Fundargerð atvinnumálanefndar 15

15. fundur

Fundur haldinn í atvinnumálanefnd Hornafjarðar mánudaginn 20. desember 2004  kl. 17:00 í ráðhúsi.

Mætt voru:  Reynir Arnarson formaður, Þóra V. Jónsdóttir, Sveinbjörn Imsland og Inga Jónsdóttir.  Einnig: Hjalti Þór Vignisson, starfsmaður nefndarinnar.

Gengið var til dagskrár og eftirfarandi tekið fyrir:

1.      Fundargerð síðasta fundar.

Til kynningar.

2.      Samkvæmt upplýsingum frá Vökli mánudaginn 20. desember eru 23 skráðir atvinnulausir í sveitarfélaginu.

Rætt var um þá virkni sem hefur verið í nýsköpun í sveitarfélaginu og margvísleg verkefni sem í gangi eru.  Einnig var velt upp ýmsum hugmyndum til atvinnusköpunar.  Undir þessum lið var rætt um uppsagnir hjá Ratsjárstofnun og nauðsynlegar aðgerðir til að bregðast við þeim.

Atvinnumálanefnd beinir því til bæjarráðs og starfsmanna bæjarfélagsins að halda vöku sinni í málinu og gæta hagsmuni sveitarfélagsins og íbúa þess.  Þá leggur atvinnumálanefnd áherslu á að starfsmenn Ratsjárstofnunar á Stokksnesi séu upplýstir um þá vinnu sem fram hefur farið á vegum sveitarfélagsins undanfarna daga.

3.      Norðurljósaverkefni.

Starfsmaður greindi frá fundi sem haldin var um verkefnið á Ísafirði fyrir skömmu.  Kom fram að aukin vetrarferðaþjónusta er raunhæfur kostur og var vísað í ýmis dæmi því til stuðnings.  Rætt um að samhliða Norðurljósaskoðun þyrfti að bjóða upp á fjölbreytta afþreyingu.

4.      Bréf samtaka ferðaþjónustunnar vegna lengingar háannar í ferðaþjónustu, dags. 3. nóvember 2004.

Í bréfinu kemur fram að íslensk ferðaþjónusta hafi vaxið töluvert utan háannar, þó sérstaklega í Reykjavík.  Samfara þessari auknu ferðaþjónustu hefur ekki verið gætt nægjanlega vel að skerða ekki þjónustuna um of utan háannar.  Að lokum er það áréttað í bréfinu að ekki ekki sé hægt að markaðsetja Ísland utan háannar nema að ferðaþjónustuaðilar leggist ekki á eitt með að halda þjónustunni gangandi yfir vetrarmánuðina.

Atvinnumálanefnd vill eindregið beina því til ferðaþjónustuaðila að kynna sér efni bréfsins og taka tillit til þeirra ábendinga sem þar koma fram.  Atvinnumálanefnd bendir á að sú þjónusta sem sveitarfélagið sinnir við ferðamenn sé sniðinn að eftirspurn á hverjum tíma og á þar m.a. við upplýsingagjöf til ferðamanna og rekstur safna og sýninga.

5.      Bréf Veiðistjórnunarsviðs Umhverfisstofnunar vegna endurgreiðslu vegna refa- og minkaveiði, dags. 9. desember 2004.

Í bréfinu kemur fram að endurgreiðsluhlutfall ríkisins vegna refa- og minkaveiða lækkar töluvert mikið.  Undir þessum lið voru skýrslur nefndar um mink frá mars 2004 og nefndar um áhrif refs í íslenskri náttúru frá júní 2004 ræddar.  Kom fram að báðir stofnanir sveiflast nokkuð í stærð og á síðustu árum hafi þeim fjölgað stórlega. 

Nefnd um minkinn leggur til að honum sé útrýmt úr íslenskri náttúru með sérstöku átaksverkefni.  Ástæðan er m.a. sú að dýrið er mikill skaðvaldur auk þess sem hann er aðskotadýr í íslenskri náttúru.  Minkurinn hefur ná mikilli útbreiðslu og veldur árlega miklu tjóni á hlunnindum, fisk í ám og vötnum og fuglalífi.  Ennfremur er lagt til að framkvæmdin sé færð frá sveitarfélögum til ríkis.  Meirihluti minkanefndarinnar leggur til að sett verði sérlög um rannsóknir og veiðar á mink.

Nefndin um áhrif refs í íslenskri náttúru leggur til að sveitarfélög taki alfarið yfir refaveiðar.  Þá leggur nefndin til að endurskoða ætti virðisaukaskatt á refaveiðar.  Nefndin kemst að þeirri niðurstöðu að auknar rannsóknir á ref séu mikilvægar og í raun sé minna vitað um refinn en minkinn.  Þó er vitað að refurinn hefur mikil áhrif á fuglalíf og æðarvarp.  Einnig leggjast refir á sauðfé, oftast unglömb í byrjun sumars.  Kom fram hjá starfsmanni umhverfisráðuneytisins að hugmyndir væri innan ráðuneytisins að rétt væri að sveitarfélög skilgreini einstök svæði þar sem refurinn hefur valdið miklu tjóni og einbeiti sér að þeim svæðum í stað þess að leggja allt sveitarfélagið undir í einu.

Atvinnumálanefnd tekur undir hugmyndir um að útrýma eigi að mink úr íslenskri náttúru.   Þá lýsir atvinnumálanefnd sig reiðubúna að skoða hvort raunhæft sé að sveitarfélagið taki yfir refaveiðar í héraðinu.  Atvinnumálanefnd hyggst taka málið upp til frekari umræðu á næstum fundum nefndarinnar.

6.      Bréf NorðurÍss vegna aukins hlutafjár í félaginu, dags. 10. desember 2004.

Rætt um þann góða árangur sem stjórnendur NorðurÍss hafa náð í sölu á afurðum fyrirtækisins á síðustu vikum og mánuðum.  Samkvæmt bréfi frá NorðurÍs býðst sveitarfélaginu að nýta sér forkaupsrétt á hlutabréfum í félaginu.

Í ljósi aðstæðna í sveitarfélaginu, að fyrirtæki innan og utan héraðs hafa keypt hlutafé í NorðurÍs og að því er virðist bjartari framtíðar fyrirtækisins leggur atvinnumálanefnd til að sveitarfélagið kaupi umrætt hlutafé.

7.      Önnur mál

Kynnt var bréf Rannsóknar og ráðgjafar um styrk til útgáfu á sögukorti fyrir Austurland.  Greint var frá samtali við útgáfuaðilann um hvort hentaði betur fyrir Hornafjörð að vera með Austurlandi eða Suðurlandi.  Hann taldi að ef Hornafjörður yrði með Suðurlandi myndi það kort spanna yfir of stórt svæði en hann þvertók alls ekki fyrir slíkan möguleika.  Hann velti líka upp hvort ætti að gera kort sem bæri titilinn Austur- og Suðausturland.

Starfsmanni falið að ræða við aðila á Austurlandi og Suðurlandi um gerð slíks sögukorts áður en ákvörðun er tekin og að leita eftir umsögn Ferðamálafélags Austur-Skaftfellinga.

Fundi slitið 18:55