Fundargerð bæjarstjórnar 111

111. fundur

Fundur haldinn í Bæjarstjórn Hornafjarðar, miðvikudaginn 3. janúar 2007, kl. 16:00 í Ekru.

Mætt voru: Árni Rúnar Þorvaldsson forseti bæjarstjórnar, Reynir Arnarson, Elín Magnúsdóttir, Sigurlaug Gissurardóttir, Guðrún Ingimundardóttir, Björn Ingi Jónsson, Björk Pálsdóttir og Erna Gísladóttir sem varamaður. Einnig Hjalti Þór Vignisson bæjarstjóri, Ásta H. Guðmundsdóttir og Stefán Ólafsson.

Forseti setti fund og bauð fundarmenn velkomna.

Forseti bar upp tillögu um þá breytingu á dagskrá að 8. fundargerð stýrihóps um skólastefnu sem ekki hefur verið tekin fyrir í bæjarráði verði tekin fyrir undir liðnum fundargerðir, 362. fundur bæjarráðs. Samþykkt án athugasemda. Árni bar og upp þá tillögu að umræður um skólastefnu og vaxtarsamning verði undir viðeigandi dagskrárliðum, 2. og 3. dagskrárlið. Var það samþykkt án athugasemda.

1.    Fundargerðir.

Bæjarráð Hornafjarðar 361. fundur 18. desember  2006

· Stýrihópur við gerð skólastefnu 6. fundur 4. des. og 7.fundur 11. des.

· Byggingar- og skipulagsnefnd 72. fundur 13. des. 2006.

· Umhverfisnefnd Hornafjarðar 63. fundur 12. des. 2006.

· Húsnæðisnefnd Hornafjarðar 72. fundur 11. des. 2006.

· Félagsmálaráð Hornafjarðar 156. fundur 12. des. 2006.

· Nefnd um íþróttamannvirki 25. fundur 11. des. 2006.

· Menningarmálanefnd 82. fundur 22. nóv., 83. fundur 27. nóv., 84. fundur 6. des., og 85. fundur 13. des. 2006.

Björk Pálsdóttir gerði að umtalsefni samning við Náttúrulega ehf. og óskaði eftir upplýsingum um hann. Einnig ræddi hún lögheimilisskráningu í frístundabyggð sem var til umfjöllunar í bæjarráði.

Sigurlaug ræddi svæðisáætlun um meðferð sorps í sveitarfélaginu sem hefur verið til umfjöllunar á fjórða ár. Þar eru m.a. áætlanir um minnkun á sorpi. Sagði hún brýnt að fara í þessa vinnu með samstilltu átaki allra íbúa og góðri þátttöku þeirra. Einnig ræddi hún endurnýtingu o.fl. atriði sem snúa að meðhöndlun sorps.

Árni ræddi íþróttamannvirki og framlag Skinneyjar ? Þinganess hf. til þeirra mála. Sagði hann bjart fram undan á þessu sviði, minnti á frjálsíþróttavöll, sundlaug, knattspyrnuhús sem reist verður með tilstyrk Skinneyjar ? Þinganess hf. Árni sagði mikilvægt að auka framboð á byggingarhæfum lóðum og hugsanlegar breytingar á skipulagi byggingarlóða sem eru í boði. Þá sagði hann mikilvægt að taka ný svæði til skipulags.

Hjalti greindi frá viðræðum við Náttúrulega ehf. Sagði hann samning ekki hafa verið undirritaðan við fyrirtækið en vinnan komin vel á veg. Sagði hann ákvörðun um lögheimilisskráningu í frístundabyggð sem til umræðu er á fundinum hafa verið tekna á grundvelli eldri laga sem féllu úr gildi um sl. áramót. Umsækjandi hafi verið með fasta búsetu í frístundabyggð um nokkurt skeið og langt liðið frá umsókn hans sem dregist hafi að afgreiða. Taldi hann þetta ekki skapa fordæmi í ljósi nýrra laga um þetta mál.

Reynir ræddi hugsanlega stofnun vatnssölufyrirtækis hér á staðnum í ljósi fyrirspurnar sem borist hefur sveitarfélaginu. Sagði hann vert að skoða þetta vel þrátt fyrir að menn séu hæfilega bjartsýnir á árangur í ljósi reynslunnar í slíkum málum. Reynir óskaði og eftir að bæjarstjóri fari yfir fjárhagsstöðu sveitarfélagsins.

