Gamla - Atvinnumálanefnd
Fundargerð atvinnumálanefndar 51
51. fundur
Fundur í atvinnumálanefnd Hornafjarðar haldinn í ráðhúsi,mánudaginn 18. maí 2009 og hófst hann kl. 12:00
Fundinn sátu:
Ásgrímur Ingólfsson, Eyjólfur Guðmundsson, Gauti Árnason, Stephen Róbert Johnson, Hjalti Þór Vignisson,
Fundargerð ritaði: Hjalti Þór Vignisson, bæjarstjóri
Dagskrá:
1. 200804056 - Staða á atvinnuleysisskrá
Kom fram að 30 eru á atvinnuleysiskrá, 20 konur og 10 karlar. Kom fram að hluti er í hlutastörfum.
2. 200904066 - Skapandi atvinnugreinar
Gerð grein fyrir fundi í Reykjavík með hópi fólks í skapandi greinum. Kom fram að fulltrúar frá Listaháskólanum, Nýsköpunarmiðstöð Íslands, Íslenska dansflokkinum, hönnuðir og fleiri sátu fundinn.
Umræður sköpuðust um næstu skref. Rætt um mikilvægi þess að ræða þessa hugmynd hér í samfélaginu og fá til liðs fólk sem starfar nú þegar innan þessa ramma. Atvinnumálanefnd leggur til að fundað verði um þessi mál á Hornafirði í vor þar sem samankoma frumkvöðlar í skapandi greinum á Íslandi, háskólar og frumkvöðlar á Hornafirði.
3. 200905001 - Orkumál á Hornafirði
Kom fram að verkefnið er komið af stað. Unnið er að því á vegum Frumunnar ehf. Verkefnið er um að kortleggja virkjanakosti í sveitarfélaginu.
4. 200902069 - Leyfi til búfjárhalds umsókn
Samþykkt leyfi fyrir 15 ær. Atvinnumálanefnd gefur þriggja ára aðlögunartíma.
5. 200902078 - Sauðfjárveikivarnir
Lagt fram gögn er málið varða. Atvinnumálanefnd mótmælir harðlega málsmeðferð Matvælastofnunar og ráðuneytis í þessu máli. Síðasta eitt og hálfa árið hefur ítrekað verið leitað eftir fundum af hálfu sveitarfélagsins með fulltrúum Matvælastofnunar. Fullkomið samráðsleysi var í aðdraganda þeirrar ákvörðunar að fella niður varnarlínu við Hornafjarðarfljót. Atvinnumálanefnd telur einnig að málefnaleg rök skorti fyrir þessari ákvörðun og óskar eftir frekari rökstuðningi og tekur ekki endanlega afstöðu til málsins fyrr en frekari upplýsingar liggi fyrir. Bæjarstjóra falið að ræða við ráðherra um þessa niðurstöðu.
6. 200705114 - Önnur mál
Ásgrímur gerði grein fyrir framvindu verkefna sem nefndin styrkti um smáframleiðslu matvæla.
Ásgrímur gerði grein fyrir samtali við starfsmann NorðurBragðs um að breytingar séu yfirvofandi á rekstri NorðurBragðs.
