Fundargerð bæjarstjórnar 112

112.fundur

Fundur haldinn      í Bæjarstjórn Hornafjarðar, þriðjudaginn 6. febrúar 2007, kl. 17:30 í Holti á Mýrum.

Mætt voru:           Árni Rúnar Þorvaldsson forseti bæjarstjórnar, Reynir Arnarson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson og Halldóra B.Jónsdóttir.  Einnig Hjalti Þór Vignisson bæjarstjóri, Ásta H. Guðmundsdóttir, Stefán Ólafsson og Haukur Ingi Einarsson.

Forseti setti fund og bauð fundarmenn velkomna.

1.    Fundargerðir

Bæjarráð Hornafjarðar 363. fundur 9. janúar 2007

Halldóra bauð Hauk Inga velkominn til starfa. Þá sagði hún sér leika forvitni á að vita hvað rætt var á fundi með forsvarsmönnum Skaftárhrepps  þennan sama dag og bæjarráðsfundurinn var haldinn.

Hjalti greindi frá því helsta sem um var rætt, einkum tvö atriði sem voru náttúrustofa og skólamál vegna nemenda úr Öræfum sem sækja skóla á Klaustri. Rætt var um þann möguleika að stofna náttúrustofu fyrir allt Suðausturland og hvernig þessi tvö sveitarfélög gætu komið að því.

Fundargerð samþykkt.

 Bæjarráð Hornafjarðar 364. fundur 16. janúar 2007

·        Byggingar- og skipulagsnefnd Hornafjarðar 73. fundur 10. janúar 2007.

·        Félagsmálaráð Hornafjarðar 157. fundur 9. janúar 2007.

·        Heilbrigðis- og öldrunarráð, 77. fundur, 9. janúar 2007.

·        Umhverfisnefnd Hornafjarðar 8. janúar 2007.

·        Nefnd um endurskoðun fjallskila 1. fundur 10. janúar 2007.

·        Heilbrigðisnefnd Austurlands 66. fundur 3. janúar 2007.

Halldóra gerði að umtalsefni fundargerð byggingar- og skipulagsnefndar og ræddi lóð fyrir Íslandspóst. Þá lagði hún áherslu á nýtingarhlutfall á miðbæjarsvæði, að því þurfi að gæta vegna mögulegra bygginga á svæðinu í framtíðinni. Þá tók hún undir að fara þurfi yfir hámarkshraða og að byggingar- og skipulagsnefnd komi með tillögur þar að lútandi. Þá ræddi hún ljósaskilti sem sýna eigi hraða ökutækja og óskaði eftir upplýsingum um stöðu þess máls og hvers vegna skiltið væri ekki komið upp. Þá fór Halldóra yfir lóðamálin, sagðist hafa af því áhyggjur ef ekki eigi að taka heildstætt á þeim málum. Benti máli sínu m.a. til stuðnings á nauðsynlegar breytingar á nýtingarhlutfalli á Leirusvæði. Sagðist binda vonir við það væri skilningur á því að ekki væri eftir neinu að bíða með þessi mál.

Sigurlaug bauð Hauk Inga velkominn til starfa og  ræddi þá fundargerð umhverfisnefndar. Sagði hún nefndina hafa lagt fyrir sig helstu mál, þar er fremst svæðisáætlun um meðferð sorps. Hún fagnaði ákvörðun bæjarráðs um endurskoðun á staðardagskrá 21, tímabært væri að fara í þá vinnu enda tæki hún til margra þátta. Þá ræddi hún Green Globe verkefnið sem hún sagði vera sér ákveðin vonbrigði að taka ekki þátt í. Sagði það þó mega taka upp síðar og gott að fengist hafi niðurstaða í málinu.  Einnig ræddi hún vaxandi samstarf við byggðirnar vestan við okkur sem hún kvaðst ánægð með.

Reynir tók undir brýningu Halldóru varðandi lóðir, þessu verkefni verði að sinna af fullri alvöru og sagði þá vinnu reyndar vera komna vel af stað. Sagðist Reynir hafa spurt um hraðamælingatæki og hafa fengið svar um að vantað hafi rafmagn á þeim stað sem staðsetja átti mælitækin. Einnig ræddi hann nýtingu miðbæjarsvæðis og mögulega byggingu Íslandspóst.

