Fundargerð bæjarráðs 507

 507. fundur

Fundur haldinn í bæjarráði Hornafjarðar í ráðhúsi mánudaginn 12. júlí 2010 kl. 16:00.

Mætt voru: Reynir Arnarson formaður, Ásgerður K. Gylfadóttir, Björn Ingi Jónsson og Árni Rúnar Þorvaldsson sem áheyrnarfulltrúi. Einnig Hjalti Þór Vignisson bæjarstjóri.

1. Fundargerðir

Atvinnu- og menningarmálanefnd, 1. fundur 29. júní 2010.

Björn Ingi spurðist fyrir um tillögu þess efnis að starfsmenn tilnefni fulltrúa á fundum nefndarinnar.  Upplýst að bæjarstjórn þurfi á endanum að taka afstöðu til þess við frágang erindisbréfa hvort þessi tillaga verði samþykkt.

Hjalti lagði fram fréttatilkynningu um gerð markaðs- og kynningaráætlunar.  Bæjarstjóra falið að senda hana á fjölmiðla á staðnum.

Árni Rúnar Þorvaldsson fór yfir verkefni nefndarinnar og ræddi um svæðisbundið menningarsamstarf.  Sagði að fyrri bæjarstjórn hafi mótað ákveðna stefnu en taldi mikilvægt ný að atvinnu- og menningarmálanefnd fjallaði um þetta mál. Árni lagði fram eftirtalda tillögu ásamt greinargerð:

Bæjarráð samþykkir að fela atvinnu – og menningarmálanefnd að meta þá kosti sem standa sveitarfélaginu til boða í svæðisbundnu menningarsamstarfi. Að því mati loknu mótar atvinnu – og menningarmálanefnd tillögur til bæjarstjórnar um aðkomu sveitarfélagsins að slíku samstarfi. Tillögur nefndarinnar skulu liggja fyrir á fundi bæjarstjórnar í september 2010.

Hjalti upplýsti að rætt hafi verið um málið við þingmenn kjördæmisins, ráðherra og þá sem koma að menningarmálum á Suðurlandi og Austurlandi.  Einnig sagði Hjalti að ljúka þyrfti þessari vinnu ekki síðar en í byrjun september því erindi frá sveitarfélaginu til fjárlaganefndar þurfi að berast ekki síðar en 15. september.

Bæjarráð vísar tillögunni til atvinnu- og menningarmálanefndar.

Hjalti upplýsti jafnframt að skrifað hafi verið undir samning við Vatnajökulsþjóðgarð um rekstur Jöklasýningar.

Fundargerð samþykkt.

• Stjórn Sambands ísl. sveitarfélaga, 775. fundur, 25. júní 2010.
  Björn Ingi ræddi hugmynd um breytingar hvað varðar launanefnd sveitarfélaga.
  Til kynningar

• HAUST, 91. fundur, 28. júní 2010.
  Til kynningar.

2. Skipurit sveitarfélagsins

Hjalti gerði grein fyrir viðræðum við starfsfólk og lýsti þeirri skoðun sinni að nýr yfirmaður umhverfis- og skipulagsmála ætti að vera millistjórnandi, undirmaður nýs framkvæmdastjóra fjármála, stjórnsýslu og framkvæmda.

Bæjarráð samþykkir framlagða tillögu.

3.  Málefni  Jökulsárlóns

Hjalti gerði grein fyrir viðræðum við aðila málsins.  Bæjarráð samþykkti eftirfarandi bókun:

Í ljósi þess ágreinings sem upp er kominn á milli Landeigendafélagsins Fells annars vegar og rekstraraðila við Jökulsárlón hins vegar vill Bæjarráð Hornafjarðar undirstrika mikilvægi þess að sátt náist um framtíðaruppbyggingu við Jökulsárlón.

