Fundargerð skólanefndar 96

96. fundur

FUNDARGERÐ

Fundur haldinn      í skólanefnd Hornafjarðar miðvikudaginn 26. september 2007 kl. 16:10 í ráðhúsi Hornafjarðar.

Mætt voru:     Guðrún Jónsdóttir formaður, Ingibjörg Ævarr Steinsdóttir, Gunnar Sigurjónsson, Torfi Friðfinnsson, Sigríður Kristinsdóttir, Eyrún Axelsdóttir, Rósa Á. Valdimarsdóttir, Guðmundur H. Gunnarsson, Snæfríður Svavarsdóttir, Jóhann Morávek, Guðmundur Ingi Sigbjörnsson, Pálína Þorsteinsdóttir og Stefán Ólafsson.        

Gengið var til dagskrár og eftirfarandi tekið fyrir:              

1. Fundargerð 95. fundar

Engar athugasemdir gerðar.

2. Skipan fulltrúa í starfshóp um úttekt og tillögur er varða félagslíf grunnskólanema

Sigríður lagði til að bætt yrði við fulltrúa frá Grunnskóla Hornafjarðar þannig að í starfshópnum sætu 6 fulltrúar í stað 5 sem nú er samkvæmt erindisbréfi starfshópsins. Skólanefnd leggur til að farið verði að tillögu Sigríðar. Skólanefnd samþykkir að skipa  Guðrúnu Jónsdóttur sem fulltrúa sinn í starfshóp um félagslíf grunnskólanema.

3. Fjöldi nemenda í leik- og grunnskólum

Farið yfir útsend gögn þar sem greint er frá fjölda nemenda í skólum sveitarfélagsins á yfirstandandi skólaári og þróun nemendafjölda frá skólaárinu 1999 – 2000 til skólaársins 2007 - 2008. Einnig farið yfir spá um nemendafjölda fram til skólaársins 2012 – 2013, byggða á nemendaskýrslum og upplýsingum úr þjóðskrá. Fram kemur að nemendum í grunnskólum hefur fækkað verulega og útlit er fyrir að þeim muni fækka enn frekar á næstu árum. Spannst nokkur umræða um þá framtíð sem blasir við sem og um húsnæðismál skólanna og nýtingu til framtíðar. Sigríður lagði áherslu á að gerð verði úttekt á húsnæði skólanna. Guðmundur lagði áherslu á að aðstaða nemenda mætti ekki versna frá því sem nú er við hugsanlegar breytingar. Skólanefnd leggur til að skipaður verði starfshópur sem hafi það hlutverk að fara yfir húsnæðismál skólanna.   

4. Skólastarf í upphafi skólaárs 2007 – 2008

Skólastjórnendur greindu frá skólastarfinu í upphafi þessa skólaárs.

Guðmundur Ingi fór yfir starfið í Grunnskóla Hornafjarðar. Sagði skólastarf  hafa byrjaði í haust með námskeiði fyrir allt starfsfólk grunnskólans, Uppeldi til ábyrgðar. Það námskeið sóttu einnig starfsmenn leikskólanna og ýmsir aðrir starfsmenn sem vinna með börnum. Skipaðir hafa verið nokkrir starfshópar eða teymi, t.d. teymi um uppeldi til ábyrgðar, teymi um einstaklingsmiðað nám, sérkennsluteymi, upplýsingateymi, heilsueflingarhópur og umhverfishópur.  Eiga þessir tveir síðastnefndu að skila tillögum eftir um það bil mánuð.

Skipaðir hafa verið fagstjórar í stærðfræði og íslensku í 1. til 10. bekk. Í innra starfi skólans er lögð áhersla á að innleiða nýja hugmyndafræði sem skólinn starfar eftir, þ.e. uppeldi til ábyrgðar og einstaklingsmiðað nám. Gert hefur verið átak í að ljúka við námskrá skólans, ný heimasíða er þegar komin í loftið, ný handbók var afhent á fyrsta skóladeginum með almennum upplýsingum. Öll sérkennsla og námsaðstoð er nú skipulögð af sérkennsluteymi.  Þegar má sjá miklar breytingar til bóta í þessum málaflokki. Vegna þess hversu illa gekk að ráða kennara var brugðið á það ráð að sameina tvo árganga, þ.e. 4. og 6. bekk.  Einnig eru 1. bekkingar í einni bekkjardeild. Við þetta fjölgaði einnig stuðningsfulltrúum við skólann. Fleiri kennarar eru í fjarnámi en áður og hefur það nokkra röskun í för með sér þegar þeir eru í staðbundnum lotum í KHÍ í Reykjavík en til lengri tíma litið skilar þetta væntanlega fleiri kennurum með kennsluréttindi. Guðmundur sagði að starfsmenn skólanna væru farnir að líta á grunnskólann sem eina heild en ekki þrjár aðskildar stofnanir. Undir  þessum lið var einnig rætt um ferðalög nemenda, kostnað við þau o.fl.