Björn Ingi sagði mikilvægt að setja þurfi kraft í lóðamál, bæði breytingar á núverandi byggingarsvæðum og ný svæði. Þá ræddi hann vatnssölusamning og var með ákveðna varnagla, meðal annars hugsanlegt afsal á vatnsréttindum og velti upp þeirri spurningu hver ætti vatnsréttindin.

Reynir taldi það vera misskilning að um afsal á vatnsréttindum sé að ræða. Hins vegar felist í þessu kvöð um að sjá fyrirtækinu fyrir vatni sem og öðrum sem hér búa og starfa.

Sigurlaug ræddi íþróttamannvirki og benti á aðrar íþróttir, svo sem golf og hestamennsku. Hún fagnaði fyrirspurn vatnssölufyrirtækisins og tengdi það vatnssölu úr eða við þjóðgarð. Þá ræddi Sigurlaug lóðamál og eftirspurn eftir þeim. Benti hún á að eftirspurn kunni að verða eftir búgarðalóðum og við því þurfi að bregðast.

Hjalti gerði grein fyrir fjárhagsstöðu sveitarsjóðs. Sagði hann málaflokka skila góðum rekstri og að tekjur verði meiri en reiknað var með. Þá ræddi Hjalti hugsanlega vatnssölu, fundi með landeigendum að Hólmslind og þau réttindi sem sveitarfélagið er með í þessum málum. Taldi hann ekki hættu á að um afsal á réttindum verði að ræða. Þá ræddi hann ýmis mál þessu tengt.

Fundargerð samþykkt samhljóða.

Bæjarráð Hornafjarðar 362. fundur 29. desember  2006

·       Nefnd um íþróttamannvirki 26. fundur 18. des. og 27. fundur 22. des. 2006.

·       Stýrihópur um skólastefnu 9. fundur 19. des. 2006..

·       Heilbrigðis- og öldrunarráð 76. fundur 20. des. 2006.

·       Skólanefnd Hornafjarðar 88. fundur 27 des. 2006

Björk ræddi fundargerð nefndar um íþróttamannvirki og grundun sundlaugar. Sagðist hún hissa á því að verkfræðingar VST skuli ekki hafa séð þetta sig fyrir og sagðist vonast til að þetta verði lagað sem allra fyrst og valdi ekki frekari seinkun.

Reynir sagðist geta tekið undir orð Bjarkar um að hægt eigi að vera að treysta sérfræðingum sem fengnir eru til slíkra verka.

Sigurlaug greindi frá fræðslufundi sem hún sat þar sem kynntir voru varmadælur og taldi mögulegt að skoða slíka tækni á okkar svæði til að hita upp hús. Þetta væri einkum vert að skoða í dreifbýli.  

Fundargerð samþykkt samhljóða.

Bæjarstjórn Hornafjarðar, 110. fundur 14. desember 2006, fundargerð áður samþykkt.

2.    Tillögur stýrihóps um skólastefnu og stjórnfyrirkomulag skólanna.

(Árni vék af fundi undir þessum lið og Erna Gísladóttir tók sæti hans. Árni gerði grein fyrir ástæðu þess að hann viki af fundi undir þessum lið og vitnar til fyrri yfirlýsinga sinna um að taka ekki þátt í umræðu og afgreiðslu þessa máls.)

Hjalti fylgdi málinu úr hlaði og las upp eftirfarandi ræðu:

Skólastefna

Stýrihópur um skólastefnu samþykkti nýja skólastefnu á fundi sínum þann 18. desember sl. Hópurinn telur að með þessari stefnu náist fram fjölmörg markmið sem bæta eiga skólastarf.  Stefnt er að því:

• Að samfella og samstarf á milli skólastiga verði tryggt.
• Að skólarnir ásamt skólaskrifstofu fari með faglega forystu í málaflokknum.
• Að í skólum sveitarfélagsins verði tryggð góð þjónusta við öll börn.
• Að starfsmenn búi við sambærilegar aðstæður eins og kostur er.
• Að gott samstarf verði við foreldra og aðra forráðmenn.
• Að tryggð verði sem best nýting þess fjármagns sem varið er til fræðslu- og uppeldismála.

