Fundargerð bæjarráðs 485

485. fundur

Fundur haldinn í bæjarráði Hornafjarðar í Ráðhúsi mánudaginn 23. nóvember  2009 kl.16:10.

Mættir voru: Árni Þorvaldsson, formaður, Reynir Arnarson og Björn Ingi Jónsson.

Einnig: Hjalti Þór Vignisson bæjarstjóri og Haukur Ingi Einarsson framkvæmdastjóri tækni- og umhverfissviðs.

1.      Fundargerðir

·        Hafnarstjórn 119. fundur, 19. nóvember 2009.

Björn Ingi spurði um ályktun hafnarstjórnar um að hafa vigt og vigtarhús á sama stað.  Reynir upplýsti um afgreiðslu hafnarstjórnar og ástæður þess að hafa vigtina og húsið á núverandi stað.  Sagði Reynir að ekki þyrfti að endurnýja vigtarpall á allra næstu árum.

Björn Ingi spurði um björgunarlaun vegna v/s Axels.  Reynir og Hjalti upplýstu um umræður í hafnarstjórn og að óskað hafi verið eftir lögfræðiáliti.

Fundargerð samþykkt.

2.      Rekstrarstaða 31. október 2009

Gerð grein fyrir rekstrarstöðu 31. október sem er í samræmi við áætlanir.

3.      Fjárhagsáætlun

Lögð fram drög að fjárhagsáætlun 2010 í bæjarráði.  Samþykkt að afgreiða hana frá í bæjarráði í næstu viku.

Mikil umræða skapaðist um uppbyggingu á félagssvæði Hestamannafélagsins Hornfirðings, girðingar umhverfis félagssvæðið og hvernig best sé að standa að framkvæmdum.

Reynir lagði fram tilboð frá Gunnari Pálmi Péturssyni, dags. 17. nóvember 2009 vegna skiptitjalds í íþróttahúsinu.

4.      Yfirfærsla málefna fatlaðra frá ríki til sveitarfélaga

Farið yfir stöðu málsins.  Bent á eftirfarandi texta í viljayfirlýsingu sem ritað var undir á milli ríkisins og Sambands sveitarfélaga:

„Þjónustusvæði verða mynduð um rekstur þjónustu og er miðað við að þau hafi að lágmarki um átta þúsund íbúa.  Ráðherra getur þó í undantekningartilfellum veitt undanþágu frá þessu viðmiði á grundvelli landfræðilegra aðstæðna, enda hafi viðkomandi sveitarfélög sýnt fram á getu til að veita alhliða þjónustu.“

Bæjarráð Hornafjarðar leggur áherslu á að Sveitarfélagið Hornafjörður verði skilgreint sem sérstakt þjónustusvæði.  Ekki er séð hvaða ávinning þjónustuþegar á Hornafirði hafi með því að vera hluti af stærra þjónustusvæði.  Auk þess hefur Sveitarfélagið Hornafjörður sýnt fram á að veita megi góða þjónustu á hagkvæman og skilvirkan hátt þrátt fyrir að þjónustusvæði telji færri íbúa en viðmið í viljayfirlýsingu ríkis og sveitarfélaga gera ráð fyrir.

Bæjarráð vísar málinu til félagsmálaráðs til frekari umfjöllunar.

5.      Jarðhitaleit 

Haukur Ingi gerði grein fyrir viðræðum við framkvæmdastjóra Vatnajökulsþjóðgarðs, landeigendur í Öræfum og ráðgjafa um áframhaldandi jarðhitaleit í Öræfum og hugmyndum um virkjun jarðhitans í Skaftafelli.  Starfsmönnum falið að vinna áfram að undirbúningi virkjunar í Skaftafelli sem nýtist fyrir nærsvæðið.

Lögð fram tilboð um dýpkun á holum og borun á hitastigulsholum.  Samþykkt að taka tilboði Jarðborana í hitastigulsholur og dýpkun í H-14 frá Ræktunarsambandinu.

6.      Útboðsgögn vegna gervigrasvallar

Til kynningar.

7.      Drög að reglum um úthlutun styrkja menningar- og tómstundanefndar

Mikil umræða skapaðist um úthlutun styrkja frá sveitarfélaginu.  Rætt um að tengja styrki betur við rekstur og viðburði á vegum félagasamtaka en ekki eingöngu hefðbundið starf þeirra.  Bæjarráð vísar til menningar- og tómstundarnefndar að undirbúa úthlutun næsta árs með góðum fyrirvara með það fyrir augum að kalla eftir ítarlegri áætlunum um starfsemi og sérstök verkefni á vegum félagasamtaka.

Framlög drög samþykkt.

8.      Innsend erindi

·        Bjarni Sævar Geirsson, afrit svarbréfa til Fasteignaskrár ríkisins, dags. 10. október og 10. nóvember 2009, skráning mannvirkja á jörðinni Uppsalir.

Til kynningar.

·        Ungmennafélag Íslands, bréf dags. 10. nóvember 2009, áskoranir til sveitarfélaga um stuðning við íþrótta- og æskulýðsstarf  og yfirlýsing vegna uppbygginga  íþróttamannvirkja á landinu.

Til kynningar.

·        Mennta- og menningarmálaráðuneytið, bréf dags. 13. nóvember 2009, kynning á íslenskri málstefnu.

Til kynningar.

·        Jafnréttisráð, tölvubréf dags. 17. nóvember 2009, þema ársins  2010 “Samþætting fjölskyldu- og athafnalífs„.

Til kynningar.

·        Umhverfisnefnd Alþingis , tölvubréf dags. 19. nóvember 2009,  ósk um umsögn um  tillögu til þingsályktunar um náttúruverndaráætlun 2009–2013, 200.  mál:  http://www.althingi.is/altext/138/s/0224.html.

Til kynningar.

9.      Önnur mál

·         Lagt fram tilboð í tvær íbúðir sveitarfélagsins á Sandbakka.  Samþykkt að heimila bæjarstjóra að samþykkja tilboðin.

Fundi slitið kl. 19.55