleika annarra til að nýta þetta vatn til útflutnings væri á því annmarki ef taka ætti vatnið beint úr almenningsveitunni. Þannig væri ekki um leiðslu að Seljavöllum, hún kæmi beint úr lindinni. Árni sagði fyrirspurn um fund með þingmönnum verða svarað síðar á fundinum.(Hjalti kom inn á fundinn)

Fundargerð samþykkt með 5 atkv., tveir sitja hjá.

Bæjarráð Hornafjarðar, 402. fundur, dags. 10. desember 2007.

·           Byggingar- og skipulagsnefnd Hornafjarðar , 84. fundur 29. nóvember 2007.

·           Heilbrigðis- og öldrunarráð Hornafjarðar, 86. fundur , 5. desember 2007.

Halldóra ræddi ítrekaða ósk sína um heildstætt plagg sem innheldi drög að þeim samningi sem við vildum sjá.  Hjalti sagðist ekki hafa sett það mál í forgang að svara Halldóru. Hann hafi hins vegar verið í miklum samskiptum við ráðuneyti um heilbrigðismálin og sagði að þar væri unnið á fullu í málefnum Hornfirðinga, samanber upplýsingar úr ráðuneytum. Sagði hann Halldóru jafnframt fá umbeðið yfirlit síðar.

Fundargerð samþykkt samhljóða.

Bæjarráð Hornafjarðar, 403. fundur, dags. 20. desember 2007.

·         Atvinnumálanefnd Hornafjarðar, 35. fundur 13. desember 2007.

·         Byggingar- og skipulagsnefnd Hornafjarðar, 85. fundur 12. desember 2007.

·        Félagsmálráð Hornafjarðar, 174. fundur 11. desember 2007.

·         Menningarmálanefnd Hornafjarðar, 95. fundur 12. desember 2007.

·         Umhverfisnefnd Hornafjarðar,  73. fundur 13. desember 2007.

·         Æskulýðs- og tómstundaráð Hornafjarðar, 95. fundur 13. desember 2007.

·         Starfshópur um félagslíf grunnskólanema, 4. fundur 20 nóvember og 5. fundur 4. desember 2007.

·         Skólanefnd Hornafjarðar, 99. fundur, 17. desember 2007.

Sigurlaug ræddi stefnu atvinnumálanefndar 2007 -2010. Lagði hún áherslu á matvælaframleiðslu og ferðamál í sinni yfirferð, sbr. áherslur atvinnumálanefndar. Sagði mikilvægt að huga vel að umhverfismálum samtímis. Þá sagði hún nauðsynlegt að nægt íbúðarhúsnæði verði til staðar þegar hjólin fara að snúast hraðar. 

Árni ræddi bréf frá Umf. Sindra sem m.a fjallaði um staðsetningu knattspyrnuhúss. Ræddi hann feril málsins frá gjöf Skinneyjar-Þinganess hf. til byggingar knattspyrnuhúss.

Þá las Árni upp eftirfarandi:Bæjarfulltrúar Samfylkingar og Framsóknarflokks leggja fram eftirfarandi tillögu um staðsetningu knattspyrnuhúss. Bæjarstjórn felur bæjarráði að móta tillögur að framtíðarstaðsetningu knattspyrnuhúss og leggja tillögur sínar fyrir bæjarstjórn. Í vinnu sinni og tillögum til bæjarstjórnar taki bæjarráð mið af nýtingarmöguleikum knattspyrnuhússins sem og að húsið falli sem best að umhverfinu. 

Halldóra sagðist ekki hafa athugasemdir við þessa hugmynd. Sagðist lengi hafa haft það á tilfinningunni að þetta væri vandræðamál fyrir meirihlutann. Þá ræddi hún fyrirhugaðan fund með þingmönnum og sagðist hafa það á tilfinningunni að ekki hafi verið óskað eftir honum.  Halldóra ræddi bréf frá sýslumanninum á Eskifirði og fund sem sýslumaður sat hér á Hornafirði. Spurði hún bæjarstjóra hvernig boðað hafi verið til fundarins. Halldóra sagði gott og gilt að gera stefnur og halda málþing. Þá spurði hún um hlutverk atvinnumálanefndar annars vegar og frumkvöðlaseturs hins vegar. Sagðist hafa það á tilfinningunni að nefndin vari að seilast inn á verksvið Frumunnar.