Hinn almenna skólastefna er vel unnin og vönduð og vil ég þakka öllum sem lögðu hönd á plóginn við gerð hennar, þar á ég við starfsmenn skólanna, foreldra, kjörna fulltrúa og framkvæmdastjóra fræðslu- og félagssviðs. Ég tel ennfremur að stefnan verði okkur gott leiðarljós í skólastarfi næstu árin.  Það er síðan hlutverk stjórnenda í skólamálum, framkvæmdastjóra fræðslu- og félagssviðs og forstöðumanna að hrinda stefnunni í framkvæmd.

Skipulag grunnskólans

Stýrihópur um skólastefnu leggur til að Nesjaskóli, Hafnarskóli og Heppuskóli verði sameinaðir undir eina stjórn. Þetta verði gert með þeim hætti að skólastjórar skólanna þriggja myndi sameiginlega skólastjórn sem komi sér saman um verkaskiptingu og hlutverk hvers og eins. Þessi nýja skólastjórn komi með tillögur um fyrirkomulag millistjórnenda - aðstoðarskólastjóra / deildarstjóra.

Þessi niðurstaða er fengin eftir samfellt tveggja ára starf.  Margar útfærslur að stjórnskipulagi hafa verið uppi á borðinu á þessum tíma.  Í þessari vinnu hefur þess verið gætt að eiga samtöl og samráð við skólastjóra, kennara, foreldra og fleiri. 

Markmið með þessari útfærslu er að sem best verði tryggt það farsæla skólastarf sem hér er. Með því að fá þetta hlutverk þeim stjórnendum, sem gjörþekkja skólastarfið og eiga að baki áratuga starf við skóla sveitarfélagsins, telur stýrihópurinn mestar líkur á að ná fram samfellu í skólastarfinu og farsælum breytingum á því. Með þessari leið verður einnig áfram tryggð nánd stjórnenda við starfsfólk, nemendur og foreldra.  Verði í framtíðinni breytingar á starfsmannahópnum mun fyrirkomulag skólastjórnarinnar verða endurskoðað.  Jafnframt kann þetta að leiða til þess að skólunum verði færð aukin verkefni sem nú eru á skólaskrifstofu Hornafjarðar, vald skólans aukið og hann gerður sjálfstæðari.  Þá getur Skólaskrifstofa Hornafjarðar aukið eftirlitshlutverk sitt og ráðgjöf og jafnframt vera mikilvægur þátttakandi í breytingarferlinu.  Skólaskrifstofan mun einnig geta í auknum mæli einbeitt sér að þverfaglegu samstarfi á milli starfsmanna félagsþjónustunnar, HSSA og skólafólks með það að markmiði að bæta þjónustu við börn og fjölskyldur þeirra.

Skipulag grunnskólastarfs í Sveitarfélaginu hefur tekið miklum breytingum síðasta áratug.  Þegar sameining sveitarfélaga í Austur-Skaftafellssýslu hófst árið 1994 voru alls sex grunnskólar starfræktir.  Á Höfn var Hafnarskóli fyrir 1-7. bekk og Heppuskóli fyrir 8.-10. bekk.  Í Nesjum var heildstæður skóli fyrir 1.-10. bekk og börn úr öðrum sveitum í 8.-10. bekk voru annað hvort á heimavist eða í daglegum akstri heiman frá.  Í Holti á Mýrum, Hrollaugsstöðum í Suðursveit og Hofgarði í Öræfum voru reknir barnaskólar fyrir 1.-7. bekk. 

Sameining sveitarfélaganna og samfélagsþróunin hefur leitt af sér miklar breytingar í skipulagi skólamála.  Samhliða sameiningu sveitarfélaga var ákveðið að breyta skipulagi skólanna í Nesjum og á Höfn þannig að börnum í 1.-3. bekk er kennt í Nesjum, 4.-7. bekk í Hafnarskóla og 8.-10. bekk í Heppuskóla.  Mikilvæg rök fyrir þessu var m.a. að hver árgangur af þessu svæði gengi saman í skóla sem leiddi til heppilegra bekkjarstærða.  Nú er aðeins starfandi einn sveitaskóli, þ.e. í Hofgarði fyrir börn í 1.-7. bekk.  Skólinn í Holti var lagður niður árið 2001 og á Hrollaugsstöðum árið 2006 vegna fækkunar nemenda í þessum sveitum. 

