Fundargerð skóla, íþrótta og tómstundanefndar 22

22. fundur

Fundur haldinn    í skóla-, íþrótta- og tómstundanefnd Hornafjarðar miðvikudaginn 16. maí 2012 kl. 16:30 í ráðhúsi Hornafjarðar.  

Mætt voru:    Ásgerður K. Gylfadóttir, formaður, Arna Ósk Harðardóttir,  Ásgeir Ásgeirsson, Lovísa Bjarnadóttir, Matthildur Ásmundardóttir, Margrét Ingólfsdóttir, Snæfríður Svavarsdóttir, Harpa Þorgeirsdóttir, Ingibjörg Sveinsdóttir,  Stefanía Lóa Þórðardóttir, Hulda Laxdal Hauksdóttir, Magnhildur Gísladóttir, Árni Rúnar Þorvaldsson og Stefán Ólafsson.          

Samþykkt að bæta við nýjum lið á dagskrá, 8. liður, skóladagatal.

1.      Fundargerð 21. fundar

Engar athugasemdir gerðar.

2.      Málefni leikskólanna

Skólatíminn 16 – 17. Fram kom að þessi skólatími er ekki í boði á Lönguhólum á þessu skólaári, ekki hefur tekist að manna hann. Í Krakkakoti eru núna 2 börn á þessum tíma. Sótt hefur verið um skólavist fyrir eitt barn á þessum tíma af þeim hópi sem er að innritast í fyrsta skipti í leikskóla. Í ljósi þess að mjög fáir sækjast eftir þessum tíma, hann feli í sér mikinn kostnað og erfitt hefur verið að manna hann samþykkir skóla-, íþrótta- og tómstundanefnd að skólatíminn 16 -17 verði ekki í boði frá og með skólaárinu 2012 - 2013. Tveir nefndarmenn sátu hjá við afgreiðslu málsins. 

Kynning á námsferðum leikskólastarfsmanna. Tólf starfsmenn Krakkakots heimsóttu þrjá leikskóla í Malmö í Svíþjóð og kynntu sér leikskólastarfið. Aðspurð sagði Snæfríður að þessi heimsókn muni eflaust skila sér í leikskólastarfinu auk þess sem ferðin hafi verið hin ánægjulegasta.

Starfsmenn Lönguhóla heimsóttu leikskólana Aðalþing í Kópavogi og Rauðhól í Reykjavík. Í kjölfar þess hefur aldursskipting verði aukin í leikskólanum frá því sem nú er, kaffitímar starfsfólks breytast og salurinn nýttur sem matsalur fyrir tvær deildir. 

Leikskólastjórar gerðu grein fyrir samstarfi á milli leikskólanna og innra starfi þeirra.

Samstarf leikskóla og grunnskóla. Börn á lokaári leikskóla heimsækja grunnskólann  fimm sinnum yfir veturinn. Nemendur 1. bekkjar grunnskólans koma í eina heimsókn í  „gamla“ leikskólann sinn. Matta taldi að samstarf skólastiganna megi aukast í báðar áttir.

Rædd var stoðþjónusta í leikskólum og stuðningur við leikskólabörn, staða mála og hvað megi bæta á þessu sviði skólastarfsins. Samþykkt að unnið verði sambærilegt skjal vegna stoðþjónustu leikskóla og unnið var í Grunnskóla Hornafjarðar á þessu skólaári.

Leikskólastjórar ræddu samstarf  leikskóla og foreldra. Vilja auka virkni foreldraráðanna og foreldra almennt í leikskólastarfi.

Rætt var um mönnun leikskólanna og viðbrögð við auglýsingum eftir starfsfólki.

(Margrét, Snæfríður, Harpa og Ingibjörg sátu fundinn undir þessum lið.)

3.      Tónskóli A-Skaft., fjöldi kennslustunda 2012 - 2013                       

Farið yfir upplýsingar um fjölda kennslustunda og um leið þróun nemendafjölda á grunnskólastigi, sem er meirihluti nemenda skólans. Í vetur hafa verið kenndar 128 vikustundir, flestar voru þær 2008, samtals 153,5.