Samfélagið við rætur Vatnajökuls hefur tekið miklum breytingum á síðustu árum og áratugum.  Hefðbundinn búskapur hefur átt á brattan að sækja og nýsköpun til sveita hefur fyrst og fremst verið á sviði ferðaþjónustu.  Jökulsárlón er eitt af höfuðdjásnum íslenskrar náttúru og dregur að tugi þúsunda gesta árlega.  Lónið og umhverfi þess eru hornsteinn þeirra miklu framfara sem orðið hafa í ferðaþjónustu á Suðausturlandi ásamt þjóðgarðinum í Skaftafelli.  Á síðustu árum hafa Öræfasveit og Suðursveit skipað sér sess sem eitt vinsælasta svæði til útivistar og ferðalaga á Íslandi.

Bæjarráð Hornafjarðar er meðvitað um þann ágreining sem hefur ríkt í málefnum Jökulsárlóns og þykir miður ef því ferli, sem landeigendur við Jökulsárlón og rekstraraðili hófu saman með sveitarfélaginu um gerð deiliskipulags fyrir lónið, sé nú teflt í tvísýnu.  Það er skoðun bæjarráðs að slíkt skipulag geti orðið grundvöllur fyrir sameiginlegri sýn um framtíðaruppbyggingu og fyrirtækjarekstur við Jökulsárlón.  Í þessu eru fólgnir miklir hagsmunir fyrir landeigendur vegna þeirra fjölbreyttu atvinnumöguleika sem þarna leynast, til dæmis á sviði jökla- og fjallaferðaþjónustu, gönguferða og sölu á ýmsum varningi og þjónustu til þeirra tugþúsunda gesta sem sækja svæðið heim ár hvert.  Hagsmunirnir eru þó ekki síst fólgnir í enn kröftugri samfélagsþróun á Suðausturlandi.  Á næstu árum er stefnt að því að fjölga ferðamönnun til Íslands yfir veturinn umtalsvert.  Það dylst engum að Jökulsárlón og umhverfi þess getur reynst samfélaginu í heild mikilvægt í þessari þróun. 

Ríkir almannahagsmunir eru því til staðar þegar teknar eru ákvarðanir um framtíðar uppbyggingu og starfsemi við Jökulsárlón. 

Á síðustu dögum og vikum hafa starfsmenn Sveitarfélagsins Hornafjarðar verið í sambandi við arkitekta um að ljúka gerð deiliskipulags við Jökulsárlón í samráði við alla hlutaðeigandi sem allra fyrst.  Það er góð von að því ljúki núna seinni hluta sumars og fari í gegnum hið formlega ferli í nefndum sveitarfélagsins og Skipulagsstofnun snemma í haust.  Það ætti því ekkert að vera að vanbúnaði að hefja uppbyggingu á grundvelli deiliskipulagsins árið 2011.

4.  Jöfnunarsjóður sveitarfélag

Hjalti gerði grein fyrir viðræðum við starfsmen í samgöngu- og sveitarstjórnarráðuneytinu um jöfnunarsjóðinn.  Þá upplýsti hann um vinnu að gerð fjármálareglna fyrir sveitarfélög þar sem reistar verði skorður við skuldsetningu þeirra.

5. Yfirfærsla málefna fatlaðra frá ríki til sveitarfélaga

Rætt um samkomulag á milli ríkis og sveitarfélaga sem undirritað var þann 6. júlí 2010.  Hjalti gerði grein fyrir samtölum við embættismenn í félags- og tryggingaráðuneytinu um yfirfærsluna.  Bæjarráð samþykkir að ítreka fyrra bréf um ósk um að Sveitarfélagið Hornafjörður verði skilgreint sem sérstakt þjónustusvæði.

6.  Uppbygging ferðaþjónustu á Höfn

Vísað til umhverfis- og skipulagsnefndar og hafnarstjórnar.

7. Endurskoðun hjá Sveitarfélaginu Hornfirði

Bæjarstjóri upplýsti um samning við KPMG.  Bæjarráð vísar ráðningarbréfi til afgreiðslu bæjarstjórnar.