Þegar vinna við endurmótun skólastefnu sveitarfélagsins hófst í janúar árið 2005 var ljóst að kallað var á ákveðnar breytingar á hinu þrískipta skipulagi grunnskólans.  Meðal annars var bent á að samfellu í skólagöngu skorti og að upplýsingar frá skólum til heimila þyrfti að samræma betur.  Einnig var rætt um að aðstæður starfsfólks væru ekki þær sömu og auknir möguleikar á flutningi kennara á milli skólastiga væru mikilvægir.

Ákvörðunin nú er tekin með þeim fyrirvara að undanþága fáist frá menntamálaráðuneytinu til að fara þessa leið, að ásættanlegir samningar náist við skólastjórnendur og að samkomulag verði um hana við Kennarasamband Íslands og Launanefnd sveitarfélaga.

Þeir sem taka þessa ákvörðun telja að með þessu sé stigið mikilvægt skref til framfara fyrir skólastarfið.  Helsti ávinningur með þessari breytingu er álitin vera aukinn samfella milli skólastiganna og sveigjanleiki í skólastarfi.   Enn fremur er talið að innleiðing samræmdrar stjórnunar og starfsmannastefnu verði einfaldari í einum sameinuðum skóla en þremur sjálfstæðum.  Einnig er talið að þessi útfærsla tryggi að mannauður skólasamfélagsins viðhaldist.  Auk þess mun þetta skipulag vera vel til þess fallið að ná fram markmiðum nýrrar skólastefnu og stuðla að stöðugri þróun og endurbótum í skólastarfi.

Því er trúað að þessi leið svari um leið óskum um ákveðnar breytingar í grunnskólum sem eftir hefur verið kallað en tryggi áfram árangursríkt og farsælt skólastarf á Hornafirði.

Stjórnskipulag tónskóla

Stýrihópur um skólastefnu leggur til að fyrirkomulag á stjórnunarþætti Tónskóla Austur-Skaftafellssýslu verði með sama sniði og verið hefur.  Jafnframt er lögð áhersla á gott samstarf hans við grunnskóla sveitarfélagsins einkum með tilliti til þjónustu við nemendur skólanna.

Ég vil að þessu tilefni hrósa tónskólanum fyrir gott starf undanfarin ár sem sést best á gróskumiklu og fjölbreyttu tónlistarlífi staðarins.

Stjórnun og fyrirkomulag leikskóla.

Á síðasta fundi bæjarstjórnar, þann 14. desember sl., var lögð bókun frá meirihluta bæjarstjórnar.  Þar var ítrekað að ákvörðun um tvo sjálfstæða leikskóla sem tekin var 30. maí 2006 standi áfram.  Sú útfærsla byggir ekki síst á að tryggja samfellu í námi barnanna.  Mikilvægt er að fylgjast vel með þroska barna á fyrstu árunum og veita þeim úrræði sem þurfa. Ef þroska- eða hegðunarfrávik eru greind nógu skjótt eru auknar líkur á að hægt sé að komast fyrir vandamálið áður en grunnskólaganga hefst.

Vinna stýrihóps um skólastefnu er nú lögð fram eftir samfellt tveggja ára starf eins og kom frá áður.  Vinnan hefur verið ítarleg og vönduð og lögð hefur verið áhersla á víðtækt samráð við alla hagsmunahópa.  Þegar jafn flókin málefni eru til umræðu og skólamál er aldrei hægt að sætta öll sjónarmið.  Mikilvægasta hlutverk sveitarfélags í fræðslu- og uppeldismálum er að leggja áherslu á gagnrýna hugsun nemenda, samkennd, virðingu fyrir einstaklingnum, sjálfstæði í þekkingarleit og ábyrgð í námi eins og kemur fram í skólastefnunni.  Ég tel að þær tillögur sem stýrihópurinn hefur lagt til séu vel til þess fallnar að ná þessum markmiðum.  

