Fundargerð Skólanefndar 55

55. fundur

Fundur haldinn í ráðhúsinu, miðvikudaginn 19. nóvember 2003 kl. 16.10

Mætt voru: Sigríður Kristinsdóttir, Bryndís Hólmarsdóttir, Elín Magnúsdóttir, Ólöf Þórhalla Magnúsdóttir, Valdís Kjartansdóttir, Sævar Þór Gylfason, Guðmundur Ingi Sigbjörnsson, Stefán Ólafsson.

Gengið var til dagskrár og eftirfarandi tekið fyrir:

1. Fundargerð 54. fundar
Engar athugasemdir gerðar.

2. Samræmd próf í Heppuskóla 1981 – 2002 og samræmd könnunarpróf í Hafnarskóla 1996 – 2002
Stefán fór yfir samantekt sína um þróun einkunna og stöðu hornfirsku skólanna í samanburði við gengi annarra skóla. Fram kom sú skoðun að árangur á samræmdum prófum sé ekki nógu góður og fyllsta ástæða til að hafa áhyggjur af honum. Ekki dugi að ræða þessi mál og gera ekkert. Miklar umræður voru um árangurinn og velt upp ýmsum hugmyndum hvað ræður honum. Rætt var m.a. um of tíð kennaraskipti, hátt hlutfall leiðbeinenda í kennslu, breytt samfélag, samvinnu foreldra og skóla, heimanám og möguleika foreldra til að aðstoða börnin, félagslíf í skólum sem var meira innan skólans en nú er. Guðmundur velti upp þeirri hugmynd hvort skólarnir eigi að bera ábyrgð á félagslífi ungmenna í stað félagsmiðstöðvar sem borin er uppi af örðum en starfsmönnum skólanna. Sagði hann um þetta skiptar skoðanir og ekki fælist í hugmyndinni vantraust á því sem gert er með ungmennum í félagsmiðstöð. Rætt var um nemendaferðir sem hluta af skólastarfi og mikilvægi þeirra fyrir skólastarfið.

3. Fjárhagsáætlun 2004
Greint frá vinnu við gerð fjárhagsáætlunar næsta árs og fjárhagsrömmum sem sendir hafa verið til forstöðumanna. Ljóst er að gæta verður fyllsta aðhalds vegna samdráttar í tekjum sveitarfélagsins. (Þórhalla vék af fundi) Undir þessum lið var m.a. rætt um viðhaldsáætlun og framkvæmdaáætlun fyrir stofnanir á fræðslusviði, fyrirhugaða breytingu á smíðastofu í Heppuskóla í kennslustofu fyrir raunvísindi. Rætt var um kröfur eldvarnaeftirlits, þar á meðal um breytingar á efri hæð Heppuskóla, flóttaleiðir o. fl. Stefán taldi mikilvægt að áður en farið verður út í gagngerar endurbætur á veggjum og loftklæðningu í Heppuskóla fari fram umræða um skipulag efri hæðar skólans með tilliti til breyttra kennsluhátta. Sagði hann hina hefðbundnu kennslustofu, sem breyttist lítið alla síðustu öld, tæplega standa óbreytta í margra áratugi á nýrri öld. Tók Guðmundur undir þessi orð og sagði það ætti að vera markmið að á næsta ári komi fram tillögur um hvernig við viljum sjá húsnæðið líta út til frambúðar. Einnig lagði hann á það áherslu að núverandi smíðahúsi verði breytt í almenna kennslustofu fyrir næsta skólár. Skólanefndarmenn lögðu áherslu á að þetta gangi eftir. (Guðmundur vék af fundi).

4. Önnur mál

• Valdís ræddi forföll kennara og að ekki sé alltaf hægt finna annan kennara til að sinna kennslunni í stað þeirra sem ekki mæta. Spurði hvort ekki mætti ráða sérstaka forfallakennara. Skólanefnd felur framkvæmdastjóra að kanna forföll og frí kennara og hvernig kennslu er háttað þann tíma. Einnig var rætt um frí nemenda á skólatíma.
• Greint frá hinum árlegu skólatónleikum á vegum „Tónlistar fyrir alla” sem fyrirhugaðir eru 20. nóvember. Greiðsla skólanna fyrir þessa tónleika er samtals um 65.000. krónur.
• Rætt um handmenntastofur í Vöruhúsi KASK. Greint frá því að tilboði sveitarfélagsins hafi verið tekið en ekki sé búið að undirrita samning.
• Afhentur var bæklingurinn "Einelti meðal barna og unglinga"


Fundi slitið kl.18:35