Björn Ingi ræddi staðsetningu knattspyrnuhúss og hvers vegna það sé ekki áfram í höndum viðkomandi nefndar.

Hjalti ræddi um þjónustusamning um heilbrigðismál og skýrslu Ríkisendurskoðunar sem hafi haft þar áhrif. Sagði að verið væri að klára þann þátt að vinda ofan af ákvörðun Tryggingastofnunar. Hjalti taldi gæta misskilnings vegna umræðu um hlutverk atvinnumálanefndar og frumkvöðlasetursins. Engin mótsögn væri þarna á milli heldur fremur samstæðar áherslur þessara aðila. Hjalti sagði samstarf Nýheima og sveitarfélagsins ákaflega gott. Benti m.a. á ráðstöfun fjár sem komið hafi úr ríkissjóði vegna mótvægisaðgerða sem beint væri til stofnana í Nýheimum. Hjalti sagðist taka á sig alla ábyrgð á því ef Halldóra hafi ekki fengið fundarboð vegna fundar með Sýslumanninum á Eskifirði. Hann greindi frá óskum til arkitekta vegna staðsetningar knattspyrnuhús og sagði gögn fara fyrir næsta fund bæjarráðs. Sagði hann vandasamt að staðsetja slíkt mannvirki sem knattspyrnuhúsið er.

Árni sagði heilbrigðismálin greinilega erfitt fyrir 1. þingmann kjördæmisins. Málið liggi núna í fjármálráðuneytinu, þaðan þurfi fá skýr svör, þar liggi málið núna. Bæjarstjórn þurfi að beina kröftum sínum sameiginlega í það ráðuneyti í stað þess að vera að tala um heildstæð plögg, sbr. ósk Halldóru. Árni sagðist furða sig á skrifum Sýslumanns á Eskifirði. Málið sé fyrst og fremst staðsetning lögregluembættisins.

Halldóra sagði að á síðasta ári hafi verið gerðar fjórar skýrslur/kannanir um heilbrigðismálin. Sagði það áberandi að í umræðu í bæjarstjórn um heilbrigðismálin væri alltaf einhverjum öðru að kenna. Sagðist Halldóra enn ekki átta sig á hvað það sé sem sveitarfélagið ætli að fara fram á í samningum við ríkið og spurði hvernig samning menn vilja sjá.

Árni lagði áherslu á að það liggi hjá fjarmálaráðuneytinu að ljúka greiðslum til HSSA, þar hafi það verið í hátt á þriðja mánuð.

Björn Ingi sagðist ekki vita betur en að meirihlutinn gangi ekki til samninga við heilbrigðisráðuneytið fyrr en fjármálaráðuneytið hafi gefið svör um greiðslur fyrir árið 2007. Björn taldi þetta vera tvö mál þannig séð.

Hjalti sagði okkur vera í samningum við ríkisvaldið. Sagði Halldóru vera svo reynda í pólitík að hún ætti að vita hvernig hlutirnir ganga fyrir sig. Sagðist ekki vilja kenna neinum einum um en umræddu máli þurfi að ljúka áður en lengra er haldið. Þá vitnaði hann til Akureyrar sem landaði eins árs samningi í lok síðasta árs um heilbrigðismálin. Þá taldi Hjalti gott að hafa góð gögn svo sem skýrslur o.f. vegna heilbrigðismálanna. Slík gögn hefðu betur legið fyrir um tveimur árum.

Reynir ræddi framlög vegna mótvægisaðgerða og sagði bæjarráð vera sammála um að fara að tillögu atvinnumálanefndar um nýtingu 8,8 milljónanna til mótvægisaðgerða.

 

Árni bar upp tillögu um staðsetningu knattspyrnuhúss og var hún samþykkt með 5 greiddum atkvæðum, 2 sitja hjá.

 

Fundargerð samþykkt samhljóða.

 

Bæjarráð Hornafjarðar, 404. fundur, dags. 10. janúar 2008.