8. Málefni Fræðaseturs Háskóla Íslands á Hornafirði

Lagt fram minnisblað dags. 6. júlí 2010 um fjármál setursins.  Kom fram að tekjur setursins hafa skerst mikið undanfarið ár.  Bæjarstjóri velti upp hugmyndum um verkefni sem sveitarfélagið þarf að láta vinna og fræðasetrið geti tekið að sér.  Bæjarstjóra falið að vinna áfram á þeim nótum sem kynnt er í minnisblaðinu.

9. Samstarf um atvinnuþróun

Hjalti gerði grein fyrir samtali og vinnu við að meta þá kosti sem Hornfirðingum standa til boða í samvinnu við önnur sveitarfélög í atvinnuþróunarmálum.  Kom fram að óvissa ríkir um framtíðarskipulag á þessum málum. 

Bæjarstjóra falið að afla frekari upplýsinga um þessi mál, m.a. að taka saman greinargerð um atvinnu- og rannsóknasjóð.

10. Ósk um umsögn á útgáfu rekstrarleyfis fyrir Hafnarnes - nýr rekstraraðili

Bæjarráð gerir ekki athugasemdir.

11.  Fasteignamat á Hornafirði

Árni Rúnar Þorvaldsson lagði fram eftirfarandi spurningar:

1. Hver mun hækkun tekna sveitarfélagsins verða miðað við 5.5% hækkun fasteignamats í sveitarfélaginu árið 2011?

2. Eru framlög úr Jöfnunarsjóði sveitarfélaga tengd álagningu fasteignaskatts?

3. Í ljósi umræðu um hækkun álagningar fasteignaskatts, þar sem fasteignamat lækkar, vaknar sú spurning hvort svigrúm er staðar hjá þeim sveitarfélögum, þar sem fasteignamat hækkar, til að lækka álagningu fasteignaskatts?

Eftirfarandi er svar bæjarstjóra:

1. Hver mun hækkun tekna sveitarfélagsins verða miðað við 5.5% hækkun fasteignamats í sveitarfélaginu árið 2011?

Samkvæmt lögum um tekjustofna sveitarfélaga nr.  4/1995 skulu sveitarfélög leggja skatt á allar fasteignir.  Skatturinn skiptist í þrennt. 

A   Íbúðir, íbúðarhús ásamt lóðarréttindum, sveitabæir, útihús og önnur mannvirki tengt landbúnaði, öll hlunnindi og sumarbústaðir ásamt lóðarréttindum (hámark 0,5% að f.mati).

B Sjúkrastofnanir samkvæmt lögum um heilbrigðisþjónustu, skólar, heimavistir, leikskólar, íþróttahús og bókasöfn (hámark 1,32% að f.mati).

C  Allar aðrar fasteignir, s.s. iðnaðar-, skrifstofu- og verslunarhúsnæði, fiskeldismannvirki, veiðihús og mannvirki sem nýtt eru fyrir ferðaþjónustu (hámark 1,32% af f.mati)

Undanþegið fasteignaskatti eru:

• kirkjur og bænahús íslensku þjóðkirkjunnar og annarra trúfélaga sem hlotið hafa skráningu dóms- og kirkjumálaráðuneytis;
• safnahús, að því leyti sem þau eru ekki rekin í ágóðaskyni;
• hús erlendra ríkja, að svo miklu leyti sem þau eru notuð af sendimönnum þeirra í milliríkjaerindum, og hús alþjóðastofnana, eftir því sem kveðið er á um í alþjóðasamningum sem Ísland er aðili að og öðlast hafa stjórnskipulegt gildi hér á landi.

Tafla 1. Tekjur sveitarfélagsins Hornafjarðar af fasteignagjöldum og jöfnunarsjóði 2003-2009

• Nýverið var kynnt 5,5 % hækkun á fasteignamati og 3,5% hækkun á lóðarmati fyrir Sveitarfélagið Hornafjörð á sama tíma og fasteignamatið lækkaði talsvert á mörgum öðrum svæðum.  Að jafnaði lækkar það um 8,6% yfir landið og lóðamatið um 8,7%.  Mest er lækkunin á SV horninu, víða um og yfir 10%.
• Við þetta hækkar hreinlega tekjur sveitarsjóðs vegna fasteignagjalda um 5,5% eða um 5,6 m.kr. miðað við tekjur ársins 2009.