Hjalti sagðist ekki vita hver staðan væri í uppsetningu skiltis til að sýna ökuhraða. Hjalti fór yfir vinnu og tillögur vegna lóðar fyrir Íslandspóst, hvaða kostir hafi verið skoðaðir. Sagði mikilvægt að fá botn í það mál, leysa þurfi málið með starfsmönnum Íslandspósts. Hann sagði ákveðna hugmyndavinnu vera í gangi með lóðamálin, fyrst og fremst væri skoðað Leirusvæði þó að önnur hafi einnig verið tekin til skoðunar. Hjalti ræddi umhverfismálin og Green Globe. Gerði að því umtalsefni að allt kosti þetta nokkuð og að við þurfum að forgangsraða. Þá ræddi hann erindi kennara þar sem fjallað er um stöðu kjaraviðræðna kennara og Launanefndar sveitarfélaga. Sagðist hann hafa af því máli nokkrar áhyggjur.

Halldóra sagðist hafa óskað eftir skýrari svörum um hvar hraðaskiltið eigi að koma upp.

Reynir sagði að ákveðið hafi verið að staðsetja skiltið nokkru innan við húsnæði Hvítasunnukirkjunnar.

Árni ræddi umferðahraðann og umræður á fundi byggingar- og skipulagsnefndar. Þar hafi verið rætt um að meginreglan verði 30 km hámarkshraði með 50 km hraða á ákv. stöðum. Árni sagði lóðamálin í farvegi og sagði megináherslu á Leirusvæðið auk þess sem önnur svæði væru til skoðunar. Þá ræddi Árni fundargerð heilbrigðis og öldrunarráðs og heimsókn heilbrigðisráðherra sem hafi heilsað upp á starfsfólk og kynnt sér starfsemi heilbrigðisstofnunar. Sagði hann heimsókn ráðherra hafa verið mjög ánægjulega. Þá sagði hann að rætt hafi verið við ráðherra um þjónustusamninginn og greindi frá þeim málum sem eru óaðgengileg fyrir okkur, svo sem fjölda lækna, fæðingar heima í héraði, áhrif aukinnar heimahjúkrunar. Sagði hann ráðherra hafa tekið mönnum vel. Einnig greindi Árni frá væntanlegri úttekt Ríkisendurskoðunar á HSSA sem heimamenn hefðu óskað eftir.

Hjalti greindi frá því að sent hafi verið erindi til Ríkisendurskoðunar sem ætlað væri að styrkja stöðu okkar í áframhaldandi samningum. Von væri á starfsmanni Ríkisendurskoðunar á næstunni Þá ræddi hann óaðgengilegt reiknilíkan sem starfsmenn heilbrigðisstofnunar hafi kynnt. Einnig ræddi hann nauðsynlegar viðbætur og endurbætur á hjúkrunarheimili. Allt þetta hefi verið farið yfir með embættismönnum. Þá fór hann yfir samanburð á kostnaði við heilbrigðisstofnanir á sambærilegum stöðum á landinu sem sýni að okkar kröfur séu sanngjarnar.

Halldóra sagði okkur öll sammála um hverju við viljum ná fram með nýjum þjónustusamningi. Sagði hún húsnæðismálin ekki tengjast þjónustusamningnum beint þó hægt verði að vinna það með öðrum málum. Halldóra spurði og hver eigi að borga úttekt Ríkisendurskoðunar. Þá gerði hún að umtalsefni umræður um væntanlega þjónustusamning. Sagði hún að bæði þurfi að ræða fyrirliggjandi drög, bæði í bæjarráð og bæjarstjórn og/eða vinnufundi bæjarstjórnar. Hún sagði að við eigum að vinna þetta verkefni saman.

