Fundargerð Æskulýðs- og tómstundaráðs 56

56. fundur

Fundur haldinn í æskulýðs- og tómstundaráði Hornafjarðar fimmtudaginn
26. janúar 2004 kl. 17:10.

Mætt voru: Friðrik Ingvaldsson formaður, Gunnar Ingi Valgeirsson, Valdemar Einarsson, Elsa S. Elisdóttir, Þórgunnur Torfadóttir og Haukur H. Þorvaldsson æskulýðs - og tómstundafulltrúi.


Friðrik formaður setti fund og bauð ráðsfólk velkomið.

Gengið var til dagskrár:
1. Styrkveiting
Farið var yfir umsóknir sem borist hafa ráðinu um styrkbeiðnir frá ýmsum félögum. Gengið var til afgreiðslu og voru styrkir til eftirtalinna félaga samþykktir:

Umf. Sindri til afborgunar á láni kr. 1250.000.00.
Sindri til almenns rekstrar kr. 1920.000.00.
Reiknuð húsaleiga í Íþróttahúsi Höfn kr. 3200.000.00.
Vegna leikjanámskeiðs kr. 750.000.00.
Sunddeild Sindra (leiga á sundlaug) kr. 150.000.00.

Umf. Máni.
Til íþróttastarfsemi kr. 200.000.00.

Golfklúbbur Hornafjarðar
Framlag vegna framkvæmdasamnings kr. 2100.000.00.
Framlag vegna barna- og ungmennastarfs kr. 400.000.00.

Hestamannafélagið Hornfirðingur
Framlag vegna framkvæmdasamnings kr. 1250.000.00
Framlag vegna barna- og ungmennastarfs kr. 300.000.00.

Hestamenn á Ægissíðu
Vegna unglingastarfs kr. 70.000.00.

Skotfélag Austur-Skaftafellssýslu
Framlag til framkvæmda og starfs kr. 70.000.00.

Dansklúbburinn Taktur
Starfsstyrkur kr. 20.000.00.
Ætlast er til að styrknum verði varið í barna- og ungmennastarf.

Danshópur Mána
Starfsstyrkur kr. 20.000.00.
Ætlast er til að styrknum verði varið í barna – og ungmennastarf.

Sérsjóðurinn
Framlag í Sérsjóð ÆTH kr. 200.000.00.

Umsóknum frá bútasaumsfélaginu Ræmunum og Ungmennafélagi Öræfa var hafnað.

Alls eru veittir styrkir að upphæð 11.900.000.00. kr.


2. Styrkveitingar til efnilegra íþróttamanna og sérverkefna úr Sérsjóði.
Haukur greindi frá því að hann hefði sent út bréf 10.desember til íþróttafélaga þar sem óskað var eftir tilnefningum í að styrkja unga og efnilega íþróttamenn og ef sérstök verkefni væri upp á borði sem Sérsjóðurinn gæti styrkt.
Ábendingar bárust um íþróttafólk frá knattspyrnudeild Sindra þeim Birni Pálssyni og Guðrúnu Ásu Jóhannsdóttur eins var stungið upp á Bjarna Malmquist frjálsíþróttamanni. Fær hver þessara íþróttamanna 20.000 kr. í styrk til að nota í æfingar og ferðalög til að efla sig í íþrótt sinni. Tvær umsóknir komu um sérverkefni frá Fimleikadeild Sindra til styrkja unga og efnilega íþróttamanna til að fara á Trompfimleikamót og Huldu Laxdal Hauksdóttur vegna verkefnisins Fjölskyldan saman/gaman. Var fimleikadeildinnni styrkt um 75.000 kr. Var ákveðið að veita Huldu styrk eftir að kostnaður við verkefnið liggur fyrir.

