Fundargerð bæjarstjórnar 124

124. fundur

Mætt voru:           Árni Rúnar Þorvaldsson forseti bæjarstjórnar, Reynir Arnarson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson og Björk Pálsdóttir.  Einnig Hjalti Þór Vignisson bæjarstjóri, Ásta H. Guðmundsdóttir, og Haukur Ingi Einarsson.        

 Forseti setti fund og bauð fundarmenn velkomna.

1.        Fundargerðir

Bæjarráð Hornafjarðar, 399.  fundur, dags. 19. nóvember  2007.

·         Hafnarstjórn Hornafjarðarhafnar, 97. fundur 14. nóvember 2007.

·         Félagsmálaráð Hornafjarðar 172. fundur 13. nóvember 2007.

Björk Pálsdóttir spyr um stöðu mála varðandi útibú Siglingastofnunar hér og heimavigtunarleyfi, einnig spyr hún um skýrslu um lögreglumál  og varðandi höfuðstöðvar Vatnajökulsþjóðgarðs.

Hjalti Þór Vignisson svarar fyrirspurnunum og sagði m.a. að vinna væri í gangi varðandi útibú Siglingarstofnunar, einnig sagði hann að hertar reglur leiddu til þess að fyrirtæki hér misstu heimavigtunarleyfi. Sagði hann frá fundi með lögreglustjóra á Eskifirði og taldi að valdið ætti að færast aftur heim í hérað. 

Árni R. Þorvaldsson ræddi um áfangaskýrslu lögreglunar á Höfn og tekur undir með Hjalta varðandi málið.

 Lagði forseti fram eftirfarandi bókun varðandi málið:

 Bæjarstjórn Sveitarfélagsins Hornafjarðar skorar á dóms ? og kirkjumálaráðherra að endurskoða þær breytingar á lögregluumdæmum sem komnar eru til framkvæmda. Það er skoðun bæjarstjórnar Sveitarfélagsins Hornafjarðar að markmið breytinganna um hagræðingu og eflingu starfseminnar hafi ekki náðst á Suðausturlandi. Þvert á móti hafi breytingarnar veikt starfsemi lögreglunnar á Hornafirði og bæjarstjórn minnir á að Höfn er fjölmennasti þéttbýliskjarninn innan lögregluumdæmis sýslumannsins á Eskifirði.

 Forseti ræddi einnig um stofnun Vatnajökulsþjóðgarðs og umræður sem sköpuðust á borgarafundi í Suðursveit, einnig ræddi hann um starfsstöð þjóðgarðsins og sagði að bæjarstjórn hafi lagt það upp frá fyrsta degi að þessi starfsstöð yrði staðsett hér í sveitarfélaginu. 

 Sigurlaug Gissurardóttir ræddi um þjóðgarðsmál og er sammála Árna varðandi málið, sagði hún að heimamenn ættu að hafa frumkvæði í málinu.  Einnig ræddi hún um starfsstöð framkvæmdastjóra og staðsetningu hennar og sagði hún að það væri köld kveðja frá Austfirðingum ef þeir stæðu ekki með okkur í þessu máli.

 Framlögð bókun er borin upp til atkvæða og samþykkt með sex atkvæðum einn situr hjá.

Fundargerð samþykkt.

 Bæjarráð Hornafjarðar, 400. fundur, dags. 27. nóvember 2007.

·         Byggingar- og skipulagsnefnd, 83. fundur, 14. nóvember 2007.

·         Menningarmálanefnd Hornafjarðar, 94. fundur, 14. nóvember 2007.

·         Æskulýðs- og tómstundaráð, 94. fundur, 15. nóvember 2007.

·         Stjórn Sambands íslenskra sveitarfélaga, 748. fundur 16. nóvember 2007, til kynningar.

 Bæjarstjóri tók til máls og sagði að fundað hafi verið í stjórn Jöklasýningar ses og las upp eftirfarandi bókum sem þar var samþykkt.  Lagði hann hana fram til atkvæða.