Skóla-, íþrótta- og tómstundanefnd samþykkir að heildarkennslustundafjöldi á viku í Tónskóla A-Skaft.- forskóli, einstaklingskennsla, tónfræði og hljómsveitaræfingar - verði 128 skólaárið 2012 – 2013.

4.      Túlkun (álit) mennta- og menningarmálaráðuneytis á skiptingu skóladaga í grunnskólum

(Hulda, Magnhildur og Stefanía Lóa komu inn á fundinn.)

Í áliti mennta- og menningarmálaráðuneytisins, vegna fyrirspurnar sem ráðuneytinu barst um skóladaga og útfærslu á þeim, kemur m.a. eftirfarandi fram: „Samkvæmt 1. mgr. 28. gr. laga um grunnskóla nr. 91/2008 skal starfstími nemenda í grunnskóla á hverju skólaári vera að lágmarki níu mánuðir og skóladagar nemenda eigi færri en 180 ... en í gildandi lögum er kveðið á um 170 kennsludaga nemenda að lágmarki á ári.  ... Ráðuneytið lítur svo á að skólum sé ekki heimilt miðað við 180 skóladaga að flokka fleiri en 10 skóladaga á hverju skólaári undir aðra skóladaga þar sem um mögulega skerta viðveru nemenda er að ræða, t.d. vegna skemmtana, foreldraviðtala eða prófa. ... 1. Ekki er heimilt að tvítelja skóladaga (staflaðir dagar).... 2. Ekki er heimilt að telja sem kennsludaga þá daga þar sem nemendur mæta eingöngu í skólann til að taka próf og fara svo strax að loknu prófi heim. ... 3. Ekki er heimilt að telja sem skóladaga samkomur á vegum skólans um helgar, t.d. vorhátíðir, íþróttahátíðir eða afmælishátíðir nema tryggt sé að allir starfsmenn skólans og nemendur taki þátt í skólastarfinu á umræddum dögum og að slíkt fyrirkomulag hafi verið samþykkt í starfsáætlun skólans. ... 4. Heimilt er að flokka vettvangsferðir og ferðalög sem kennsludaga að því tilskildu að nemendur séu skyldaðir til þátttöku og lengd ferðar sé a.m.k. sambærileg og samkvæmt stundaskrá á almennum kennsludegi.“

Fram hefur komið í Formannsfréttum Skólastjórafélags Íslands að félagið muni bregðast við þessu álit ráðuneytisins og mótmæla því.

5.      Verklagsreglur vegna reglugerðar um ábyrgð og skyldur aðila skólasamfélagsins í grunnskólum

Gerð grein fyrir leiðbeiningum og verklagsreglum vegna reglugerðar um ábyrgð og skyldur  aðila skólasamfélagsins (nr. 1040 frá 2011). Einnig greint frá starfsemi fagráðs vegna eineltismála í grunnskóla og verklagsreglum fagráðsins. Ásgerður sagðist fagna því að þessar verklagsreglur séu fram komnar. Hulda tók undir orð Ásgerðar. Þá voru kynntar verklagsreglur Árborgar um viðbrögð við verulegum frávikum nemenda frá ábyrgð og skyldum grunnskóla sem samþykktar voru í mars 2012. Starfsmanni falið að hefja vinnu við verklagsreglur.

6.      Rekstur grunnskóla, ákvörðun um fjölda kennslustunda

Gerð grein fyrir þróun kostnaðar í grunnskólum sveitarfélagsins tímabilið 2007 – 2011. Fram kom m.a. að kostnaður á nemanda í Grunnskóla Hornafjarðar árið 2011er kr. 1.176.627 og hefur hefur lækkað um kr. 100.475 á föstu verðlagi frá 2007. Þróun rekstrarkostnaðar í Grunnskóla Hornafjarðar er í samræmi við fækkun nemenda við skólann. Kostnaður á nemanda í Grunnskólanum í Hofgarði árið 2011er kr. 2.903.241 og hefur lækkað um kr. 317.217 á föstu verðlagi frá 2007. Nemendur í Hofgarði eru á þessu tímabili 8 – 12 en í Grunnskóla Hornafjarðar 284 – 330.  (Kostnaður við skólaakstur og mötuneytiskaup af verktökum eru ekki inni í þessum tölum.)