Pálína Þorsteinsdóttir fór yfir starfið í Grunnskólanum í Hofgarði.

Skólastarf hófst á sama tíma og hjá Grunnskóla Hornafjarðar. Tveir kennarar sóttu námskeiðið um Uppbyggingarstefnuna og í framhaldi af því hófst undirbúningur af fullum krafti, eins og aðstæður leyfðu. Um miðjan ágúst veiktist einn kennarinn og ekki er séð hvenær sá kennari kemur aftur til starfa. Þurfti því að gera breytingar á stundatöflu, ráða inn starfsmann í veikindaforföll auk þess sem fastir starfsmenn skólans tóku á sig aukna vinnu.

Í skólanum er sami nemendahópur og  í fyrra, 10 börn, en þau tímamót eru að í skólanum er 8. bekkur í fyrsta sinn, 2 stúlkur. 8. bekkurinn fer vel af stað. Þessir nemendur passa vel saman í vinnu. Þá hafa þessir tveir nemendur þegar farið í eina tveggja daga heimsókn á  nýnemahátíð í Grunnskóla Hornafjarðar. Meiningin er að hafa áfram samskipti og gagnkvæmar skiptiheimsóknir eftir samkomulagi skólanna.

Leikskóli er ekki starfandi eins og er. Það eru 3 börn á leikskólaaldri en foreldrar tveggja bræðra ákváðu að hafa þá ekki í leikskóla. Komin er upp sú staða að það er aðeins eitt barn eftir á leikskólaaldri. Þar sem starfsmenn áttu nóg með að koma skólastarfinu í fastar skorður í haust við erfiðar aðstæður, var ákveðið við að bíða með hvað hægt er að bjóða einu barni á leikskólaaldri upp á. Það er ljóst að ekki verður um að ræða hefðbundið leikskólastarf með aðeins einu barni. Það er þó ósk skólans að hægt verði að veita þessu barni einhverja þjónustu.

Framtíðarsýn varðandi skólastarf í Hofgarði er ekki björt eins og er segir Pálína. Gengið hefur verið út frá því að nemendur 9. bekkjar fari í Heppuskóla og þá verður staðan þannig ef ekki flytja börn í  sveitina núna eða fæðast: Haust 2008,1 nemandi í 1. bekk, 3 nem í 3. bekk, 3 nem. í 4. bekk og 2 nem í 5. bekk, samtals 9 nemendur.  Þá verða 2 börn í 5 ára árganginum og ekkert barn undir 5 ára aldri. Það eru því ýmis spurningarmerki fyrir næstu árin hver staðan verður bæði fyrir nemendur og starfsmenn segir Pálína.

Skólaárið á Krakkakoti hófst á starfsdegi 7. ágúst sagði Snæfríður. Dagana 15.-16. ágúst voru  námskeiðsdagar sem notaðir voru til að sækja fyrirlestur Diane Gossen um Uppbyggingarstefnuna, eins og allt skólasamfélagið gerði. Krakkakot hefur stefnt að því að verða heilsuleikskóli og undirbúningur að því staðið yfir.

Þann 14. september, á skipulagsdegi, kom Unnur Stefánsdóttir, framkvæmdarstjóri heilsustefnunnar í skólann. Kynnti hún heilsustefnuna og tilurð hennar sem og heilsubók barnsins. Ákveðið er að taka upp notkun á heilsubókinni sem hvert og eitt barn fær þegar það verður 2 ára. Þar er skráð ýmislegt sem við kemur börnunum, hæð, þyngd, heilsufar, mataræði, svefn, félagshæfni o.fl. og er það gert tvisvar á ári. Eftir að búið er að skrá í bókina er foreldraviðtal og þá er stuðst við bókina sem gerir viðtalið mjög markvisst og þar geta foreldrar séð skráningar og rætt við hópstjóra barnsins síns. Markmið Krakkakots verða því þríþætt: hreyfing, næring og umhverfið og náttúran. Ef allt gengur að óskum í vetur getum skólinn átt von á því að fá vígslu í vor sem heilsuleikskóli og hrósaði Unnur starfsfólki fyrir áhuga og góðan undirbúning.