·       Byggingar- og skipulagsnefnd, 86. fundur, 19. desember 2007.

·       Hafnarstjórn Hornafjarðar, 98. fundur, 21. desember 2007.

·       Heilbrigðis- og öldrunarráð, 87. fundur, 19. desember 2007

·       Starfshópur um félagslíf grunnskólanema, 6. fundur, 18. desember 2007.

·       Stjórn Sambands ísl. sveitarfélaga, 749. fundur, 14. desember 2007.

Hjalti ræddi stöðu í málum útibús Siglingastofnunar á Höfn.  Greindi hann frá viðræðum við ríkisstofnanir um það mál og sagðist hann bjartsýnn um jákvæða niðurstöðu í því.

Fundargerð samþykkt samhljóða.

 

Bæjarráð Hornafjarðar, 405. fundur, dags. 21. janúar 2008.

·       Byggingar- og skipulagsnefnd Hornafjarðar,  87. fundur 17. janúar 2008.

·       Heilbrigðis- og öldrunarráð Hornafjarðar, 88. fundur 16. janúar 2008.

·       Gjafasjóður Skjólgarðs 38. fundur 16. janúar  2008.

·       Félagsmálaráð Hornafjarðar 175.  fundur 8. janúar 2008.

·       Menningarmálanefnd Hornafjarðar, 96. fundur 9. janúar 2008.

·       Umhverfisnefnd Hornafjarðar 74. fundur 10. janúar 2008.

·       Æskulýðs og tómstundaráð Hornafjarðar, 96. fundur 17. janúar 2008.

·       Nefnd um íþróttamannvirki, 43. fundur, 15. janúar 2008.

·       Starfshópur um félagslíf í grunnskólum, 8. fundur 15. janúar 2008.

·       Ungmennaráð Hornafjarðar 1. fundur 10. janúar 2008.

Hjalti ræddi framlag ríkisvaldsins, hluti af mótvægisaðgerðum, til viðhalds á húsnæði HSSA. Einnig ræddi hann framlag til byggingar nýrrar lögreglustöðvar sem hann fagnaði.

Árni ræddi liðinn önnur mál í fundargerð bæjarráðs þar sem fjallað er um samþykktir sveitarfélagsins um stjórn og fundarsköp. Las hann upp eftirfarandi:

Bæjarfulltrúar Samfylkingar og Framsóknarflokks leggja fram eftirfarandi tillögu um endurskoðun á samþykktum Sveitarfélagsins Hornafjarðar um stjórn og fundarsköp:

Bæjarstjórn felur bæjarráði að hefja þegar í stað undirbúning að endurskoðun á samþykkt sveitarfélagsins um stjórn þess og fundarsköp. Bæjarstjórn leggur áherslu á að endurskoðunin taki til allra þátta samþykktarinnar.

Greinargerð:

Núgildandi samþykkt var staðfest í bæjarstjórn árið 2002 og því orðið tímabært að hefja endurskoðun á samþykktinni. Mikilvægt er að öll stjórn sveitarfélagsins sé í sífelldri endurskoðun enda tekur samfélagið örum breytingum og kröfur fólks breytast. Stjórn sveitarfélagsins verður að taka mið af þeim kröfum sem uppi eru hverju sinni og hún verður að vera þannig uppbyggð að hún þjóni hagsmunum samfélagsins.  Hugmyndir um lýðræðið breytast og raddir hækka um opna stjórnarhætti, valdreifingu og þátttöku íbúanna sem kallar á að bæjarstjórn haldi uppi vinnubrögðum í þeim anda.  Bæjarstjórn Hornafjarðar telur því mikilvægt að við endurskoðun á samþykktum sveitarfélagsins verði sérstaklega skoðað hvernig hægt sé að efla valdsvið nefnda og skilgreina hlutverk og ábyrgð starfsmanna annars vegar og kjörinna fulltrúa hins vegar.

 

Lagði Árni til að bæjarstjórn feli bæjarráði að fara með þessa endurskoðun. Ræddi hann m.a. nefndaskipan sveitarfélagsins o.fl. þætti sem þessu tengjast.