 Jöklasýning var sett upp til heiðurs náttúru svæðisins og fellur vel að því hlutverki þjóðgarðsins að fræða fólk um náttúruna og náttúruvernd.  Uppsetning sýningarinnar er í anda þess sem ráðgjafarnefnd um stofnun Vatnajökulsþjóðgarðs setti fram um sýningu í gestastofu.  Þar er sagt að í gestastofu yrði um að ræða fræðslusýningu í þrem meginhlutum: útstilling mynda og texta og áþreifanlegra hluta, lifandi myndir (video, dvd) og fróðleiksbrunnur bóka, tímarita og tölvugrunna.  Jöklasýning fer létt með að uppfylla öll þessi skilyrði.  Sýningin býður upp á upplifun, fræðslu um náttúruna á Suðausturlandi og jöklafræði.  Sýningunni er skipt niður í fimm þætti:

 ·        Kynning og náttúruvernd

·        Náttúra og þjóðgarður

·        Jöklafræði

·        Upplifun - m.a. gengið inn í ígildi jöklasprungu og íshellis.

·        Búseta við jökul og rannsóknarferðir.

 Í sýningunni eru uppsett dýr og fuglar sem eru einkennandi fyrir svæðið, kvikmynd um eldgos í Vatnajökli er sýnd á tjaldi og þrjár aðrar myndir á 42" skjám. Boðið er upp á margmiðlunarefni, s.s. upplýsingar í tölvum, ýmis hljóð, líkön og aflestur mælitækja.  Einnig fylgir með útsýnispallur með örnefnakorti.  Þá er aðgengilegur texti um náttúru svæðisins, náttúruvernd og þjóðgarða og jöklafræði.  Stórar myndir af náttúru svæðisins prýða sali sýningarinnar.  Að lokum er leikmynd uppsett af jöklaförum við jöklakofa og tjald.

 Hugmynd um samstarf Jöklasýningar og þjóðgarðs er ekki ný af nálinni.  Frá því að umræða hófst um uppsetningu Jöklasýningar hefur hún verið tengd við hugmyndina um stofnun Vatnajökulsþjóðgarðs.  Í stefnumörkun bæjarstjórnar Hornafjarðar frá árinu 2001 segir að eitt af aðalmarkmiðum Hornfirðinga í þjóðgarðsmálum sé að koma á fót samstarfi milli Jöklasýningar og þjóðgarðs.   Þá segir í niðurstöðum undirbúningsnefndar um stofnun Jöklaseturs frá nóvember 2001 að æskilegt væri að þróa samstarf Jöklasýningar og hins fyrirhugaða þjóðgarðs.

 Bæjarstjórn Hornafjarðar og stjórn Jöklaseturs ses. óska eftir því að nú þegar hefjist viðræður um náið samstarf  Vatnajökulsþjóðgarðs og Jöklaseturs ses. Stefnt verði að því að strax og Vatnajökulsþjóðgarður hefur formlega verið stofnaður verði rekin gestastofa í tengslum við Jöklasýninguna á Höfn, en einnig verði undirbúningi að byggingu nýrrar gestastofu þjóðgarðsins á Stekkanesi við Höfn hagað þannig að mögulegt verði að flytja Jöklasýninguna þangað þegar sú bygging er risin og tekin til starfa.  Flutningur Jöklasýningar í gestastofu á Stekkanesi yrði verðugt framlag Austur-Skaftfellinga til eflingar Vatnajökulsþjóðgarðs.

 Bæjarstjórn samþykkir samhljóða framlagða bókun.

 Björk Pálsdóttir fagnar samningi við Sindra einnig minnir hún að girða þurfi nýja völlinn af.  Einnig spyr hún um staðsetningu á knattskjólinu og skýli við stoppistöðvar grunnskólanema.  Þá óskaði hún eftir skilti við hlaupabrautina og nefndi einnig að lýsa þurfi brautina upp.  Að lokum ræddi hún um bréf frá Dagbjörtu Sverrisdóttir.

Sigurlaug Gissurardóttir greindi frá ósk Dagbjartar um að nýja brúin yfir Hornafjarðarfljót yrði hossubrú.  Ræddi hún um gestastofu við Stekkanes og taldi hún að staðsetning á Stekkanesi væri góð og væri til þess fallin að þjóna nærsvæði þjóðgarðsins allt um kring.  Ræddi hún um skipulag þjóðgarðsins og málefni hans. 

Hjalti Þór Vignisson sagði að verið væri að vinna að staðsetningu hússins. Búið er að gera samning við verktaka um girðingu við íþróttavöll og stefnt sé að lýsingu við völlinn.

