Fundargerð skóla, íþrótta- og tómstundanefndar 10

10. fundur

Fundur haldinn    í skóla-, íþrótta- og tómstundanefnd Hornafjarðar miðvikudaginn 27. apríl 2011 kl. 16:30 í ráðhúsi Hornafjarðar.  

Mætt voru:    Ásgerður K. Gylfadóttir, formaður, Arna Ósk Harðardóttir,  Ottó Marvin Gunnarsson, Lovísa Rósa Bjarnadóttir, Matthildur Ásmundardóttir, Hulda Laxdal Hauksdóttir, Stefanía Lóa Þórðardóttir, Snæfríður Svavarsdóttir, Harpa Þorgeirsdóttir og Stefán Ólafsson.           

1.      Fundargerð 9. fundar

Margrét Ingólfsdóttir sendi inn eftirfarandi athugasemd:  Varðar 5. lið í fundargerð þar sem haft er eftir mér að „ Lönguhólar hafa ákveðið að fara í vinnu með málörvun en munu þó ekki senda inn umsókn til ráðuneytisins.“  Á fundi skólanefndar sagði ég að okkur hafi borist  pósturinn of seint svo við höfðum ekki tök á að senda inn umsókn til ráðuneytisins.

Lönguhólar ætla þrátt fyrir það að fara yfir þá málörvunar vinnu sem er í gangi í leikskólanum og meta hvað mætti betur fara.

2.      Skóladagatal grunnskólanna

Lögð fram skóladagatöl Grunnskóla Hornafjarðar og Grunnskólans í Hofgarði og þau samþykkt.

3.      Bréf skólastjórnenda leik-, grunn- og tónskóla, dags. 6. apríl 2011, vísað til nefndarinnar af bæjarráði

Í öðru bréfinu er lögð áhersla á mikilvægi þess að hafa tengingu við „öfluga skólaskrifstofu þar sem starfsmenn geta leitað faglegrar ráðgjafar.“  Í hinu bréfinu er lögð áhersla á „að á vegum sveitarfélaga sé hægt að fá leiðbeiningar um hvernig eigi að vinna ákveðnar skýrslur, stefnur eða áætlanir sem kveðið er á um í lögum að eigi að vera til í hverjum skóla.“ Bréfin eru undirrituð af stjórnendum leikskóla, grunnskóla og tónskóla. Fram kom í máli framkvæmdastjóra sviðsins að hann hafi ekki setið þennan fund og ekki vitað um samþykktir skólastjórnenda. Hulda greindi frá tilurð bréfanna og sameiginlegum fundum skólastjórnenda sem hafa verið þrír á þessu skólaári. Sagði skólana fást við marga sameiginlega hluti sem þeir vilja ræða saman. Einnig fjallaði Hulda um áhrif úttektar þeirrar sem unnin var á Grunnskóla Hornafjarðar.  Þá ræddi hún stórar skólaskrifstofur sem hafa mikinn mannafla og marga sérfræðinga. Til þeirra gæti verið gott að leita með ýmis mál. Ásgerður sagði að skoða þurfi málið í heild sinni, sagði í bréfunum koma fram marga góða punkta.  Einnig ræddi hún fyrirhugað námskeið fyrir skólanefndir og að þar muni væntanlega bera á góma mörg mál sem varpað er fram í bréfum skólastjórnenda.  

4.      Niðurstöður íbúaþings - leiðarljós og starfsmarkmið, mál sem snúa að skóla-, íþrótta- og tómstundanefnd

Greint frá erindi bæjarstjóra og farið yfir þá þætti í niðurstöðum íbúaþings sem snúa að skóla-, íþrótta- og tómstundanefnd. Nokkrar breytingatillögur og viðbætur voru gerðar við fyrirliggjandi starfsmarkmið og þær skráðar niður. Samþykkt að senda breytingartillögur í tölvupósti á fundarmenn.