Sigurlaug ræddi um  umhverfismálin og umhverfisviðurkenningar, athyglin er nú á dreifbýlið varðandi umhverfismál og stefnt er að því að koma upp grenndargámastöðvum í dreifbýlinu í stað bláu gámanna.  Einnig ræddi hún um seyrulosun og fráveitur í dreifbýli.  Ræddi hún um fráveituna á Höfn og áframhaldandi vinnu við hana.  Ræddi um fyrirhugaða vinnu við endurskoðun á umhverfisstefnu  sveitarfélagsins.  

Halldóra B. Jónsdóttir ræddi um skautasvellið,  las hún upp bókun Heilbrigðis- og öldrunarráð varðandi þjónustusamninga og lagði fram eftirfarandi bókun varðandi málið.

Við undirrituð bæjarfulltrúar Sjálfstæðismanna getum ekki tekið undir bókun meirihlutans um samninga við ríki um heilbrigðis- og öldrunarmál.  Í jafn mikilvægu máli og þjónustusamningur sem þessi er fyrir samfélagið, er mikilvægt að vanda alla undirbúningsvinnu og áherslur sveitarstjórnar séu skýrt fram settar í samningsdrögum. Þetta hefur enn ekki verið gert. Jafnframt hefur ekki verið nein festa í samningafundum við ríki og formleg samninganefnd ekki verið starfandi. Við viljum ítreka að mikilvægt er að bæjarstjórn stilli saman strengi og nái niðurstöðu um þau samningsdrög sem við viljum stefna að áður en farið er að átelja ríkisstjórn og ráðuneyti um seinagang.

Ræddi hún um tillögu varðandi stjórn og fundarsköp, yfirleitt gert í lok kjörtímabils hún spyr  hvort vinna eigi að fara í gang nú og taka gildi við næstu kosningar eða fyrr.  Ræddi hún um blogg og hvort  meirihlutinn væri farin að hafa mikið vald um hvað fjölmiðlarnir hér birta.  Hún fagnar grænu tunnunum hennar Sigurlaugar.  

Hjalti Þór Vignisson svaraði varðandi bloggið og skrif í fjölmiðla.  Varðandi stjórn og fundarsköp er hægt að gera breytingar hvenær sem er.   

Björn I. Jónsson ræddi um tillögu  um endurskoðun á stjórn og fundarsköp, hann vill hafa skráningu fundargerða eins og hún er. 

Reynir Arnarsson ræddi einnig um tillöguna , sagði hann að menn ættu að gefa sér þann tíma sem þarf í þessa vinnu. 

Sigurlaug Gissurardóttir sagðist þakka ráðsmönnum fyrir gott samstarf, þar væri einhugur um málaflokkinn. Einnig ræddi hún grænar tunnur sem fyrir löngu hafi komið til umræðu í nefndinni.

Árni ræddi samþykkt um stjórn og fundarsköp. Sagði að verið væri að hefja undirbúning að þeirri vinnu. Hann sagði að einnig þurfi að skoða ritun fundargerða, það eigi ekki að vera undir starfsmönnum komið hvað þar fari inn, þeir væru settir í mikinn vanda með koma orðum bæjarfulltrúa til skila. Hann sagði það skipta máli að fá góða samþykkt sem bæti okkar störf. Árni sagði í ljósi bókunar sjálfstæðismanna leggja fram eftirfarandi bókun: Bæjarfulltrúar S- lista og B-lista hafna því alfarið að ekki hafi verið festa í samningaviðræðum um heilbrigðismál af hálfu sveitarfélagsins. Bæjarfulltrúar S- og B-lista hvetja fjármálaráðherra til þess að ljúka sinni vinnu er varðar uppgjör síðasta árs í samræmi við munnlegt samkomulag fjármálaráðuneytisins og sveitarfélagsins. Fyrst þá verði hægt að hefja að nýju viðræður við ríkisstjórnina um áframhaldandi þjónustusamning.

Hjalti greindi frá vinnu við skautasvell. Það hafi ekki náðst að gera það með þeim hætti sem vænst var. Þá benti hann á hugmyndir að öðrum staðsetningum að skautasvelli, svo sem á miðbæjarsvæði.