Árlegur kostnaður við skólaakstur í sveitarfélaginu, reiknaður á föstu verðlagi, hefur lækkað úr kr. 55.335.142 í kr. 27.070.721. Munar þar mestu um skólaakstur á milli Hafnar og Nesjaskóla sem lauk vorið 2009.

Hulda sagði það sína skoðun að í rekstrinum hafi verið skorið nokkuð inn að beini í rekstri Grunnskóla Hornafjarðar. Óskaði hún eftir að gefið verði aðeins meira til baka en hagrætt hefur verið í skólanum undanfarin ár. Hins vegar sagðist Hulda sátt við 30 kennslustunda fjölgun frá síðasta skólaári.

Skóla-, íþrótta- og tómstundanefnd leggur til að tekið verði mið af fjölda nemenda (bekkjardeilda) við úthlutun kennslustunda til Grunnskóla Hornafjarðar. Þeim fækkaði um 30 vikulegar kennslustundir á yfirstandandi skólaári frá skólaárinu á undan vegna fækkunar nemenda. Vegna fjölgunar nemenda og bekkjardeilda á næsta skólaári er lagt til að vikulegum kennslustundum verði fjölgað um 30, verði 867. Ekki er lögð til breyting á fjölda kennslustunda í Grunnskólanum í Hofgarði.

7.      Vistun nemenda úr Öræfum sem eru í Grunnskóla Hornafjarðar

Á þessu skólaári er einn nemandi úr Öræfum í Grunnskóla Hornafjarðar og býr hann í heimahúsi á Höfn. Gert er ráð fyrir að nemendur úr Öræfum verði 3 á næsta skólaári. Stefán gerði grein fyrir viðtölum sínum við foreldra grunnskólabarna í Öræfum sem sækja munu Grunnskóla Hornafjarðar. Fram kom að uppi eru skiptar skoðanir um vistun, sumir vilja koma á fót heimavist en aðrir nýta gistingu í heimahúsum.

Skóla-, íþrótta- og tómstundanefnd samþykkir að nemendur úr Öræfum, sem sækja Grunnskóla Hornafjarðar, verði í heimahúsi á næsta skólaári.  

8.      Skóladagatal Grunnskóla Hornafjarðar

Lagt fram skóladagatal Grunnskóla Hornafjarðar og var það samþykkt samhljóma.

9.      Könnun á vímuefnanotkun nemenda í 8. – 10. bekk

Stefán             gerði grein fyrir samskiptum sínum við starfsmann Rannsókna og greiningar og kostnaði við að fá upplýsingar um vímuefnanotkun þessa aldurshóps í sveitarfélaginu frá fyrirtækinu. Skóla-, íþrótta- og tómstundanefnd leggur til að fengnar verði upplýsingar frá Rannsóknum og greiningu um vímuefnanotkun nemenda. Vísað til starfsmanns að finna lausn á á fjármögnun verkefnisins.  (Hulda, Magnhildur og Stefanía Lóa viku af fundi.)

10.  Félagsmiðstöð, lengd viðvera og ráðning tómstundafulltrúa

(Árni Rúnar kom inn á fundinn.)

Farið yfir minnisblað um félagsmiðstöð, dags. 27. apríl 2012.        

Skóla-, íþrótta- og tómstundanefnd leggur til að auglýst verði staða tómstundafulltrúa í samræmi við minnisblaðið.

11.  Stefnumótun í æskulýðs-, íþrótta- og tómstundamálum

Farið yfir drög að stefnumótun. Lagt til að drögin verði kynnt í bæjarráði. Í kjölfarið komi nefndin saman til vinnufundar um stefnumótunina.

12.  Önnur mál  

Matthildur gerði að umtalsefni ferðakostnað vegna íþróttakeppna. Benti hún m.a. á  umræðu og áskoranir sem fram komu í Austurglugganum um að bæjaryfirvöld taki sig saman og þrýsti á stjórnvöld að styðja við íþróttafélög á landsbyggðinni vegna þátttöku þeirra í keppnum. Starfsmanni falið að afla upplýsinga um ferðakostnað íþróttamanna á Hornafirði.

13.  Einstaklingsmál

Fært í trúnaðarbók.

Fundi slitið kl. 19:55