Fundargerð Bæjarstjórnar 49

49. fundur

Fundur haldinn í bæjarstjórn Hornafjarðar, fimmtudaginn 11. apríl 2002, kl. 16.00 í Ekru.

Mætt voru: Gísli Sverrir Árnason, Halldóra Bergljót Jónsdóttir, Björn Traustason, Egill Jón Kristjánsson, Eyjólfur Guðmundsson, Kristín Gestsdóttir, Þorbjörg Arnórsdóttir, Sigurlaug Gissurardóttir, Margrét Ingólfsdóttir, Hermann Hansson og Ólafur Sigurðsson. Einnig Albert Eymundsson og framkvæmdastjórar sviða Inga Jóna Halldórsdóttir, Ásta H. Guðmundsdóttir og Stefán Ólafsson, og Helgi Már Pálsson.

.



Forseti setti fund og bauð fundarmenn velkomna.

Gengið var til dagskrár.

1. Fundargerðir

161. fundur Bæjarráðs Hornafjarðar 5. mars 2002

· Atvinnu- og ferðamálanefnd Hornafjarðar 34. fundur 25. febrúar 2002.

· Æskulýðs- og tómstundaráð Hornafjarðar 38. fundur 25. febrúar 2002.

· Landbúnaðarnefnd Hornafjarðar 27. fundur 26. febrúar 2002.

· Fundargerð 44. fundar samstarfsnefndar Kennarasambands Íslands og Launanefndar sveitarfélaga 23. febrúar 2002 til kynningar.

Þorbjörg spurðist fyrir um stöðu mála varðandi ráðningu atvinnu- og upplýsingafulltrúa. Hún telur brýnt að sem fyrst verði kallaður saman hópur sem sinna á eftirfylgni með skýrslunni. Þorbjörg lýsti áhyggjum af fjölda atvinnulausra í sveitarfélaginu. Þorbjörg spurðist fyrir um stöðu varðandi hagkvæmniathugun á sundlaug, stefnumótun í íþrótta- og æskulýðsmálum og aukna ásókn hreindýra til vesturs. Sigurlaug ræddi mikla ásókn hreindýra til vesturs og einnig fyrirhugaða ráðningu atvinnu- og upplýsingafulltrúa. Hún velti fyrir sér breyttri stöðu okkar með nýrri kjördæmaskipan m.a. varðandi samskipti við atvinnuþróunarfélög og möguleika á samstarfi Ferðamálafélags Austur-Skaftafellssýslu og rekstraraðila tjaldsvæðis. Sigurlaug telur tímabært að bjóða iðnaðarráðherra heim í hérað til viðræðna. Ólafur tók undir áhyggjur af ágangi hreindýra til vesturs. Hann ræddi einnig nauðsyn á góðu farsímasambandi á Breiðamerkursandi. Bæjarstjóri sagði verið að huga að starfslýsingu fyrir nýjan starfsmann í samstarfi við Þróunarstofu Austurlands. Fundur um stefnumótunina er fyrirhugaður n.k. þriðjudag. Gert er ráð fyrir að hagkvæmniathugun á sundlaug verði lögð fyrir bæjarráð 22. apríl n.k.. Bæjarstjóri sagði hreindýraráð hafa átt erfitt með stjórnun veiða m.a. vegna þess að sumir bændur hafa lokað aðgangi að jörðum sínum á veiðitíma. Nú væri í smíðum ný reglugerð um stjórn hreindýraveiða sem færði ráðinu auknar heimildir til að taka á þessum málum utan veiðitíma. Bæjarstjóri sagði bráðabirgðaleyfi hafa verið gefið út vegna sendis á Breiðamerkursandi. Ólafur skorar á Landsímann að koma upp varanlegu farsímasambandi á Breiðamerkursandi. Halldóra tók undir áskorunina og mælist til þess að bráðabirgðasendir sá sem reistur var fái að standa uns framtíðarlausn finnist á málinu.

Fundargerð samþykkt.

162. fundur Bæjarráðs Hornafjarðar 12. mars 2002.

· Hafnarstjórnar Hornafjarðarhafnar 35. fundur 4. mars 2002.

· Þjónustuhópur aldraðra 8. fundur 6. mars 2002.

163. fundur Bæjarráðs Hornafjarðar 19. mars 2002.

· Almannavarnanefnd A-Skaft 20. fundur 6. mars 2002.

