Fundargerð skóla, íþrótta og tómstundanefndar 12

12. fundur

Fundur haldinn    í skóla-, íþrótta- og tómstundanefnd Hornafjarðar miðvikudaginn 15. júní 2011 kl. 16:30 í ráðhúsi Hornafjarðar.  

Mætt voru:    Ásgerður K. Gylfadóttir, formaður, Arna Ósk Harðardóttir,  Lovísa Rósa Bjarnadóttir, Matthildur Ásmundardóttir, Þórgunnur Torfadóttir, Gunnar Ingi Valgeirsson, Snæfríður Svavarsdóttir, Gunnhildur Gísladóttir og Stefán Ólafsson.           

1.      Fundargerð 11. fundar

Engar athugasemdir gerðar.

2.      Starfsemi íþróttamiðstöðvar

Ásgerður bauð Gunnar Ingi Valgeirsson, forstöðumann íþróttamannvirkja, velkominn til starfa og velkominn á fundinn. Gerði hann grein fyrir sínu starfi, starfsemi íþróttamiðstöðvar, starfsmannamálum o.fl. þáttum. Sagði hann mesta vinnu vera við sundlaugina en þar hafi verið skortur á starfsfólki. 15891 gestur hafa komið í sundlaugina frá janúar til maí á þessu ári en 18941á sama tíma í fyrra. Gunnar Ingi gerði að umtalsefni nýjar reglur um sundstaði og áhrif þau sem reglurnar hafa.  Einnig ræddi Gunnar Ingi íþróttavellina, eftirlit og viðhald á þeim.  Miklar umræður voru um íþróttamannvirki og starfsemi þeirra. (Gunnar Ingi vék af fundi.)

3.      Stoðþjónusta og lög um leik- og grunnskóla

Farið yfir minnisblað bæjarstjóra og framkvæmdastjóra sviðsins, dags. júní 2011. Þórgunnur sagði það sína skoðun að miðað við minnisblaðið sé þetta of loðið, ekki sé ljóst hvert stefnt sé með þessari vinnu. Samþykkt að fela leikskólastjórum, skólastjórum grunnskólanna, skólastjóra tónskólans og framkvæmdastjóra sviðsins að móta tillögur um þau álitamál sem uppi eru í þessum málaflokki, sbr. minnisblaðið.  Framkvæmdastjóra sviðsins falið að kalla hópinn saman og skal hann hafa lokið störfum eigi síðar en 1. nóvember 2011.

4.      Skólatíminn 16 – 17 í lengdri viðveru

Fram kom að mjög fáir nemendur nýta þennan tíma, eru oft einn til tveir jafnvel ekkert nýttur. Skólanefnd samþykkir að stytta opnunartíma lengdrar viðveru í Grunnskóla Hornafjarðar þannig að hann verði til kl. 16:00 frá og með næsta skólaári.    

5.      Skólatíminn 16 – 17 í leikskólum

Eftir klukkan 16 eru fá börn í leikskólunum sveitarfélagsins. Erfitt hefur verið að manna þennan tíma en a.m.k. tveir starfsmenn þurfa að vera á vakt í hvorum skóla. Flest börn sem eru á þessum tíma í leikskóla hafa lokið 9 – 9 ½  klukkutíma skóladegi klukkan 17 (17:15). Í umræðum um þetta mál komu fram ábendingar um kröfur atvinnulífsins um að hafa fólk í vinnu á þessum tíma á meðan algeng skoðun sé að skóladagur leikskólabarna eigi ekki að vera umfram 8 klst. Fram kom að á Lönguhólum skorti nú þegar starfsfólk eftir kl. 16 og ekki líti vel út fyrir næsta skólaár. Matthildur velti upp hugmynd um að kannað verði meðal þeirra foreldra leikskólabarna sem eru að nýta þennan tíma hvernig þeir gætu brugðist við lokun leikskóla kl. 16:15. Einnig benti hún ásamt fleiri fundarmönnum á að hafa mætti 9. tímann dýrari.

6.      Reglur um akstur með leikskólabörn í skólabílum fyrir grunnskólanemendur

Skólanefnd felur starfsmanni nefndarinnar að gera drög að reglum um akstur með leikskólabörn í skólabílum fyrir grunnskólanema. Þar verði m.a. horft til lágmarksaldurs leikskólabarnanna sem kunna að verða í þeim akstri. Fram kom það sjónarmið að miða skuli við að akstur með leikskólabörn verði eingöngu fyrir síðasta árgang leikskólabarna.

7.      Skóladagatal leikskólanna

Snæfríður fór yfir dagatalið og útskýrði það. Einnig greindi Snæfríður frá hugmynd um námsferð starfsmanna beggja leikskólanna í apríl 2012. Skólanefnd samþykkir dagatal leikskólanna fyrir skólaárið 2011 - 2012.

8.      6. leikskóladeildin, viðbygging við Krakkakot

Farið yfir tillögu meirihluta bæjarstjórnar sem samþykkt var  á 169. fundi um „viðbyggingu við Krakkakot þannig að frá og með haustinu 2012 verði tveir þriggja deilda leikskólar á Höfn.“  Einnig farið yfir bókanir Samfylkingar og Sjálfstæðisflokksins um leikskólamál á sama fundi. Lovísa sagðist taka undir bókun Sjálfstæðisflokksins á bæjarstjórnarfundi um að stefnt verði að einum 6 deilda leikskóla í framtíðinni. Matthildur tók undir orð Lovísu sem og sambærilega bókun fulltrúa Samfylkingar í bæjarstjórn.

9.      Forvarnir

Ásgerður fór yfir málið. Greindi hún frá þeirri vinnu sem í gangi er hjá grasrótarhópi um forvarnir. Meðal annars sé stefnt að forvarnarþingi í haust. Rætt var um forvarnir í víðum skilningi, nauðsynlegan áróður o.fl. og að ákveðinn starfsmaður þurfi að sjá um málaflokkinn.  Beint til starfsmanns nefndarinnar að koma því á framfæri til þeirra sem sjá um Humarhátíð að í prentuðu efni sem út verður gefið í sambandi við hátíðina verði ábendingar um forvarnir. Rætt var um nauðsyn þess að fara í endurskoðun á forvarnastefnu sveitarfélagsins.

10.  Samkomulag um tónlistarfræðslu

Farið yfir samkomulag mennta- og menningarmálaráðuneytis og Sambands íslenskra sveitarfélaga „um eflingu tónlistarnáms og jöfnun á aðstöðumun nemenda til tónlistarnáms.“ Á grundvelli þessa samkomulagsins á nemandi að geta skráð sig í framhaldsnám í tónlistarskóla hvar sem er á landinu. Sama á við um miðnám í söng. Þeir fjármunir sem koma frá ríkinu skv. samkomulaginu eiga síðan að tryggja að kennslukostnaður verði greiddur að fullu án þess að sveitarfélögin þurfi að semja um það sín á milli.

 11.  Önnur mál

·         Snæfríður greindi frá því að sum börn megi ekki borða ýmsa fæðu vegna óþols. Lagði hún til að bætt verði inn í reglur um leikskóla ákvæði um að ef barn greinist með óþol, ofnæmi, astma eða annað sem krefst sérstakrar meðhöndlunar í leikskóla, skuli skila læknisvottorði því til staðfestingar.  Skólanefnd sammála um að taka reglur um leikskóla til skoðunar í ágúst nk. 

·         Bent á að „stubbahús“ fyrir vindlinga á sundlaug megi ekki vera þar samkvæmt lögum.

 Fundi slitið kl. 18:50