2. Eru framlög úr Jöfnunarsjóði sveitarfélaga tengd álagningu fasteignaskatts?

Auk fasteignaskatts fá sveitarfélög greitt úr jöfnunarsjóði sveitarfélaga skv. sömu lögum vegna jöfnunar tekjutaps einstakra sveitarfélaga vegna lækkunar fasteignaskattstekna í kjölfar breytingar á álagningarstofni mannvirkja.  Í  reglugerð er þetta útfært nánar en í stuttu máli má draga eftirfarandi aðalatriði fram hvað þetta varðar:

• Framlagið í þennan hluta jöfnunarsjóðs er allt að 30% af tekjum jöfnunarsjóðs sem fæst með innheimtum á þeim 2,12% sem falla til jöfnunarsjóðs af skatttekjum ríkisins.
• Til grundvallar er lagt fasteignamat í Reykjavík árið 2000 þegar þessu regluverki var breytt í meginatriðum. 
• Til þess að jafna að fullu tekjur sveitarfélaga vegna álagningu fasteignaskatts þá þyrfti að veita 4,5 miljörðum króna í jöfnunarsjóð sveitarfélaga þannig að hægt væri að tala um að öll sveitarfélög fengju jafn mikið. 
• Raunin er hins vegar sú að um 2,5 miljörðum hefur verið veitt í þennan hluta jöfnunarsjóðs og sú upphæð skerðist með minnkandi tekjum sjóðsins. 
• Hvað varðar breytingar á framlögum úr jöfnunarsjóði vegna hækkandi fasteignamats á Hornafirði er eingöngu hægt að segja að mjög ólíklegt er að það þýði sjálfkrafa 5,5% lækkun á framlagi jöfnunarsjóðs.  Rökin eru þau að þrátt fyrir að fasteignamat lækki mikið á SV horninu er ennþá langt í land til að „full jöfnun“ eigi sér stað.  Bilið á milli fjárþarfar á landsbyggðinni og SV hornsins er því enn til staðar.  Samt sem áður er líklegt að tekjur Sveitarfélagsins Hornafjarðar skerðist eitthvað þar sem í mörgum sveitarfélögum á landsbyggðinni lækkar fasteignamat á meðan það hækkar á Hornafirði.

3. Í ljósi umræðu um hækkun álagningar fasteignaskatts, þar sem fasteignamat lækkar, vaknar sú spurning hvort svigrúm er staðar hjá þeim sveitarfélögum, þar sem fasteignamat hækkar, til að lækka álagningu fasteignaskatts?

• 5,5% hækkun á fasteignamati þýðir í raun um 5,6 m.kr. tekjuaukningu fyrir sveitarsjóðs.  Gera verður ráð fyrir að framlög úr jöfnunarsjóði lækki eitthvað þannig að hrein tekjuaukning gæti numið á bilinu 1-4 m.kr.
• Hafa verður í huga að á SV horninu varð mikil tekjuaukning hjá sveitarfélögum vegna launaþróunar og hærra fasteignamats á síðustu árum.  Sveitarfélög á landsbyggðinni fylgdu ekki með í þeirri þróun nema að litlu leyti.  Staðreyndin er líka sú að ennþá er fasteignaverð talsvert mikið hærra á SV horninu en á Hornafirði. 
• Fjárhagsáætlunargerð fyrir árið 2011 er háð óvissu, m.a. með framlög jöfnunarsjóðs, útgjaldaþörf vegna reksturs sveitarfélags og fjárlagagerðar sem gæti haft áhrif á rekstur opinberrar starfsemi á Hornafirði.
• Að ofansögðu getur undirritaður ekki á þessu stigi metið hvort svigrúm er til lækkunar álagningar fasteignaskatts. 