· Félagsmálaráð Hornafjarðar 79. fundur 7. mars 2002.

· Fundargerð stjórnar SSA 14. febrúar 2002 til kynningar.

Halldóra sagði frá fundi Þróunarstofu Austurlands um stóriðjuframkvæmdir á Austurlandi, fund sem hún sagði hafa verið mjög upplýsandi. Ef af framkvæmdum verður munu þeim fylgja bæði tækifæri og ógnanir fyrir sveitarfélagið sem nauðsynlegt sé að búa sig undir.

Ólafur spurði um jarðhitaleit. Björn taldi tækifæri sem fylgja munu stóriðjuframkvæmdum á Austurlandi verða mun meiri er ógnanir. Bæjarstjóri sagði borunum lokið í Öræfum og Suðursveit en enn liggi niðurstöður ekki fyrir. Hann sagði rannsóknir vera að hefjast á Hoffellssvæðinu. Björn spurði hvort ekki gildi neinar reglur þegar aflaheimildir eru seldar úr sveitarfélaginu, hvort ekki sé eðlilegt að heimamenn hafi að þeim forkaupsrétt. Sigurlaug ræddi merkingar í sveitarfélaginu og sagði frá mikilli vinnu sem óformlegur vinnuhópur hefur lagt fram í málinu. Hún sagði mikilvægt að koma málinu í formlegan farveg og að fundur væri væntanlegur um það mál. Bæjarstjóri sagði bæjaryfirvöld hafa forkaupsrétt þegar skip eru seldir en þegar um sölu hlutafélaga er að ræða kemur það ekki inn á borð bæjarstjórnar. Bæjarstjóri sagði búið að ráða einstakling til að fara yfir merkingu sveitabæja og að Vegagerðin hafi varið umtalsverðu fjármagni á síðasta ári til framleiðslu upplýsingaskilta fyrir A-Skaftafellssýslu, en flest þessara skilta verða sett upp á næstu vikum. Halldóra ræddi sölu aflaheimilda.

Fundargerð samþykkt.

164. fundur Bæjarráðs Hornafjarðar 3. apríl 2002.

· Heilbrigðis- og öldrunarráð 34. fundur 19. mars 2002.

· Húsnæðisnefnd Hornafjarðar 38. fundur 14. mars 2002.

· Menningarmálanefnd Hornafjarðar 35. fundur 2002.

· Æskulýðs- og tómstundaráð Hornafjarðar 39. fundur 25. mars 2002.

· Samstarfsnefnd Kennarasambands Ísl. og launanefnd sveitarfélaga 41. fundur 2002 til kynningar.

· Stjórn Sambands ísl. sveitarfélaga 689. fundur til kynningar - sjá 19. lið.

Björn spurist fyrir um ógreiddan hreindýraarð og stöðu líkamsræktamála á Hornafirði. Bæjarstjóri sagði verið að vinna að lausn mála varðandi ógreiddan hreindýraarð og í því sambandi væri horft til núverandi úthlutunarreglna hreindýraráðs. Hann sagði málefni líkamsræktar verða á dagskrá næsta bæjarráðsfundar.

Fundargerð samþykkt.

Bæjarstjórn Hornafjarðar 48. fundur 7. mars 2002 áður samþykkt.

2. Ársreikningar 2001 - fyrri umræða

Bæjarstjóri fylgdi ársreikningunum úr hlaði með eftirfarandi greinagerð



Ársreikningar Sveitarfélagsins Hornafjarðar og stofnana fyrir árið 2001 eru hér til fyrri umræðu. Ég ætla í stuttu máli að gera grein fyrir helstu niðurstöðum og lykiltölum reikninganna.



Skatttekjur námu tæpum 610 milljónum króna sem er um 23 milljónum kr. hærra en fjárhagsáætlun gerði ráð fyrir. Það skýrist m.a. með 19 milljón kr. hærra framlagi úr Jöfnunarsjóði sveitafélaga og 4 milljóna kr. hærri útsvarstekjum. Rekstur málaflokka nam rúmum 503 milljónum kr. en fjárhagsáætlun gerði ráð 485 milljónum. Rekstur málaflokka fer þannig um 4% fram úr fjárhagsáætlun. Skatttekjur umfram rekstrargjöld málaflokka eru rúmlega 106,5 milljón kr. Greiðslubyrði vegna langtímaskuldbindinga er rúmlega 44 milljónir og eignfærð og gjaldfærð fjárfesting rúmar 130 milljónir. Ráðstafað er því umfram tekjur rúmum 67 milljónum.