Hjalti sagði kostnað vegna úttektar Ríkisendurskoðunar væri hluti af þeim þjónustusamningi sé féll úr gildi um síðustu áramót og ekki þurfi að greiða fyrir þá úttekt sérstaklega. Hjalti sagði heilbrigðis- og öldrunarráð vera bakhjarl samningagerðarinnar en lagðist ekki gegn því að aðrir kæmu þar að vinnu.

Fundargerð samþykkt.

 Bæjarráð Hornafjarðar 365. fundur 23. janúar 2007

·        Atvinnumálanefnd Hornafjarðar 29. fundur 15. janúar 2007.

·        Hafnarstjórn Hornafjarðarhafnar 87. fundur 16. janúar 2007.

·        Heilbrigðis- og öldrunarráð Hornafjarðar 78. fundur 17. janúar 2007.

·        Húsnæðisnefnd Hornafjarðar 73. fundur 16. janúar 2007.

·        Stjórn Gjafa og minningarsjóðs Skjólgarðs 33. fundur 20. desember 2006.

·        Þjónustuhópur aldraðra 14. fundur 13. desember 2006.

·        Samband íslenskra sveitarfélaga, 739. fundur 8. desember 2006.

·        Nefnd um íþróttamannvirki, 28. fundur 22. janúar 2007.

Björn Ingi ræddi fundargerð atvinnumálanefndar og hugmyndir um gagnahvelfingu sem hann fagnaði. Þá spurði hann hvort eitthvað meira væri að frétta af vatnssölufyrirtæki. Sagði hann okkur þurfa að stíga varlega til jarðar varðandi framsal vatnsréttinda.

Hjalti tók undir orð Björns Inga um gagnahvelfingu sem hann sagði jákvætt mál. Þá greindi hann frá stöðu vatnssölumála. Sagði hann Frumkvöðlasetrið halda utan um það mál. Fyrirhugað væri að kortleggja vatnsból í nágrenni Hafnar. Lagði áherslu á að ekki megi blanda saman neysluvatni til almennings og fyrirtækja á staðnum og vatni sem selja eigi úr landi í gegnum vatnssölufyrirtæki.

Halldóra sagðist vilja ítreka að við eigum að fara yfir smáatriði þjónustusamningsins saman. Hún ræddi lóðamörk við hafnarsvæði og óskaði eftir upplýsingum um það mál. Þá ræddi Halldóra dælingu úr innsiglingarennunni. Hún óskaði eftir upplýsingum um hvort gerðir hafi verið samningar við verktaka. Einnig ræddi hún hvort komið væri skriflegt svar um hæfi manna til setu í hafnarstjórn. Halldóra sagði að hún hefði áhyggjur af framkvæmd við íþróttamannvirki og um leið framkvæmd við landsmót næsta sumar. Sagði hún nefnd um íþróttamannvirki þurfa að skoða það hvort ekki þurfi að ráða verkefnastjóra til að stýra þessu verkefni. Sagði hún þetta allt vera orðna eina raunasögu. Sagðist Halldóra ekki hafa neina lausn á þessu máli en tíminn væri orðinn skammur.

Hjalti ræddi þjónustusamning við heilbrigðis- og tryggingaráðuneyti.  Fá þurfi fyrst aðalatriðin á hreint áður en lengra verður haldið með samninginn. Lóðamál við höfnina eigi að vera skýr og greinileg samkvæmt þeim gögnum sem fyrir hendi eru. Ekki væri búið að skrifa undir samning við verktaka við dælingu. Vel hafi gengið að vinna við ákveðin svæði en verr við önnur.  Þá hafi komið fram að laun þeirra sem vinna á dæluskipinu væru ekki í samræmi við íslenska kjarasamninga. Þá greindi hann frá fyrirhuguðum fundi með starfsmönnum Siglingastofnunar. Hjalti sagðist einnig hafa áhyggjur af framkvæmd við íþróttamannvirki, lagði áherslu að taka á þessum málum af festu og kvaðst bjartsýnn á að allt muni þetta hafast.  Þá ræddi Hjalti hæfi sitt og fleiri og spurði hvort komið hafi upp mál í hafnarstjórn sem orki tvímælis.

