Fundargerð Bæjarstjórnar 73

73. fundur

Fundur haldinn í Bæjarstjórn Hornafjarðar, miðvikudaginn 5. maí 2004, kl. 16:00 í Ekru.
Mætt voru: Halldóra B. Jónsdóttir, Einar Karlsson, Björk Pálsdóttir, Elín Magnúsdóttir, Reynir Arnarson, Ólafur Sigurðsson og Þorbjörg Arnórsdóttir. Einnig Albert Eymundsson, Inga Jóna Halldórsdóttir, Ásta H. Guðmundsdóttir og Stefán Ólafsson.

Gengið var til dagskrár.

1. Fundargerðir

Bæjarráð Hornafjarðar 246. fundur 6. apríl 2004.
• Félagsmálaráð Hornafjarðar 108. fundur 23. mars 2004.
• Skólanefnd Hornafjarðar 59. fundur 31. mars 2004.
• Fundargerð 712. fundar stjórnar Sambands íslenskra sveitarfélaga 19. mars 2004
– til kynningar.
Halldóra fagnaði hugmynd um skólaþing á Hornafirði þar sem lagt er mat á starfsemi skólanna og horft til framtíðar. Hún ræddi einnig fyrirhugaða kvikmyndagerð, verkefni sem hún telur mjög áhugavert.
Fundargerð samþykkt.
Bæjarráð Hornafjarðar 247. fundur 16.apríl 2004.
Þorbjörg spurði um fyrirhugaðar framkvæmdir á Hafnarbraut, hvenær þær séu fyrirhugaðar og hvað þær muni kosta.
Bæjarstjóri sagði að tæknideild hafi verið falið að gera kostnaðaráætlun m.v. tillögur Ullu Pedersen landslagsarkitekts. Kostnaðaráætlunin eigi að liggja fyrir í sumar þannig að mögulegt verði að fara í framkvæmdir í haust.
Reynir ræddi deiliskipulag fyrir tjaldsvæði. Hann sagði að menn væru ekki á eitt sáttir um tillöguna og hvatti þá sem athugasemdir hafa að koma þeim formlega á framfæri. Möguleiki til að koma athugasemdum á framfæri er 6 vikur eftir birtingu auglýsingar sem var 20 apríl sl.
Fundargerð samþykkt.
Bæjarráð Hornafjarðar 248. fundur 20.apríl 2004.
• Byggingar- og skipulagsnefnd 52. fundur 5. apríl 2004.
• Menningarmálanefnd Hornafjarðar 56. fundur 14. apríl 2004.
• Fundargerðir HAUST 45. fundu r 31. mars og 46. fundur 1. apríl 2004 til kynningar.
Þorbjörg vakti athygli á auknum framlögum frá ríki til menningarmála.
Halldóra ræddi endurskoðun á aðalskipulagi og hvort ekki væri ráð að halda íbúaþing til að fá fram viðhorf íbúa til málsins. Halldóra ræddi um Menningarráð Austurlands og fjármagn sem veitt hefur verið til menningarmála í gegnum það. Hún sagðist telja að Austurland hafi borið skarðan hlut frá borði miðað við fjárveitingar til uppbyggingar menningarhúsa, m.a. á Ísafirði og Akureyri. Ólafur ræddi um breytingar á aðalskipulagi og sagði að þegar boðað hafi verið til opinna funda vegna skipulagsmála hafi áhugi íbúa því miður ekki verið mikill.
Fundargerð samþykkt.
Bæjarráð Hornafjarðar 249. fundur 29.apríl 2004.
• Félagsmálaráð Hornafjarðar 109. fundur 20. apríl 2004.
• Hafnarstjórn Hornafjarðarhafnar 55. fundur 21. apríl 2004.
• Æskulýðs og tómstundaráð 59. fundur 26. apríl 2004.
Þorbjörg fagnaði samvinnu við KSÍ um uppbyggingu sparkvallar og mælti eindregið með því að lögð verði í hann hitalögn. Hún sagði uppbyggingu íþróttamannvirkja brýnasta verkefnið í málaflokknum. Hún spurði um stefnumótun í æskulýðs- og tómstundamálum, hvernig unnið verði að framgangi þeirra fjölmörgu mála sem þar eru reifuð. Hún spurði um undirbúningshóp vegna stofnunar Náttúrustofu Suðausturlands og ræddi um NPP verkefnið.
Halldóra sagði beðið eftir tilnefningum m.a. frá menningarmálanefnd í undirbúningshóp vegna stofnunar Náttúrustofu Suðausturlands. Halldóra sagði að öllum hefði mátt vera það ljóst við byggingu Nýheima að ekki yrði um fjárfrekar framkvæmdir að ræða næstu ár þar á eftir. Hún minnti á að næsta stóra verkefnið sem biði væru framkvæmdir við fráveitumál.
Reynir ræddi ástæður þess að rætt er nú um fegrun Hafnarbrautar en það er endurnýjun á lögnum sem unnið var að sumarið 2003. Á framkvæmdatímanum kom upp hugmynd um að lagfæra svæðið í áföngum. Nú er unnið að gerð tillagna og kostnaðarútreikningi.
Reynir vakti athygli á ummælum starfsmanns Siglingastofnunar um vel unnin störf starfsmanna sveitarfélagsins varðandi hafnarvernd.
Halldóra hvatti æskulýðs- og tómstundaráð til að endurskoða opnunartíma sundlaugarinnar m.a. á föstudaginn langa, páskadag og 1. maí en víða er farið að hafa opið á þessum dögum.
Bæjarstjóri sagði nauðsyn á því að huga að endurbótum og frekari uppbyggingu íþróttamannvirkja á næstu árum þrátt fyrir þrönga stöðu bæjarsjóðs.
Fundargerð samþykkt.