Aðlögun á nýjum börnum hefur staðið yfir síðan í ágúst, stendur enn yfir og þannig verður það líklega meira og minna allt skólaárið. Í haust var breytt nokkuð skipan innanhúss. Salurinn var stúkaður af í tvö “hólf” eitt svæði fyrir einingakubbana og hitt fyrir 2ja ára börnin. Inni á Skýjadeildinni eru því eingöngu 1 árs börn. Á Mánadeild eru svo 3, 4 og 5 ára börnin.

Það sem einkum er unnið með í vetur í Krakkakoti:

• Heilsuefling, hreyfing og næring, dans-og íþróttatímar og einnig er Mánadeildin (eldri deildin) í íþróttahúsinu, heilsdagsbörn 2x í viku og ½ dags börn 1x í viku.
• Umhverfismennt; umhverfið og náttúran, matjurtagarðurinn, fernur endurunnar og önnur flokkun á rusli, s.s. brotajárn, pappi, grænmetisafgangar settir út til moltugerðar, pappír endurunnin o.fl.
• Bærinn minn, unnið í þematímum.
• Ísland er skoðað með Bjössa bangsa.
• Markviss málörvun, þar sem er notuð er þar til gerð mappa með verkefnum fyrir elstu börnin, allt sett upp í leikjaformi.
• Stig af stigi (rauður) sem er kennsluefni í lífsleikni fyrir leikskólabörn og yngstu börn grunnskóla.
• Hljóm-2 er tekið á hverju hausti á öllum elstu börnunum, sem er próf sem kannar hljóðkerfisvitund hjá börnum og auðveldar að finna þau börn sem gætu átt í lestrarerfiðleikum þegar í grunnskóla er komið.

Nokkrir starfsmenn skólans eru í fjarnámi sem leikskólakennarar og einn í þroskaþjálfanámi.

Eyrún Axelsdóttir fór yfir starfið á Lönguhólum.

Hún sagði að öll vinna með börnunum í skólanum væri sniðin að þroska þeirra og getu. Hún miðast við að ná fram ákveðnum markmiðum sem jafnframt væri undirbúningur að næsta þroskastigi barnsins, sbr. skólanámskrá skólans. Öllum er gert jafnhátt undir höfði, allir eru jafn mikilvægir. Lagt er upp úr því að aldurshópar séu ýmist blandaðir eða nánast aldursskiptir eins og í hópastarfi. Í hópastarfi er unnið markvisst með hreyfingu, tónlist, málrækt, stærðfræði, myndlist, náttúruna, samfélagið, menningu, framsögn og sjálfsbjörg. Ýmiskonar þemu eru tekin fyrir og unnið út frá yfir skólaárið. Grunnþemað er “Ég og líkami minn” auk þess er unnið með einstaklinginn, tilfinningar, fjölskylduna, nánasta umhverfi, bæinn okkar, ólík þjóðerni-tungumál og heiminn. Einnig fer fram árstíðabundin vinna eins og umferðarfræðsla, árstíðirnar, jólin, páskarnir og þorrinn.

Auk hópastarfs fá börnin val og frjálsan tíma. Valið er einu sinni í viku og er deildarskipt. Það byggir á því að börnin öðlist færni í því að velja sjálfstætt hvað þau vilja gera, hvernig þau vilja gera hlutina, hvað er hægt að gera, hvernig eru hlutirnir leystir o.fl. Svipaðar aðferðir eru notaðar í frjálsum leik og í hópastarfi þótt þar sé meiri skipulögð vinna.

Í haust var farið af stað með útiskóla. Útiskólinn er tvisvar í viku, þriðjudaga og fimmtudaga fyrir börn á aldrinum 3-6 ára. Fyrri daginn eru börnin úti frá því eftir morgunverð og til kl. 16.00, sem þýðir að þau vinna hópastarfið úti og borða hádegisverð og nónhressingu úti. Seinni dagurinn í vikunni er eins og sá fyrri fyrir utan það að máltíðirnar eru borðaðar inni. Hugmyndin að útiskólanum kemur frá Svíþjóð.

Eftir námskeiðið í ágúst síðastliðinn um Uppbyggingarstefnuna var settur saman þriggja manna hópur innan veggja leikskólans sem vinnur að því að sníða hugmyndir stefnunnar að leikskólaaldrinum. Sú vinna er byrjuð og hefur starfsfólk fengið verkefni til að æfa sig í fræðunum. Auk þessa mun vera farið í heimsókn á Suðvesturlandið í tvo leikskóla til að kynna sér starfið hjá þeim, annar er með uppbyggingarstefnuna og hinn gefur sig út fyrir að vera með útistarf.