Árni Rúnar Þorvaldsson ræddi um vinnu byggingar og skipulagsnefndar á aðalskipulagi sveitarfélagsin.  Einnig ræddi hann um drög að samningi við Sindra og tekur undir með Björk varðandi málið. 

Ræddi hann um heilbrigðismál og lagði hann fram eftirfarandi bókun:

 Bæjarstjórn Sveitarfélagsins Hornafjarðar krefst þess að fjármálaráðherra og heilbrigðisráðherra aflétti óvissu um framtíð reksturs HSSA. Ráðið bendir á að samskipti ríkis og sveitarfélagsin hafa í raun verið í lausu lofti síðan þjónustusamningur við heilbrigðs ? og tryggingamálaráðuneytið rann út um síðustu áramót. Þessi óvissa stendur framþróun í starfi stofnunarinnar fyrir þrifum og mun á endanum koma niður á þjónustu við íbúa sveitarfélagsins.

Bæjarstjórn Sveitarfélagsins Hornafjarðar hvetur ráðherrana til þess að kynna sér þann árangur sem náðst hefur á samningstímanum. Góður árangur hefur náðst á grundvelli samningsins hvað varðar eflingu heimahjúkrunar þannig að tekist hefur að fækka einstaklingum í langlegu umtalsvert. Bæjarstjórn skorar á fjármála ? og heilbrigðisráðherra að þessi árangur verði metinn að verðleikum í nýjum samningi. 

 Bæjarstjórn samþykkir með sex atkvæðum einn situr hjá.

 Guðrún Ingimundardóttir er fylgjandi því að Jöklasýning verði flutti í gestastofu á Stekkanesi.  Einnig ræddi hún um hámarkshraða í þéttbýli og lagði fram hugmyndir þar að lútandi.

Björn Ingi Jónsson gerði hraðatakmarkanir að umtalsefni og sagði að samþykkt hafi verið á síðasta fundi byggingar- og skipulagsnefndar að ljúka við tillögugerð um hámarkshraða innanbæjar.  Þá ræddi hann um bókun um heilbrigðismál en spurði hver væru samningsmarkmið í gerð hins nýja samnings.

Björk Pálsdóttir  ræddi um kauptilboð í eign ríkisins á Hafnarbraut 27 og spurði hvað ætti að gera við þetta húsnæði.  

Hjalti Þór Vignisson  fór yfir samningaviðræður við ríkið um eignarhald á ráðhúsinu. Einnig ræddi hann um heilbrigðismál og sagði hafa orðið fyrir miklum vonbrigðum með síðasta samtal við heilbrigðisráðuneytið. 

Árni Rúnar Þorvaldsson sagði nauðsynlegt að tryggja sambærilegan samning eins og verið hefur. 

Fundargerð samþykkt.

 Bæjarstjórn Hornafjarðar, 123. fundur, 15. nóvember  2007 , áður samþykkt.

2.        Fjárhagsáætlun ? síðari umræða

Bæjarstjóri fylgdi áætlun úr hlaði og sagði að fjárhagur sveitarfélagsins standi traustum fótum.  Í máli hans kom fram að bankainnistæða sé drjúg og dugi langt með að borga upp framkvæmdir við sundlaug.  Rekstrarafgangur ársins 2008 verður góður miðað við núverandi forsendur.  Þær geta breyst þar sem kjarasamningar eru margir hverjir lausir og veltan í þjóðfélaginu að minka sem hefur áhrif á Jöfnunarsjóð sveitarfélaga.  Bæjarstjóri sagði að samspil nokkurra atriða gerði stöðu sveitarfélagsins eins sterka og raun ber vitni. 

Í fyrsta lagi hefur sveitarfélagið ekki tekið lán í fimm ár og því borgað hratt niður skuldir og lækkað þannig fjármagnskostnað.  Mörg önnur sveitarfélög eru með háar skuldir og nýta mikið af sínum tekjum í afborganir sem annars gætu farið í rekstur og framkvæmdir.  Það væri því mikilvægt að halda skuldastöðunni góðri.

Í öðru lagi er skýringanna að leita í ábyrgri fjármálstjórn forstöðumanna og framkvæmdastjóra.  Forstöðumenn hafa haldið áætlanir vel og eru vel meðvitaðir um mikilvægi þess að jafna út fjárhagsgetu sveitarfélagsins og metnað sinn í uppbyggingu starfseminnar. 

