Fundargerð Bæjarstjórnar 70

70. fundur

Fundur haldinn í Bæjarstjórn Hornafjarðar, fimmtudaginn 12. febrúar 2004, kl. 16:00 í Ekru.
Mætt voru: Halldóra B. Jónsdóttir, Björn E. Traustason, Einar Karlsson, Elín Magnúsdóttir, Reynir Arnarson, Friðrik Þór Ingvaldsson og Eyjólfur Guðmundsson. Einnig Albert Eymundsson, Inga Jóna Halldórsdóttir, Ásta H. Guðmundsdóttir, Helgi Már Pálsson og Stefán Ólafsson.

Gengið var til dagskrár.

1. Fundargerðir
Bæjarráð Hornafjarðar 234. fundur fimmtudaginn 18. desember 2003
• Byggingar- og skipulagsnefnd Hornafjarðar 48. fundur 11. desember 2003.
• Félagsmálaráð Hornafjarrðar 102. fundur 9. desember 2003.
• Hafnarstjórn Hornafjarðarhafnar 51. fundur 15. desember 2003.
• Heilbrigðis- og öldrunarráð Hornafjarðar 46. fundur 26. nóvember 2003.
• Heilbrigðiss og öldrunarráð Hornafjarðar 47. fundur 11. desember 2003.
• Menningarmálanefnd Hornafjarðar 52. fundur 10. desember 2003.
• Skólanefnd Hornafjarðar 56. fundur 9. desember 2003.
• Stjórn Gjafa- og minningarsjóðs Skjólgarðs 20. fundur 11. desember 2003.
Halldóra spurðist fyrir um samning við Slysavarnarfélagið Kára í Öræfum varðandi aðstöðu fyrir slökkvibifreið. Hún spurðist einnig fyrir um árangur jarðhitaleitarverkefnisins. Eyjólfur spurði um fjárhagsstöðu Heilbrigðisstofnunar Suðausturlands en áætlaður halli ársins 2003 er 17,6 milljónir og ósamþykkt fjárhagsáætlun ársins 2004 gerir ráð fyri rúml.18 milljón kr. halla. Friðrik spurðist fyrir um áform varðandi endurnýjun gólfs í Íþróttahúsinu á Höfn, skipulagningu frístundabyggðar í Nesjum, staðsetningu á nýjum kirkjugarði og framkvæmdir við Hornafjarðarhöfn.
Bæjarstjóri sagði samning við Slysavarnarfélagið Kára frágenginn. Hann sagði að fyrirhuguð væri kynning í bæjarráði á niðurstöðu síðustu jarðhitaborana. Bæjarstjóri sagði vinnu í fullu gangi í ráðuneytinu við að finna viðunandi lausn á rekstrarvanda Heilbrigðisstofnunarinnar. Hann sagði enga vinnu vera í gangi varðandi skipulagningu frístundabyggðar í Nesjum, engar beiðnir hafi borist um slíkt. Bæjarstjóri sagði Sóknarnefnd Hafnarsóknar vera í samvinnu við bæjaryfirvöld að skoða bestu staðsetningu á nýjum kirkjugarði. Hann sagði áætlanir um framkvæmdir við höfnina hafa breyst í meðförum Siglingarstofnunar og nú væri m.a. áætlaðar 46 milljónir kr. til framkvæmda við Grynnslin.
Halldóra ræddi rekstrarstöðu Heilbrigðisstofnunarinnar og sagði heilbrigðisráðuneytið seint til svara. Hún sagði ekki hægt að ganga formlega frá fjárhagsáætlun stofnunarinnar 2004 fyrr en svör berist frá ráðuneytinu en ítrekaði að samanburður við aðrar stofnanir sýni að stofnunin hér sé vel rekin.
Bæjarstjóri sagði vinnu vera í gangi varðandi úttekt og mat á ástandi á gólfi í Íþróttahúsinu á Höfn.
Fundargerð samþykkt.
Bæjarráð Hornafjarðar 235. fundur fimmtudaginn 8.janúar 2004
• Stjórn Sambands ísleskra sveitarfélaga 709. fundur 12. desember 2003 – til kynningar
Eyjólfu ræddi um skerta greiðsluprósentu ríkisins varðandi húsaleigubætur og sagði ótækt að ríkið velti þannig auknum kostnaði yfir á sveitarfélögin. Hið sama hefur verið að gerast varðandi önnur mál m.a. greiðslur til refa- og minkaveiðar.
Bæjarstjóri ræddi framlög ríkisins til menningarhúsa. Hann benti einnig á að menningarstarfsemi hér í sveitarfélaginu er að fá umtalsverðar upphæðir í styrki frá ríki og hinum ýmsu styrktaraðilum menningar. Þessir framlög sýni hversu öflug menningarstarfsemi er til staðar í samfélaginu
Fundargerð samþykkt.
Bæjarráð Hornafjarðar 236. fundur miðvikudaginn 14. janúar 2004
Bæjarstjóri ræddi fyrirhugaða stofnun Vatnajökulsþjóðgarðs og mismunandi áherslur manna í því máli.
Fundargerð samþykkt.
Bæjarráð Hornafjarðar 237. fundur fimmtudaginn 15. janúar 2004
Eyjólfur sagði stofnun Vatnajökulsþjóðgarðs eitt brýnasta hagsmunamál sveitarfélagsins og því séu deilur um það af hinu illa.
Halldóra útskýrði tillögur og viðhorf sem rædd hafa verið í nefnd um stofnun Vatnajökulsþjóðgarðs. Hún sagði um gríðarlegt hagsmunamál að ræða fyrir sveitarfélagið en að enn eigi eftir að taka afstöðu til margra atriða.
Fundargerð samþykkt.
Bæjarráð Hornafjarðar 238. fundur fimmtudaginn 22. janúar 2004
• Félagsmálaráð Hornafjarðar 103. fundur 13. janúar 2004.
• Menningarmálanefnd Hornafjarðar 53. fundur 14. janúar 2004.

