Fundargerð svæðisráðs Vatnajökulsþjóðgarðs - Suðursvæði 12. fundur

12. fundur

Fundur var haldinn í svæðisráði suðursvæðis þriðjudaginn, 10. mars 2009 í Ráðhúsi á Höfn kl. 13:00.

Mætt voru:  Hjalti Þór Vignisson, Sigurlaug Gissurardóttir.  Skúli Skúlason var í síma.  Guðrún Ingimundardóttir og Björn Ingi Jónsson boðuðu forföll. Einnig: Regína Hreinsdóttir, þjóðgarðsvörður, Þórður Ólafsson, framkvæmdastjóri og Sigrún Inga Sigurgeirsdóttir, starfsmaður Háskólaseturs. 

 Gengið var til dagskrár:

1.             Rekstraráætlun

Þórður Ólafsson og Regína Hreinsdóttir gerðu grein fyrir rekstraráætlun þjóðgarðsins fyrir árið 2009.  Reksturinn byggir á sömu forsendum og árið 2008. Þá var bætt töluvert við landvarðarvikur í Skaftafelli.   Laun eru áætluð 35,6 m.kr., önnur gjöld alls 21,7 m.kr. eða alls 57,3 m.kr.  Sértekjur er áætlaðar 32,8 m.kr. og framlag ríkissjóðs til reksturs í Skaftafelli alls 24,5 m.kr.  Kom fram að um 60 m.kr. hafi farið í endurbætur í þjónustumiðstöð, skrifstofuhúsnæði og snyrtingum á Skaftafelli og jafnframt að meginþungi starfs sjálfboðaliða á vernduðum svæðum á Íslandi er í Skaftafelli.

 Sigurlaug lagði áherslu á að gestastofan í Skaftafelli yrði opinn allt árið. 

 2.       Veitingarekstur í Skaftafelli

Þórður Ólafsson fór yfir veitingarekstur í Skaftafelli og hugmyndir um að þjóðgarðurinn tæki yfir reksturinn.  Rökin fyrst og fremst þau að þannig fær þjóðgarðurinn vitneskju um tekjumöguleika og áttar sig betur á hvert sanngjarn leiguverð er.  Tók Regína undir þessi sjónarmið.

 Sigurlaug lagði áherslu á að ef þessi leið verði farinn megi rekstur þjóðgarðsins ekki undirbjóða samkeppnisaðila og að taka verði húsaleigu af rekstri veitingasölu.  Einnig að þetta yrði til þess að lengja opnunartíma þjóðgarðsins.  Var í framhaldi rætt um að þjóðgarðurinn væri nú þegar í samkeppnisrekstri, m.a. um rekstur tjaldsvæðis.  Kom fram að hugmyndin væri að þjóðgarðsvörður bæri ekki ábyrgð á veitingarekstri og hann yrði alveg aðskilinn í bókhaldi frá annarri starfsemi þjóðgarðsins.

 Svæðisráð leggur til að veitingareksturinn verði á könnu þjóðgarðsins í sumar en staðan endurskoðuð við lok árs.

 3.      Uppbygging á Heinabergssvæði

(Þorvarður Árnason kom á fundinn kl. 14.00).

Sigurlaug Gissurardóttir gerði grein fyrir helstu niðurstöðum þess hóps sem vann að tillögum um uppbyggingu á Heinabergssvæði.   Sagði hún að hópurinn hafi haft samband við aðila sem hafi hagsmuna að gæta á svæðinu t.d. vegna ferðamennsku, sauðfjárbeitar og veiðimennsku auk eldra fólks og annarra með þekkingu á svæðinu.   Gerð er tillaga um vegi inn á svæðið og bílastæði, aðstöðu á áningarstöðum, göngustígagerð, landvörslu, fræðslu, upplýsingaskilti, útsýnisskífur og bæklinga.  Var tekið fram að svæðið henti sérstaklega fyrir reiðhjól.  Rætt um að 4 miljónir króna væru áætlaðar til uppbyggingar á Heinabergssvæði á árinu 2009.

 Svæðisráðið óskar eftir að hugmyndirnar séu kostnaðarmetnar og sett upp verkáætlun um framkvæmdir.  Þegar áætlun er tilbúinn verði settur á fundur með helst hagsmunaaðilum og íbúum á nærsvæði.

 Að lokum þakkaði Hjalti fyrir vel unnar tillögur.

 4.       Verndaráætlun

Þorvarður og Sigrún Inga gerðu grein fyrir vinnu að verndaráætlun. Kom fram að ráðgjafar hittust allir á Kirkjubæjarklaustri fyrir fjórum vikum. Unnið er núna að grunnvinnu í kortagerð og söfnun upplýsinga.  Taldi Þorvarður að vinnu ætti að ljúka á tilsettum tíma.

 5.       Gestastofa

Hjalti fór yfir umræður í yfirstjórn um gestastofur og heildarstefnumótun fyrir þjóðgarðinn.

 6.       Deiliskipulag í Skaftafelli

Hjalti gerði grein fyrir umræðum um staðsetningu húsa heilsársstarfsmanna í Skaftafelli, uppbyggingu á vegum Íslenskra fjallaleiðsögumanna og uppbyggingu þjónustumiðstöðvar og tjaldsvæðis.  Svæðisráð leggur til að farið verði í heildar skipulagsvinnu fyrir Skaftafell og nærsvæði.

(Þorvarður og Þórður viku af fundi kl. 15.50).

 7.       Endurskoðun á aðalskipulagi Hornafjarðar

Svæðisráð gerði tillögu að texta í greinargerð fyrir aðalskipulag Hornafjarðar.

 8.       Önnur mál

Engin.

 Fundi slitið 16.10