Fundargerð skólanefndar 92

92. fundur

Mætt voru:     Guðrún Jónsdóttir formaður, Anna María Ríkharðsdóttir, Torfi Friðfinnsson, Gunnar Sigurjónsson, Sigríður Kristinsdóttir, Snæfríður Svavarsdóttir, Rósa Á. Valdimarsdóttir, Eyrún Axelsdóttir, Sigrún Kapitóla Guðrúnardóttir, Pálína Þorsteinsdóttir, Þórgunnur Torfadóttir og Stefán Ólafsson.   

  Gengið var til dagskrár og eftirfarandi tekið fyrir:

 1.            Fundargerð 91. fundar

Engar athugasemdir voru gerðar

2.      SOS-námskeið fyrir starfsmenn skóla og foreldra

Farið yfir greinargerð Ragnhildar Jónsdóttur. Þar kemur fram að ?SOS ? hjálp fyrir foreldra er leiðarvísir um uppeldi barna þar sem aðferðir atferlismótunar eru virkjaðar til þess að hjálpa foreldrum og börnum að stjórna hegðun og skapsmunum barnsins, þær miðast við uppeldi 2 til 12 ára barna. Í þessari aðferð fá foreldrar í hendur vel skipulagða, aðgengilega og skýra aðferðafræði um uppeldi og jákvæða hvatningu til hegðunarstjórnunar. Lögð er áhersla á að foreldrar hvetji börn með því að vera óspör á bros, knús og hrós. Aðferðirnar styrkja foreldra jafnframt í því að vera fastir fyrir, leiðbeinandi og samkvæmir sjálfum sér þegar kemur að reglum í samskiptum og hegðun. Námskeiðið er ekki einungis ætlað foreldrum heldur einnig starfsfólki í leik-og grunnskólum, svo og fjölskylduráðgjöfum og ráðgefandi aðilum um uppeldi barna.?

Einnig var farið yfir kostnaðaráætlun vegna þessara námskeiða. Fram kom að starfsmenn og foreldrar eigi kost á að sækja í starfsmenntasjóði vegna námskeiðanna. Misjafnt er þó hversu mikið viðkomandi hafa nýtt sér þá sjóði, sumir jafnvel að fullu vegna náms. Einnig kom fram að fé til þessara námskeiða er ekki á fjárhagsáætlun skólanna. Skólanefnd hvetur til að næsta haus verði farið af stað með þessi námskeið meðal starfsmanna leikskólanna. Í framhaldinu verði komið á námskeiðum fyrir foreldra leikskólabarna.

Undir þessum lið var einnig kynnt námskeið um uppbyggingarstefnuna ? uppeldi til ábyrgðar, sem verður fyrir starfsmenn leik- og grunnskóla í ágúst.

 3.      Samkeppni um nafn og merki á nýsameinuðum grunnskóla

Borist hefur nokkur fjöldi tillagna, flestar frá nemendum í Hafnarskóla. Skólanefnd samþykkir að vísa þessu máli til vinnufundar í skólanefnd.

 4.      Skóladagatal 2007 - 2008

Þórgunnur fór yfir tillögu að skóladagatali nýsameinaðs grunnskóla. Gert er ráð fyrir 180 skóladögum, þar af tveimur ?stöfluðum? dögum vegna félagslífs. Skipulagsdagar á starfstíma skólans eru  fimm og átta að sumri.  Pálína fór yfir skóladagatal Grunnskólans í Hofgarði. Gert ráð fyrir 180 skóladögum, þar af 6 stöfluðum vegna félagslífs. Skipulagsdagar eru fimm að vetri og sjö að sumri. Skólanefnd samþykkir fram lögð skóladagatöl grunnskólanna.  

 5.      Skipting í bekkjardeildir og kennslustundir 2007 - 2008

Gert er ráð fyrir að tvískipta 2. ? 10. bekk eins og verið hefur en að fyrsti bekkur grunnskólans verði í einni bekkjardeild með viðbótarstuðning inni í bekk. Ekki liggja fyrir endanlegar tillögur skólastjórnenda um kennslustundafjölda

Pálína gerði grein fyrir óskum Grunnskólans  í Hofgarði  um kennslustundafjölda skólans á næsta skólaári sem tekur meðal annars mið af því að þar verði kennt í 8. bekk.  

Undir þessum lið var rætt var um kennaraskort, einkum skort á vel menntuðum kennurum með reynslu. Sú staðreynd hafi áhrif á möguleika til að steypa saman árgöngum í stærri bekkjardeildir.     

 6.      Húsnæði Nesjaskóla

Greint frá umræðu í bæjarráði um húsnæði Nesjaskóla og hvað gera eigi við allt hið vannýtta húsnæði sem þar er til staðar, heimavist o.fl.. Á 373. fundi bæjarráðs var eftirfarandi bókað:  ?Starfsmönnum falið að leggja fram tillögur að nýtingu Nesjaskóla.? Rætt var m.a.um skort á sal og mötuneyti fyrir nemendur Hafnar- og Heppuskóla. Sigríður sagði mikilvægt að gerð verði þarfakönnun vegna húsnæðis grunnskólanna. Skólanefnd telur mikilvægt að hugsanleg sala á húsnæði Nesjaskóla valdi sem minnstri röskun á skólastarfi. Jafnframt óskar nefndin eftir því að fullt samráð verða haft við skólann og skólanefnd um þessi mál. 

 7.      Önnur mál

• Gunnar ræddi um hvort nemendur í sveitum sem stunda nám í FAS geti nýtt sér skólaakstur með grunnskólanemendum. Sagði hann þetta geta haft einhver áhrif á skipulag framhaldsskólans þar sem aksturinn væri miðaður við grunnskólann sem byrjar kl. 8:30. Skólanefnd var því sammála að þetta eigi að skoða. Það væri hagur að því að nemendur í okkar sveitarfélagi geti sótt framhaldsskóla í sveitarfélaginu. Undir þessari umræðu var bent á að Reykjavíkurborg hyggist bjóða sínum nemendum frítt í strætó á næsta skólaári.
• Rætt um skort á sérstökum merkingum á skólabílum. Samþykkt að það þurfi að lagfæra.

Fundi slitið kl. 18:45