Fundargerð Umhverfisnefndar 37

37. fundur

Fundur haldinn Í Umhverfisnefnd Hornafjarðar í Ráðhúsinu miðvikudaginn
11. júní 2003 kl. 17:10 í Ráðhúsi Hornafjarðar.

Mætt voru: Egill Jónasson formaður, Rannveig Einarsdóttir, Olga Friðjónsdóttir, Björk Pálsdóttir, Eyjólfur Guðmundsson og starfsmenn nefndarinnar Helgi Már Pálsson og Valur Sveinsson.


1. Drög að náttúruverndaráætlun, umsögn.
Valur kynnti fyrstu drög að náttúruverndaráætlun frá starfshópi í Umhverfisráðuneytinu.
Nefndin telur að allt of skammur tími vegna svo viðamikils verkefnis sé ætlaður sveitarfélögum til umsagnar og harmar það að endanleg náttúruverndaráætlun skuli ekki koma til umsagnar sveitarfélaga áður en henni er vísað til þingsályktunar nú í haust. Einnig að ekki skuli vera haft samráð við hagsmunaaðila ( landeigendur ) eins og segir í meðfylgjandi bréfi.
Umhverfisnefndin gerir ekki athugasemdir við tillögurnar svo fremi sem landnýting verði með óbreyttum hætti. Umhverfisnefndin áskilur sér samt sem áður rétt til að gera athugasemdir við tillögurnar á síðari stigum málsins.
Að öðru leyti skal bent á eftirfarandi ;
Ekki er samræming milli teikningar og lýsinga, t.d. mörk friðlands í Lóni.
Á sæðinu, fjalllendi við Hoffellsjökul eru í dag skipulögð svæði fyrir skógrækt og þinglýstir skógræktarsamningar, auk þess sem að á gildandi aðalskipulagi eru opnar námur.
Misræmi er í gögnum hvað varðar Steinadal, þar sem hann hefur verndartillöguna, búsvæði í töflu 18. Tillögur um friðlýsingu svæðis á Austurlandi ( s. 77 ), en í viðauka VI - Tillögur á Austurlandi, sagður friðland. Ekki er talið að svæðinu stafi ógn af aukningu á frístundabyggð þar sem ekki eru uppi áform um þessháttar framkvæmdir, heldur stafi svæðin frekar ógn af lúpínu þar.
Á svæðinu Breiðamerkursandur - Kvíármýrakambur, er bent á í kafla um röskun, ógnir úrbætur : Efnistaka, grjótnám. Rétt er að benda á að á gildandi aðalskipulagi eru fjórar námur, þ.a. ein grjótnáma ( Breiðárlón )
Á svæðinu Skeiðarársandur er rétt að geta þess að ferðaþjónusta er stunduð á Skeiðarársandi, hestaferðir.


2. Beitilönd í nágrenni Hafnar og í Nesjum.
Rætt var um beitilönd á og í nágrenni Hafnar og ofan við Nesjahverfi í "landi" Austurhóls.
Nefndin er sammála um að hófleg beit verði leifð á Ytri Ægissíðu, en hindri þó ekki aðgengi fólks á göngustígum. Einnig verði leyfð hófleg beit í Nesjum í landi Austurhóls.

3. Vegabætur/varnargarður á Kollumúlaveg í Lóni.
Erindi frá bæjarráði vegna framkvæmdaleyfis við Kollumúlaveg. Dreift var umsögn Einars Þórarinssonar, eftirlitsráðgjafa Umhverfisstofnunar á Austurlandi, ódagsett ( barst á tölvupósti í morgun ).
Nefndin tekur undir athugasemdir Einars í hans umsögn vegna efasemda hans um gæði klapparinnar og byrjunarframkvæmdum verði hagað með þeim hætti sem þar kemur fram og fellst á að framkvæmdarleyfi verði veitt að því tilskyldu.
Einnig er því beint til vegagerðarinnar að þeir skilgreini aðrar grjótnámur í sveitarfélaginu þar sem nú standi yfir endurskoðun á gildandi aðalskipulagi til að forðast smákropp nokkrum dögum fyrir fyrirhugaðar framkvæmdir.

4. Önnur mál.
Rætt var um fernu- og blaðagáma við verslanir. Til stendur að bæta þessa aðstöðu. Um tilraun hefur verið að ræða og úrbætur eru væntanlegar.

Helgi Már kynnti fyrirhugaðar framkvæmdir vegna göngubrúara í Lóni.

Helgi Már sagðri frá fundi með fráveitunefnd fyrr í dag og kynnti lauslega forhönnunarskýrslu sem unnin hefur verið af Línuhönnun.
Fjallað verður um þessa skýrslu á næsta fundi.


Fundi slitið kl. 19:30

Egill Jónasson
Eyjólfur Guðmundsson
Rannveig Einarsdóttir
Björk Pálsdóttir
Olga Friðjónsdóttir

Helgi Már Pálsson
Valur Sveinsson