Bæjarstjórn Hornafjarðar 72. fundur, 1. apríl 2004, fundargerð áður samþykkt.

2. Ársreikningar 2003 - fyrri umræða

Bæjarstjóri fylgdi ársreikningunum úr hlaði og kom m.a. eftirfarandi fram í máli hans.
Ársreikningar Sveitarfélagsins Hornafjarðar og stofnana fyrir árið 2003 eru hér til fyrri umræðu. Ég ætla í stuttu máli að gera grein fyrir helstu niðurstöðum reikninganna.

Helstu niðurstöður A-hluta sveitasjóðs :
Skatttekjur námu 695 milljónum króna sem er um 16 milljónum kr. hærra en fjárhagsáætlun gerði ráð fyrir. Skýringin er hærra framlagi úr Jöfnunarsjóði sveitafélaga.
Rekstur málaflokka nam 755 milljón kr. Fjárhagsáætlun gerði ráð fyrir um 732 milljónum kr til rekstrar málaflokka. Mismuninn er fyrst og fremst vegna uppfærslu langtímalána.
Niðurstaða A-hluta sveitarsjóðs er neikvæð sem nemur 60 milljónum en þar eru reiknaðar afskriftir, verðbætur og reiknaðar lífeyrisskuldbindingar upp á 78,4 milljónir. Veltufé frá rekstri er því um 18,4 milljónir. Handbært fé í árslok er 148,6 milljónir. Greiðslubyrði vegna langtímaskuldbindinga er rúmlega 84 milljónir. Langtímaskuldir A-hluta bæjarsjóðs eru 700 milljónir í árslok og aukast á milli ára um 78 milljónir.
Fjárfrekustu málaflokkar eru.
• Fræðslumál um 409 milljónir sem er um 58,8% af skatttekjum.
• Sameiginlegur kostnaður um 93 milljónir sem er um 13,38% af skatttekjum.
• Æskulýðs og íþróttamál um 57 milljónir sem er um 8,20% af skatttekjum.
• Félagsmál um 38 milljónir sem er um 5,46% af skatttekjum.
• Menningarmál um 40 milljónir sem er um 5,75% af skatttekjum
Fárfestingar eru:
• Kaup á íbúðum Silfurbraut 2-4 kr. 13,5
• Kaup á vélgröfu kr. 4,3