Framangreind bókun um endurskoðun á samþykktum sveitarfélagsins samþykkt með fimm atkvæðum, tveir sitja hjá

Fundargerð samþykkt samhljóða

Bæjarráð Hornafjarðar, 406. fundur, dags. 28. janúar 2008.

·       Félagsmálaráð Hornafjarðar, 176.  fundur 22. janúar 2008.

·       Húsnæðisnefnd Hornafjarðar, 79. fundur 22. janúar 2008.

·       Skólanefnd Hornafjarðar, 100. fundur 23. janúar 2008.

 

Fundargerð samþykkt samhljóða

Bæjarstjórn Hornafjarðar, 124. fundur, 6. desember  2007, áður samþykkt.

2.    Þriggja ára áætlun síðari  umræða.

Bæjarstjóri  fylgdi  áætluninni úr hlaði og sagði m.a., eins og fram kom við fyrri umræðu, þurfi bæjarstjórn samkvæmt lögum að gera þriggja ára áætlun fyrir sjóði sveitarfélagsins og að þessu sinni nær hún yfir árin 2009 til 2011. Markmiðið er að varpa ljósi á það svigrúm sem er til sérstakra framkvæmda og stærri fjárfestinga á tímabilinu. Sömuleiðis þarf að skila þriggja ára áætlun fyrir samstæðureikning, þ.e.a.s. bæði A-hluta og B-hluta sem eru Hornafjarðarveitur, Hornafjarðarhöfn og íbúðakerfið.  Áætlun til þriggja ára eða lengri tíma sem byggist á fjárhagsáætlun ársins í ár getur aldrei verið fullkomlega nákvæm þó svo að rekstur sveitarfélagsins sé í mjög föstum skorðum. Áætlunin er þó gott tæki til að átta sig á ákveðinni þróun og hvaða möguleikar eru á framkvæmdum til lengri tíma litið. Langtímaáætlun er líka stefnumótandi og segir til um hvaða markmið sveitarstjórn setur um stöðu sjóðanna og sveitarfélagsins í heild. Helstu breytinga milli umræðna eru m.a. að framkvæmdir í A-hluta  árið 2009 eru 40 m.kr. hærri en við fyrri umræðu en 40 m.kr. lægri árið 2010 annað er óbreytt frá fyrir umræðu. Rekstraráætlun er  á föstu verðlagi og allar upphæðir miðast við fjárhagsáætlun 2008.  Gert er ráð fyrir varanlegum fjárfestingum að upphæð 563,2 m.kr., á árunum 2009 til 2011. 

Áætlunin gerir ráð fyrir að aðalsjóður framkvæmi fyrir 500 m.kr. og  taki langtímalán að upphæð 50,0 m.kr. á móti eru afborganir langtímalána 251,2 m.kr.  Langtímalán aðalsjóðs lækka því á tímabilinu um 200,0 m.kr. Ný  langtímalán  B-hluta að upphæð 32,0 m.kr. á móti afborgun langtímalána að upphæð 64,8 m.kr. Langtímalán B-hluta lækka því á tímabilinu um 32,8 m.kr. Bæjarstjóri lagði til að starfsmönnum verði falið að vinna að undirbúningi á lokafrágangi fráveitunnar á Höfn.

 

Helstu framkvæmdir A-hluta  og B-hluta:

Framkvæmdir 2009-2011
A-hluti	2009	2010	2011	Alls
Knattspyrnuhús	35.000			35.000
Endurbætur á götum og plön (malbik)	70.000	10.000	10.000	90.000
Salur við Grunnskóla Hornafjarðar og félagsmiðstöð	80.000	100.000		180.000
Opin svæði, leiktæki á göngusvæðum, göngustígar o.fl.	15.000			15.000
Hafnarbraut, endurnýjun  3. áfangi	10.000			10.000
Hafnarvík - Heppa			40.000	40.000
Tengibygging sundlaug / líkamsrækt		50.000	50.000	100.000
Geymslur vegna safna	30.000			30.000
Samtals A hluti	240.000	160.000	100.000	500.000
B-hluti
Vatnsveituframkvæmdir	4.500	7.500	7.500	19.500
Fráveituframkvæmdir	7.000	7.000	7.000	21.000
Hafnarsjóður	22.600			22.600
	34.100	14.500	14.500	63.100
Samtals A og B hluti:	274.100	174.500	114.500	563.100

.  

