Hornafjarðarhöfnin Björn Lóðs og fleiri bátar

28.04.2008 Fréttir

Breyttir atvinnuhættir og þjóðgarður kalla á endurskoðun aðalskipulags

Nú um helgina var haldinn fundur um aðalskipulag sveitarfélagsins. Þar var rætt um að fara í endurskoðun aðalskipulags og að sögn Hjalta Þórs Viginsonar bæjarstjóra er þar tvennt sem kallar sérstaklega á breytingar. Í fyrsta lagi tilkoma þjóðgarðs sem hefur mikil áhrif á gildandi skipulag og í öðru lagi miklar breytingar á atvinnuháttum og samfélagsþróun sem er að nokkru leyti í aðra átt en gildandi aðalskipulag spáði fyrir um. Hjalti segir sem dæmi að sjávarútvegur hafi breyst mikið og því kalli það á endurskoðun í hafnarmálum og síðan hefur ferðaþjónusta vaxið umtalsvert.


Eftirfarandi er fundargerð vinnufundarins:

Vinnufundur bæjarstjórnar og byggingar- og skipulagsnefndar um endurskoðun á aðalskipulagi var haldin í Pakkhúsinu á Höfn laugardaginn 26. apríl 2008 kl. 9.00 ? 14.00.

Mætt voru: Árni Rúnar Þorvaldsson, Ólafur Sigurðsson, Torfi Friðfinnsson, Sigurlaug Gissurardóttir, Guðrún Ingimundardóttir, Halldóra B. Jónsdóttir og Páll V. Ólafsson.

Einnig: Haukur Ingi Einarsson, Hjalti Þór Vignisson, Árni Kjartansson, Sigurbjörn Kjartansson og Jón Guðmundsson.

Upprifjun

• Sigbjörn Kjartansson gerði grein fyrir vinnu að gildandi aðalskipulagi sem unnið var í kjölfar sameiningar sveitarfélaga. Þá var mikið fjallað um íbúaþróun. Samgöngur voru fyrirferðarmiklar, hvort sem það voru vegasamgöngur, flug eða hafnaraðstæður og innsigling. Í upphafi vinnunnar þurfti að vinna upp gagna- og kortagrunna. Áherslur í vinnunni fólust í almennri ástandsskráningu, hringveg 1, námur, landslag og umhverfi, menningarminjar, hafnaraðstæður, flugvöll, flokkun gatna á Höfn og unnið miðbæjarskipulag á Höfn.
  
• Hann lagði til að fundurinn snerist fyrst og fremst um hvernig aðalskipulagið hafi reynst í praxís og hvernig það hafi verið notað, hverju hafi þurft að breyta, vonbrigði eða mistök í skipulagsferlinu og síðan nýja hluti sem hafa þróast sem skipulagið hafi gert ráð fyrir, s.s. Vatnajökulsþjóðgarð, Nýheima og þróun í hefðbundnum atvinnugreinum. Þá fór hann yfir hugmyndir sínar um markmið endurskoðunar á aðalskipulagi og ræða um þær hugsjónir, sýnir og stefnumál um framtíð byggðarinnar. Aðalskipulag væri í raun pólitísk yfirlýsing.
  
• Sigurbjörn fór í kjölfarið ítarlega í forsendur gildandi aðalskipulags. Sagði hann til dæmis að ákveðinnar tortryggni hafi gætt í garð aðalskipulagsins og raddir uppi að valdið yrði allt flutt til Hafnar. Sagði hann frá umræðum um þjóðveg um Almannaskarð, Öræfi, Hornafjarðarfljót og í Lóni. Gerði hann grein fyrir umræðum um hvert þessara svæða við gerð gildandi skipulags. Einnig ræddi hann um þverbraut og stækkun fyrir Hornafjarðarflugvöll. Umræður urðu nokkrar um hafnarmannvirki og rætt um nýjan ós og Faxeyrarhöfn.
  
