Fundargerð bæjarstjórnar 151

Fundur haldinn      í Bæjarstjórn Hornafjarðar, fimmtudaginn 4. febrúar 2010 kl. 16:00 í Nýheimum.

Mætt voru:    Reynir Arnarson, forseti bæjarstjórnar, Árni Rúnar Þorvaldsson, Gunnar Sigurjónsson, Elín Magnúsdóttir, Guðrún Ingimundardóttir,  Björk Pálsdóttir og Björn Ingi Jónsson.  Einnig: Hjalti Þór Vignisson bæjarstjóri, Ásta Halldóra Guðmundsdóttir, framkvæmdastjóri fjármálasviðs og Haukur Ingi Einarsson framkvæmdastjóri tækni- og umhverfissviðs.

Forseti setti fund og bauð fundarmenn velkomna.

1.      Fundargerðir

·        Bæjarráð Hornafjarðar 487. fundur , 22. desember 2009.

Guðrún Ingimundardóttir tekur undir með Umhverfisnefnd varðandi utanvegaakstur.  Björk Pálsdóttir óskar eftir upplýsingar um stöðu í atvinnumálum hvort sveitarfélagið styrkti námskeið og verkefni  fyrir atvinnulausa  einnig ræddi hún um utanvegaakstur.  Hjalti Þór upplýsti að það væru 30 manns á atvinnuleysisskrá, sama og var á sama tíma og í fyrra.  Upplýsti að 10 einstaklingar hafi fengið vinnu eftir að vinnsla á loðnu hafi hafist.  Einnig sagði hann að á þessum fundi atvinnumálanefnda hafi farið vinna í að greina þá sem væru atvinnulausir og hvaða lausnir henta, hann tók undir varðandi utanvegaakstur.  Björn I. Jónsson ræddi um leikvöll á Holti á Mýrum og spurði hann hvort þetta mál væri komið í eitthvað ferli.  Hjalti tók undir orð Björns Inga að mikilvægt væri að bregðast óskum íbúa.

Fundargerð samþykkt.

·        Bæjarráð Hornafjarðar 488. fundur , 11. janúar 2010.

Björk Pálsdóttir tók til máls um málefni Háskólasetursins á Hornafirði og spurði um stöðu þess, taldi hún mikilvægt að sveitarfélagið hefði frumkvæði til eflingar setursins og viðræðum við ríkið um framtíð þess.  Hjalti Þór upplýsti um stöð setursins og þær viðræður sem hafa átt sér stað við hið opinbera um málið.   Einnig ræddi hann um aðkomu sveitarfélagsins af því.  Björn Ingi ræddi um aðhaldsaðgerðir Vegagerðarinnar og hvar verið sé að framkvæma á vegum hennar, sagði hann að engar framkvæmdir væru frá Hvolsvelli að Djúpavogi. 

Fundargerð samþykkt.

·        Bæjarráð Hornafjarðar 489. fundur, 19. janúar 2010.

Björk Pálsdóttir ræddi um tilboð í reiðskemmu og taldi mikilvægt að vinna rétt að kostnaðaráætlun.  Hjalti Þór ræddi um kostnaðaráætlanir og  gagnabanka sem notaðir eru til viðmiðunar..

Fundargerð samþykkt.

·        Bæjarráð Hornafjarðar 490. fundur , 23. janúar 2010.

Fundargerð samþykkt.

·        Bæjarráð Hornafjarðar 491. fundur, 1. febrúar 2010.

Björk Pálsdóttir spurðist fyrir um lóðarumsókn Skeljungs um lóð nr. 38 við Hafnarbraut.  Hjalti Þór  sagði að deiliskipulag um svæði væri í endurskoðun.   Björn Ingi  ræddi um sumarlokun leikskóla.  Hjalti ræddi um þá könnun sem gerð var í fyrra um lokun leikskóla.  Þar hafi komið fram að meirihluti foreldra sé almennt sátt um núverandi fyrirkomulag..

Fundargerð samþykkt.

·        Bæjarstjórn Hornafjarðar 150. fundur, 10. desember 2009 áður samþykkt.

2.      Þriggja ára áætlun 2011-2013 – seinni umræða

Bæjarstjóri fylgdi áætluninni úr hlaði og sagði m.a. að við gerð þriggja ára áætlunar var lagt upp með að byggja á raunhæfri tekjuáætlun og að skuldir myndu ekki aukast á tímabilinu.  Tekjur og gjöld 3ja ára áætlunar taka mið af áætlun ársins 2010.  Áætlun gerir ráð fyrir að allar kennitölur í rekstri beri með sér góðan rekstur, sterkan efnahag og gott sjóðstreymi.  Undantekning á sterkum efnahag er í kaupleigukerfinu þar sem skuldir eru háar miðað við eignir.  Samkvæmt 3ja ára áætlun verður framkvæmt fyrir 554 m.kr. í A-B hluta, afborgarnir af lánum verður 379,9 m.kr. og ný langtímalán tekin upp á 320 m.kr.  Langtímalán lækka því um 57,9 m.kr. 