Halldóra þakkaði bæjarstjóra fyrir svörin og tók undir þau atriði sem snerta kjör sjómanna á dæluskipinu. Þá ræddi hún vanhæfi, sagði þetta geta verið óheppilegt en gat ekki bent á neitt dæmi. Þá sagði hún að á síðasta fundi bæjarstjórnar hafi mátt efast um hæfi nokkurra bæjarfulltrúa til að taka þátt í afgreiðslu skólamála og nefndi þar Elínu Magnúsdóttur, Reynir Arnarson og bæjarstjóra.

Hjalti fór yfir síðasta bæjarstjórnarfund þar sem voru til umræðu og ákvörðunar ákveðnir þættir skólamála.

Árni tók undir það sem rætt hefur verið um kjaramál sjómanna á dæluskipi. Þá fjallaði hann um þjónustusamning um heilbrigðis- og öldrunarmál. Tók undir þau orð bæjarstjóra að aðalatriðin þurfi að fá á hreint.  Þá sagði hann öllum heimilt að ræða samninginn, engum haldið frá þeirri umræðu. Árni tók undir með Halldóru að hann hefði áhyggjur af framkvæmdum við íþróttamannvirki. Sagðist hann þess fullviss að verkefnið kláraðist á réttum tíma. Þá ræddi Árni hæfi og sagði vont ef það vofði yfir að bæjarstjórn verði kærð til félagsmálaráðuneytis vegna afgreiðslu í bæjarstjórn. Sagðist hann hvetja Halldóru til að leggja fram kæru ef hún teldi að bæjarfulltrúar væru á einhvern hátt vanhæfir til að taka þátt í afgreiðslu ákv. máls.

Halldóra sagði að sér dytti ekki í huga að leggja fram slíka kæru því það væri í verkahring bæjarfulltrúa að vekja máls á vanhæfi sínu.

Reynir ræddi einnig hæfi, sagði að umræða í hafnarstjórn snerist almennt ekki um einstök fyrirtæki. Þá sagðist hann hafa tekiðþátt í afgreiðslu skólamála í bæjarstjórn þar sem hann hafi ekki efast um hæfi sitt til þess.

Sigurlaug taldi að spurningin um hæfi snerti fyrst og fremst afgreiðslu einstakra mála. taldi hann að menn væru komnir út í sparðatíning í hæfis- og vanhæfismálum.

Fundargerð samþykkt

 Bæjarráð Hornafjarðar 366. fundur 30. janúar 2007

·        Félagsmálaráð Hornafjarðar 158. fundur 23. janúar 2007.

·        Menningarmálanefnd Hornafjarðar 86. fundur 10. janúar 2007.

·        Skólanefnd Hornafjarðar 89. fundur 24. janúar 2007.

·        Æskulýðs og tómstundaráð Hornafjarðar 85. fundur 22. janúar 2007.

·        Nefnd um endurskoðun fjallskila 2. fundur þriðjudaginn 23. janúar 2007.

·        Nefnd um íþróttamannvirki, 29. fundur 25. janúar 2007.

Halldóra ræddi gerð umhverfismat áætlana vegna vegstæðis yfir Hornafjarðarfljót. Hún óskaði upplýsinga um samninga við Háskólasetrið um gerð umhverfismat áætlana. Sagðist og ósátt ef greiða eigi kostnað við matið úr sveitarsjóði. Þá sagði hún það áhyggjuefni hjá íbúum hvar nýtt vegstæði yfir Fljótin muni verða. Halldóra lagði fram eftirfarandi tillögu og greinargerð bæjarfulltrúa Sjálfstæðismanna:

Bæjarstjórn Hornafjarðar samþykkir að fela bæjarráði að kanna og undirbúa að fram fari skoðanakönnun samhliða kosningum til Alþingis 12. maí nk.  um vilja íbúa sveitarfélagsins á legu vegstæðis yfir Hornafjarðarfljót. Greinargerð með bókun:Nú stendur yfir undirbúningsvinna vegna lagningu nýs vegar yfir Hornafjarðarfljót.

