Gamla - Atvinnumálanefnd
Fundargerð atvinnumálanefndar 36
36. fundur
atvinnumálanefndar Hornafjarðar
miðvikudaginn 30. janúar 2008 og hófst hann kl. 17.00
Fundinn sátu:
Ásgrímur Ingólfsson, Eyjólfur Guðmundsson, Gauti Árnason, Gunnar Ingi Valgeirsson, Eiríkur Sigurðsson, Hjalti Þór Vignisson,
Fundargerð ritaði: Hjalti Þór Vignisson, bæjarstjóri
Dagskrá:
1. Ráðstöfun styrks vegna samdráttar í aflamarki þorsks.
Hjalti lagði fram eftirfarandi tillögu um ráðstöfun á úthlutun félagsmálaráðuneytisins vegna samdráttar í aflamarki þorsks, dags. 30. janúar 2007:
Í bréfi dags. 28. desember 2007 frá félagsmálaráðuneytinu kemur fram að Sveitarfélaginu Hornafirði sé úthlutað 8,8 m.k.r til að bregðast við samdrætti í aflamarki þorsks. Bæjarráð Hornafjarðar fól atvinnumálanefnd á 404. fundi ráðsins, dags. 10. janúar 2007, að gera tillögu um nýtingu þessa fjár.
Á 35. fundi atvinnumálanefndar Hornafjarðar samþykkti nefndin framtíðarsýn til næstu þriggja ára og leit á það sem hlutverk sitt að tryggja sérstaklega þremur verkefnum brautargengi, þ.e. verkefnum sem tengjast vinnslu og útflutningi á vatni, uppbyggingu matvælaklasa og að greina atvinnutækifæri í tengslum við stofnun Vatnajökulsþjóðgarðs. Tillögur atvinnumálanefndar um nýtingu ofangreindra fjármuna taka því mið af þessari stefnumörkun.
Tillaga atvinnumálanefndar er því eftirfarandi:
1. Að lagðar verði fram 2 miljónir króna til að undirbúa vinnslu og útflutning á vatni í héraðinu. Frumkvöðlasetur Austurlands hefur unnið verkefna- og kostnaðaráætlun vegna verkefnisins sem gerir ráð fyrir kostnaði upp á 2 miljónir. Atvinnumálanefnd telur rétt að leitað verði til setursins að vinna verkefnið.
2. Að lagðar verði allt að 1,8 miljónir krónur í atvinnuuppbyggingu í tengslum við stofnun Vatnajökulsþjóðgarðs. Að mati atvinnumálanefndar er þessi vinna á frumstigi og telur nefnd mikilvægt að gerð verði nákvæm verk- og kostnaðaráætlun um verkið áður en fjármunir verði greiddir út. Þá leggur nefndin til að leitað verði til Háskólasetursins á Hornafirði, Frumkvöðlaseturs Austurlands ehf. og Ríki Vatnajökuls ehf. til að finna verkefninu réttan farveg.
3. Að lagðar verði 5 miljónir króna í verkefni sem tengjast matvælaferðamennsku. Atvinnumálanefnd leggur að þessu sinni áherslu á að verkefni á sviði sjávarútvegs. Matís ohf. og Frumkvöðlasetur Austurlands ehf. hafa verið í samstarfi við stofnanir og fyrirtæki um slík verkefni og leggur atvinnumálanefnd til að þessir aðilar verði fengnir til að vinna þetta verkefni.
Gauti lagði fram eftirfarandi tillögur vegna úthlutunar á styrkjum vegna samdráttar í aflamarki þorsks, dags. 30. janúar 2007:
· Þeir fjármunir sem ríkið hefur lagt sveitarfélaginu til renna inn í sameiginlegan rekstur þess vegna skerðingar á skatttekjum vegna minnkandi kvóta.
· Þeir fjármunir sem ríkið hefur lagt sveitarfélaginu fara eingöngu til verkefna sem tengd eru fiskveiðum/fiskvinnslu. Hvort það séu verkefni sem er nú þegar hafin eða verkefni sem þarfnast frekari vinnslu. Að þessi peningar verði nýttir til frekari verðmætasköpunar á sjávarfangi, eða til styrktar verkefnum sem skapa störf í sjávarútvegi.
Eftir nokkrar umræður varð atvinnumálanefnd sammála um eftirfarandi tillögu:
1. Að lagðar verði allt að 2 milljónir króna til að undirbúa vinnslu og útflutning á vatni í héraðinu. Frumkvöðlasetur Austurlands hefur unnið verkefna- og kostnaðaráætlun vegna verkefnisins sem gerir ráð fyrir kostnaði upp á 2 miljónir. Atvinnumálanefnd telur rétt að leitað verði til setursins að vinna verkefnið en leggur jafnframt áherslu á að aðrir hagsmunaaðilar leggi fram fjármuni í verkefnið.
2. Að lögð verði allt að 1 milljón króna í atvinnuuppbyggingu í tengslum við stofnun Vatnajökulsþjóðgarðs. Að mati atvinnumálanefndar er þessi vinna á frumstigi og telur nefndin mikilvægt að gerð verði nákvæm verk- og kostnaðaráætlun. Þá leggur nefndin til að leitað verði til Háskólasetursins á Hornafirði, Frumkvöðlaseturs Austurlands ehf. og Ríki Vatnajökuls ehf. til að finna verkefninu réttan farveg.
3. Að lagðar verði 5,8 miljónir króna í verkefni sem tengjast matvælaframleiðslu. Atvinnumálanefnd leggur að þessu sinni áherslu á að verkefni á sviði sjávarútvegs verði styrkt sérstaklega. Matís ohf. og Frumkvöðlasetur Austurlands ehf. hafa verið í samstarfi við stofnanir og fyrirtæki um slík verkefni og leggur Atvinnumálanefnd til að þessir aðilar verði fengnir til að vinna þetta verkefni.
2. Erindi Bestfisks um ósk um hlutdeild í styrk vegna samdráttar í aflamarki þorsks.
Atvinnumálanefnd telur að ekki sé hægt að verða við ósk Bestfisk en bendir forsvarsmönnum fyrirtækisins á að leita eftir samstarfi við Matís ohf. og Frumkvöðlasetur Austurlands ehf. um samstarf um verkefni á sviði sjávarútvegs sbr. tillögu atvinnumálanefndar um ráðstöfun styrks vegna samdráttar í aflamarki þorsks.
3. Fjallskil.
Lögð fram bréfaskipti á milli Sæmundar Jóns Jónsonar, bónda í Árbæ, og Hjalta Þórs Vignissonar um framkvæmd fjallskila sl. hausts. Miklar umræður sköpuðust um bréfin og m.a. rætt um skyldur landeigenda og fjáreigenda. Í umræðunni kom einnig fram að kominn væri tími til að Alþingi endurskoði lög um afréttarmál og fjallskil. Hjalti gerði grein fyrir hugmynd sinni um framkvæmd fjallskila næsta haust. Atvinnumálanefnd sammála um að taka málið fyrir í vor.
Eyjólfur ræddi um að skýra þyrfti betur hlutverk atvinnumálanefndar og bæjarstjórnar í fjallskilasamþykkt.
4. Önnur mál.
Engin.
Fleira ekki gert. Fundi slitið kl. 18.00
