Fundargerð svæðisráð Vatnajökulsþjóðgarðs – Suðursvæði 10. fundur

10. fundur

Fundur var haldinn í svæðisráði suðursvæðis fimmtudaginn, 30. október 2008 á Höfn í Hornafirði kl. 12:00.

Mætt voru:  Hjalti Þór Vignisson, Sigurlaug Gissurardóttir, Þorvarður Árnason, forstöðumaður Háskólaseturs og Sigrún Inga Sigurgeirsdóttir.  Skúli Skúlason, Hrafnhildur Hannesdóttir og Björn Ingi Jónsson voru í síma.

Gengið var til dagskrár:

1.      Samráðsfundur á Mývatni, haldinn 2. október 2008.

Sigurlaug lagði fram minnispunkta og gerði grein fyrir umræðum á fundinum.  Niðurstöður fundarins verða nýttar til vinnu að verndaráætlun.  Sigurlaug greindi frá því að fundarmenn hafi skipst í fjóra vinnuhópa sem fjölluðu um ferðaþjónustu í Vatnajökulsþjóðgarði; gönguleiðakerfi og útivist; verndun líffræðilegrar fjölbreytni og skipulag og aðgengi að svæðinu og jaðarsvæði þjóðgarðsins.  Kom fram hjá Þorvarði að fundurinn hafi skilað mikilvægum niðurstöðum.  Ræddu Sigurlaug og Þorvarður um að viðhorf til náttúruverndar og þjóðgarðsins eru ólík eftir svæðum.  Skúli sagði að fundurinn hafi verið góður og gagnlegur. 

Sigurlaug og Þorvarður lögðu áherslu á virkt samráð um gerð verndaráætlunar.

2.      Staða við gerð verndaráætlunar

Þorvarður lagði til að Sigrún Inga sæti fundi svæðisráðsins sem áheyrnarfulltrúi. Það var samþykkt.  Ræddi Þorvarður um vöktunarverkefni um áhrif þjóðgarðsins á nærsvæði hans sem kynnt verður á ráðstefnu um atvinnulíf og þjóðgarða 7. – 8. nóvember nk..  Þá gerði Þorvarður grein fyrir stöðu að vinnu að verndaráætlun.

3.      Heinabergssvæðið

Hjalti lagði til að einn fulltrúi úr svæðisráði og ráðgjafi myndu fá það hlutverk að gera tillögu að uppbyggingu svæðisins.  Svæðisráðið samþykkir að Sigurlaug Gissurardóttir verði fulltrúi svæðisráðs.  Svæðisráðið leggur ríka áherslu á mikið samráð við landeigendur í nágrenni við svæðið, ferðaþjónustuaðila, ferðafélagið og náttúruverndarsamtök.   

4.      Önnur mál.

·         Sigurlaug Gissurardóttir gerði NEED ráðstefnuna að umtalsefni.  Ræddi sérstaklega hugmyndir um upplýsingagjöf til ferðamanna í þjóðgörðum og að verja þurfi meiri fjármunum í þann þátt í starfsemi þjóðgarðsins í staðinn fyrir að byggja upp stórar og miklar gestastofur.  Hrafnhildur sagði í kjölfarið frá umræðu sem á sér stað meðal kollega hennar um þá miklu fjármuni sem fara í gestastofur.  Sagði hún að fólk hafi komið að máli við sig um að peningum yrði betur varið í að byggja upp aðstöðu innan garðsins sjálfs og til að auka fræðslu og þjónustu við gesti garðsins.