 Greinargerð með tillögu:

Bæjarstjórn hefur tvívegis samþykkt legu vegarins, í tengslum við samþykkt aðalskipulag árið 2000 og breytingar á aðalskipulagi þann 11. maí sl. Lega vegarins hefur verið rædd á fjölmörgum fundum með íbúum sveitarfélagsins undanfarin ár og bæjarfulltrúum því kunnugt um áherslur íbúa í þessu máli. En í ljósi mikilla umræðna í samfélaginu um legu vegarins þá teljum við mikilvægt að vilji íbúanna sé ljós og að skoðanakönnun samhliða kosningum til Alþingis sé til að fá staðfestan vilja meirihluta íbúa svæðisins.

Hjalti greindi frá nýjum lögum sem kvæðu á um umhverfismat áætlana. Hann sagði þetta fyrsta sveitarfélagið sem ynni eftir þessum lögum. Nokkuð góð mynd sé komin á verkefnið sem er í höndum Háskólasetursins. Næst sé að magntaka það og finna út kostnað við það. Hægt verður að sækja til Skipulagsstofnunar um fjárframalag til að koma til móts við kostnað vegna þessa verkefnis. Þá greindi hann frá fyrirhuguðum fundum þar sem m.a. verður rætt um nýtt vegstæði. Þá las Hjalti upp úr lögum um umhverfismat áætlana. Sagði hann ljóst að vanda þurfi þetta verk og Háskólasetrið vel í stakk búið til að halda utan um þá vinnu.

Árni fagnaði tillögubæjarfulltrúa Sjálfstæðisflokksins og kom með tillögu að breytingu á tillögunni.

Sigurlaug sagði það á margan hátt fagnaðarefni að leita eftir vilja íbúanna. Þetta væri hins vegar margþætt og því þurfi að vanda slíka skoðanakönnun vel. Þá gerði hún að umtalsefni skoðanakönnun sem fram fór á sínum tíma um kjördæmamálið þar hafi fram komið skýr vilji íbúanna.

Reynir tók undir þau orð sem fallið hafa fallið um skoðanakönnun á vegum íbúanna og gerði um leið tillögu að breytingu á orðalagi. Einnig velti hann því fyrir sér hvort þetta verði kosning eða skoðanakönnun þar sem þetta verði gert samfara kosningum til Alþingis.

Halldóra las upp tillögu með áorðnum breytingum á fyrri bókun sem hljóðar svo eftir breytingar:

Bæjarstjórn Hornafjarðar samþykkir að fela bæjarráði að kanna  kosti þess að fram fari skoðanakönnun samhliða kosningum til Alþingis 12. maí nk. um vilja íbúa sveitarfélagsins á legu vegstæðis yfir Hornafjarðarfljót.

Þá benti Halldóra á skoðanakönnun vegna kjördæmaskipunar sem framkvæmd var á sínum tíma og um leið að það væri ekki bæjarstjórn sem tæki ákvörðun um kjördæmaskipan heldur Alþingi.

Hjalti sagði að fleiri kæmu að þessu máli en íbúar sveitarfélagsins og benti á að Vegagerðin kunni að koma með tillögur um annað vegstæði. Einnig benti hann á væntanlega aðkomu Skipulagsstofnunar og umhverfisráðuneytis.

Reynir tók undir orð Hjalta.

Sigurlaug ræddi skoðanakönnun um kjördæmaskipan og sagði að ekki megi hafa íbúa að fíflum þegar skoðanakönnun hefur verið framkvæmd.

Guðrún tók undir orð þeirra sem bent hafa á að við ráðum þessu ekki ein, aðrir komi þar málum.

Árni sagði að vanda þurfi til verka en sagðist telja eð með skoðanakönnuninni væri verið að fá fram hver vilji íbúanna er en niðurstaðan gæti aldrei orðið bindandi á neinn hátt.

Tillaga bæjarfulltrúa Sjálfstæðisflokksins með áorðnum breytingum borin undir atkvæði og hún samþykkt með 6 atkvæðum, einn situr hjá.

(Árni sagðist nú víkja af fundi við afgreiðslu 366. fundargerðar bæjarráðs)

Fundargerð samþykkt.

