Fundargerð skóla, íþrótta og tómstundanefndar 16

16. fundur

Fundur haldinn    í skóla-, íþrótta- og tómstundanefnd Hornafjarðar miðvikudaginn 16. nóvember 2011 kl. 16:30 í ráðhúsi Hornafjarðar.    

Mætt voru:    Ásgerður K. Gylfadóttir, formaður, Arna Ósk Harðardóttir,  Ásgeir Ásgeirsson, Lovísa Rósa Bjarnadóttir, Matthildur Ásmundardóttir, Margrét Ingólfsdóttir, Ingibjörg Sveinsdóttir, Hera Guðmundsdóttir, Stefanía Lóa Þórðardóttir, Hulda Laxdal Hauksdóttir, Gunnar Ingi Valgeirsson og Stefán Ólafsson.           

1.      Fundargerð 15. fundar

Engar athugasemdir gerðar.

2.      Fjárhagsáætlanir 2012

Farið yfir fyrirliggjandi gögn. Gert er ráð fyrir að til fræðslu- og uppeldismála verði varið kr. 630.940.000. Til æskulýðs- og íþróttamála verði varið kr. 155.753.000.-, þar af til sundlaugar kr. 78.900.000.

3.      Sundlaug Hafnar – fjöldi gesta

Gestum í sundlaug hefur fækkað á milli ára. Fyrstu tíu mánuði ársins 2010 voru þeir 52.095 en í ár voru gestir fyrstu tíu mánuðina 44.346, þ.e. 7749 færri gestir. Mismunurinn júní – ágúst á milli ára er 4710. Rætt um áhrif veðurs á aðsókn í sundlaug, aðgangsgjalds og áhrif nýrra reglna um sundstaði.  Undir þessum lið var rætt um geymslu fyrir ýmsa muni og tæki sem nýtt eru af sundkennurum og starfsmönnum sundlaugar.

4.      Ósk íþróttakennara við Grunnskóla Hornafjarðar um aðgang að sundlaug án greiðslu

Í bréfi íþróttakennara er farið fram á að þeir fái aðgang að sundlaug án greiðslu aðgangseyris vegna starfs þeirra þar sem áhersla er lögð á sundþjálfun sundkennara og um leið skyldu þeirra til að standast próf sundlaugarvarða.  

Skóla-, íþrótta- og tómstundanefnd samþykkir að sundkennarar fái frítt í sund frá 1. september til 31. maí.

5.      Gjaldskrár

Greint frá ákvörðun bæjarráðs um gjaldskrár. Einnig farið yfir hugmyndir forstöðumanns íþróttamannvirkja um aðgangseyri að sundlaug og hvaða áhrif þær hefðu á tekjur sundlaugar. Skóla-, íþrótta- og tómstundanefnd samþykkir að vísa tillögu (1) forstöðumanns íþróttamannvirkja með áorðnum breytingum til bæjarráðs. (Gunnar Ingi vék af fundi)

6.      Skýrsla starfshóps um stuðning við skólastarf

Á 12. fundi skóla-, íþrótta- og tómstundanefndar var samþykkt að fela leikskólastjórum, skólastjórum grunnskólanna, skólastjóra tónskólans og framkvæmdastjóra sviðsins að móta tillögur um stuðning við skólastarf. Farið yfir tillögur starfshópsins og svör fjögurra skólaskrifstofa sem svöruðu spurningum um stuðning viðkomandi sveitarfélaga við skólastarf. Margrét sagði að starfshópurinn bjóðist til að koma að áframhaldandi vinnu við þessi mál.

Skóla-, íþrótta- og tómstundanefnd leggur til að skýrslunni og tillögum sem þar er að finna verði vísað til bæjarráðs til áframhaldandi vinnu.   

7.      Staðsetning 7. bekkjar í Grunnskóla Hornafjarðar

Undir þessum lið var farið yfir kannanir skólans á líðan nemenda í 7. bekk á yfirstandandi skólaári og því síðasta. Könnun sem lögð er fyrir nemendur og foreldra þeirra. Fram kemur að miklum meirihluta nemenda líður vel í skólanum, samkvæmt niðurstöðum könnunarinnar. Skólastjóri og kennari við skólann sem sátu fundinn sögðu að reynslan af veru 7. bekkjar í Heppuskóla væri góð. Fram kom að nemendur í 7. bekk hafi sína heimastofu og umsjónarkennari þeirra kenni verulegan hluta námsgreina í bekknum. Fulltrúi foreldra sagðist ekki hafa orðið var óánægju með núverandi staðsetningu 7. bekkjar. Skólanefndarmaður sagðist bæði hafa heyrt jákvæðar og neikvæðar raddir meðal foreldra.  

Skóla-, íþrótta- og tómstundanefnd leggur til að 7. bekkur verði í Heppuskóla.   

8.      Niðurstöður samræmdra könnunarprófa

Samkvæmt niðurstöðum samræmdra könnunarprófa í 4., 7. og 10. bekk er árangur nemenda í í sveitarfélaginu undir landsmeðaltali. Lovísa spurði hvort eitthvað væri gert innan skólans með niðurstöður prófanna. Hulda sagði prófin vera notuð sem tæki til að upplýsa nemendur og kennara þeirra. Einnig spurði Lovísa hvernig bæta mætti árangur nemenda. Hulda sagðist hafa trú á að einstaklingsmiðun náms væri eitt af því sem muni bæta árangurinn.

9.      Upplýsingar um aldur barna við upphaf leikskólagöngu

Samkvæmt upplýsingum sem komu frá  15 sveitarfélögum (skólaskrifstofum) hefja börn leikskólagöngu frá 12 – 24 mánaða aldri, misjafnt eftir sveitarfélögum.

10.  Reglugerð um ábyrgð og skyldur aðila skólasamfélagsins í grunnskólum

Reglugerðin (nr. 1040/2011) tekur á ábyrgð, réttindum og skyldum starfsfólks grunnskóla, nemenda og foreldra. Einnig skólabrag, skólareglum, brotum á þeim og málsmeðferð vegna brota nemenda á skólareglum. Undir þessum lið var rætt um einelti í skóla og lausn á þeim. Skólastjóri sagði flest slík mál leysast en vissulega geta komið upp mál sem erfiðara er að leysa. Í eineltismálum er unnið eftir fyrirfram ákveðnum verkferlum.

11.  Önnur mál 

Engin fram borin.  

Fundi slitið kl. 19:25