Guðrún tók til máls og fór yfir þá miklu vinnu sem að baki er við skólastefnu og stjórnun skólanna. Þá vitnaði Guðrún til stjórnunarfyrirkomulags í heilbrigðisgeiranum þar sem þrír stjórnendur koma að málum

Elín sagðist taka undir orð bæjarstjóra og Guðrúnar.  Sagði Elín það mikið lán að núverandi skólastjórnendur taki að sér það verkefni að sameina skólana undir eina stjórn. Einnig ræddi hún þann möguleika að segja upp fólki og þeim afleiðingum sem það gæti haft í för með sér. Sagðist hún ekki geta tekið þátt í slíku. Þá sagði hún þetta vera spurningu um hugarfar. Með jákvæðu hugarfari fari þetta vel og það sé best fyrir alla.

Björn Ingi gerði grein fyrir eftirfarandi séráliti Halldóru B. Jónsdóttur:

Sérálit vegna tillagna stýrihóps um skólastefnu og fyrirkomulag á stjórnunarþætti grunnskóla og leikskóla í sveitafélaginu Hornafirði.

Þrátt fyrir að afar mikilvægt sé að sem best sátt ríki um fyrirkomulag skólamála hefur nú um nokkurt skeið verið ljóst að ekki myndi nást eining innan stýrihóps um tillögur að fyrirkomulagi á stjórn leikskóla og nú á síðustu dögum um stjórn grunnskóla. Þetta hefur m.a. komið fram í því að ekki hefur mátt ræða einstaka þætti í stjórn leikskólanna innan stýrihóps, auk þess hafa litlar umræður verið um kosti og galla á mismundandi stjórnfyrirkomulagi grunnskólanna og ekki talin ástæða hjá fulltrúum meirihlutans að fjalla um mismunandi kostnaðarhlið þeirra stjórnunarleiða sem voru til umfjöllunar.   Einnig hefði stýrihópurinn átt að skila heildstæðum tilögum um millistjórnendur þ.e. aðstoðarskólastjóra, deildarstjóra og fjölda þeirra.

Nokkuð góð sátt er um faglegan þátt skólastefnunnar enda er hún í samræmi við þær áherslur sem unnið hefur verið eftir í meira en áratug. Stuðla á að sem bestri stoðþjónustu við skólana hverju sinni svo hægt sé að veita börnum stuðning sem fyrst, þegar upp koma vandamál eða greind eru þroskafrávik.  Ekki eru áform um miklar breytingar á skólastarfi í skólastefnu, en undirrituð bindur vonir við að á næstu árum muni koma fram aukinn áhugi á sveigjanleika í hefðbundnu skólastarfi.

Stjórnskipulag grunnskóla:

Við ákvörðun á stjórnfyrirkomulagi grunnskólanna þriggja Hafnar-, Heppu- og Nesjaskóla er mikilvægt að hafa að leiðarljósi meiri samfellu og samræmingu í skólastarfi, auk betri nýtingu fjármuna. Nýta á þá fjármuni sem eru til ráðstöfunar í starf með nemendum í stað yfirbyggingar. Því er mikilvægt að stjórnun sé markviss og verkaskipting skýr. Samkvæmt spá yfir nemendaþróun í þéttbýlisskólunum mun nemendum fækka um 79 úr 375 í 296 á næstu 5 árum. Nú eru 6 stjórnendur í þessum þremur skólum. Fækkun nemenda á grunnskólaaldri kallar á skipulagsbreytingar á næstu árum, sem geta orðið erfiðari í framkvæmd með þrem skólastjórum heldur en ef þeir væru færri. Að hafa þrjá skólastjóra í stað eins er auk þess dýrari leið og ávinningur er ekki sjáanlegur. Samkvæmt upplýsingum sem Stefán Ólafsson aflaði hjá Sambandi sveitarfélaga og Kennarasambandi Íslands þarf  að sækja um undanþágu til menntamálaráðuneytis og gera sérstaka samninga við skólastjórnendur með aðkomu Kennarasambandsins og Launanefndar Sveitarfélaga. Þeir samningar geta reynst okkur þungir og hætta er á að sveigjanleiki verði ekki til staðar með tilliti til fækkunar nemenda á næstu árum. Bæði KÍ og LN  bentu á að hægara væri fyrir sveitarfélagið að samþykkja ályktun um aukið samstarf milli skólanna í stað þess að leggja út í samningaferli við þrjá skólastjóra sem allir ættu að sitja jafnir. Þau rök voru nefnd í stýrihóp að skólastjórar skuli vera þrír en ekki tveir í skólastjórn, annars sitji skólastigin ekki við sama borð. Með þessu hugarfari er einmitt hætta á að hver sitji í sínu húsnæði og breytingar verði litlar eða engar. Það kom einnig skýrt fram hjá fulltrúum starfsfólks í Hafnar- og Nesjaskóla að með því að fara þessa leið þ.e. þrír skólastjórar og jafnvel 3 deildarstjórar samtals 6 stjórnendur, þá séu miklar líkur á að litlar breytingar verði í starfsemi skólastiganna.