Þriggja ára áætlun borin undir atkvæði og samþykkt með fjórum atkvæðum, tveir sitja hjá, einn bæjarfulltrúi fjarstaddur.

3.        Erindisbréf stýrihóps um mótun fjölskyldustefnu sveitarfélagsins

Bæjarstjóri fór yfir erindisbréfið og baðst afsökunar á því að röng drög hafi farið út með fundarboði.

Björn Ingi gerði athugasemdir við skiladaga í erindisbréfi. Hann hefði viljað sjá þessa daga fyrr og nefndi dæmi um leikskólagjöld o.fl. sem þurfi að taka til endurskoðunar. lagði hann til að skilin fari fram í ársbyrjun 2009.

Hjalti benti á að stýrihópurinn eigi að skila áfangaskýrslu þannig að hluti komi til framkvæmda á árinu 2009.

Erindisbréfið samþykkt með fimm atkvæðum, tveir sitja hjá.

4.        Skipan stýrihóps um mótun fjölskyldustefnu sveitarfélagsins

Tillaga um að eftirtaldir skipi stýrihópinn: Matthildur Ásmundardóttir af S-lista, sem jafnframt verður formaður, Elín Magnúsdóttir af B-lista og Gauti Árnason af D-lista.

Tillagan samþykkt samhljóða með öllum greiddum atkvæðum.

5.        Kosningar

Halldóra gerði grein fyrir eftirfarandi tillögu sjálfstæðismanna:

Í ritnefnd Skaftfellings verði kjörin Bryndís Hólmarsdóttir í stað Snorra Aðalsteinssonar. Tillagan samþykkt samhljóða með öllum greiddum atkvæðum.  

6.        Frummatsskýrsla vegna hringvegar um Hornafjörð

Reynir sagði nú liggja fyrir gögn vegna umhverfismats við fyrirhugaðar framkvæmdar.

Þá las Reynir upp tillögu að eftirfarandi bókun sem byggð er á samhljóðandi bókun bæjarráðs þann 4. febrúar 2008:

Niðurstaða matsvinnu Vegagerðarinnar vegna nýs hringvegar um Hornafjörð er að mæla með svokallaðri leið 1.  Um þrjár meginleiðir er að ræða skv. tillögu Vegagerðarinnar en auk þeirra leggur Vegagerðin fram mismunandi útfærslu á þessum þremur leiðum, sbr. bls. 13 í frummatsskýrslu. Umhverfisáhrif, umferðaröryggi og greiðfærni ráða mestu um afstöðu Vegagerðarinnar. Bæjarstjórn Hornafjarðar er ósammála niðurstöðu Vegagerðarinnar í veigamiklum atriðum og leggur þar til grundvallar auknar vegstyttingar, umferðaröryggi og að draga sem mest úr áhrifum á hefðbundin landbúnaðarafnot. 

 

Skipta má fyrirhugaðri framkvæmd í þrennt. Í fyrsta lagi liggur fyrirhugð leið um sveitina Mýrar sem er vestan Hornafjarðarfljóta. Í öðru lagi um Skógey sem er á milli Hornafjarðarfljóta og Hoffellssár. Í þriðja lagi liggur leiðin um Nesjasveit sem er austan Hornafjarðarfljóta. 

 

Á Mýrum tekur Vegagerðin leið 1 umfram aðrar leiðir sem er með öllu óskiljanlegt vegna umferðaröryggis.  Leið 1 liggur á sama stað og núverandi vegur við Holtabæi og sveigir til suðurs á milli Holts og Tjarnar.  Bæjarstjórn Hornafjarðar telur mikilvægt að nýtt vegstæði liggi eins og leið 3 gerir ráð fyrir, þ.e. að sveigja frá núverandi hringvegi um 2,5 km fyrir austan Hólm og þaðan liggur hún sunnan við Stóraból og þverar Hornafjarðarfljót við móts við Skógey.  Með þessu fækkar vegtengingum stórlega og eykur öryggi íbúa og vegfarenda.