(Gert var hlé á fundi kl.19:50 sem fram var haldið kl. 22:17)

Bæjarstjórn Hornafjarðar, 110. fundur 14. desember 2006 óundirrituð fundargerð.

Bæjarstjórn Hornafjarðar, 111. fundur 3. janúar  2007 fundargerð áður samþykkt.

 2.    3ja ára áætlun  - fyrri umræða

Bæjarstjóri fylgdi áætluninni úr hlaði og sagði m.a.

Bæjarstjórn þarf samkvæmt lögum að gera þriggja ára áætlun fyrir sjóði sveitarfélagsins og að þessu sinni nær hún yfir árin 2008 til 2010. Markmiðið er að varpa ljósi á það svigrúm sem er til sérstakra framkvæmda og stærri fjárfestinga á tímabilinu. Sömuleiðis þarf að skila þriggja ára áætlun fyrir samstæðureikning, þ.e.a.s. bæði A-hluta og B-hluta sem eru veitur (vatnsveita og fráveita),  höfnin og íbúðakerfið.  Áætlun til þriggja ára eða lengri tíma sem byggist á fjárhagsáætlun ársins í ár getur aldrei verið fullkomlega nákvæm þó svo að rekstur sveitarfélagsins sé í mjög föstum skorðum. En þær eru samt gott tæki til að átta sig á ákveðinni þróun og hvaða möguleikar eru á framkvæmdum til lengri tíma litið. Langtímaáætlun er líka stefnumótandi og segir til um hvaða markmið sveitarstjórn setur um stöðu sjóðanna og sveitarfélagsins í heild.

Rekstraráætlun sem fram kemur í 3ja ára áætlun er á föstu verðlagi og allar upphæðir miðast við fjárhagsáætlun 2007. Gert er ráð fyrir varanlegum fjárfestingum að upphæð 307,0 m.kr., á árunum 2008 til 2010. 

Áætlunin gerir ráð fyrir að aðalsjóður framkvæmi fyrir 181 m.kr. og  taki langtímalán að upphæð 190,0 m.kr. Á móti eru afborganir langtímalán 328,4 m.kr. Langtímalán aðalsjóðs lækka því á tímabilinu um 138,4 m.kr.

Framkvæmdir á vegum hafnarsjóðs eru 33,0 m.kr., ný  langtímalán að upphæð 37,0 m.kr. á móti afborgun langtímalána að upphæð 66,6 m.kr. Langtímalán hafnarsjóðs lækka því á tímabilinu um 29,6 m.kr.  

Þá gerði bæjarstjóri grein fyrir því að unnið sé að uppgjöri ársins 2006 og í kjölfarið verði 3ja ára áætlun endurskoðuð áður en hún verði tekin fyrir til seinni umræðu.  Þá verði jafnframt metið hvenær hvaða framkvæmdir hægt verður að fara í næstu árin.

Bæjarstjóri þakkaði samstarfsmönnum og bæjarfulltrúum fyrir vinnu við fjárhagsáætlun.

Halldóra sagði að 3ja ára áætlun væri til að sjá fyrir möguleika á framkvæmdum til þessara sömu ára. Vakti hún athygli á að samkvæmt þessari áætlun hafi ekki verið gert ráð fyrir byggingu knattspyrnuhúss og lítið lagt í aðrar framkvæmdir á árunum 2009 og 2010.

Hjalti sagði að verið sé að fara yfir kostnaðaráætlanir vegna knattspyrnuhúss jafnframt því sem unnið væri að uppgjöri ársins 2006. Þá sagði hann áætlanir hafa staðist vel og forstöðumenn stofnana staðið sig vel.

Bæjarstjórn samþykkir samhljóða að vísa 3ja ára áætlun til síðari umræðu í bæjarstjórn.