Í þriðja lagi hefur verið skorið niður í stjórnsýslu sveitarfélagsins á undanförnum árum.  Nefndi hann í því sambandi breytingar á fræðslu- og félagssviði, stjórnsýslusviði og tækni- og umhverfissviði.  

Í fjórða lagi hafa tekjur sveitarfélagsins aukist, einkum úr jöfnunarsjóði.  Þá sagði bæjarstjóri að árið 2008 muni einkennast af miklum framkvæmdum, framsæknum verkefnum og ábyrgð í rekstri.  Á árinu 2008 verði framkvæmt fyrir ríflega 600 milljónir í A og B hluta.  Þar er ný sundlaug stærsta einstaka verkefnið en einnig verður byggt nýtt knattspyrnuhús og hafist handa við byggingu nýrrar bryggju við Álaugarey.  Árið 2008 munu nefndir fjalla um málefni fjölskyldunnar, starfsmannamál og greina húsnæðisþörf stofnana sveitarfélagsins.  Þá verða tekin skref til að auka sýnileika sveitarfélagsins í dreifbýlinu  Að endingu verður aukið umtalsvert við stuðning við U.M.F. Sindra þannig að félagið geti betur sinnt starfi sínu í lýðheilsumálum og eflt æskulýðsstarf.

Þá gerði bæjarstjóri grein fyrir breytingum á milli umræðna en kynnti að rekstrarniðurstaða yrði óbreytt.  Eftirfarandi kom fram í máli bæjarstjóra um lykiltölur í rekstri bæjarsjóðs:

A-hluti:

Skatttekjur bæjarsjóðs eru áætlaðar um 1.039,7 m.kr. og aðrar tekjur um 176,2 Rekstur A-sjóðs er áætlaður 1.075,6  m.kr. Fjármagnsliðir eru áætlaðir 23,35 m.kr. Mismunur tekna og gjalda A-hluta sveitarfélagsins er því afgangur um 126,4 m.kr. Handbært fé frá rekstri er um 212,6 m.kr.  Fjárfestingar eru 550 m.kr. Afborganir langtímalána 87,0 m.kr. og tekin verða ný langtímalán 200 m.kr. og handbært fé í árslok verða 143,6 m.kr.  Með þessari áætlun hækka langtímaskuldir sveitarsjóðs um 113 m.kr.

 A og B-hluti:

Heildartekjur eru áætlaðar 1.371,2 m.kr. Rekstrargjöld er áætlaður 1.172,0  m.kr. þar af laun  og launatengd gjöld 666,6 m.kr. Fjármagnsliðir eru áætlaðir 69,3 m.kr. Mismunur tekna og gjalda A og B hluta sveitarfélagsins er því afgangur um 129,9 m.kr. Handbært fé frá rekstri er um 259,6 m.kr.  Fjárfestingar eru 506,1 m.kr. Afborganir langtímalána 103,1 m.kr. og tekin verða ný langtímalán 235 m.kr. Handbært fé í árslok verða 146,2 m.kr.  Með þessari áætlun hækka langtímaskuldir A og B hluta um 88,8 m.kr.

Heildarumsvif sveitarfélagsins A og B hluta er um 1,4 milljarður kr.

 Björn I. Jónsson lagði fram eftirfarandi bókun:

 Bókun bæjarfulltrúa Sjálfstæðisflokks við afgreiðslu fjárhagsáætlunar fyrir árið 2008.

 Gerð fjárhagsáætlunar er mikilvægasta stjórntækið sem kjörnir fulltrúar hafa til að framfylgja stefnu sinni.  Það sem af er þessu kjörtímabili hefur það ekki verið nýtt sem skyldi til að gæta aðhalds í rekstri eða móta stefnu til uppbyggingar. Benda má á að þrátt fyrir að börnum á grunnskóla- og leikskólaaldri fari fækkandi hækkar sú upphæð sem sett er í þennan málaflokk m.a. vegna þess að með sameiningu grunnskólanna hefur verið farin dýrari leið þ.e. að skipa þrjá skólastjóra, sama gildir í leikskólum með því stjórnfyrirkomulagi sem þar hefur verið samþykkt. Árið 2008 er áætlað að tæp 92% af útsvarstekjum sveitarfélagsins fari fræðslu og uppeldismál.