• Sigurbjörn fór einnig yfir umhverfismál og í kjölfarið skapaðist mikil umræða um flokkun sorps og hvernig hægt sé að minnka magn sorp til urðunar. Hverfisverndarákvæði gekk skemur en ráðgjafi lagði til og einkum vegna þess að áhyggjur voru um að svigrúm bænda yrði þá takmarkað til þróunar búskapar á jörðum sínum. Talaði hann um að þessa umræðu væri gaman að tala um í tengslum við uppbyggingu þjóðgarðsins.
  
• Hann ræddi sérstaklega gatnakerfi bæjarins. Ræddi um hugmyndir að finna nýjar leiðir fyrir þungaumferð um bæinn og ræddi um "hringinn" sem byggja ætti þjónustu og verslun í kringum. Einnig að skipuleggja íbúðabyggð í kringum þessa miðju. Sigurbjörn kynnti skipulagsuppdrætti sem unnir voru í tengslum við vinnuna á sínum tíma.
  
• Sigurbjörn talaði um að mikilvægt væri að setja markmið í gerð skipulags en ekki eingöngu að lýsa ástandi. Samfélagið ætti að nota skipulagið til að setja sér fyrir um lífshætti og þróun á svæðinu.
  
• Sigurbjörn lýsti þeirri skoðun sinni að fásinna væri að staðsetja Gestastofu Vatnajökulsþjóðgarðs á Stekkanesi. Það hlyti að vera markmið að styrkja byggðina og bæjarmyndina á Höfn.
  
• Rætt var nokkuð um ný vegstæði í Öræfum, á Kolgrímu, yfir Hornafjarðarfljót og í Lóni.
  
• Í kjölfarið á upprifjun fór af stað umræða um hvernig aðalskipulagið hafi verið notað hingað til. Hvort það hafi verið það leiðarljós sem stefnt var að. Sigurbjörn sagði að aðalskipulag væri jafnvel oft flókið og ferlið við breytingar og stefnumörkun væri þungt í vöfum.

Lifandi stefnumótun

Fundarmenn ræddu um að aðalskipulagið hafi reynst gott leiðarljós í vegamálum en í þéttbýlinu hefði þróuninni orðið önnur en spáð var á sínum tíma. Breytingar á atvinnuháttum og íbúaþróun á tímabili aðalskipulagsins hafa orðið með öðrum hætti en gert var ráð fyrir.
Rætt var um aðferðir við endurskoðun, t.d. skipulagsþing, samráðsfundi með íbúum, vefsíðu til að fólk geti fylgst með framvindu mála og útgáfu aðalskipulags.

Lóðamál
Árni Kjartansson sagði að þegar hann kom til starfa á Hornafirði árið 1980 að þá hafi verið unnið út frá því að Höfn yrði 5000 manna bær. Í framhaldinu ræddi hann um þá þróun sem hafi átt sér stað síðustu ár og hvaða kostir væru í lóðamálum.
Í kjölfarið skapaðist umræða um þéttingu byggðar en einnig að mikilvægt væri að fullklára skipulag á Leirum.

Ferlið
Rætt um hvernig best væri að nálgast vinnu að endurskoðun aðalskipulags. Rætt um að vinna þurfi náið með þeim sem vinna að gerð verndaráætlunar fyrir þjóðgarðinn. Sérstaklega þarf að taka mið af þeirri vinnu varðandi endurskoðun á aðalskipulagi í dreifbýlinu. Í þéttbýlinu þarf sérstaklega að ræða lóðamál, hafnaraðstæður, uppbyggingu svæðisins við Hafnarvík og Heppu, uppbyggingu Hafnar sem útivistarsvæðis. Fyrir allt svæðið þarf að fjalla um íbúaþróun, breytingar á atvinnuháttum og samfélagsþróun til framtíðar og hvernig búið er í haginn fyrir komandi kynslóðir.