 3.    Deiliskipulag við Haukafell

Bæjarstjóri fylgdi málinu úr hlaði.  Unnið hefur verið að deiliskipulagi í landi Skógræktarfélags Austur-Skaftafellssýslu við Haukafell á Mýrum í Hornafirði, sem er um 200 ha af stærð, er fyrirhugað að breyta hluta skógræktarsvæðisins í frístundabyggð. Stærð svæðisins er um 34 ha og er það vel gróið, blanda af náttúrulegum gróðri og ræktuðum skógi, auk gamalla túna sem fyrirhugað er að nota undir tjaldsvæði. Svæðið liggur austan og utan hverfisverndarsvæðisins í Kolgrafardal. Umhverfisstofnun gerði athugasemdir við framlagt deiliskipulag, dags. 20. mars 2006.  Þar kom m.a. fram að stofnunin teldi að bygging frístundahúsa á lóðum A, B og C muni rýra útvistargildi svæðisins fyrir almenning og bygging á lóð E muni skerða útivistargildi svæðisins verulega.

Bæjarstjórn samþykkir samhljóða með öllum greiddum atkvæðum framlagða tillögu að deiliskipulagi en telur mikilvægt að svæðið haldi sem mest gildi sínu sem útivistarsvæði fyrir almenning.  Bæjarstjórn tekur undir það með Umhverfisstofnun að húsum verði vel fyrir komið í umhverfinu og að vandað verði til hönnunar og litavals þeirra.

 4.    Aðalskipulagsbreyting vegna Falljökulskvíslar

Bæjarstjórn samþykkti að auglýsa breytingu á aðalskipulagi vegna grjótnáms úr Falljökulskvísl þann 7. nóvember sl. Fyrirhugað efnisnám er til þess ætlað að viðhalda núverandi samgöngukerfi þjóðvegarins í sveitarfélaginu og til að beisla síbreytilegan farveg jökulánna á þessum svæðum. Nauðsynlegt er því að vinna grjót til viðhalds og endurbóta á leiðigörðum jökulvatna og námur vegna þessa verða að vera innan skynsamlegrar fjarlægðar frá framkvæmdasvæði. Umrætt námusvæði, ásamt námu við Virkisá, er hugsað til að fullnægja þessari þörf fyrir austurhluta Skeiðarársands og nauðsynlegum leiðigörðum rétt austan hans við Skaftafellsá, Svínafellsá, Virkisá og Kotá.  Ljóst er að framkvæmdin mun hafa sjónræn áhrif á umhverfi sitt. Til að lágmarka þau áhrif sem mest er brýnt að efnistöku og öðrum framkvæmdum við námu sé hagað þannig að ásýnd landsins spillist sem minnst og skapi um leið aukna möguleika fyrir ferðamenn til að nálgast og njóta einstæðrar náttúru þessa svæðis. 
Umhverfisstofnun gerði athugasemdir við breytinguna og taldi að vinna ætti grjót úr opnun námum á svæðinu og að fyrirhugað efnisnám hafi í för með sér umhverfisspjöll.
Bæjarstjórn telur að taka megi undir margt komi fram í andmælum Umhverfisstofnunar en telur að nauðsyn á aðgengilegu efnistökusvæði hljóti að vega þungt í þessu máli enda sé um heill samgangna í byggðarlaginu og umferðaröryggi á þjóðvegi 1 að ræða.

Bæjarstjórn samþykkir samhljóða með öllum greiddum atkvæðum breytingu á aðalskipulagi vegna Falljökulskvíslar.

 5. Aðalskipulagsbreyting vegna Víkurbrautar 11 og 13

Bæjarstjóri fylgdi málinu úr hlaði og lagði til að Bæjarstjórn Hornafjarðar samþykki að auglýsa breytingar á lóðum við Víkurbraut  11 og 13 á þann veg að þeim verði breytt úr íbúðarsvæði í verslunar- og þjónustusvæði.  Lóðirnar tvær eru um og 1.803 fermetrar en að auki eru um 400 fermetrar sem einnig falla undir breytingarnar.  Á umræddum lóðum eru fjölbýlishús sem til stendur að breyta úr kaupleiguíbúðum í gistiherbergi.  Ekki er gert ráð fyrir verslun á svæðinu.