 

Í matsvinnu Vegagerðarinnar segir á bls. 14 að hvaða leið sem sé valin um Skógey séu áhrifin sambærileg.  Undir þetta mat getur Bæjarstjórn Hornafjarðar tekið.

 

Í Nesjum liggur leið 1 rétt norðan við ósa Laxá og þverar hana rétt neðan við  Borgir og sveigir inn á núverandi hringveg við Árnanes.  Bæjarstjórn Hornafjarðar vill benda á að á þessum slóðum er afar þétt byggð og mikil landbúnaðarstarfsemi.  Á þessari leið liggur leiðin, skv. tillögu Vegagerðarinnar, yfir skeiðbraut hestamanna, yfir gróin tún í Borgum og yfir ræktunarlönd Akurness og Seljavalla.  Ennfremur mun þessi leið ekki auka umferðaröryggi fram yfir núverandi ástand því vegtengingar verða jafnmargar og áður.  Bæjarstjórn Hornafjarðar leggur áherslu á að vegurinn um Nesjasveit liggi sunnan við Árnanes eins og leið 3 gerir ráð fyrir.  Sú veglagning styttir vegalengdir mest innan héraðsins og eykur umferðaröryggi stórlega umfram tillögu Vegagerðarinnar. 

Stytting vegalengda innan Sveitafélagsins Hornafjarðar er grundvallaratriði að mati Bæjarstjórnar Hornafjarðar. Sú umtalsverða stytting sem verður samfara því að fara leið 3 samanborið við að fara leið 1 er það mikil að Bæjarstjórn Hornafjarðar telur að almannahagsmunir liggi við. 

 

Bæjarstjórn Hornafjarðar er sammála um að leið 2 hafi umtalsverða ókosti í för með sér. Í fyrsta lagi hefur leiðin umtalsverð áhrif á landslag á austasta hluta leiðarinnar, þ.e. eftir að hún tekur land við Dilksnes. Þar er gert ráð fyrir að hún liggi í gegnum stór klapparholt sem geta talist einkennandi fyrir landslag á þessum slóðum. Ennfremur liggur hún yfir nær samfelldar sjávarfitjar á milli Árnaness og Dilksness. Þá liggur hún mun nær Árnanesbæjunum en leið 3. Bæjarstjórn Hornafjarðar hafnar því að leið 2 verði farin.

 

Bæjarstjórn Hornafjarðar telur einnig einsýnt að leið 3 hafi minni áhrif á landslag en leið 2 auk þess að leið 3 sker jarðir landeigenda í sveitafélaginu minnst þeirra þriggja leiða sem í mati eru. Helsti munur á milli leiðanna felst í því að leið 3 liggur yfir Flóa í Skarðsfirði sem er á náttúruminjaskrá. Á hinn bóginn liggur leið 3 ekki í sama mæli yfir sjávarfitjar og leið 2. Einnig bendir flest til þess að leið 3 hafi ekki jafn mikil áhrif á landslag og leið 2.  

 

Til að milda umhverfisáhrif leiðar 3 leggur sveitarfélagið til að leiðin liggi ekki yfir Skarðsfjörð eins og núverandi tillaga gerir ráð fyrir heldur liggja austan Hafnarvegar í samræmi við gildandi aðalskipulag sveitarfélagsins. Þessi leið mun ekki hafa umhverfisáhrif á Skarðsfjörð. 

 

Leiðir 2 og 3 hafa það báðar sammerkt að stór hluti Nesjasveitar liggur ekki lengur í alfaraleið. Bæjarstjórn Hornafjarðar telur það mikilvægt að merkingar og auglýsingar verði settar upp við gatnamót þjóðvegar og Hafnarvegar þar sem þjónusta í sveitafélaginu verði auglýst. 