Skuldir bæjarsjóðs aukast um 92 milljónir kr. vegna mikilla fjárfestinga. Peningaleg staða án lífeyrisskuldbindinga er - 268 milljónir, en með lífeyrisskuldbindingum ? 384,2 milljónir. Veltufjárstaða er tæpar 68,3 milljónir.

Fjárfrekustu málaflokkar eru.

· Fræðslumál um 244 milljónir sem er um 40% af skatttekjum.

· Félagsmál um 90 milljónir sem er um 15% af skatttekjum.

· Yfirstjórn um 52 milljónir sem er um 8,5% af skatttekjum.

· Menningarmál um 26 milljónir sem er um 4,3% af skatttekjum

· Æskulýðs og íþróttamál um 32 milljónir sem er um 5,2% af skatttekjum.

Önnur mál þ.m.t. reiknaðar lífeyrisskuldbindingar um 34,3 milljónir sem er um 5,6% af skatttekjum.

Aðrir málaflokkar eru innan við 5 % hver af skatttekjum.

Helstu fjárfestingar eru:

· Bygging Nýheima kr. 67,4 milljónir.

· Nýbygging gatna og holræsa kr. 45,6 milljónir en álagninga gatnagerðagjalda nam kr. 19,5 milljónir.

· Kaup á hlutabréfum í Sláturfélaginu Búbót svf. kr. 5 milljónir.



Hornafjarðarhöfn helstu niðurstöður: Tekjur eru tæpar 58,2 milljónir. Gjöldin eru rúmar 45,3 milljónir . Fjármagnsgjöld eru tæpar 2,6 milljónir, þannig að tekjur umfram gjöld eru tæpar 10,3 milljón. Peningaleg staða er neikvæð um rúmar 23 milljónir án lífeyrisskuldbindinga og veltufjárstaðan er neikvæðu um rúmar 3,2 milljónir. Fram kemur í skýrslu endurskoðanda að rekstrarniðurstaða hafnarsjóðs er mun betri á árinu 2001 en var árið 2000. Aukning verður í tekjum um rúmar 9,0 millj. króna en kostnaðarliðirnir eru í heild sinni óbreyttir milli ára.



Kaupleigukerfið helstu niðurstöður: Leigutekjur eru rúmar 18 milljónum kr. Rekstrargjöld námu rúmum 10 milljónum þannig að tekjur umfram gjöld námu um 8 milljónum kr. Fjármagnskostnaður og greiðslubirgði lána námu tæpum 13 milljónum þannig að halli kerfisins er 4,9 milljónir. Peningalegt framlag bæjarins nam tæpum 1,8 milljónum kr. Peningaleg staða er neikvæðu um 325 milljónir kr.



Heilbrigðisstofnun Suðausturlands helstu niðurstöður. Heildartekjur námu rúmum 228,3 milljónum kr. og rekstrargjöld námu rúmum 238,4 milljón kr. Gjöld umfram tekjur námu um 10,1 milljón kr. en gert er ráð fyrir að ríkissjóður greiði hallann. Veltufjárstaðan er neikvæð um 16,5 milljónir kr. Peningaleg staða er neikvæð um 19,2 milljónir kr.



Eins og fram kemur í skýrslu löggilts endurskoðanda sveitarfélagsins er ekki ástæða til að gera miklar athugasemdir við ársreikning 2001. Þó er alltaf nauðsynlegt, ekki síst í opinberum rekstri eins og rekstri sveitarfélags, að vera vakandi og á varðbergi því kröfur og væntingar fólks eru sífellt að aukast.



