Fundargerð atvinnumálanefndar 27

27. fundur

Fundur haldinn í atvinnumálanefnd Hornafjarðar mánudaginn 16. október kl. 16:00 í Ráðhúsi.

 Mætt voru:  Lilja Hrund Harðardóttir, formaður, Ásgrímur Ingólfsson, Eyjólfur Guðmundsson, Eiríkur Sigurðsson og Gauti Árnason.

 Gengið var til dagskrár og eftirfarandi tekið fyrir:

1.                  Fundargerð síðasta fundar

Hjalti gerði grein fyrir fundi fulltrúa sveitarfélagsins með iðnaðar- og viðskiptaráðherra um byggðamál.  Þar var m.a. komið inn á fjarlægð til skilgreindra landshlutakjarna.

 2.                  Staða atvinnumála

Kom fram að samkvæmt samtali eru nú um 14 manns á skrá.

 3.                  Ferðamál – markaðsáætlun og vöruþróun

Mikil umræða skapaðist í nefndinni um ferðaþjónustu og möguleika til framþróunar.  Einnig skapaðist umræða um aðkomu atvinnumálanefndar og sveitarfélagsins að þessu málum.  Atvinnumálanefnd er sammála um að sveitarfélagið eigi að beita sér fyrir eflingu ferðamennsku á jaðartímum.    

 Mikil umræða skapaðist um hvað geti eflt ferðamennsku yfir jaðartímanum, t.d. menningartengdir viðburðir í líkingu við það sem Hornfirska skemmtifélagið hefur staðið fyrir, fjalla- og jöklaferðir yfir vetrartímann og fleira.  Til dæmis skapaðist mikil umræða um ráðstefnur og möguleika svæðisins til að efla þennan þátt í ferðaþjónustu.  Kom fram að sveitarfélagið geti vel stuðlað að aukningu á ráðstefnum, aðstaða til ráðstefnuhalds sé góð og gisting og önnur aðstaða vel til þess fallinn að taka á móti stórum ráðstefnum.  Rifjað var upp að fyrir nokkrum árum var stefna atvinnumálanefndar að standa fyrir a.m.k. einni ráðstefnu á ári.   Þá skapaðist umræðu um möguleika á því hvernig uppbygging þjóðgarðs geti stuðlað að aukningu á ferðamennsku.  

 Ennfremur voru samgöngumál mikið rædd, bæði flugmál og sérleyfi í áætlunarakstri frá Reykjavík til Hafnar.  Atvinnumálanefnd leggur mikla áherslu á að þeir aðilar sem sinni flugi og sérleyfisakstri taki þátt í uppbyggingu á ferðaþjónustu á svæðinu og geri grein fyrir því hvernig þeir hyggist standa að þeim málum á meðan samningar eru í gildi.

 4.                  Atvinnulífssýning

Kom fram að þessi hugmynd hafi verið rædd á fundi menningarmálanefndar á síðasta fundi nefndarinnar.  Þar kom fram áhugi á að taka þátt í þessu verkefni.  Rætt um hvernig best sé að standa að þessari sýningu, m.a. með tilliti til kostnaðar og framkvæmdar.  Atvinnumálanefnd beinir því til bæjarráðs að móta framtíð þessa verkefnis, m.a. með því að gera kostnaðar- og framkvæmdaáætlun.

5.                  Önnur mál

Gauti spurðist fyrir um fjallskil og landnýtingarþátt gæðastýringar í sauðfjárrækt.  Gerð grein fyrir málefnum sauðfjárbænda varðandi gæðastýringu í sauðfjárrækt.  Atvinnumálanefnd samþykkir að taka landbúnaðarmál sérstaklega fyrir á næsta fundi nefndarinnar.  Þá yrði almenn kynning á málaflokknum og sérstök mál tekin fyrir, t.d. fjallskil.

Lilja ræddi um hádegisverðarfundi um eflingu atvinnulífs.  Umræða skapaðist um samstarf við Menningarmiðstöð og Jöklasetur um hádegisverðarfundi einu sinni í mánuði í vetur. 

Lilja ræddi um námskeið á vegum Iðntæknistofnunar.

Fundi slitið kl.  17.35