 

Í frummatsskýrslu kemur fram á bls. 22 að kostnaður leiðar 1 sé samtals 2,324 milljarða kr. en leiðar 3 samtals 2,977 milljarða kr.  Sveitarfélagið hefur áður gert athugasemdir við fjárhagslegt mat þessara kosta og telur útreikninga Vegagerðarinnar ótrúverðuga.  Í útreikningum á kostnaði á leið 1 er ekki teknar inn í endurbætur á vegarkaflanum frá Hólmi að Holtum og einnig frá Árnanesi að Haga. Til að samanburður á milli valkosta Vegagerðarinnar sé sanngjarn þarf að taka endurbætur á þessum köflum með í dæmið.   Fjárhagslegur munur á milli þessara kosta er því hverfandi að mati bæjarstjórnar og getur því ekki legið til grundvallar þegar endanlegt vegstæði verði valið.

 

Það er því niðurstaða Bæjarstjórnar Hornafjarðar að leið 3 í tillögum Vegagerðarinnar sé besti kosturinn af þeim leiðum sem hún leggur til að verði metnar í framkvæmdamati. Ekki síst vegna bætts umferðaröryggis sem og verulegra styttingu á vegalengdum innan sveitafélagsins sem leið 3 hefur í för með sér. Niðurstaða Bæjarstjórnar Hornafjarðar er því að leið 3 verði fyrir valinu með þeirri breytingu að ekki verði farið út í Skarðsfjörð með veginn.

 

Halldóra sagðist telja að allir bæjarfulltrúar væru því sammála að um væri að ræða gífurlegt hagsmunamál fyrir samfélagið og enginn ágreiningur þar um. Halldóra ræddi skýrslu Vegagerðarinnar sem segir umhverfismál vera meginástæðu þess að mæla með leið 1. Við þessa niðurstöðu Vegagerðarinnar gerði Halldóra verulegar athugasemdir og sagði að deila megi um hvar umhverfisáhrif séu mest. Hún taldi að sama hvaða leið verði valin muni alltaf verða deildar meiningar meðal ákveðinna íbúa og vonaðist til að fundurinn á morgun verði vel sóttur. Halldóra sagðist telja að funda þurfi með þingmönnum kjördæmisins og lagði til eftirfarandi viðbót við framangreinda tillögu að bókun: Vegna nýs vegstæðis óskar bæjarstjórn eftir fundi með þingmönnum Suðurkjördæmis. Þá ræddi hún um fundi sem Vegagerðin hefur átt með heimamönnum.

Hjalti sagðist hafa verið boðaður á fund með Vegagerðinni og greindi frá því sem þar fór fram. Þá hafi hann m.a. sagt að Vegagerðin yrði að funda með bæjarstjórn um málið, hann mundi ekki bera skilaboð til hennar. Þá ræddi hann hugmyndir um fund með þingmönnum og sagðist sem áður vera hlynntur slíkum fundi.

Sigurlaug sagði menn vera sammála í þessu mikilvæga máli. Þá lagði hún til eftirfarandi breytingu á tillögunni: “Á Mýrum tekur Vegagerðin leið 1 umfram aðrar leiðir sem er með öllu óskiljanlegt vegna umferðaröryggis” þar sem (viðbót S. G.) leið 1 liggur á sama stað og núverandi vegur við Holtabæi í gegnum þétta byggð og atvinnustarfsemi (viðbót S.G.) og sveigir þá (viðbót S. G.) til suðurs á milli Holts og Tjarnar. 

Árni fjallaði um umferðaröryggi á vegum og sagðist vilja sjá það í skýrslunni hvaða leið skapi mest umferðaröryggi. Hann lagði áherslu samstöðu bæjarfulltrúa í þessu mikilvæga máli. Hann sagði fund með þingmönnum kjördæmisins eflaust geta þokað því áleiðis.

 

Framangreind tillaga að bókun borin undir atkvæði og samþykkt að viðbættri tillögu Sigurlaugar samhljóða  með öllum greiddum atkvæðum.

Viðbótartillaga Halldóru um fund með þingmönnum Suðurkjördæmis borin undir atkvæði og samþykkt samhljóða  með öllum greiddum atkvæðum.

7.        Fyrirspurnir

Engar fyrirspurnir hafa borist.

Fundi slitið kl. 20.10