Eyjólfur ræddi mikilvægi úrbóta á veginum yfir Öxi. Hann óskaði eftir að bæjarstjóri taki málið til athugunar. Reynir sagði samgöngunefnd SSA hafa rætt mikið um veginn yfir Öxi og tekið undir ályktanir þess efnis að gerðar verði úrbætur á honum. Reynir sagði frá fyrirhuguðum fundi á vegum SASSA um samgöngumál sem haldinn verður á Egilsstöðum 10. Mars n.k.
Halldóra telur þörf á heildstæðri samgöngu- og jarðgangaáætlun fyrir Austurland.

Bæjarstjóri ræddi um breytingar sem urðu á reglum um afslátt á fasteignagjöldum frá því í fyrri reglum:
Lengi hefur verið í framkvæmd sú regla að fella niður fasteignaskatta af íbúðareigendum 70 ára og eldri. Sömuleiðis gátu aðrir ellilífeyrisþegar og öryrkjar sótt um afslátt eða niðurfellingu og var það metið eftir aðstæðum fólks m.a. af félagsmálaráði. Rétt er að taka fram að ekki felldu mörg sveitarfélög fasteignaskatta niður eins gert var hér.

Eins og kom fram í bréfi sem sent var öllum íbúðareigendum þá varð að bregðast við úrskurði umboðsmanns Alþingis og félagsmálaráðuneytisins um túlkun á lögum í þessum efnum. Kjarnin er að reglurnar verða tekjutengdar. Allir tekjuminni ellilífeyrisþegar og 75% öryrkjar, sem falla undir lögin, eiga rétt á lækkun eða niðurfellingu fasteignaskatts. Á sama hátt þurfa tekjuhærri einstaklingar í þessum hópum að greiða skattinn. Jafnframt breikkar aldurshópurinn og 75% öryrkjar falla undir sömu reglu og ellilífeyrisþegar í samræmi við áðurnefndan úrskurð.

Framkvæmdin kallar á meiri vinnu fyrir alla aðila, íbúðareigendur sem þurfa að fylla út umsókn og skila gögnum með og sömuleiðis starfsfólk sveitarfélagsins sem fer yfir umsóknirnar og breytir álagningunni þar sem það á við. Mikilsvert er að reglurnar eru skýrar og framkvæmdin gegnsæ. Aftur á móti getur fólk haft misjafnar áherslur gagnvart tekjuviðmiðunum. Það er ljóst að mjög margir sem falla undir skilgreiningu reglnanna fá niðurfellingu eða lækkun. Ekki er gert ráð fyrir að tekjur sveitarfélagsins aukist við þessa breytingu.
Mörg sveitarfélög eru að lagfæra reglur um afslátt með svipuðum hætti og hér hefur verið gert. Eftir því sem næst verður komist eru viðmiðanir okkar um tekjumörk hagstæðari íbúum hér en í mörgum sveitarfélögum sem við berum okkur saman við.
Alltaf verður að gera fyrirvara þegar verið er að bera saman fjármál og rekstrarstærðir sveitarfélaga. Sveitarfélög af svipaðri stærð geta haft mismunandi aðstöðu til tekjuöflunar vegna fasteignaskatta eins og annarra gjalda. Bæjarstjóri nefndi nokkur dæmi máli sínu til stuðnings.
Bæjarstjóri ræddi einnig breytingar sem urðu á álagningarreglum fasteignaskatts:
Álagningarprósenta íbúðarhúsnæði hækkaði úr 0,43% í 0,50% af fm og atvinnuhúsnæði úr 1,50% í 1,62 af fm.

