Fundargerð skóla-, íþrótta- og tómstundanefndar 17

17. fundur

Fundur haldinn    í skóla-, íþrótta- og tómstundanefnd Hornafjarðar miðvikudaginn 14. desember 2011 kl. 16:30 í ráðhúsi Hornafjarðar.  

Mætt voru:    Ásgerður K. Gylfadóttir, formaður, Arna Ósk Harðardóttir,  Ásgeir Ásgeirsson, Lovísa Rósa Bjarnadóttir, Matthildur Ásmundardóttir, Stefanía Lóa Þórðardóttir, Magnhildur Gísladóttir, Hulda Laxdal Hauksdóttir og Stefán Ólafsson.          

1.      Fundargerð 16. fundar

Engar athugasemdir gerðar.

2.      Niðurstöður samræmdra prófa í 4., 7. og 10. bekk

Farið yfir útsend gögn, yfirlit yfir niðurstöður í samræmdum (könnunar-)prófum í Grunnskóla Hornafjarðar og forverum hans 2003 – 2011. Fram kemur í yfirlitinu að á umræddu tímabili hafi skólarnir almennt verið undir landsmeðaltali í þessum prófum, þó ekki sé það án án undantekninga. Umræður urðu um þessar niðurstöður og ástæður fyrir þeim. Hulda benti á að niðurstöður samræmdra prófa og einstakra prófþátta nýtist kennurum vel sem vinnutæki. Magnhildur taldi að skólinn þyrfti að vera meira vakandi yfir þessum þætti skólastarfsins. Matthildur spurði hvort krafan um árangur væri nógu ákveðin.

Undir þessum lið var einnig fjallað um tillögu bæjarfulltrúa Samfylkingarinnar sem hann flutti á 174. fundi bæjarstjórnar þar sem lagt er til að skóla -, íþrótta – og tómstundanefnd .. meti hvort ástæða sé til að setja á fót starfshóp til þess að greina námsárangur nemenda Grunnskóla Hornafjarðar á samræmdum prófum. Bæjarstjórn vísaði tillögunni til umræðu í skóla-, íþrótta- og tómstundanefnd.  

Ásgerður greindi frá framangreindri tillögu bæjarfulltrúa Samfylkingarinnar í bæjarstjórn.  Hún lagði í framhaldinu áherslu á mikilvægi þess að tryggja góðan árangur í skólastarfinu.  Vísaði hún í nýja aðalnámskrá og að innleiðingarferli hennar ætti meðal annars að miðast út frá umræðunni um árangur í skólastarfi. 

Undir umræðu um samræmd próf og framangreinda tillögu greindi Hulda frá að hverjum skóla væri lögbundið að vera með innra mat þar sem niðurstöður samræmdra prófa væru skoðaðar ásamt öllum öðrum þáttum skólastarfsins. Í kjölfar mats væri komið með úrbótaáætlanir í þeim þáttum sem talið væri eðlilegt að bregðast þyrfti við. Allir þættir skólastarfsins væru mikilvægir, samræmdu prófin þar meðtalin en skólastjórnendur teldu ekki ástæðu til að taka einn þátt út og rannsaka sérstaklega þegar allt skólastarf væri undir í innra mati skólans. Þá fyndist skólastjórnendum ástæða til að benda á þær miklu breytingar sem átt hafa sér stað á undanförnum árum í starfi grunnskólans. Þær breytingar hafi skapað mikið álag á alla starfsmenn skólans og mikilvægt væri að þeir geti nú beint kröftum sínum í meira mæli að nemendum og námi þeirra. Einnig greindi Hulda frá fyrirhugaðri vinnu vegna innleiðingar nýrrar aðalnámskrár en samkvæmt henni muni verða veruleg breyting á flestum þáttum skólastarfsins. Þar biði skólans mikil vinna þar sem allir þættir skólastarfs væru undir, þar með talið námsmat og árangur í skólastarfi. Hulda sagði einnig að það væri ósk skólastjórnenda að skólanefnd standi við bakið á skólanum við innleiðingu nýrrar aðalnámskrár.

Matthildur spurði  hvort ástæða væri til að skólarnir hér ættu að eiga sér stuðningsskóla og vitnaði í því sambandi m.a. í úttektarskýrslu vegna Grunnskóla Hornafjarðar.

Ásgerður bar upp eftirfarandi tillögu:

Skóla-, íþrótta- og tómstundanefnd leggur áherslu á þá ferla sem eru innan skólans í innra mati, bæði á námsárangri og öðrum þáttum  skólastarfs. Miklar breytingar eru framundan við innleiðingu nýrrar aðalnámskrár og vill skóla-, íþrótta- og tómstundanefnd leggja áherslu á að styðja við bakið á skólunum í þeirri vinnu. Hvernig til tekst við innleiðingu nýrrar aðalnámskrár mun væntanlega sjást í niðurstöðum samræmdra prófa næstu árin. Um leið er lögð áhersla á að námsárangur viðhaldist og helst styrkist alla skólagönguna.

Skóla-, íþrótta- og tómstundanefnd samþykkt bókunina samhljóða.  

3.      Tillaga um að skoða aðild sveitarfélagsins að Skólaskrifstofu Suðurlands

Bæjarfulltrúi Samfylkingarinnar flutti á 174. fundi bæjarstjórnar eftirfarandi tillögu sem vísað var til skóla-, íþrótta og tómstundanefndar:  „Bæjarstjórn felur skóla - , íþrótta – og tómstundanefnd að kanna kosti þess að Sveitarfélagið Hornafjörður gerist aðili að Skólaskrifstofu Suðurlands.“

Hulda lagði áherslu á að leitað verði leiða til að efla stuðning við skólastarf.

Skóla-, íþrótta- og tómstundanefnd felur formanni og starfsmanni nefndarinnar að afla upplýsinga sem varða þetta mál og kynna á næsta fundi nefndarinnar.  

4.      Erindisbréf ungmennaráðs Hornafjarðar

Á 568. fundi bæjarráðs var  skóla-, íþrótta- og tómstundanefnd falið að endurskoða erindisbréf ungmennaráðs. Nefndin samþykkir að vísa vinnu við endurskoðun á erindisbréfinu til starfsmanna og til umfjöllunar í ungmennaráði. Niðurstöður þeirrar vinnu verði kynntar á næsta fundi nefndarinnar.

Matthildur vakti athygli á ráðstefnu sem haldin verður í mars nk. – Ungt fólk og lýðræði, haldin á Hótel Örk í Hveragerði.

Undir þessum lið var einnig kynnt 1. fundargerð ungmennaráðs, dags. 17. nóvember 2011.

5.      Athugasemd mennta- og menningarmálaráðuneytis um fjölda skóladaga í grunnskólum 2010 – 2011

Fram kemur í bréfi ráðuneytisins að skóladagar í Grunnskóla Hornafjarðar hafi verið 178 en eigi að vera 180. Starfsmanni nefndarinnar og skólastjórnendum falið að svara bréfi ráðuneytisins.

6.      Önnur mál 

Greint frá kynningarfundi um aðalnámskrá leik-, grunn- og framhaldsskóla sem haldinn verður í Nýheimum 13. janúar nk.

Matthildur lýsti yfir ánægju með útieldstó á Lönguhólum, sem var vígð fyrir skömmu.

Fundi slitið kl. 17: 55