Hermann sagði gott að aukning tekna og gjalda haldist í hendur en að tekjuaukinn stafi fyrst og fremst af auknum framlögum úr Jöfnunarsjóði. Hermann benti á að peningaleg staða um áramót var betri en búist var við vegna seinkunar á framkvæmdum við Nýheima. Hermann gagnrýnir að Nýherjabúðir eru byggðar án þess að fjármögnun liggi fyrir en telur hugmynd um fasteignafélag ákveðna lausn. Halldóra ræddi um ársreikninga sveitarsjóðs og tengdra stofnana og telur niðurstöður þeirra viðunandi. Eyjólfur sagði miklar framkvæmdir hafa verið í sveitarfélaginu undanfarið og auk þess sé hér veitt mjög góð þjónusta. Hann segir mikið rætt um að auknar tekjur þurfi að koma til sveitarfélaganna en lítið gerist til bóta í þeim málum. Eyjólfur segir að þrátt fyrir allt sé staða sveitarfélagsins góð en að sýna þurfi varfærni því svigrúm sé lítið. Þorbjörg segir vinnubrögð við fjárhagsáætlunargerð sveitarfélagsins góð, áætlanir þær sem gerðar eru standist. Hún segir þá framsæknu stefnu sem unnið hefur verið að á kjörtímabilinu hafa skilað góðu inn í samfélagið.

Ársreikningum sveitarsjóðs og tengdra stofnana vísað til síðari umræðu í bæjarstjórn.



Sigurlaug vék af fundi 18:40.

3. Áætlun um rekstur , framkvæmdir og fjárfestingar sveitarfélagsins 2002-2011 (3 ára og 10 ára áætlun) til seinni umræðu

Bæjarstjóri kynnti forsendur áætlunarinnar.



· Reiknað er með 0,5% aukningu í mannfjölda á ári, innan tímabilsins.

· Reiknað er með sömu (0,51%) hækkun skatttekna og þjónustugjalda. Útsvarsgrunnur árið 2002 er miðaður við nýjar upplýsingar frá Sambandi ísl. sveitarfélaga, en skv. þeim tölum má reikna með því að tekjufærð staðgreiðsla á því ári verði 386 mkr.

· Aðrar tölur áætlunarinnar eru settar fram á föstu verðlagi, út frá þeirri forsendu að framlög til rekstrar verði óbreytt miðað við tekjur og gjöld.

· Áhrif magnbreytinga (mannfjölda) koma þó fram í umfangi rekstrar í Hafnar-, Heppu- og Nesjaskóla, þar sem reiknað er með 0,3% hækkun á ári.

· Framkvæmdum og fjárfestingum er skipt í tvennt í áætluninni. Annars vegar eru verkefni sem reiknað er með að verði til staðar á hverju ári út frá þeim grunni sem fyrir hendi er í fjárhagsáætlun yfirstandandi árs. Þessi grunnur telst vera 12,3 mkr. á ári. Hins vegar eru framlög til sérstakra framkvæmda sem ákveðið kann að vera á hverjum tíma að ráðast í. Á tímabilinu frá yfirstandandi ári fram til 2003 eru þannig færð á málaflokka framlög sem skýrast af fjárfestingum sem þegar hafa verið ákveðnar, s.s. loka á byggingu Nýheima. Frá og með árinu 2002 og út tímabilið er metið hve mikið kunni að renna til sérstakra verkefna annarra og er sú tala færð neðst í málaflokkayfirlitið.

· Lífeyrisskuldbindingar eru færðar á málaflokk 21 og eru metnar á 12,0 mkr. miðað við árið 2001. Þetta mat er í samræmi við hækkun skuldbindinga milli 2000 og 2001.

· Varðandi framkvæmdaröð og framkvæmdahraða er þó rétt að hafa í huga að sveitarfélagið hlýtur ávallt að meta út frá aðstæðum hverju sinni hvenær hentugast er að ráðast í framkvæmdir. Rétt kann að vera við slíkar aðstæður að fresta framkvæmdum, bæði til þess að ná hagstæðari verðum, en eins til þess að stuðla að stöðugleika.



Markmið áætlunarinnar:

· Langtímalán, áhvílandi á bæjarsjóði, eru í dag 394 mkr. Áætlunin gengur út frá því að ekki komi til lántöku vegna rekstrar og þeirra verkefna sem þegar hafa verið ákveðin. Á hinn bóginn er gert ráð fyrir lántöku til greiðslu afborgana og til að standa straum af hluta þeirra sérstöku framkvæmda sem ákveðnar kunna að verða. Gert er ráð fyrir því að langtímalán verði í lok tímabilsins 490 mkr.

· Eitt meginhlutverk langtímaáætlunarinnar er að varpa ljósi á svigrúm til sérstakra framkvæmda og stærri fjárfestinga á tímabilinu. Til langs tíma litið helgast svigrúmið fyrst og fremst af þeim afgangi sem til staðar er þegar rekstrarútgjöld hafa verið greidd. Því er í áætluninni svigrúm til framkvæmda ákvarðað út frá afgangi bæjarsjóðs að teknu tilliti til lántöku skv. framansögðu.

