Fundargerð heilbrigðis- og öldrunarráðs 58

58. fundur

Fundur haldin í Heilbrigðis- og öldrunarráði Hornafjarðar þriðjudaginn 1. febrúar 2004, kl. 16:15 í fundarsal Ráðhúss. Mætt voru: Maren Sveinbjörnsdóttir, Margrét Ingólfsdóttir , Elínborg Baldursdóttir, Vignir Júlíusson og Kristín Gestsdóttir. Einnig: Hjalti Þór Vignisson og Albert Eymundsson.
Gengið var til dagskrár og eftirfarandi tekið fyrir:

1. Ráðning framkvæmdastjóra HSSA
Albert óskaði eftir því við fundarmenn að umræðunni yrði skipt í tvennt, annars vegar um málsmeðferð og hins vegar um tillögu hans að ráðningu framkvæmdastjóra HSSA. Albert fór fyrst yfir málsmeðferðina og sagði meðal annars að atburðarrásin hafi verið hraðari en æskilegt hefði verið og tók fram að hann teldi sig hafa gert mistök.
Margrét sagði að á síðasta fundi hafi verið rætt um að Hör yrði haft með í ráðum en síðan hafi ekkert samráðs verið haft við Hör.
Kristín gerði málsmeðferðina að umtalsefni. Hún taldi bagalegt að upplýsingaflæði til Hör hafi ekki verið nægjanlega gott. Kristín ræddi ennfremur um að sá aðili sem gert hefur verið tillögu um að ráðin sé til að gegna starfi framkvæmdastjóra hafi ekki sent inn umsókn. Hún lýsti sig andvíga vinnubrögðunum.
Margrét tók undir orð Kristínar og taldi að rétt hefði verið að velja framkvæmdastjóra úr röðum umsækjanda.
Albert gerði grein fyrir viðræðum sínum við umsækjendur og aðdraganda þess að hann gerði tillögu um að ráðin yrði framkvæmdastjóri sem ekki sótti um starfið. Í máli hans kom fram að sá umsækjandi sem kom frekar til greina hafi komið skilaboðum til sín um að af ráðningunni, ef til kæmi, gæti ekki orðið af persónulegum ástæðum. Ennfremur gerði Albert grein fyrir því að hinn umsækjandinn hafi ekki verið eins álitlegur kostur. Þegar þessar upplýsingar hafi legið fyrir ásamt öðrum sem skiptu máli var ákveðið að leita að framkvæmdastjóra út fyrir raðir umsækjanda.
Maren taldi að réttast hefði verið að kalla Hör saman þegar þessar upplýsingar lágu fyrir áður en gerð hefði verið tillaga um framkvæmdastjóra HSSA.
Albert gerði grein fyrir af hverju hann gerir tillögu um að Guðrún Júlía Jónsdóttir verði ráðin framkvæmdastjóri fyrir HSSA.
Margrét ræddi um að málsmeðferðin hafi verið allt of hröð. Margrét spurði hvort formlega væri búið að ganga frá ráðningu eða ekki.
Albert gerði hann grein fyrir að ekki væri búið að ganga frá ráðningunni formlega.
Kristín, Margrét og Elínborg taka ekki afstöðu til tillögu Alberts um framkvæmdastjóra HSSA. Vignir og Maren taka undir tillögu Alberts.

2. Önnur mál
Maren gerði grein fyrir að Halldóra B. Jónsdóttir muni láta af störfum sem nefndarmaður í Hör.

Fundi slitið kl. 18:05