Eðlilegt er að skoða fasteignaskatta og fasteignagjöld í samhengi þegar fjallað er um breytingar á þessum tekjustofnum. Að þessu sinni var horft til þess að lóðarleigugjöld hafa verið óbreytt lengi og ekki í takt við verðlagsþróun. Ástæða þess er að samræma og endurnýja þarf gamla samninga sem fallnir eru úr gildi. Sú vinna er í fullum gangi og stefnt að því að ljúka henni á þessu ári. Tekjuaukningin með þessum breytingum nú miðaðist við svipaða upphæð og ef lóðarleiga væri sambærileg því sem gerist hjá öðrum sveitarfélögum sem við berum okkur gjarnan við.

Til að halda öllu til haga má bæta við að holræsagjöld eru hér tiltölulega há vegna mikilla framkvæmda á þessu sviði, einkum í ár og næstu tveim árum samkvæmt áætlunum en vatnsskattur er í meðallagi miðað við sveitarfélög almennt.

Síðar gerist það að fasteignamat hækkar um 10% hjá Fasteignamati ríkisins sem hefur áhrif á fasteignagjöldin. Samt sem áður er það gleðiefni að fasteignamat hér, sem unnið er samkvæmt söluskýrslum íbúða og breytingum á húsnæðismarkaðnum, skuli fylgja því sem almennt er að gerast í landinu. Það væri meira áhyggjuefni ef svo væri ekki.
Fundargerð samþykkt.
Bæjarráð Hornafjarðar 239. fundur fimmtudaginn 22. janúar 2004
• Atvinnumálanefnd Hornafjarðar10. fundur 27. janúar 2004.
• Byggingar- og skipulagsnefnd Hornafjarðar 49. fundur 2. febrúar 2004.
• Hafnarstjórn Hornafjarðarhafnar 52. fundur 26. janúar 2004 og 53. fundur 2. febrúar 2004.
• Skólanefnd Hornafjarðar 57. fundur 28. janúar 2004.
• Æskulýðs- og tómstundaráð 56. fundur 26. janúar 2004.
Friðrik spurðist fyrir um merkingar við þjóðveg 1, verkefni sem unnið er í samvinnu við Vegagerðina. Hann fagnar þeim góða árangri sem náðst hefur í því að draga úr einelti í hornfirskum skólum. Friðrik ræddi lítið svigrúm æskulýðs- og tómstundaráðs við úthlutun styrkja þar sem stærsti hluti styrkveitinganna er þegar ákvarðaður af samningum við ýmis félög.
Bæjarstjóri útskýrði þær merkingar sem nú verður unnið að en þar má nefna að skilti verða sett upp sem upplýsa ferðalanga um að þeir séu staddir í Lóni, Nesjum, Mýrum, Suðursveit eða Öræfum.
Halldóra ræddi um störf nefndar sem skila á tillögum um sameiningu sveitarfélaga og hugsanlega breytingu á verkaskiptingu á milli ríkis og sveitarfélaga. Nefndin hefur kallað eftir viðhorfum landshlutasamtaka m.a. SSA. Halldóra spurðist fyrir um eignaskiptasamning fyrir Nýheima. Reynir ræddi um atvinnumál í sveitarfélaginu. Reynir sagði stöðuna nú í upphafi árs mun betri hvað varðar fjölda á atvinnuleysisskrá eða 32 einstaklingar nú í samanburði við 55 á sama tíma á síðasta ári.
Bæjarstjóri sagði eignaskiptasamning fyrir Nýheima frágenginn en nú væru aðilar að senda hann á milli til formlegrar undirskriftar.
Friðrik telur að horfa eigi til þess við þriggja ára áætlun að styðja enn frekar við æskulýðs- og tómstundastarf í sveitarfélaginu.
Fundargerð samþykkt.

