Fundargerð heilbrigðis- og öldrunarráðs 82

82. fundur

Fundur haldinn í Heilbrigðis- og öldrunarráði Hornafjarðar fimmtudaginn 10. maí 2007  kl. 12:00 í fundarsal ráðhúss.

Mætt voru: Árni R. Þorvaldsson, Ásgeir Gunnarsson, Björk Pálsdóttir, Aðalsteinn Ingólfsson og Guðrún Ingimundardóttir. Einnig: Guðrún Júlía Jónsdóttir, Jóhanna Kristjánsdóttir, Ester Þorvaldsdóttir, Sigríður Lárusdóttir og Hjalti Þór Vignisson.

 1. Þjónustusamningur við Heilbrigðis- og tryggingaráðuneytið.

Hjalti fór yfir nýjustu drögin að þjónustusamningi.

 Björk Pálsdóttir lagði fram eftirfarandi bókun:

Ég get ekki gefið samþykki mitt fyrir því að þjónustusamningur við heilbrigðisráðuneytið verði undirritaður á morgun föstudaginn 11. maí. Ég hef setið í samninganefndinni ásamt Árna Rúnari Þorvaldssyni formanni, Ásgeiri Gunnarssyni og Guðrúnu Júlíu Jónsdóttur og við erum í miðjum klíðum að vinna í samningsdrögunum að bæta því við sem okkur finnst upp á vanta, þegar skyndilega er tímabært af hálfu  formanns HÖR að skrifa undir samninginn. Þetta þykja mér undarleg vinnubrögð. Á fundi samningsnefndarinnar fimmtudaginn 3. maí vorum við að vinna í nýjustu drögum. Þau drög voru unnin í samráði við starfsfólk stofnunarinnar og almenn sátt ríkti um þau og vildi formaður senda þau strax til ráðuneytisins. Við hin vildum hinsvegar lesa yfir drögin og bæta við þeim tölum sem vantaði inn í, einnig átti eftir að klára nokkur fylgiskjöl. Þann 8. maí er annað hljóð komið í Árna Rúnar formann. Á HÖR fundi þann dag óskaði Árni Rúnar eftir umboði til þess að skrifa undir viljayfirlýsingu við ráðuneytið þess efnis að vinnan við þessa samningsgerð myndi halda áfram að kosningum loknum. Það var samþykkt samhljóða enda allir á því að vinna haldi áfram í þessum drögum sem verið var að vinna i. Eftir þann fund var fyrirhugað að samningsnefndin settist niður og kláraði þá vinnu sem eftir var í samningsgerðinni og senda þau til ráðuneytisins. Á þeim fundi fer Árni Rúnar að tala um að samninginn ættum við að samþykkja án þess að bæta inn síðustu breytingum sem komu frá starfsmönnum HSSA. Þessu var ég ekki sammála og vildi að við héldum áfram þeirri vinnu sem sátt virtist vera um á fundinum 3. maí. Það var svo í gær sem ág fæ fundarboð um það að aukafudnur skyldi haldinn í HÖR í dag fimmtudag 10. maí til að fjalla um þjónustusamninginn. Ekki var boðað til fundar í samningsnefndinni fyrir fundinn í dag og upplýsingar um það að skrifa ætti undir fékk ég ekki fyrr en ég hringdi í Árna sainnipartinn í gær. Ég get því ekki séð annað en að formaður telji sig ráða þessum hlutum einn þar sem samningsnefndin fær ekkert að tjá sig um þetta mál og átta ég mig ekki á til hvaða verka samningsnefndin hefur verið skipuð. Ég tel að við eigum ekki að gefa eftir þó að ráðuneytið þrýsti á okkur núna fimm mínútur í kosningar við eigum fyrst og fremst að hugsa um hag allra íbúa hér, til þeirra verka erum við kosin og vinna markvisst að því að ná fram samningi sem góð sátt ríkir um og að við sjáum fram á að rekstrarmöguleikar HSSA verði raunhæfir en útlit er fyrir að endar muni ekki nást saman, þrátt fyrir að farið hafi fram hagræðingar í rekstri. Mikilvægt er að tiltaka í samningnum sem þessum alla þá þætti sem HSSA ber að veita íbúum sveitarfélagsins, því það verður ekki auðvelt að reyna að sækja til ráðuneytisins auka fjárveitingar eftir að skrifað hefur verið undir. Eftir það verðum við að reka stofnunina miðað við það sem þar stendur.

 Guðrún Júlía Jónsdóttir framkvæmdastjóri HSSA lagði fram eftirfarandi bókun:

Ég tel ekki tímabært að skrifa undir þjónustusamninginn á þessum tímapunkti, því ekki er búið að setja töluliði samningsins inn í ósamþykkta fjárhagsáætlun HSSA fyrir árið 2007. Eftir er að athuga hvort það fjármagn sem verið er að semja um standi undir rekstrarkostnaði.

 Ester Þorvaldsdóttir og Jóhanna Kristjánsdóttir hjúkrunarstjórar HSSA lögðu fram eftirfarandi bókun:

 Við höfum miklar áhyggjur af því að með þeim samningi sem er frammi í dag er ekki gert ráð fyrir aukinni heimahjúkrun, né þeirri þjónustu sem heilsugæslan veitir i dag í kjölfar aukinnar þjónustu við heimilin. Ekki er gert ráð fyrir að neitt af þeim peningum sem fylgdu ónotuðum dvalarrýmum skili sér í heimahjúkrunina. Einnig er ekki horft til þeirrar starfsemi sem fram fer á HSSA árið 2007, en mikil breyting hefur orðið með aukinni heimahjúkrun og í kjölfarið færri langlegu og fleiri hvíldarinnlagnir. Því er mjög mikilvægt að tryggt sé að heilsugæslan hafi bolmagn í nýjum samningi til að reka aukna heimahjúkrun í anda sýnar heilbrigðisráðherra.

 Meirihluti Heilbrigðis- og öldrunarráðs Hornafjarðar lagði fram eftirfarandi bókun:

 Meirihluti heilbrigðis- og öldrunarráðs Hornafjarðar telur að fjárveitingar til HSSA hefðu mátt vera hærri.  Um það eru allir sammála.  Meirihlutinn telur hins að lengra verði ekki komist að sinni.  Meirihluti HÖR leggur því til að þjónustusamningnum verði vísað til bæjarstjórnar til samþykktar.

 Árni lagði til að samningnum yrði vísað til samþykktar í bæjastjórn.  Fjórir greiddu atkvæði með, Björk var á móti.

2. Önnur mál