Helstu niðurstöður B-hluta sveitarsjóðs:
Hornafjarðarhöfn. Tekjur eru tæpar 75,2 milljónir. Gjöldin eru rúmar 63 milljónir. Fjármagnsgjöld eru um 3,5 milljónir, þannig að tekjur umfram gjöld eru um 8,6 milljón.
Félagslega íbúðakerfið. Leigutekjur eru 19,3 milljónir kr. Rekstrargjöld námu 10,6 milljónum þannig að tekjur umfram gjöld eru 8 milljónir kr. Fjármagnskostnaður og greiðslubirgði lána námu tæpum 16 milljónum þannig að halli kerfisins er rúmlega 7 milljónir kr.
Vatnsveita Hornafjarðar. Heildartekjur námu um 21 milljónum kr., rekstrargjöld og afskriftir voru 20,2 milljónir kr. Fjármunagjöld 7,8 milljónir og halli á rekstri því um 7 milljónir. Upphæð reiknaðra afskrifta nam 4,5 milljónum.
Tengd stofnun :
Heilbrigðisstofnun Suðausturlands. Heildartekjur námu tæplega 284 milljónum kr. og rekstrargjöld voru 302,5 milljónir . Fjármunakostnaður var um 1 milljón kr. Gjöld umfram tekjur námu því um 19,6 milljón kr. Ójafnað tap stofnunarinnar nemur um 40 milljónum kr.
Bæjarstjóri vitnaði í og gerði að umtalsefni atriði sem fram koma í endurskoðunarskýrslu Sigurðar Tómassonar hjá Deloitte s.s. aðvörunarorð um mikilvægi þess að hafa skýrar vinnureglur um aðskilnað bókhalds og fjárreiðustarfa ásamt kostnaðareftirliti. Endurskoðandi bendir á auknar skuldir sveitarfélagsins sem gætu skaðað sveitarfélagið hvað varðar lán og lánakjör í framtíðinni. Sömuleiðis leggur hann áherslu á að viðunandi lausn fáist á uppgjör vegna reksturs heilbrigðisstofnunarinnar.
Jafnfram segir í skýrslu endurskoðanda:
„Í heild sinni er fjárhagsáætlun vel unnin og áætlanir standast að mestu leyti og tæplega unnt að gera ráð fyrir öðru en eitthvað kunni að fara öðru vísi er ströngustu kröfur um gerð áætlana gerir ráð fyrir.“
Halldóra tók undir orð endurskoðanda þess efnis að fjárhagsáætlun sveitarfélagsins sé vel unnin. Hún þakkaði starfsmönnum vel unnin störf. Hún ræddi um skuldastöðu sveitarfélagsins og sagði hana glöggt merki þess að aðhalds væri þörf varðandi framkvæmdir á næstunni. Halldóra lýsti áhyggjum af stöðu Heilbrigðisstofnunar Suðausturlands og sagðist vona að viðræður hæfust innan skamms við heilbrigðisráðuneytið um lausn málsins.
Þorbjörg sagði þrönga stöðu sveitarsjóðs sýna að brýn þörf er á að forgangsraða verkefnum. Þorbjörg bað um nánari skýringar á stöðu Heilbrigðisstofnunarinnar og hvað bæjarstjórn hyggist gera í málinu. Þorbjörg spurðist einnig fyrir um heimaþjónustu og hvort gjald það sem lagt var á þá þjónustu í byrjun árs hafi orðið til þess að fólk hafi dregið úr notkun þjónustunnar.
Halldóra ræddi gjald sem nú er tekið v. heimaþjónustu. Gjaldtakan er tekjutengd líkt og reglur sem settar voru um afslátt á fasteignaskatti. Þessi gjaldtaka er hugsuð þannig að þeir sem fjárhagslega getu hafi til að greiða fyrir þjónustuna gera það aðrir ekki. Ástæða þess að ekki var farið út í gjaldtöku fyrr var sú að tiltölulega fáir nýttu sér þjónustuna. Aukin aðsókn og aukin útgjöld vegna heimaþjónustu hafi leitt til þess að reglur um gjaldtöku voru settar.
Bæjarstjóri fór yfir helstu skýringar halla Heilbrigðisstofnunarinnar en þar má nefna launahækkanir, veikindalaun, lægri tekjur dvalardeildar auk tjóns á tölvukerfi.
Halldóra sagði gjaldtöku vegna heimaþjónustu hafa byrjað í febrúar s.l. Hún sagðist ekki hafa frétt af því að dregið hafi úr notkun þjónustunnar.
Ólafur vitnaði í endurskoðandaskýrslu þar sem bent er á að ef ekki komi til leiðrétting á þjónustusamningi um heilbrigðismál þá sé íbúum hér íþyngt umfram aðra íbúa landsins að því er varðar þessa þjónustu. Hann hvatti alla bæjarfulltrúa til að beita sér í málinu gagnvart ríkinu.

Bæjarstjórn samþykkir að vísa ársreikningunum til annarar umræðu í bæjarstjórn þann 3. júní n.k.

3. Tilkynning um nýjann varamann í bæjarstjórn

Forseti tilkynnti að Halldóra K. Guðmundsdóttir fulltrúi D-lista hafi tekið sæti sem varamaður í bæjarstjórn í stað Ármanns Guðmundssonar.

4. Fyrirspurnir
Engar.


Fundi slitið kl. 18:30