Fundargerð Bæjarstjórnar 78

78. fundur

Fundur haldinn í bæjarstjórn Hornafjarðar, miðvikudaginn 18. nóvember 2004, kl. 17:30 í Ekru.

Mætt voru:  Halldóra B. Jónsdóttir, forseti, Einar Karlsson, Björn Emil Traustason, Friðrik Þór Ingvaldsson, Reynir Arnarson, Ólafur Sigurðsson og Eyjólfur Guðmundsson. Einnig Albert Eymundsson, Hjalti Þór Vignisson, Ásta H. Guðmundsdóttir, Stefán Ólafsson og Helgi Már Pálsson.

Gengið var til dagskrár.

1.  Fundargerðir

Bæjarráð Hornafjarðar 269. fundur 26. október 2004.

·  Atvinnumálanefnd Hornafjarðar 13. fundur 20. október 2004.

·  Skólanefnd Hornafjarðar 64. fundur 20. október 2004.

·  Stjórn Sambands íslenskra sveitarfélaga 718. fundur 15. október 2004 til kynningar.

Forseti las uppsagnar bréf Kristínar Gestsdóttur grunnskólakennara þar sem hún lýsir yfir óánægju með framkomu ríkisins og sveitarfélagsins í kjaradeilu Kennarasambandsins og Launanefndar sveitarfélaga.  Í bréfinu lýsir hún yfir áhyggjum af framtíð skólastarfs ef ekki verði breyting á stöðu mála.  Kristín lagði fram eftirfarandi spurningu:  „Hvað ætlar bæjaryfirvöld Sveitarfélagsins Hornafjarðar að gera í málefnum kennara Grunnskóla Hornafjarðar til að skapa frið um starfið innan skólans?“  Forseti las einnig upp bréf frá kennurum við Grunnskóla Hornafjarðar þar sem mótmælt er lagasetningu á verkfall þeirra og skorað á fulltrúa bæjarins og bæjarstjóra að kynna sér tilboð félags grunnskólakennara frá 8. nóvember s.l.  Í bréfinu skoruðu kennarar einnig á bæjaryfirvöld að laun sem greidd hafa verið fyrirfram verði ekki dregin af kennurum fyrr en endanlegt uppgjör hefur farið fram.

Þá las forseti upp bréf frá skólastjórum í grunnskólum Hornafjarðar þar sem þeir lýsa yfir áhyggjum af skólahaldi í sveitarfélaginu í kjölfar lagasetningar.

Bæjarstjóri ræddi málefni grunnskólanna í ljósi síðustu atburða og bar upp eftirfarandi bókun:

Bæjarstjórn Hornafjarðar lýsir yfir ánægju með að undirritaðir hafi verið samningur í kjaradeilu Kennarasambands Íslands og sveitarfélaganna.

Bæjarstjórn hvetur aðila að samþykkja samninginn og taka höndum saman um að ljúka þessu skólaári með velferð nemenda að leiðarljósi og sjá til þess að afleiðingar kjaradeilunnar bitni sem minnst á þeim.

Jafnframt lýsir bæjarstjórn yfir ánægjum með framkomu kennara við grunnskóla sveitarfélagins en þeir hafa ekki raskað starfsemi skólanna í þessari viðkvæmu deilu eftir að lagasetning var samþykkt á Alþingi.

Bæjarstjórn er tilbúinn fyrir sitt leyti að skoða og ræða leiðir og tillögur sem skólastjórar og starfsfólk skólanna telja að geti bætt árangur í skólastarfinu á þessu skólaári og lýsir yfir fullum vilja til samstarfs m.a. um uppgjörsmál.          

Reynir tók til máls og taldi að vegna undirritunar samnings milli Launanefndar og Kennarasambands Íslands sé málið komið úr höndum bæjarstjórnar á meðan ekki liggi ljóst fyrir hvernig atkvæðagreiðslu um samninginn lyktar.

Friðrik ræddi kjaradeilu grunnskólakennara og sveitarfélaganna.  Hann hrósaði kennurum í sveitarfélaginu fyrir framkomu þeirra í deilunni.

Eyjólfur tók undir bókun bæjarstjóra.  Hann taldi að þeir samningar sem hafi verið gerðir séu ekki ásættanlegir fyrir kennara.  Hann lagði áherslu á að næstu ár og misseri yrðu nýtt til að aðilar kæmu sér saman um betri laun og bætta aðstöðu í skólum.  Hann gerði tvö atriði að umtalsefni.  Annars vegar vaxandi miðstýringu í samningum á vegum sveitarfélaga og jafnvel kennara og hins vegar ójafna tekjuskiptingu ríkis og sveitarfélaga.  Hann taldi kjaramun grunnskólakennara og framhaldsskóla kennara m.a. skýrast af því að sveitarfélögin greiddu grunnskólakennurum laun en ríkið framhaldskólakennurum. 

Forseti tók undir orð þeirra sem lofuðu framgöngu kennara í sveitarfélaginu í kjaradeilunni.

