Fundargerð atvinnumálanefndar 26

26. fundur

Fundur haldinn í atvinnumálanefnd Hornafjarðar mánudaginn 18. september 2006 kl. 16:00 í fundarsal Ráðhúss.

 Mætt voru:  Ásgrímur Ingólfsson, varaformaður sem stýrði fundi, Eyjólfur Guðmundsson og Gauti Árnason.  Lilja Hrund Harðardóttir mætti á fundinn kl. 16:40.

 1.            Staða atvinnumála

Kom fram að 10 eru á atvinnuleysisskrá.

 2.            Skýrsla starfshóps um stöðu og möguleika lífrænnar framleiðslu á Íslandi

Töluverð umræða skapaðist um skýrsluna.  Nefndin taldi óljóst í hverju sóknarfæri við lífræna framleiðslu væri fólgið og hver ábati bændanna væri í raun.  Einnig kom fram að sveitarstjórn hafi takmörkuð áhrif á framgang verkefna á borð við lífræna framleiðslu í landbúnaði.

 3.            Skýrsla votlendisnefndar

Til kynningar.

 4.            Rannsókna- og þróunarsjóður

Miklar umræður sköpuðust um hugmyndina og ýmsir fletir ræddir.  Meðal annars var rætt um hvort skynsamlegra væri að efla faglega aðstoð í þróunarstarfi, t.d. með því að styrkja Frumkvöðlasetrið í Nýheimum.  Einnig að einstaklingar og fyrirtæki á Hornafirði þyrftu í auknum mæli að koma að rannsókna- og þróunarstarfi í héraðinu, þar sem það er hægt.  Atvinnumálanefnd telur mikilvægt að leiðir verði skoðaðar til efla enn frekar rannsókna- og þróunarstarf í sveitarfélaginu.

 5.            Atvinnulífssýning í tengslum við ungmennalandsmót 2007

Lilja Hrund kynnti hugmyndina.  Hún felur í sér að fyrirtæki og stofnanir í sveitarfélaginu kynni starfsemi sína í tengslum við ungmennalandsmót 2007.  Það verði t.d. gert með opnu húsi hjá þessum aðilum eða með því að setja upp kynningarbása í hentugu húsnæði eða á landsmótssvæðinu. 

Í þessu samhengi spratt upp umræða um kynningarmál fyrir sveitarfélagið. Atvinnumálanefnd er sammála um að mikilvægi þess að efla kynningu á samfélaginu og beinir því til bæjarráðs að fjármunir verði lagðir til þessa verkefnis.

 6.            Seljum norðurljósin

Hjalti Þór gerði grein fyrir stöðunni í verkefninu.  Kom fram að unnið er hörðum höndum að markaðssetningu, rætt hafi verið við sendiráðin í Kína og Japan, sölufulltrúa Icelandair í norður Evrópu og farið á nokkrar sölusýningar.  Í framhaldinu skapaðist umræða um opnunartíma á fjölsóttum ferðamannastöðum í sveitarfélaginu.

 7.            Önnur mál

·        Atvinnumálanefnd telur mikilvægt að safnað verði saman upplýsingum um atvinnumál í sveitarfélögum.  Ennfremur að þessar upplýsingar lýsi atvinnuástandi, uppbyggingu atvinnuvega og öðrum slíkum þáttum.  Nefndin felur starfsmanni að taka málið upp við hlutaðeigandi aðila, t.d. Hagstofu íslands og Byggðastofnun.

·        Umræða skapaðist um fjölgun opinberra starfa.  Atvinnumálanefnd beinir því til bæjarráðs að skoða möguleika á fjölgun opinberra starfa í samvinnu við ríkið.

·        Gauti lagði áherslu á að atvinnumálanefnd væri í meira mæli uppfrædd um framkvæmdir á vegum sveitarfélagsins og verkefni sem það tekur þátt í varðandi atvinnuþróun.  Taldi hann mikilvægt að fá slíkar upplýsingar því þær gefa hugmynd um horfur í atvinnumálum.

Fundi slitið kl. 17.45