Það er mitt mat að fengnum þessum upplýsingum að einfaldast og skilvirkast sé að hafa einn skólastjóra yfir grunnskólanum og ráða tvo millistjórnendur meðan skólahald er á þrem stöðum. Kostnaður við 1 skólastjóra og 2 millistjórnendur skv. Upplýsingum frá Stefáni er rúmar 16 milljónir króna (með launa. t. g.).

Ef vilji hefði verið í stýrihóp að ræða málin hefði líklega verið hægt að ná málamiðlun um skólastjórn með tveim skólastjórum og einum aðstoðarskólastjóra þrátt fyrir ákveðnar efasemdir. Árlegur kostnaður við 3 skólastjóra (ef tekið er viðmið af stærð skólanna fyrir sameiningu) er 17,2 milljónir króna.

Engin rök sé ég fyrir að ráða einnig deildarstjóra inn á öll skólastigin. Ef ráðnir er þrír deildarstjórar er árlegur kostnaður 12.8 milljónir króna (m.launa.t.gj).

Stýrihóp var falið að gera tillögur um stjórnfyrirkomulag grunnskólanna og tel ég að hann hafi átt að gera tillögur um hvort ráða ætti deildarstjóra eða ekki. Þetta er ákvörðun sem kjörnir bæjarfulltrúar eiga að taka en ekki vísa til  starfsmanna.

Í raun finnst mér að við höfum ekki klárað þá vinnu sem stýrihóp var falið, að ekki skuli hafa verið farið yfir fjölda millistjórnenda sem klárlega þarf að taka mið af í öðrum ákvörðunum um stjórnfyrirkomulag grunnskólanna í þéttbýli.

Stjórnskipulag leikskóla.

Undanfarin ár hefur börnum á leikskólaaldri fækkað og áframhaldandi fækkun á næstu árum er líkleg.

Engar athugasemdir eru við hvernig börnum er skipt á deildir. Sá þáttur snýr að faglegu starfi sem fagaðilar eru betri til að ákvarða.

Engin rök hafa komið fram sem styðja að betra sé að reka leikskólana aðskilda, en ljóst er að með því móti nýtast fjármunir mun verr og má þegar sjá merki þess í dag. Með einum leikskólastjóra er mun auðveldara að bregðast við breytingum á fjölda leikskólabarna. Rými er fyrir 66 börn á Lönguhólum, en í ágúst voru þar 42 börn þegar flest voru fyrir hádegi. Á Krakkakoti er rými fyrir 59 börn en þar voru á sama tíma 39 börn. Því er ljóst að húsnæði er á leikskólum sveitarfélagsins fyrir 44 börn til viðbótar.

Nú er yfirmönnun á Lönguhólum m.v. barngildi um 50% og 20% á Krakkakoti. Vel er hægt að samþykkja að mönnun sé umfram það lágmark sem gert er ráð fyrir í reglugerð um leikskóla og hóflegt að miða við 20%. Ætla má að sú yfirmönnum sem nú er á Lönguhólum kosti a.m.k. 4 milljón króna á ári.

Samkvæmt upplýsingum frá Stefáni Ólafssyni (frá nóv. 2005) er fjárhagslegur ávinningur af sameiningu leiksskólanna undir eina stjórn með einum leikskólastjóra og einum aðstoðarleikskólastjóra 5,3 milljónir á ári með launatengdum gjöldum.

Grunnskólinn Hofgarði

Á fundum okkar með starfsfólki grunnskólans í Hofgarði og foreldrum barna kom skýrt fram að þeim finnst sem skólinn hafi einangrast eftir að grunnskólinn á Hrollaugsstöðum og Holti voru lagðir niður. Best er að grunnskólinn í Hofgarði starfi áfram sem sjálfstæð eining en gæta þarf sérstaklega að góðum tengslum við hina grunnskólana í sveitarfélaginu.