Friðrik óskaði eftir upplýsingum um fund bæjarráðs og Vegagerðarinnar þann 21. október s.l.  Eins óskaði hann eftir upplýsingum um söluna á Bjarnarhóli 7.  Þá spurðist hann fyrir um útboð í fráveitumálum, hversu mörg tilboð hafi borist og kostnað við þá framkvæmd.

Eyjólfur kallaði eftir upplýsingum um afgreiðslu reglugerðar fyrir Skaftafellsþjóðgarð.

Forseti greindi frá að reglugerð fyrir Skaftafellsþjóðgarð hafi verið afgreidd á síðasta bæjarstjórnarfundi.

Reynir óskaði eftir upplýsingum um fráveitumál og hvenær framkvæmdir hefjist.

Bæjarstjóri upplýsti að á fundi með Vegagerðinnar hafi m.a. verið rætt um framkvæmdir við Hornafjarðarfljót.  Í samtölum bæjarstjóra við vegamálastjóra hefur komið fram að undirbúningsvinna sé komin á fullt skrið eftir nokkrar tafir að undanförnu.  Bæjarstjóri upplýsti að berjast yrði fyrir því að Hornafjarðarfljót yrðu á vegaáætlun árið 2006 vegna niðurskurðar á stórframkvæmdum.  Þá upplýsti hann að allt benti til þess að vegurinn við Dynjanda yrði lagfærður í tengslum við vegagerð vegna Almannaskarðsgangnanna.  Bæjarstjóri sagði að kröfum heimamanna varðandi reglugerð að Skaftafellsþjóðgarð hafi verið mætt að nær öllu leyti.  Að lokum gerði hann grein fyrir að tilboð í fráveituframkvæmdir hafi verið yfir kostnaðaráætlun og starfsmen tækni- og umhverfissviðs séu að reyna að ná samningum um framkvæmdina og lægra verð.

Forseti sagði að Bjarnarhóll 7 hafi verið seldur á markaðsverði.

Forseti las upp tillögu bæjarstjóra að bókun um málefni grunnskóla.  Bókunin samþykkt samhljóða.

Bæjarráð Hornafjarðar 270. fundur 11. nóvember 2004.

·  Félagsmálanefnd Hornafjarðar 117. fundur 26. október 2004.

·  Menningarmálanefnd Hornafjarðar 60. fundur 27. október 2004.

Friðrik ræddi um fjárveitingu til danskennslu í grunnskólum sveitarfélagsins og lýsti jákvæðu viðhorfi sínu til danskennslu.  Hann spurðist fyrir um Jöklasýningu og hvernig gengi að afla fjár til verkefnisins.  Þá spurði hann um framkvæmdir við Krosseyjarbakka.

Bæjarstjóri tók undir orð Friðriks um danskennslu.  Þá gerði hann grein fyrir ferð sinni ásamt starfsmönnum Menningarmiðstöðvarinnar til Reykjavíkur.  Hann lýsti yfir að allir þeir aðilar sem rætt var við hafi verið reiðubúnir að veita faglegan stuðning en enn væri bið á svari eftir hvort aðilar styrktu verkefnið fjárhagslega.  Bæjarstjóri upplýsti að tilboð hafi borist í þekju á Krosseyjarbakka en formleg afgreiðsla í hafnarstjórn hafi ekki farið fram.

Fundargerð 77. fundar Bæjarstjórnar Hornafjarðar 27. október 2004, áður samþykkt.

2.      Fjárhagsáætlun 2005 – fyrri umræða

Bæjarstjóri fylgdi áætluninni úr hlaði.  Helstu niðurstöðu tölur við fyrri umræðu eru þessar:

A-hluti:

Skatttekjur bæjarsjóðs eru áætlaðar 735,8 mkr. Rekstur málaflokka eru áætlaður 731,3 mkr. Gjöld vegna eignasjóðs og þjónustustöðvar eru áætluð 22 mkr. Mismunur tekna og gjalda A-sjóðs sveitarfélagsins er því halli um 17,4 mkr.   Aðrir liðir sem áhrif hafa eru 7,3 mkr. Rekstur og afborganir umfram tekjur eru því áætlaðar 24,7 mkr.

B-hluti:
Hornafjarðarhöfn:  Gert er ráð fyrir að tekjur verði 48,8 mkr.  en rekstrargjöld ásamt fjármagnskostnaði verði 31,9 mkr. Tekjur umfram gjöld verði því 15,9 mkr.

Vatnsveita:   Gert er ráð fyrir að tekjur verði 23,8 mkr.  en rekstrargjöld ásamt fjármagnskostnaði og afskriftum  verði 19,8 mkr. Tekjur umfram gjöld verði 4,0 mkr.

Leiguíbúða:  Gert er ráð fyrir að tekjur verði 19,5 mkr.  en rekstrargjöld ásamt fjármagnskostnaði verði 22,6 mkr. Gjöld umfram tekjur verði 3,1.

Bæjarstjóri kynnti einnig fjárhagsáætlun fyrir Heilbrigðisstofnunar Suðausturlands.