· Helstur fjárfestingar sem þessi áætlun gerir ráð fyrir eru: (ásamt stofnkostnaði sem áætlaður hefur verið):
- Nýheimar....................................................... 151,0 mkr.
- Ný íþróttamannvirki........................................ 160,0 mkr.
- Nýbygging og viðhald holræsa........................ 275,0 mkr.
ath. þó endurgreiðslu vsk. til frádráttar (43,6).
Þá er aukið rekstrarumfang vegna nýrra framkvæmda ekki tekið með í áætluninni, nema rekstur Nýheima en árlegur rekstrarkostnaður hans er metinn 2,4 mkr.

· Rekstur málaflokka tekur nú til sín 90% af skatttekjum.

· Reiknað hefur verið með, að 50,0 mkr. mismunur á tekjum og gjöldum skv. áætlun 2001 verði jafnaður í gegnum veltufjárstöðu.

Bæjarstjóri sagði alveg ljóst að ef forsendur áætlunarinnar breytist ekki til batnaðar þurfi við næstu fjárhagsáætlanagerð að gera verulegar breytingar á langtímamarkmiðum til að rekstur sveitarfélagsins verði með viðunandi hætti.

Egill Jón sagði aukningu gjalda umfram tekjur vera áhyggjuefni. Hann sagði mikilvægasta verkefnið nú vera að skoða hvort mögulegt sé að hagræða í rekstri og skoða nýja möguleika í rekstrarformi

Ólafur sagði 10 ára áætlunina áhyggjuefni. Hann lagi fram eftirfarandi bókun fulltrúa Framsóknarmanna í bæjarstjórn við afgreiðslu á áætlun um rekstur, framkvæmdir og fjárfestingar 2002 - 2011 :



?Sú langtímaáætlun ( 10 ára ) sem hér er til afgreiðslu sýnir ýmis hættumerki í rekstri og efnahag sveitarfélagsins.

Í því sambandi viljum við nefna eftirtalin atriði:



Rekstrargjöld sem hlutfall af skatttekjum eru öll árin á bilinu 88% til 92% af skatttekjum. Þetta er óviðunandi og hlýtur að leiða til róttækrar endurskoðunar á öllum rekstrarþáttum og framkvæmdaáformum ef ekki á að leiða til stóraukinnar skuldasöfnunar.

Samkvæmt áætluninni er gert ráð fyrir að ný langtímalán að fjárhæð 1102 milljónir verði tekin á tímabilinu, en verklegar framkvæmdir og fjárfestingar nemi 715 milljónum. Þannig er lántaka 387 milljónum hærri en fjárfestingar og verið er að taka ný lán til að greiða eldri skuldir, en nauðsynlegt hlýtur að teljast að reksturinn skili nægum fjármunum til afborgana af eldri lánum.

Áætlunin gerir ráð fyrir að peningaleg staða sem hlutfall af skatttekjum verði neikvæð um 65% og allt upp í 88% á tímabilinu. Í skýrslu löggilts endurskoðanda, sem fylgir Ársreikningi 2001 kemur fram að nettóskuldir á því kjörtímabili sem er að líða hafa verið á bilinu 33% til 53%. Þar kemur einnig fram þekkt viðmið um að nettóskuldir ættu helst ekki að fara yfir 50% og hættumörkum væri náð þegar hlutfallið væri orðið 80-90%.



Það er skoðun okkar, að í ljósi ofangreindra staðreynda hljóti þessi mál að koma til endurskoðunar snemma á næsta kjörtímabili auk þess sem verkaskipting milli ríkis og sveitarfélaga og skipting skatttekna hlýtur ávallt að vera til endurskoðunar.

Við sitjum því hjá við afgreiðslu á þessari áætlun.?



Þorbjörg sagði það vera verksvið sveitarstjórnarmanna í landinu að knýja á um nauðsyn aukinna framlaga úr Jöfnunarsjóði. Þorbjörg sagði vonlaust að sveitarfélagið geti fjármagnað holræsaframkvæmdir af eigin skatttekjum. Hún sagði miður að stefnumótun í íþrótta- og æskumálum væri ekki lokið til að sjá hvort einhverjar lausnir eru í sjónmáli varðandi framtíðaruppbyggingu.