Helstu niðurstöður í áætluninni eru eftirfarandi:

A - hluti                                               2011                 2012                 2013                 Alls

Handbært fé frá rekstri             96,6                  98,6                  96,8

Framkvæmdir                           156                  163,8                170,8                490,6

Afborganir lána                        109,3                108                  123,8                341,1

Nýjar lántökur                          150                  170                  320

B - hluti                                               2011                 2012                 2013                 Alls

Eignfjárhlutfall                          21%                 24%                 27%

Handbært fé frá rekstri             85                    84,2                  83,6

Framkvæmdir                           14,5                  34,5                  14,5                  63,5

Afborganir lána                        18,1                  19,1                  19,7                  56,9

Nýjar lántökur                          0                      0                      0                      0

A – B hluti                               2011                 2012                 2013                 Alls

Eignfjárhlutfall                          56 %                56%                 55%

Handbært fé frá rekstri             181,6                182,9                180,4

Framkvæmdir                           170,5                198,3                185,3                554,1

Afborganir lána                        127,3                127,1                143,5                397,9

Nýjar lántökur                          150                  170                  320

Björn Ingi telur eðlilegt að framkvæmdaáætlun næstu þriggja ára lægi fyrir.  Hjalti Þór taldi upp nokkur atriði sem hefur verið kastað fram í umræðunni en það bíði kosninga og eftirmála þeirra að móta stefnu um framkvæmdir næstu ára. 

Forseti bar áætlun upp til atkvæða.

Samþykkt með fimm atkvæðum, tveir sitja hjá.

3.      Aðalskipulag – Lambleiksstaðir

Bæjarstjóri fylgdi tillögunni úr hlaði:

Breytingin tekur til landnotkunar við Lambleiksstaði á Mýrum: Norð- vestur af Lambleiksstaðabænum er sýnt svæði fyrir verslun og þjónustu með hringtákni.  Uppbygging vegna ferðamannaþjónustu skal heimil á svæði norðan og vestan bæjarins að Lambleiksstöðum.  Þetta tekur til gistirýmis í stakstæðum smáhýsum, tjaldstæða, og gistiheimilis.  Á sveitarfélagsuppdrætti aðalskipulagsins er merkt svæði fyrir verslun og þjónustu með hringtákni.  Svæðið er utan í klettaholti – því sama og bærinn stendur sunnan undir. Fyrirhuguð mannvirki vegna ferðaþjónustu – smáhýsi, tjaldstæði og gistiheimili – verða að verulegu leyti í skjóli af klettaholtinu þegar horft er frá þjóðveginum, og lítil truflun verður á áhrifamiklu útsýni til fjalllendis og jökla. Að sama skapi munu gestir sem nýta sér þjónustu þar njóta útsýnisins að fullu.  Breytingin á aðalskipulaginu nær til allt að 5 ha svæðis. Gerð verður grein fyrir fyrirhugaðri uppbyggingu í deiliskipulagi.  Með staðsetningunni er leitast við að virða byggðamynstur á Mýrum. Þar eru bæjarhús jafnan reist á hólum eða utan í þeim, og staðsett í landslaginu með markvissum hætti.  Æskilegt er að byggðin meðfram þjóðveginum á Mýrum þróist í anda þessarar hefðar, og birtist áfram með formföstum hætti sem spillir ekki áhrifamikilli upplifun af landslaginu.  Stuðlað skal að þessu í útfærslu deiliskipulags á heimild aðalskipulagsins. Heimreið frá þjóðvegi að Lambleiksstöðum verður notuð sem aðkoma að mannvirkjum vegna ferðamannaþjónustunnar.  Svæðið mun tengjast vatnsveitu á Mýrum og eigin fráveitu.  Svæðið mun tengjast núverandi rafveitu – og fjarskiptastofnlögnum á Mýrum.  Sveitarfélagið Hornafjörður er fjölsótt af ferðamönnum og mikilvægt að halda áfram uppbyggingu í þágu atvinnustarfssemi sem tengist þeim.  Undanfarin ár hefur eftirspurn eftir gistirými verið langt umfram framboð yfir mesta ferðamannatímann. Uppbygging að Lambleiksstöðum er liður í að bregðast við því með auknu framboði á gistirými svæðisins.  Fjölgun gistinátta ferðamanna hefur einnig jákvæð áhrif aðra atvinnustarfsemi og þjónustu – m.a. í næsta nágrenni

Samþykkt samhljóða.

4.      Kosningar

Gunnar Sigurjónsson verður formaður skólanefndar

Gísli Már Vilhjálmsson kosinn aðalmaður í stað Elínar Magnúsdóttur

Gunnar Ingi Valgeirsson kosin varamaður í skólanefnd í stað Gísla Más Vilhjálmssonar

5.      Fyrirspurnir

Engar.  

Fundi slitið kl. 17.10