Fundargerð atvinnumálanefndar 32

32. fundur

32. fundur atvinnumálanefndar Hornafjarðar haldinn í ráðhúsi, miðvikudaginn 8.ágúst 2007 og hófst hann kl. 16:00

Fundinn sátu: Lilja Hrund Harðardóttir, Ásgrímur Ingólfsson, Eyjólfur Guðmundsson, Gauti Árnason, Hjalti Þór Vignisson, Fundargerð ritaði: Hjalti Þór Vignisson, bæjarstjóri

Dagskrá:

1. 200706044 - Fundarg. 31. fundar atvinnumálanefndar

Engar athugasemdir.

2. 200706008 - Staða atvinnumála

Kom fram að fjórir eru á atvinnuleyfisskrá. Undir þessum lið sköpuðust miklar umræður um stöðu sjávarútvegsins vegna ákvörðunar um niðurskurð aflaheimilda. Atvinnumálanefnd lýsir yfir þungum áhyggjum af stöðu sjómanna, fiskverkunarfólks og fyrirtækja í sjávarútvegi. Atvinnumálanefnd telur mikilvægt að ríkið leggi til umtalsverða fjármuni í menntun, rannsóknir og þróun á svæðinu til að vega á móti þeim samfélagsbreytingum sem hljótast af niðurskurði aflaheimilda.

3. 200705034 - Drög að samþykkt um búfjárhald í sveitarfélaginu Hornafirði

Ólafur Páll Vignisson, lögfræðingur í samgönguráðuneytinu, sat á fundinn undir þessum lið. Ólafur fór yfir drögin og benti sérstaklega á 3. tl. 2.gr. er varðaði bótaábyrgð á tjóni sem búfé veldur. Taldi hann að sveitarfélagið hefði ekki heimild til að skilgreina bótaábyrgð í þessu tilfelli. Í kjölfarið var rætt um fyrirliggjandi drög. Atvinnumálanefnd telur mikilvægt að fjöldi fjár sem frístundabændur halda sé innan ákveðinna marka. Atvinnumálanefnd samþykkir fyrirliggjandi drög með áorðnum breytingum fyrir sitt leyti.

4. 200705035 - Samningur um friðun vegsvæðis fyrir ágangi búfjár í sveitarfélaginu Hornafirði

Ólafur Páll Vignisson, lögfræðingur í samgönguráðuneytinu, sat á fundinn undir þessum lið. Ólafur gerði grein fyrir rannsóknarverkefni sem hann vann um tjón af völdum lausagöngu búfjár og ábyrgð hlutaðeigandi aðila. Hann greindi frá því að þar sem ekki væri sérstakur samningur um viðhald girðinga að þá væri landeigandi ábyrgur fyrir viðhaldi girðinga en kostnaður greiðist að jöfnu úr vasa landeiganda og Vegagerðar. Sveitarfélagið hafi eftirlitsskyldu með því að girðingar séu fjárheldar. Þá fór hann yfir fyrirliggjandi drög að samningi. Taldi hann að frá sjónarhóli sveitarfélagsins séð væri jákvætt að Vegagerðin lýsti því yfir að hún tæki að sér uppsetningu og viðhald girðinga. Sagði hann að Vegagerðinni bæri ekki skylda til þess samkvæmt lögum. Helsta breytingin fyrir sveitarfélagið frá þeirri stöðu sem nú er uppi er að kosta búfjáreftirlitsmann. Benti hann á að oft væri sami aðilinn sem sinnti eftirliti á þjóðvegunum og forðagæslu. Að lokum gerði hann grein fyrir því að eitt af tíu áhersluátriðum í nýrri umferðaröryggisáætlun væri að draga úr tjónum af völdum lausagöngu búfjár. Í kjölfarið varð töluverð umræða í nefndinni um fyrirliggjandi samning. Meðal annars var rætt um hvort lausagöngu bann hefðu áhrif á bændur, m.a. hvort þeir fengu bætur fyrir fé sem ekið væri á. Kom fram að hagur bænda vegna samningsins fælist fyrst og fremst í því að losna við kostnað vegna viðhalds girðinga og draga úr tjónum á búfé þeirra. Atvinnumálanefnd samþykkir fyrirliggjandi drög fyrir sitt leyti en leggur áherslu á að samningurinn fái góða kynningu meðal bænda á því svæði sem á að friða fyrir ágangi búfjár. Ennfremur telur atvinnumálanefnd mikilvægt að fleiri svæði verði friðuð sem allra fyrst.

5. 200706043 - Framtíðarsýn

Atvinnumálanefnd er sammála um að í vetur verði unnið að framtíðarsýn fyrir samfélagið. Starfsmanni falið að vinna drög að verkáætlun og leggja fram á næsta fundi.

6. 200706045 - Landbótáætlun fyrir Laxárdal

Fulltrúar Landgræðslunnar mæta á fundinn

7. 200705114 - Önnur mál

Atvinnumálanefnd lýsir ánægju með sýninguna Atvinna - mannlíf - menning á Hornafirði sem haldin var um Verslunarmannahelgina.

Fleira ekki gert. Fundi slitið kl. 17:40