Halldóra ræddi um að nettóaukning á skuldum á 10 ára tímabili er áætluð 96 milljónir. Hún sagði holræsisframkvæmdir brýnt verkefni og sagði ríkið þurfa að taka meiri þátt í kostnaði framkvæmdanna.

Áætlunin var borin upp til atkvæða. Bæjarstjórn samþykkir áætlunina með 7 atkvæðum, 3 sátu hjá.

4. Stefnumótun í heilbrigðis- og öldrunarmálum ? drög

Bæjarstjóri fór yfir helstu markmið stefnumótunar í heilbrigðis- og öldrunarmálum.

Gísli Sverrir fór yfir tillögur að breytingum á texta stefnumótunarinnar. Engar athugasemdir komu fram við breytingarnar.

Kristín lýsti ánægju með stefnumótunina og telur þá ákvörðun okkar að verða reynslusveitarfélag í heilbrigðismálum hafa skilað miklum árangri.

Halldóra ræddi um þá vinnu sem liggur að baki stefnumótuninni. Hún lagði áherslu á að heimaþjónusta í dreifbýli hefur verið efld frá því að reynsluverkefnið hófst.

Margrét lagði fram eftirfarandi bókun fulltrúa Framsóknarmanna í bæjarstjórn vegna stefnumótunar sveitarfélagsins í heilbrigðis- og öldrunarmálum.

?Við undirrituð fögnum því að fram er komin stefnumótun í heilbrigðis- og öldrunarmálum og lýsum stuðningi við þau markmið sem þar er steft að. Við teljum hins vegar nauðsynlegt að skýrt verði kveðið á um tímasetningu markmiða, sérstaklega um byggingu aukins hjúkrunar- og dvalarrýmis. Jafnframt teljum við brýnt, að þar til þau markmið náist, verði í samvinnu við Heilbrigðisráðuneytið, þegar í stað unnið að því að finna skammtímalausn á mjög aðkallandi þörf á hjúkrunarrými.?

Eyjólfur lýsti sérlegri ánægju með stefnumótunina.

Bæjarstjóri lagði fram almenna bókun:

?Stefnumótun í heilbrigðis- og öldrunarmálum sem hér er til afgreiðslu, og gildir til ársins 2010 kemur í framhaldi af stefnumótunin Sýslunefndar frá 1993 sem hafði jákvæð áhrif á þróun málaflokksins s.s. yfirtöku á heilbrigðisþjónustu sem reynsluverkefni og samþættingu þjónustu sem var áður bæði á vegum ríkis og sveitarfélaga. Stefnumótunin byggist áfram á að heilbrigðisþjónustan sé á hendi sveitarfélagsins. Helstu markmið hennar eru að samræma og einfalda stjórn og rekstur í heilbrigðis- og öldrunarþjónustu, auka sjálfsstjórn sveitarfélagsins, nýta betur fjármagn hins opinbera og auka og bæta þjónustuna við íbúana bæði í dreifbýli og þéttbýli.?

Tillagan var borin upp til afgreiðslu með þeim ábendingum sem fram hafa komið í umræðunni. Bæjarráði falið að ganga endanlega frá stefnumótuninni.

Bæjarstjórn samþykkir stefnumótun í heilbrigis- og öldrunarmálum með öllum 10 greiddum atkvæðum.



5. Þjónustusamningur um Heilbrigðisstofnun Suðausturlands ? drög

Bæjarstjóri kynnti málið og lagði til að bæjarstjórn feli bæjarráði að ganga frá gerð þjónustusamnings í samræmi við fyrirliggjandi drög og fram komnar ábendingar.

6. Fyrirspurnir

Engar






Fleira ekki gert

Fundi slitið kl.

Halldóra B. Jónsdóttir

Björn E. Traustason Albert Eymundsson

Kristín G. Gestsdóttir Stefán Ólafsson
Egill Jón Kristjánsson Ásta H. Guðmundsdóttir

Þorbjörg Arnórsdóttir Inga Jóna Halldórsdóttir

Eyjólfur Guðmundsson Helgi Már Pálsson

Ólafur Sigurðsson

Margrét Ingólfsdóttir

Hermann Hansson

Gísli Sverrir Árnason

Sigurlaug Gissurardóttir