Staða sveitarsjóðs er mjög sterk um þessar mundir, en það er ekki vegna betri reksturs heldur vegna aukinna framlaga úr jöfnunarsjóði, framlög jöfnunarsjóðs nema nú um þriðjung af tekjum í A-hluta í stað fjórðungs áður. Einnig hafa nýframkvæmdir síðastliðin tvö ár verið mun minni ráð var gert fyrir í fjárhagsáætlunum.

 Á næsta ári er gert ráð fyrir að 45 milljónir króna fari í undirbúning á Leirusvæði. Sú fjárhæð nægir ekki til að ljúka við fyrsta áfanga á Leirusvæði. Veita þarf 10 milljónum til viðbótar í það verkefni ef lóðir á svæðinu eigi að verða tilbúnar til  úthlutunar á árinu 2008. Á síðustu árum hefur leiguíbúðum fækkað umtalsvert í sveitarfélaginu. Því er mikilvægt að byggingalóðir verði sem fyrst tilbúnar til úthlutunar.

 Reynir Arnarson ræddi um framkvæmdir á Leirusvæðinu og sagði að ekki væri þörf fyrir að bæta við 10 m.kr. vegna þessa. Taldi hann að fjárveiting til Leirusvæðis dugi til fyrsta áfanga. 

Hjalti Þór Vignisson  ræddi um bókun sjálfstæðismanna og spurði hvar ætti að taka þessar 10 m.kr. sagði að hann væri ekki sammála að fjárhagsáætlun væri ekki nýtt sem stjórntæki. 

Árni Rúnar Þorvaldsson sagði að fjárhagur sveitarfélagsins sé mjög traustur og reksturinn skilar afgangi en að  miklar framkvæmdir yrðu á næsta ári. Einnig ræddi hann um fjölskyldustefnu sem fara á í og hann er ekki sammála bókun sjálfstæðismanna varðandi grunnskólann.

Björn I. Jónsson sagði að bæjarsjóður væri traustur og bæta mætti við 10 m.kr. í framkvæmdir, taldi hann að kostnaður hafi ekki minkað þó starfsfólki fækki.   

Hjalti Þór Vignisson sagði að það væri ekkert bruðl í gangi eins og skilja má á bókun Sjálfstæðisflokksins.

 Forseti fyrir hönd bæjarstjórnar þakkar öllum sem komu að gerð fjárhagsáætlunar.

 Forseti bar upp fjárhagsáætlun fyrir árið 2008. Samþykkt með 6 atkvæðum, 1 sat hjá.

3.        Þriggja ára áætlun - fyrri umræða

Bæjarstjóri fylgdi áætluninni úr hlaði og sagði m.a. að áætlun áranna 2009 ? 2011 væri á  föstu verðlagi og allar upphæðir miðast við fjárhagsáætlun 2008 nema upphæð til fjárfestinga og lána.  Gert er ráð fyrir varanlegum fjárfestingum að upphæð 563,1 m.kr., á árunum 2009 til 2011.  Áætlunin gerir ráð fyrir að aðalsjóður framkvæmi fyrir 500,0 m.kr. og  taki langtímalán að upphæð 50,0 m.kr. Á móti eru afborganir langtímalán 251,2 m.kr. Langtímalán aðalsjóðs lækka því á tímabilinu um 201,2 m.kr. Langtímalán A-hluta verða því í lok tímabilsins 449,4 m.kr. 

 Forseti bar upp tillögu um að vísa fjárhagsáætlun 2009-2011 til seinni umræðu.  Samþykkt samhljóð með 6 atkvæðum einn fjarstaddur.

 4.      Innkaupareglur sveitarfélagsins

Bæjarstjóri gerði grein fyrir tilkomu reglnanna og vísað til lagasetningar þar um.  Þá upplýsti hann að reglunnar séu unnar eftir fyrirmynd reglna frá Akranesi, Akureyri og Sambandi íslenskra sveitarfélaga.  Þá gerði bæjarstjóri grein fyrir innihaldi reglnanna. 

Forseti bar reglunnar upp til samþykktar.  Samþykkt með 5 atkvæðum, 2 sátu. 

5.        Fyrirspurnir

Engar.

Fundi slitið kl. 17:25