Ljóst er að ákvarðanir meirihlutans á stjórnfyrirkomulagi grunnskólanna og leikskólanna þýðir meiri kostnað. Það er mat mitt að þeim fjármunum eigi að verja frekar í innra starf í skólunum. Ég vildi gjarnan sjá að öllum 5 ára börnum yrði til að byrja með veitt frí 4 tíma vistun á leikskóla sem yrði fyrsti vísir að gjaldfrjálsum leikskóla

Ég vil að lokum þakka Stefáni Ólafssyni fyrir hans starf með stýrihópnum, en hann hefur fært okkur allar þær upplýsingar sem hópurinn hefur óskað eftir og borið hitann og þungann af allri vinnu við skólastefnuna.

Hornafirði 3. janúar 2007

Halldóra B. Jónsdóttir.

Björn Ingi sagði að þessum lestri loknum að sjálfstæðismenn beri fullkomið traust til skólastjórnenda og okkur beri að fara vel með fjármuni sem okkur er falið að gæta.

Hjalti sagði það ekki einfalt viðfangsefni að ákveða um stjórnskipulag grunnskólans enda hafi það tekið nær tvö ár. Hann sagðist erfitt að fjalla um sérálit Halldóri enda ekki verið með það í höndunum þar til nú.  Hjalti sagði það skipulag að vera með skóla í þremur húsum kalli á stjórnendur í hvert þeirra. Þá greindi hann frá heimsóknum sínum og framkvæmdastjóra fræðslu- og félagssvið í grunnskólana þann 20. des. þar sem fundað var með starfsmönnum og þeim kynntar niðurstöður stýrihópsins. Sagði hann þá fundi hafa verið góða og andann á þeim sömuleiðis. Þá fór Hjalti yfir ýmis áhersluatriði í skólastarfi. Sagði hann miklar breytingar vera í þessum málaflokki. Hvað varðar tölur sem birtast í áliti Halldóru sagðist hann á þessari stundu ekki hafa forsendur til að ræða þær. Hjalti sagðist draga í efa þær fullyrðingar sem fram koma um yfirmönnun í leikskólum og minnti á ákvörðun skólanefndar um úttekt á starfi leikskólanna á þessari önn. Þá minnti hann á að sjálfstæðismenn hafi verið með formennsku í skólanefnd í 12 ár og bæru því mikla ábyrgð á þessum málaflokki.

Björn Ingi sagðist taka undir það að best hefði verið að Haldóra hefði getað verið hér til að taka þátt í þessari umræðu. Hann efaðist og um það að færri stjórnendur en sex kæmi niður á faglegu starfi í skólunum. Björn Ingi ræddi mönnun í leikskólum og velti því upp hvort yfirmönnun sé meint eða raunveruleg. Þá minnti hann á að sjálfstæðismenn hafi verið í samstarfi við aðra og að ná þurfi samkomulagi við fyrirkomulag skólamála.

Hjalti sagði enn ekki ljóst hvernig háttað verður fyrirkomulagi millistjórnenda í grunnskólunum. Þá sagði hann leikskólaumræðuna vera orðna góða í bili.

Björk sagði skólamálin vera afar viðkvæman málaflokk en við megum ekki gleyma því að við erum að reka fyrirtæki. Sagðist hún vilja sjá einn skólastjóra og tvo aðstoðarskólastjóra. Þá sagðist hún vera ánægð með skólastefnuna sjálfa og sagðist samþykkja hana.

Björn Ingi sagði að ekki mætti túlka orð Halldóru sem vantraust á framkvæmdastjóra, slíkt hafi aldrei komið fram hjá henni..

Elín sagðist ekki geta setið undir þeirri umræðu að hafa lagst gegn úttekt á mönnun í leikskólum á síðasta kjörtímabili, það hafi aldrei verið rætt um að gera slíka úttekt.

Tillögur stýrihóps um skólastefnu og fyrirkomulag á stjórnunarþætti grunnskóla, tónskóla og leikskóla, dagsett 19. desember 2006 bornar undir atkvæði.

A liður  - samþykktur samhljóða með öllum greiddum atkvæðum.