Sérkennslumálum er þannig háttað hjá okkur að þau börn sem eru með einhverja greiningu frá sérfræðingi fá einstaklingsmiðaða vinnu út frá ráðleggingum sérfræðinga og sér einn starfsmaður um þá vinnu að mestu leyti, undir leiðsögn leikskólakennara. Auk þessa er unnið að málum barnanna í öllum tímum.

Rætt um skólalóðir leikskólanna, sem eru í ágætu lagi segja starfsmenn, útiskólann á Lönguhólum og fækkun nemenda í Krakkakoti frá sl. skólaári.   

Jóhann Morávek fór yfir skipulag Tónskólans. Þar kom m.a. fram að skólinn hafi byrjað sitt starf nokkrum dögum eftir að grunnskólinn byrjaði sitt starf. Nemendafjöldi í einkatímum er 112, þar af 108 á Höfn og 4 í Öræfum. 69 nemendur  í forskóla, þ.e. 2. og 3. bekkur grunnskólans. 12 starfsmenn eru við skólann, 9 kennarar,  2 stjórnendur og 1 ræstitæknir. Stöðugildi eru 9,6  þar af 1,05 í forskóla og 1,74 í stjórnun. Kennsla er 148,44 tímar í viku auk stjórnunar, þar af 9 klst. á viku í tónfræðigreinum og 1 klst. v/lúðrasveitar, sem í eru 25 nemendur, 3,0  klst. Eru nýttar í aðrar hljómsveitir, 0,5 klst. í raddæfingar sem tengjast öllum hljómsveitunum og 2,0 klst. vegna undirleiks. Góður skriður er á starfinu en veikindi tveggja starfsmanna hafa sett nokkurt strik í reikninginn. Fram að áramótum verða fimm smærri tónleikar auk stærri tónleika um jólin. Jóhann sagði samstarf við grunnskólann ver mjög gott. Hann sagði og nokkurn biðlista eftir skólavist vera við skólann eða tuttugu. Jóhann sagði nokkuð vera um það að farið sé með tónlistaratrið út fyrir skólann, svo sem að spila fyrir nemendur leikskólanna og vistmenn á HSSA. Þá greindi Jóhann frá fyrirhuguðu landsmóti lúðrasveitanna sem verður á Höfn nærri miðjum október. Rætt um stöðugildafjölda við skólann og hvað ráði þeim fjölda. Starfsmaður í fullu starfi í tónlistarskóla þarf að sinna 705 klst. á ári í kennslu kenni hann í grunnnámi sem fer lækkandi þegar ofar dregur í námi.   

5. Önnur mál

a)      Eftirfarandi var tekið fyrir á 394. fundi bæjarráðs: „Samband ísl. sveitarfélaga, tölvubréf dags. 14. september 2007, ósk um umsögn á stefnumótun sambandsins í skólamálum.” Bæjarráð samþykkti að vísa framangreindu erindi til skólanefndar. Skólanefnd gerir engar efnislegar athugasemdir við stefnumótun Sambands ísl. sveitarfélaga. (Snæfríður, Eyrún og Jóhann viku af fundi.)

b)      Orðsending frá menntamálaráðuneytinu vegna fyrirspurna um túlkun á grunnskólalögum frá nr. 66/1995 og breytingum á þeim nr. 98/2006 „er lýtur að því ákvæði að óheimilt sé að taka gjald af nemendum vegna ferðalaga sem flokkast undir vettvangsnám eða eru að öðru leyti hluti af skyldunámi nemenda.” Stefán greindi frá því að á sl. skólaári hafi sveitarfélagið greitt kr. 1.624.556.- vegna margháttaðar vettvangsferða grunnskólanna, sem og ferðalaga vegna félagslífs og annarra ferða á vegum skólanna. Rætt var um hvort það fjármagn sem fer í þessar ferðir eigi að vera algjörlega í höndum skólanna sem tækju jafnframt ákvörðun um nýtingu þess óðháð starfsmanni skólaskrifstofu.  

c)      Sigríður lagði til að keypt verði ný húsgögn í félagsmiðstöðina og gert ráð fyrir því í fjárhagsáætlun.

d)      Rætt um heimsóknir skólanefndar í skóla sveitarfélagsins. Starfsmanni nefndarinnar falið að skipuleggja vettvangsferðir.

Fundi slitið kl. 18:47