Fundargerð stjórnar HSSA 4

4. fundur

FUNDARGERÐ

Fundur haldinn í Stjórn Heilbrigðisstofnunar Suðausturlands miðvikudaginn 27.október 2010  kl. 16:15 í fundarsal Heilsugæslu

Mætt voru: Ásgeir Gunnarsson, Guðmundur Gunnarsson, Guðbjörg Garðarsdóttir, Guðrún Ása Jóhannsdóttir og Guðrún Ingimundardóttir.  Einnig: Guðrún Júlía Jónsdóttir, Hjalti Þór Vignisson, Ásgerður Gylfadóttir og Guðlaug Björgvinsdóttir.

1.    Fundargerðir 2 og 3. fundar lagðar fram til kynningar

Engar athugasemdir við fundargerðir 2 og 3 fundar.

2.    Greint frá fundum og vinnu, í framhaldi af fyrstu drögum fjárlaga ríkisins fyrir

árið 2011

Eftirfarandi gögn voru send út með fundarboði:

a)      Til minnis um samdrátt í framlagi til Heilbrigðisstofnunar Suðausturlands í fjárlagafrumvarpi 2011, HBR 14. október 2010

b)      Tillögur um samdrátt í rekstrargjöldum heilbrigðisstofnana, HBR ekki dagssett

c)      Forsendur fyrir samdrætti á sjúkrasviðum heilbrigðisstofnana, HBR ekki dagssett

d)      Minnisblað frá bæjarráði Hornafjarðar um niðurskurð á Heilbrigðisstofnun Suðausturlands, 11. okt. 2010.

Í fyrstu drögum að fjárlögum ársins 2011 er lagður til samdráttur í útgjöldum HSSA á heilsugæslu-, sjúkra- og hjúkrunarsviði. Fækka á sjúkrarýmum úr 4 í 3 og hjúkrunarrými verði 20.  Á árinu 2010 voru fjárheimildir HSSA á heilsugæslu-, sjúkra- og hjúkrunarsviði 386,4 millj. og tillagan er að lækka þær um 57,4 millj. eða í 329 millj.

 Hjalti og Ásgerður sögðu frá fundum bæjarráðs Hornafjarðar sem haldnir voru 13 og 14 okt. með þingmönnum Suðurlands, fjárlaganefnd og fjármálaráðherra. Komu því á framfæri að hér er ekki hægt að skera niður annað en grunnþjónustu ef mæta á öllum þeim niðurskurði sem boðaður er. Þingmenn suðurlands funda á Hornafirði 3. nóvember n.k.

Guðrún Júlía greindi frá fundi sem hún og Ester fóru á og var haldinn á Selfossi 11 okt. sl. með heilbrigðisráðherra, þingmönnum Suðurlands og sveitastjórnum á Suðurlandi. Þar fluttu framkvæmdastjórar heilbrigðisstofnana á Suðurlandi þ.e. frá Hornafirði, Selfossi, Keflavík, og Vestmannaeyjum framsöguerindi og greindu frá hvaða áhrif fyrirhugaður niðurskurður myndi hafa á heilbrigðisstofnanirnar. Á eftir framsögum svaraði heilbrigðisráðherra fyrirspurnum.

 Ásgerður og Guðrún Júlía sögðu frá fundi sem þær ásamt Ester, áttu í heilbrigðisráðuneytinu 19. október sl., en boðað var til fundar með framkvæmdastjórnum heilbrigðisstofnana í Heilbrigðisumdæmi Suðurlands, þ.e. framkvæmdastjórnum heilbrigðisstofnana í Vestmannaeyjum, Selfossi og Hornafirði.  Þegar til kom var fundað með hverri framkvæmdastjórn fyrir sig, fundirnir byggðust upp á því að framkvæmdastjórnirnar sátu fyrir svörum 5 starfsmanna úr heilbrigðis- og félagsmálaráðuneytinu. Þeir starfsmenn sem sátu fundinn fyrir hönd ráðuneytanna voru Anna Sigríður Baldursdóttir aðstoðarmaður ráðherra, Hrönn Ottósdóttir skrifstofustjóri, Jón Baldursson læknir, Sveinn Magnússon yfirlæknir og Vilborg Ingólfsdóttir skrifstofustjóri.

 Hjalti, Ásgerður og Guðrún Júlía greindu frá fundum sem haldnir hafa verið með starfmönnum HSSA og stjórn félags eldri borgara. Farið var yfir minnisblað bæjarráðs Hornafjarðar um niðurskurðinn á Heilbrigðisstofnun Suðausturlands.

 Stjórn HSSA hafnar alfarið þeim mikla niðurskurði sem stjórnvöld boða á fjárlögum 2011 til Heilbrigðisstofnunar Suðausturlands, með honum er vegið alvarlega að grunnþjónustu í heilbrigðisþjónustu í sveitarfélaginu Hornafirði. Það er einkennilegt að ríkisstjórn sem kennir sig við norrænu velferðarsamfélögin skuli leggja til svo mikinn niðurskurð á litla stofnun. Í upphafi á niðurskurðarferli ríkisstjórnarinnar var talað um að standa vörð um grunnþjónustu heilbrigðiskerfisins. Ölum má vera ljóst að með þessum tillögum er skorið langt umfram þolmörk stofnunarinnar til að halda uppi þeirri grunnþjónustu sem hún á að sinna. Stjórn Heilbrigðisstofnunarinnar ítrekar að íbúar í sveitarfélaginu Hornafirði búa við landfræðilega einangrun og vegalengdir í næstu heilbrigðisþjónustu eru aldrei undir 300 km. Í ljósi þeirrar staðreyndar er með öllu óásættanlegt fyrir íbúa svæðisins að búa við það óöryggi að hafa ekki tryggt aðgengi að grunnþjónustu í nærumhverfi. Stjórn Heilbrigðisstofnunnar Suðausturlands skorar á heilbrigðisráðherra og þingmenn að endurskoða fjárveitingu til stofnunarinnar þannig að grunnþjónustu í heilbrigðismálum á Hornafirði verði ekki ógnað.

 3.    Stefnumótun HSSA

Formaður leggur til að því verði frestað að fara í stefnumótun HSSA þar til fjárlög 2011 liggja fyrir og var það samþykkt.

 4.    Fyrirspurnum svarað sem komu fram á 2. fundi stjórnar HSSA

Hjalti Þór fór yfir að forsendur eru breyttar í samningaviðræðum við ríkið og mikil óvissa vegna fjárlaga 2011. Líklegt er að málefni aldraðra verði flutt yfir til sveitarfélaganna árið 2012.

 5.    Önnur mál

a)      Rekstrarleiga á 2 bílum fyrir heimahjúkrun er runnin út. Stendur HSSA til boða að leigja bílana áfram eða kaupa. Leggur Guðrún Júlía til að annar bíllinn sé keyptur en hinum skilað. Samþykkt.

 Fundi slitið kl: 17.11