Fundargerð umhverfisnefndar 64

64. fundur

Fundur haldinn          Í umhverfisnefnd Hornafjarðar mánudaginn 8. janúar 2007

kl. 13:50 í Ráðhúsi Hornafjarðar.

 Mætt voru:     Sigurlaug Gissurardóttir, formaður, Valdemar Einarsson, Erna Gísladóttir, Miralem Haseta og Björn Arnarson.

Einnig: Hjalti Þór Vignisson.

 Sigurlaug bauð fundarmenn velkomna.  Gengið var til dagskrár:

 1.      Staðardagskrá 21.

Stefán Gíslason, verkefnisstjóri sd21, mætti á fundinn undir þessum lið ásamt Rannveigu Einarsdóttur og Elínu S. Harðardóttur. 

Stefán fór yfir hvernig verkefninu væri best fyrir komið hjá sveitarfélaginu.  Sagði hann að þrátt fyrir að Staðardagskrá 21 væri oft vistuð hjá umhverfisnefndum að þá væri áætlunin mun víðtækari.  Staðardagskrá 21 tekur til dæmis á fjölskyldumálum, þróun byggðar, menningarmálum og ferðaþjónustu.  

Umræða skapaðist um hvort ætti að fara í endurskoðun á staðardagskrá og í hvaða farvegi endurskoðunin ætti að vera.  Rætt um að ef farið verði í endurskoðun á staðardagskrá sé mikilvægt að fólk með mismunandi bakgrunn og þekkingu komi að vinnunni, t.d. tæknifólk og fólk sem vinnur að málefnum fjölskyldunnar.  Í framhaldinu var rætt um tímaramma endurskoðunarinnar.  Rætt um að gagnasöfnun yrði lokið í apríl 2007 og eiginleg vinna að endurskoðun og samráð við almenning hefjist að því loknu.  Á fundinum var rætt um að verklok yrðu eigi síðar en í apríl 2008.

Tillaga gerð um að umhverfisnefnd haldi utan um þessa vinnu og leiti eftir athugasemdum og tillögum frá öðrum nefndum og aðilum eftir atvikum. 

Umhverfisnefnd felur starfsmönnum að fara yfir Staðardagskrá 21 með tilliti til þess hvað búið er að gera, hvað hafi fengið minni áherslu í starfi sveitarfélagsins og hvernig Staðardagskrá 21 falli að annarri stefnumótun í sveitarfélaginu, t.d. skólastefnu og aðalskipulagi. 

 Stefán Gíslason kynnti einnig Green Globe vottunarkerfi fyrir samfélög.  Stefán taldi mikilvægt að samfélagið í heild tæki á umhverfismálum en ekki einstök fyrirtæki og það væri mikilvægur hluti af ímyndarsköpun.  Í framhaldi var rætt um vöxt ferðaþjónustu og mikilvægi þess að skipuleggja vöxtinn sem best.  Nefndarmenn telja mikilvægt að þegar tekin verði ákvörðun um þátttöku í Green Globe verði samspil þjóðgarðs, umhverfismála og ferðaþjónustu metin vandlega.

 2.      Samþykkt um fráveitur.

Lögð fram drög að samþykktum um fráveitur og losun og hreinsun rotþróa.  Umhverfisnefnd leggur til að framlögð drög leggi grunn að nýrri samþykkt fyrir Sveitarfélagið Hornafjörð.  Umhverfisnefnd beinir því til bæjarráðs að skoða sérstaklega lið um gjaldskrá og hvort uppbygging fráveitna skuli greidd með skattfé eða þjónustugjöldum.  Þá leggur umhverfisnefnd áherslu á að unnið verði að úrlausn fráveitumála fyrir dreifbýlið og frístundabyggðir.  Í því samhengi þarf bæði að gæta að tæmingu rotþróa og magninnkaupa á rotþróm.  Þá leggur umhverfisnefnd til að samþykkt Fljótsdalshéraðs um hreinsun, losun og frágang rotþróa verði höfð til hliðsjónar við þessa vinnu.

 3.      Refa- og minkaveiðar.

Hjalti gerði grein fyrir fyrirkomulagi varðandi refa- og minkaveiðar í sveitarfélaginu.  Kom fram í máli hans að veiðimenn telji að fjöldi refa og minka hafi aukist.  Einnig sagði hann að leit og veiðar á dýrum á ákveðnum svæðum væri ábótavant.  Gerði hann grein fyrir samtölum við bændur, veiðimenn og landeigendur. 

Umræðar sköpuðust um fyrirkomulag.  Nefndin felur starfsmönnum að gera tillögur að úrbótum.  Hugmyndir sköpuðust um árangurstengdar greiðslur.

4.      Umhverfisverðlaun Hornafjarðar.

Umhverfisnefnd telur afar brýnt að setja reglur um verðlaunin fyrir næsta ár.  Samþykkt að fela starfsmönnum að óska eftir tilnefningum fyrir 20. janúar.

 5.      Önnur mál.

·        Valdemar gerði grein fyrir heimsókn sinni í Sorpu í Reykjavík þar sem hann kynnti sér flokkun sorps og hvernig hægt er að standa að framkvæmd flokkunar.

·        Rætt um mikilvægi þess að haldin verði skrá um staði þar sem hætta er talin á að sjúkdómar leynist í jörðu, t.d. miltisbrandur.

Fundi slitið kl. 16.15