3. Opnun sundlaugar. Verðskrá.
Sundlaugin var opnuð fimmtudaginn 22.janúar sem er þrem vikum fyrr en undanfarin ár. Ekki vildi betur til þennan fyrst opnunardag en að bilun kom upp í vatnsbúnaði sem olli því að vatn náði að streyma undir laugardúkinn sem varð þess valdandi að ekki var hægt fyrr gesti að fá sér sundsprett. Ákveðið var að opnunartímar í vetur verði frá kl. 07:00 – 09:00 og 16:00 – 20:00 virka daga og frá 09:00 til 15:00 um helgar. Frá júní til loka ágúst verði opið á virkum dögum frá kl. 07:00 – 20:30 og um helgar frá 0900 – 18:00. Varðandi opnun um Humarhátíð er mælst til þess að opið verði í sturtur frá kl.18:00 - 21:00 föstudag og laugardag. Kemur þetta til vegna umræðu sem upp kom eftir Humarhátíð í fyrra.
Verðskrártillögur ráðsins vegna sundlaugar voru samþykktar í bæjarráði í desember.

4. Forvarnamál.
Á miðvikudaginn kemur verður haldinn fundur með lykilaðilum sem hvað mest varða forvarnir á Hornafirði. Á þessum fundi verður farið yfir og rætt innihald skýrslu sem inniheldur könnun sem Rannsókn og greining gerði í mars 2003 á vímuefnaneyslu nemenda í 8.-9. og 10. bekk á Hornafirði. Í framhaldi af þeim fundi verður boðað til fundar með foreldru nemenda í 7.- 10. bekk.
Haukur sýndi ráðsfólki forvarnaplaggöt sem 8. bekkingar í Heppuskóla gerðu í lok forvarnavinnu sem hann ásamt Árna Pétri Hilmarssyni kennara í skólanum unnu með nemendunum í haust. Lauk vinnunni í byrjun desember með því að 8. bekkingar kynntu plaggötin sín fyrir öðrum nemendum Heppuskóla og í lokin fengu nemendur afhent viðurkenningaskjal fyrir þátttökuna og eins voru veitt verðlaun fyrir þrjú bestu plaggötin. Þá greindi Haukur frá því að hann og Sindri Ragnarsson starfsmaður í Þrykkjunni hefur farið í heimsókn í 6. og 7. bekk Hafnarskóla og gefið nemendum segulmiða með útivistarreglum og rætt við þau um útivist, reykingar og áfengi. Var skólanum gefin forvarnaplaggöt í lok þessara heimsóknar sem 8. bekkingar höfðu hannað. Þá hefur Nesjaskóla verið afhent plaggöt.

5. Humarhátíð 2004.
Ráðið ræddi síðustu Humarhátíð og þá sem framundan er. Ráðinu fannst að hátíðin í fyrra hefði verið á mörkum þess að fara úr böndum og lýsir áhyggjum yfir komandi hátíð ef engin breyting verður á tilhögun. Þá hefur það áhyggjur af mikilli drykkju unglinga á hátíðinni. Ráðinu finnst rétt að ræða næstu hátíð á breiðum grundvelli með þátttöku þeirra sem að henni koma beint og óbeint.

6. Önnur mál.
Friðrik lagði fram eftirfarandi bókun: Nú fer í hönd endurskoðun á þriggja og tíu ára fjárhagsáætlunum Sveitarfélagsins Hornafjarðar. Æskulýðs- og tómstundaráð skorar á háttvirta bæjarstjórn að taka nú myndarlega til hendinni hvað varðar uppbyggingu íþróttamannvirkja sem og eflingu þess íþrótta – og tómstundastarfs sem stundað er innan sveitarfélagsins. Minnt er á að á síðasta ári var lagt í mikla vinnu í stefnumótun málaflokksins og að ætla mætti að sú vinna komi að góðum notum við ákvörðunartöku við þessa endurskoðun. Það er von ráðsins að hægt verði að auka það fjármagn sem veitt er í þennan málaflokk umtalsvert frá því sem nú er.
Samþykkti ráðið bókunina.
Litboltafélag Hornafjarðar var til umræðu og greindi Gunnar Ingi frá reglum og starfsemi þess og leist ráðsmönnum vel á þetta framtak.
Ákveðið að fundir í febrúar og mars verði kl. 20:00.


Fundi slitið kl. 19:40.

Friðrik Ingvaldsson
Valdemar Einarsson
Gunnar Ingi Valgeirsson
Þórgunnur Torfadóttir
Elsa S. Elísdóttir

Haukur H. Þorvaldsson.