12. Samningur um raforkusölu til gervigrasvallar

Bæjarstjóra falið að óska eftir fundi með forstjóra RARIK þar sem farið verði yfir húshitunarmál á Hornafirði.

13. Kostnaður og styrkir framboða vegna sveitarstjórnarkosninga 2010

Árni Rúnar Þorvaldsson lagði fram eftirfarandi tillögu ásamt greinargerð:

Bæjarráð beinir þeim tilmælum til þeirra flokka, sem buðu fram til bæjarstjórnar í Sveitarfélaginu Hornafirði sl. vor, að þeir leggi fram upplýsingar um heildarkostnað og styrki (t.d. bein fjárframlög einstaklinga og lögaðila, afslættir af leigu kosningamiðstöðva, aðrir afslættir og annað sem talist getur styrkur) vegna framboða sinna.

Bæjarráð samþykkir framlagða tillögu.

14. Löggæslumál á Hornafirði

Hjalti gerði grein fyrir samtölum sem hann átti um skipan löggæslumála og embætti sýslumanna á Íslandi.  Bæjarstjóra falið að óska eftir fundi með dómsmálaráðherra um málið.

15.  Innsend erindi

· EBÍ, tölvubréf dags. 24. júní 2010, varðar, ágóðahlutagreiðslu til sveitarfélaga.

Ásgerður lagði til að á næstu árum myndi ágóðahlutagreiðslur frá EBÍ renna til endurnýjunar á tækjabúnaði slökkviliðsins.  Samþykkt að vísa til fjárhagsáætlunargerðar árið 2011.

· Mennta- og menningarmálaráðuneytið, bréf dags. 25. júní 2010, greiðslur úr Námsgagnasjóði.

Vísað til skólaskrifstofu.

· Samgöngu- og sveitarstjórnaráðuneytið, bréf dags. 25. júní 2010, aukaframlag úr Jöfnunarsjóði 2010.

Til kynningar.

· HAUST, tölvubréf dags. 28. júní 2010, aðalskoðun leiksvæða – öryggi barna.

Ásgerður lagði fram tillögu um að gerð yrði viðhalds- og umhirðuáætlun fyrir öll leiksvæði í sveitarfélaginu.  Tækni- og umhverfissviði falið að vinna þessa áætlun.

· Samband ísl. sveitarfélaga, bréf dags. 29.06.2010, innheimta STEF gjald hjá sveitarfélögum.

Til kynningar.

· Samgöngu- og sveitarstjórnaráðuneytið, Jöfnunarsjóður,  bréf dags. 28. júní 2010, úthlutun framlaga.

Til kynningar.

· Lánasjóður sveitarfélaga, bréf dags. 5. júlí 2010, niðurfærsla eigin fjár 2010.

Til kynningar.

16.    Önnur mál

• Hjalti upplýsti um umræður um framtíð kaffiteríu í Nýheimum
• Hjalti gerði grein fyrir að þrír hafi sótt um starf tómstundafulltrúa. Bæjarstjóra falið að ræða við umsækjendur.
• Hjalti gerði grein fyrir umsóknum í starf yfirmanns umhverfis og skipulagsmála.  Bæjarstjóra falið að vinna að úrlausn málsins í samvinnu við Capacent og leggja síðan tillögu fyrir bæjarráð til endanlegrar afgreiðslu.
• Björn Ingi benti á að í miklum rigningum fljóti yfir nýja göngustíginn á nokkrum stöðum.  Hafði hann áhyggjur af hættum sem gæti skapast í vetur þegar svell myndist og valdi slysum.  Ásgerður benti líka á að illgresi væri að farið að myndast á göngustígnum.  Þá var bent á að ruslatunnur vantaði við göngustíginn.  Björn Ingi ræddi um lögreglusamþykkt og endurskoða þurfi hana m.a. með tilliti til aksturs vélhjóla á göngustígum.  Tækni- og umhverfissviði falið að fara yfir ofangreind mál.

Fleira ekki gert og fundi slitið kl. 18.10