5.      Fundargerðir rýnihóps um leikskólamál

Farið yfir 1. og 2. fundargerð rýnihóps um leikskólamál. Á fundum rýnihópsins hefur m.a. verið farið yfir skýrslu um leikskólamál, stjórnskipulag leikskóla, biðlista í leikskóla, reglur um leikskóla, fjallað um húsnæði leikskólanna, kynntar viðmiðunarreglur 14 sveitarfélaga um fjölda barna í leikskólum, samvinnu á milli leikskólanna o.fl. sem varðar leikskóla og starfsemi þeirra.

Skóla-, íþrótta- og tómstundanefnd leggur til að við ákvörðun um fjölda barna samtímis í leikskóla verði hafðar til hliðsjónar viðmiðanir eldri reglugerðar um leikskóla (nr. 225/1995) ásamt gildandi reglugerð og lögum líkt og fjölmörg sveitarfélög gera í dag. Með því móti megi fjölga börnum í báðum leikskólum frá því sem nú er og minnka til muna biðlista sem til staðar eru.

Harpa lagði áherslu á að einnig þurfi að horfa til mismunandi einstaklinga, sbr. ný lög um leikskóla. Snæfríður lagði einnig áherslu á að við ákvörðun um fjölda barna í leikskóla þurfi að horfa til hinna nýju laga sem samþykkt hafa verið.

6.      Akstur með leikskólabörn í skólabílum

Greint frá fyrirkomulagi við akstur leikskólabarna í skólabílum, þ.e. þeirra sem búa í dreifbýli. Urðu verulegar umræður um akstur með leiksskólabörn í skólabílum. Rædd var nauðsyn á gæslu í skólabílum sem flytja svo ung börn. Fundarmenn almennt sammála um að setja þurfi reglur um akstur með leikskólabörn í skólabílum. Einnig lögð áhersla á að samræmi sé á milli leikskólanna um þjónustu við leikskólabörn sem eru í þessum akstri. Fram kom hjá Hörpu að það er eins í báðum skólum. Vísað til starfsmanns nefndarinnar að vinna drög að reglum um þennan akstur.  

7.      Bréf mennta- og menningarmálaráðuneytisins, endurskoðuð drög að aðalnámskrá, dags. 13. apríl 2011.

Í bréfinu kemur fram að ráðuneytið hefur birt endurskoðuð drög að almennum hluta aðalnámskrár grunnskóla á vefsvæði sínu, http://www.menntamalaraduneyti.is/.

8.      Tölvupóstur umboðsmanns barna, dags. 5. apríl 2011, vísað til nefndarinnar af bæjarráði

Bréfið fjallar um niðurskurð í skólum og áhyggjum umboðsmanns barna „yfir þeim niðurskurði sem átt hefur sér stað og er fyrirhugaður í sveitarfélögum landsins.“  Ásgerður sagði að í Sveitarfélaginu Hornafirði hafi ekki verið um niðurskurð að ræða og ekki áætlanir um hann.

 9.      Önnur mál

·         Ásgerður spurði um aðsókn að sundlaug um páska. Miðvikudaginn  20.apríl komu 157 gestir, á skírdag komu 195 gestir, laugardaginn 23. apríl komu 378 gestir og á annan í páskum 150 gestir.

·         Svar við fyrirspurn Lovísu á 9. fundi um fundi í ungmennaráði: Tveir fundir hafa verið haldnir í ungmennaráði eftir áramót.

·         Lovísa ræddi fjölda barna í leikskólum sveitarfélagsins. Sagði að t.d. virðist hafa fækkað um þrjú börn á Lönguhólum frá því í haust. Hafi orðið fækkun sé rétt að taka inn börn í þeirra stað. Harpa kannast ekki við fækkun barna á Lönguhólum. 

·         Lovísa spurðist fyrir um störf forvarnahóps. Fram kom að lítið hafi verið gert á hans vegum.

·         Lovísa spurðist fyrir um vinnu við sjálfsmat Grunnskóla Hornafjarðar. Hulda greindi frá þeirri vinnu sem lokið er, því sem er í gangi og þeim upplýsingum sem eru á vef skólans um sjálfsmatið.

Fundi slitið kl. 19:10