B liður  - samþykktur með 5 atkvæðum, tveir sátu hjá

C liður  - samþykktur samhljóða með öllum greiddum atkvæðum.

D liður  - samþykktur með 5 atkvæðum, tveir sátu hjá.

3.    Vaxtarsamningur Austurlands.

(Erna vék af fundi og Árni mætti á fund.)

Hjalti fór yfir vinnu og gerð vaxtarsamnings fyrir Austurland.  Í máli hans kom m.a. fram að vaxtarsamningar séu hluti af nýrri nálgun í byggðamálum á Íslandi.  Í stað þess að styrkja einstakar atvinnugreinar sé verið að miða að því að byggja á styrkleikum hvers svæðis og efla samkeppnishæfni atvinnulífs á svæðunum.  Hann gerði grein fyrir kostnaðarskiptingu í samningnum og að stærsti hlutinn kæmi frá ríki en sveitarfélög og fyrirtæki á Austurlandi kæmu einnig með myndarlegum hætti að fjármögnun samningsins.  Hjalti undirstrikaði að frumkvæði að gerð samningsins hefði komið frá bæjarstjórn Hornafjarðar.  Í samningnum er tíundað að markmiðið sé að styrkja helstu byggðakjarna á svæðinu, s.s. Hornafjörð.  Þá fór Hjalti yfir fjórar áherslur sem hann lagði til að væru hafðar að leiðarljósi við þróun atvinnulífs í Austur-Skaftafellssýslu.  Í fyrsta lagi að leggja áherslu á samkeppnishæfni á alþjóðlegum markaði.  Í öðru lagi að halda áfram að skilgreina sérstöðu okkar í náttúrufarslegu tilliti og byggja upp ferðaþjónustu í tengslum við hana.  Í þriðja lagi að leggja áherslu á framleiðslu matvæla og hönnunar sem eru á einhvern hátt einkennandi fyrir svæðið.  Í fjórða lagi að efla opinbera þjónustu á vegum sveitarfélagsins og hvetja til þess að ríkið flytji í auknum mæli störf inn í sveitarfélagið. Að lokum þakkaði hann öllum sem komið hafa að þessu máli fyrir hönd Sveitarfélagsins Hornafjarðar og lagði til að bæjarstjórn samþykkti samninginn.

Björn Ingi þakkaði yfirlit Hjalta. Hann sagði ákveðnar vangaveltur í sínum huga. Þó minna fjármagn fylgi minna svæði væri það umhugsunarvert. Þá benti hann á að við séum komin í Suðurkjördæmi. Hann sagðist harma það að horfið hafi verið frá sérstökum samningi fyrir Suðausturland en ekki að færa hann yfir allt Austurland eins og nú sé raunin.

Sigurlaug sagði gott að komið væri að leiðarlokum og að hægt verði að vinna eftir vaxtarsamningnum.  Hún sagði það vonbrigði að vaxtarsamningurinn skuli ekki ná aðeins yfir okkar landshluta eins og upphaflega var að stefnt. Þrátt fyrir þetta verðum við að hagnýta okkur þau tækifæri sem hann gefur okkur. Við megum ekki setjast með hendur í skaut heldur hafa frumkvæði, leiða vinnuna og óhikað leita samstarfs út fyrir gamla Austurlandskjördæmi þegar við förum að byggja upp okkar verkefni. Mestu máli skipti að við á þessu svæði stöndum þétt saman. 

Björk fagnaði vaxtarsamningnum og sagðist vonast til að hann verði okkur lyftistöng. Samninginn þurfi að kynna vel í samfélaginu.  Þá óskaði hún upplýsinga um okkar kostnað af þátttöku í samningnum og óskaði eftir upplýsingum um greiðslur til einstakra svæða og verkefna.

Hjalti greindi frá því að á næsta ári muni sveitarfélagið greiða 1,2 millj. króna vegna samningsins. Ekki liggi enn fyrir hvernig fjármagni sem fylgir samningnum í heild verði varið, útfærsla á því bíði vinnu að samningnum. Sagðist Hjalti gera sér góðar vonir um okkar hlut.

Vaxtarsamningur fyrir Austurland borinn undir atkvæði og hann samþykktur samhljóða.

4.    Fyrirspurnir.

Engar fyrirspurnir hafa borist.

Fundi slitið kl. 18.30