Samhliða breytingunni er ekki gert ráð fyrir aukningu umferðar á svæðinu, en bílastæði framan við húsin eru 12.  Að auki  er stórt bílaplan við Hótel Höfn sem einnig kemur til með að nýtast umræddum byggingum.  Norðan við svæðið, í ca. 100m fjarlægð, er í dag rekið hótel og er ætlunin að þessi gistiherbergi verði hluti af þeirri starfsemi sem þar fer fram.
Umrædd fjölbýlishús hafa verið sveitarfélaginu þung rekstrareining og verið reknar í gegnum tíðina með talsverðu rekstrartapi. Nú sjá hins vegar athafnamenn í sveitarfélaginu möguleika á að efla þjónustu við ferðamenn í sveitarfélaginu með kaupum og breytingum á umræddu húsnæði.

Sveitarfélaginu hefur borist kauptilboð í þessar eignir með ofangreind markmið í huga en það hefur verið stefna sveitarfélagsins að létta á þessum neikvæða rekstri með því að losa sig við umræddar eignir.  Nú hefur því skapast kjörið tækifæri að nýta þessar eignir  sem gistirými og með þeim auka á fjölbreytni og fjölga gistimöguleikum fyrir ferðamenn og á svæðinu og verða þannig ferðaþjónustunni til framdráttar.  Jafnframt er talið að breytingin hafi í för með sér jákvæða aukningu í verslun, þjónustu og atvinnu fyrir íbúa héraðsins samhliða því að auðga mannlíf á svæðinu. Ferðamennska skiptir íbúa, sem og alla þjónustu í Sveitarfélaginu Hornafirði, mjög miklu máli.

Ekki er talið að nein neikvæð umhverfisáhrif hljótist af breytingunni heldur skapi hún frekar jákvæð áhrif á umhverfið í heild sinni ásamt því að auðga mannlíf svæðisins.   

Bæjarstjórn samþykkir samhljóða að auglýsa aðalskipulagsbreytingu vegna Víkurbrautar 11 og 13.

6.    Aðalskipulagsbreyting vegna lagningar ljósleiðara í Sveitarfélaginu Hornafirði

Landsnet hyggst leggja ljósleiðara milli nokkurra tengivirkja í flutningskerfi sínu á Norður og Austurlandi.  Tilgangur framkvæmdarinnar er fyrst og fremst að endurbæta eldri búnað til sömu nota svo og fjarskiptasamband á milli tengivirkja Landsnets og auka með því öryggi í rekstri raforkuflutningskerfisins. Auk þess er áætlað að endurnýja svokallaðan „háspennusíma” sem er í raun hluti af núverandi háspennulínum.  

Á Austurlandi er fyrirhugað að ljósleiðarinn liggi frá tengivirki Alcoa - Fjarðaáls í Reyðarfirði að aðveitustöð við Hóla í Hornafirði. Fyrirhugaður ljósleiðarastrengur kemur inn í sveitarfélagið um Lónsheiði, þar er háspennulínunni fylgt suður undir Reyðará. Þar fylgir hann veginum framhjá Reyðará en fer síðan beint yfir sandana að Stafafelli og Brekku og yfir Jökulsána á brúnni. Þaðan er farið í beina línu suður að Volaseli þaðan sem veginum er fylgt í gegnum göngin í Almannaskarði. Þaðan er raflínunni fylgt að aðveitustöð í Hólum.

Farið er í jaðri tveggja svæða á náttúruminjaskrá, annars vegar er fjalllendið utan Skarðsdals, en hins vegar er Skarðsfjörður. Í báðum tilfellum er ljósleiðarinn lagður í veghelgunarsvæði við útmörk svæðanna. Samráð verður haft við landeigendur, Umhverfisstofnun, Fornleifavernd ríkisins, Landbúnaðarstofnun og Vegagerðina vegna fyrirhugaðra framkvæmda. Verklag og frágangur er samkvæmt útboðsgögnum.

Breytingin felst í því að lagður verður ljósleiðari frá Lónsheiði að aðveitustöð við Hóla.

Bæjarstjórn samþykkir samhljóða með öllum greiddum atkvæðum að auglýsa aðalskipulagsbreytingu vegna lagningar ljósleiðara í Sveitarfélaginu Hornafirði.

7.    Fyrirspurnir

Engar hafa borist.