Niðurstaða vinnustaðagreiningar Sveitarfélagsins Hornafjarðar
Í desember 2007 var hafist handa við að greina vinnuumhverfi starfsmanna Sveitarfélagsins Hornafjarðar, samskipti á vinnustað, aðbúnað, möguleika til starfsþróunar, hollustu starfsmanna við vinnustaðinn og jafnréttismál. Greining sem þessi er forsenda að hægt sé að taka upp árangursstjórnun í starfsmannamálum í sveitarfélaginu og þannig að efla Sveitarfélagið Hornafjörð sem vinnuveitanda. Í desember og janúar var spurningalisti hannaður og bakgrunnsbreytur valdar. Haft var samráð við forstöðumenn og trúnaðarmenn í stofnunum sveitarfélagsins um gerð spurningalistans.
Í janúar var tilgangur spurningalistans og markmið kynnt fyrir stjórnendum. Jafnframt var tilkynning send til Persónuverndar um spurningakönnunina, skv. lögum um persónuvernd nr. 77/2000. Í febrúar var spurningalistinn sendur út til allra stofnana og svörun var góð. Jón Kristján Rögnvaldsson, félagsmálastjóri, og Hjalti Þór Vignisson, bæjarstjóri, hafa haldið utan um vinnuna og séð um úrvinnslu á spurningakönnuninni.
Helstu niðurstöður eru þær að 87% starfsmanna sveitarfélagsins eru í heildina ánægðir í starfi hjá sveitarfélaginu. Einnig er jákvætt að samskipti starfsmanna og yfirmanna eru almennt góð og sama má segja um samskipti á milli starfsmanna. Könnunin leiðir í ljós að úrbóta er þörf í vinnuverndarmálum, jafnréttismál þurfa að komast framar á dagskrá í starfsmannamálum og sí- og endurmenntun starfsmanna þarf að taka fastari tökum. Athygli vekur að nokkur hluti svarenda, einkum þeir sem unnið hafa hjá sveitarfélaginu í 6 ? 10 ár, hugsar um að hætta í starfi. Leitast verður sérstaklega við að greina hvað valdi þessu viðhorfi og jafnframt leita lausna.
Niðurstöður vinnustaðagreiningar verða notaðar til að endurbæta starfsmannastefnu sveitarfélagsins. Á grunni þessarar greiningar verða sett skýrari markmið um hvernig Sveitarfélagið Hornafjörður getur bætt sig sem vinnuveitandi. Stefnt er að því að endurbætt starfsmannastefna liggi fyrir í ágúst nk. Sambærileg könnun og þessi sem nú liggur fyrir verður framkvæmd eftir tvö ár.
Vinnustaðagreining 11.apríl 2008 (pdf)
Hornafjörður, 11. apríl
Hjalti Þór Vignisson
Skrifa athugasemd