Bæjarstjórn Hornafjarðar, 69. fundur föstudaginn 19. desember 2003, áður samþykkt.
2. 3 ára áætlun
Bæjarstjóri fylgdi áætluninni úr hlaði og sagði m.a.
Bæjarstjórn hefur í rúman áratug gert samhliða 3ja og 10 ára áætlanir fyrir aðalsjóð sveitarféalgsins. Markmiðið er að varpa ljósi á það svigrúm sem verður til sérstakra framkvæmda og stærri fjárfestinga á tímabilinu. Með nýjum reikningsskilavenjum sveitarfélaga breytist allur samanburður milli ára og lykiltölur fá aðra merkingu. Sömuleiðis þarf að skila 3ja ára áætlun fyrir samstæðurreikning þ.e.a.s. bæði A-hluta og B-hluta sem eru t.d. vatnsveitan, höfnin og íbúðakerfið en heilbrigðisstofnunin er gerð upp sér. Þessar breytingar kalla á að 3ja ára áætlun sé unnin sérstaklega sem er lögbundið og 10 ára áætlunin sér sem er ákvörðun bæjarstjórnar hverju sinni. Það mun taka sveitarstjórnarfólk, ekki bara hér heldur alls staðar, tíma að læra að lesa og tileinka sér nýjar bókhaldsreglur. Að þessu sinni er 3ja ára áætlun unnin í fyrsta skipti í tölvuforriti byggt upp eins og sveitarfélagið þarf að skila til félagsmálaráðuneytis lögum samkvæmt. Undirbúningsvinna hefur tafist vegna þess að beðið var eftir komu sérfræðings með ráðgjöf og leiðbeiningar. Það er algjört grundvallaratriði að tölur séu rétt uppfærðar í uppgjöri og áætlunum því forritið framreiknar sjálfkrafa flestar stærðir í 3ja ára áætluninni sem notaðar eru til að byggja ákvarðanir á.
Forsendur áætlunarinnar er m.a.:
• Rekstraráætlun er á föstu verðlagi og allar upphæðir miðast við tekjur og gjöld í áætlun fyrir árið 2004.
• Gert er ráð fyrir varanlegum fjárfestingum að upphæð 307,125 mkr., mest á árunum 2005 og 2006 þar sem fráveituframkvæmdir eru fyrirferðamestar svo og hafnarframkvæmdir.
Áætlunin gerir ráð fyrir að taka langtímalán að upphæð 352,2 mkr. og á móti greiða niður langtímalán að upphæð 379,8 mkr. Langtímalán eiga því að lækka á tímabilinu um 27,6 mkr. Rétt er að benda á miklar framkvæmdir fyrir hafnarsjóð sem skekkja myndina um rúmlega 100 mkr. á kostnað A-sjóðs.

Ég tel ekki rétt að fara nákvæmar yfir áætlunina að þessu sinni því ljóst er að 3ja ára áætlunin mun taka breytingum milli umræðna.

Aftur á móti hvet ég bæjarfulltrúa til að nota þetta tækifæri til að viðra skoðanir sínar og hugmyndir varðandi verkefni og framkvæmdir í framtíðinni og forgangsröðun þeirra. Ég tel hollt fyrir umræðuna í heild að bæjarfulltrúar hafi góða möguleika til að koma persónulegum skoðunum sínum á framfæri opinberlega. Það er svo jafn mikilvægt að fulltrúar tali sig niður á sameiginlega niðurstöðu til að málin fái góðan framgang.

Halldóra telur mikilvægt að vinna áfram 10 ára áætlanir. Hún ræddi fyrirhugaðar fráveituframkvæmdir en sagði að þar fyrir utan væru óskaverkefnin á sviði íþróttamannvirkja.
Eyjólfur ræddi áætlunina og sagði stóru ákvarðarnirnar vera hversu miklar framkvæmdir eigi að fara í á næstu árum. Þá þurfi að horfa til skuldastöðunnar og marka stefnu um hvað við teljum ásættanlegt að vera mikið skuldsett.

Friðrik telur að fara eigi rólega í fráveituframkvæmdir. Sífellt séu að koma fram nýjar tæknilegar lausnir á málinu sem jafnvel séu hagkvæmari en fyrri útfærslur. Hann telur að horfa eigi til þess að gera úrbætur á íþróttamannvirkjum.

Reynir minnti á fyrirhugaða byggingu 2. áfanga hjúkrunarheimilisins. Hann ræddi einnig skort á einbýlishúsalóðum.

Forseti vísaði 3. ára áætlun til annarar umræðu í bæjarstjórn.

3. Fyrirspurnir
Engar.


Fundi slitið kl. 19:40