Gert er ráð fyrir að tekjur verði 300,5 mkr. og  gjöld verði 300,5 mkr.  Því er útlit fyrir að jafnvægi verði í rekstri HSSA árið 2004

Bæjarstjóri ítrekaði að fjárhagsstaða sveitarfélagsins er þröng og ekki svigrúm til stórra framkvæmda.  Hann kynnti vinnulista með fjölmörgum nauðsynlegum framkvæmdum,  sem samtals hljóðar upp á yfir hálfan milljarð kr. í grófri áætlun.  Þar sem augljóst er að ekki er hægt að framkvæma nema brot af listanum  hvatti bæjarstjóri  bæjarfulltrúa  til að vanda vel forgangsröð framkvæmda áður en endanleg afgreiðsla fer fram við aðra umræðu.

Bæjarstjóri lagði fram eftirfarandi tillögu að álagningarreglum fyrir árið 2005:

Útsvar                                        13,03%

Fasteignaskattur

  íbúðarhúsnæði                           0,50%

  atvinnuhúsnæði                          1,62%

 

Lóðarleiga

 íbúðarlóðir (af lóðarmati)              1,00%  

 iðnaðarlóðir (af lóðarmati)             1,00%  

 aðrar lóðir (af lóðarmati)               1,00%

Reynir ræddi um annan áfanga í fráveitumálum og taldi að þrýstingur á að þessum áfanga ljúki væri ekki eins mikill og áður.  Hann lýsti áhuga sínum til að nýta hluta af þeim fjármunum sem áttu að renna til fráveituframkvæmda í undirbúning að nýrri sundlaug.  Þá ræddi hann fjárfestingu við Jöklasýningu og taldi að ef ekki kæmi fjármagn frá fyrirtækjum og opinberum aðilum að þá ætti sveitarfélagið að endurskoða fjárveitingar sínar til sýningarinnar.

Einar ræddi um framkvæmdir í sveitarfélaginu.  Hann lagði áherslu á að tækifæri til malbikunarframkvæmda yrði nýtt.  Þá tók hann undir orð Reynis um sundlaug. 

Eyjólfur gerði fjárveitingar ríkisvaldsins til sveitarfélaga að umtalsefni og taldi of naumt skammtað miðað við þau verkefni sem sveitarfélög annast.  Hann ræddi einnig um framkvæmdir í sveitarfélaginu og taldi að ekki ætti að leggja ofuráherslu á malbikunarframkvæmdir þó að þær væru brýnar.  Þá tók hann undir orð Reynis um sundlaug og taldi skynsamlegt að leggja áherslu á æskulýðs- og íþróttamál.  Hann taldi þó að ræða þyrfti betur hvort færa ætti framkvæmdir við sundlaug fram fyrir fráveituframkvæmdir í forgangsröðinni.  Hann lagði áherslu á að klára þyrfti framkvæmdir við Nýheima til hægt væri að fullnýta það húsnæði.

Björn Emil tók undir áherslur í malbikunarframkvæmdum.  Hann tók einnig undir orð Reynis og Einars um framkvæmdir við sundlaug.

Friðrik ræddi um eignarsjóð og gerði íþróttamannvirki að umtalsefni í því sambandi.  Hann lagði áherslu á að skýra þyrfti rekstrarkostnað mannvirkja.  Þá ræddi hann nauðsyn á úrbótum á starfsmannaaðstöðu, búningsklefum og öðru sem tilheyrir sundlauginni.  Þá gerði hann gólfefni á íþróttahús á Höfn að umfjöllunarefni ásamt lýsingu og öðru sem þykir ábótavant þar.   Hann tók undir þær tillögur að fresta ætti öðrum áfanga fráveituframkvæmda og bíða og sjá hverju fyrsti áfangi skilar okkar.

Halldóra B. Jónsdóttir, forseti lagði áherslu á að rekstur bæjarins færi ekki fram úr tekjum.  Hún lagði áherslu á að nýjar lántökur mættu ekki vera of íþyngjandi.  Þá ræddi hún um að nauðsynlegt væri að kanna hvort möguleiki væri á að hagræða í rekstri.  Þá tók hún undir orð Friðriks um fráveituframkvæmdir.  Forseti benti á að umræða ætti eftir að fara fram um hvort halda ætti áfram jarðhitaleit.

Bæjarstjóri ræddi um tillögur um breytingar að fráveituframkvæmdum.  Þá gerði hann Nýheima að umtalsefni.  Bæjarstjóri ítrekaði að bæjarfulltrúar sýndu fulla ábyrgð í fjármálum.

Reynir fagnaði þeirri opnu umræðu sem fram hefur farið um framkvæmdir en ítrekaði að ekki væri verið að taka ákvarðanir á þessu stigi.

Ofangreind tillaga að álagningarreglum samþykkt samhljóða.

Bæjarstjórn vísar fjárhagsáætlun til seinni umræðu.                                                                    

3.      Fyrirspurnir

Engar fyrirspurnir

 Fundi slitið kl. 19.55