Fundargerð skólanefndar 72

72. fundur

Skólanefnd Hornafjarðar 72. fundur

Fundur haldinn í ráðhúsinu, þriðjudaginn 23. maí 2005 kl. 16:20

Mætt voru: Sigríður Kristinsdóttir, Ólöf Þórhalla Magnúsdóttir, Elín Magnúsdóttir, Valdís Kjartansdóttir, Snæfríður Svavarsdóttir, Íris Gísladóttir, Matthildur Ásmundardóttir, Eygló Illugadóttir, Arnbjörg Stefánsdóttir, Stefán Ólafsson. Gengið var til dagskrár og eftirfarandi tekið fyrir:

1. Fundargerðir 70. - 71. fundar

Engar athugasemdir gerðar.

2. Skipulagsbreytingar á leikskólum sveitarfélagsins - greinargerðir leikskólastjóra

Farið yfir greinargerð Snæfríðar Svavarsdóttur, greinargerð Margrétar Ingólfsdóttur og minnisblað Stefáns Ólafssonar frá kynningarfundi um málið sem haldinn var í leikskólanum Krakkakoti 2. maí sl. Skólanefnd er því sammála að ákvörðun um framtíðarskipulag leikskólanna tengist vinnu við nýja skólastefnu sveitarfélagsins. Skipulag leikskólanna verði því niðurstaðan af þeirri vinnu.

3. Tillaga leikskólastjóranna um breytt fyrirkomulag – skólaliðar í stað ræstingafólks

Snæfríður fór yfir tillögur að breyttu skipulagi sem felst í því að í stað ræstingafólks verði ráðnir skólaliðar, einn á hvorum leikskóla. Þeir hefðu með höndum ræstingu samkvæmt ákv. skipulagi og myndu einnig aðstoða nemendur í leik og starfi. Skólanefndin leggst ekki gegn skipulagsbreytingum af þessu tagi ef þær verða til að bæta leikskólastarfið enda rúmist þessar breytingar innan fjárhagsáætlunar skólanna. (Matthildur vék af fundi)

4. Umsókn um áframhaldandi stöðu aðstoðarkennara í Hafnarskóla

(Arnbjörg mætti á fund) Arnbjörg fór yfir málið og greindi frá reynslunni af þessu fyrirkomulagi á yfirstandandi skólaári. Þetta fyrirkomulag hafi styrkt einstaklingsmiðað skólastarf en þó fyrst og fremst leitt til þess að hægt var að koma til móts við þá nemendur sem þurftu á stoðþjónustu að halda. Lagði hún áherslu á að aðstoðarkennari sé menntaður til starfa með nemendum og nýtist því þeim nemendum sem hann vinnur með betur en ófaglært starfsfólk sem ráðið hefur verið til starfa í grunnskólum. Þá hafi tilvist þessara tveggja aðstoðarkennara minnkað útgjöld vegna forfallakennslu um 1.6 – 2 milljónir króna í skólanum þar sem þessir tveir aðstoðarkennarar hafi tekið að sér forföll í viðkomandi bekkjum. Skólanefnd mælir með að þetta skipulag verði áfram næsta vetur enda hafi reynslan af því verið mjög góð á yfirstandandi skólaári. (Snæfríður vék af fundi)

5. Staðan í kennararáðningum fyrir næsta skólaár

Fullmannað er í flestar stöður fyrir næsta vetur að öðru leyti en því að enn vantar sund- og íþróttakennara í Nesjaskóla og Heppuskóla. Í Hafnarskóla fara ráðningarmál að nokkru eftir því hvaða afgreiðslu ósk um aðstoðarkennara fær. Nú eru 76,2 % kennarra með full kennsluréttindi, 14,3 % með nám á háskólastigi og eru flestir í kennsluréttindanámi og 9,5 % með framhaldsskólanám eingöngu. Rætt var einnig um ráðningamál kennara og hvort bera eigi ráðningar almennt undir skólanefnd. Formaður skólanefndar taldi að það kunni t.d. að eiga við þegar um ráðningu leiðbeinenda er að ræða. Vitnað var meðal annars í lög nr. 86 frá 1998, lög um lögverndun á starfsheiti og starfsréttindum grunnskólakennara ....... (Arnbjörg vék af fundi)

6. Breytt skipan náms til stúdentsprófs

Skólanefnd Hornafjarðar telur að skólamál eigi alltaf að vera til umfjöllunar og í stöðugri endurskoðun. Því telur skólanefndin að þegar uppi eru svo viðamiklar áætlanir um breytingar á skólamálum, sem breytt skipan náms til stúdentsprófs er, eigi allir sem tengjast þessum málaflokki að koma að umræðum um breytingarnar. Stytting framhaldsskólans úr fjórum árum í þrjú byggist meðal annars á því að flytja á hluta af námsefni framhaldsskólans til grunnskólans. Skólanefndin hvetur til þess að áður en lengra verður haldið með undirbúning þessa fyrirhugaða flutnings verði lögð áhersla á eftirfarandi: Fram fari rækileg kynning sem nái til allra þeirra er málið varða, svo sem starfsmanna grunnskólanna, sveitarstjórnarmanna og foreldra grunnskólabarna. Þessa kynningu hefur algjörlega skort. Fyrirhugaður flutningur verði kostnaðarmetinn, bæði vegna nauðsynlegrar endurmenntunar kennara og sjálfrar kennslunnar. Það er óásættanlegt að breytt skipan leiði til aukins kostnaðar fyrir sveitarfélögin sem augljóst virðist vera samkvæmt fyrirliggjandi gögnum. Hvort og þá hvaða áhrif þessi breyting kann að hafa á faglegt starf í grunnskólum. Kannað verði sérstaklega hvaða áhrif umræddar breytingar kunna að hafa á fámenna skóla. Hvort og þá hvaða áhrif þessi breyting kann að hafa á einstakar námsleiðir á framhaldsskólastigi og undirbúning fyrir háskólanám. Breytt námsskipan til stúdentsprófs verði ákveðin í kjölfar þessarar vinnu en ekki fyrirfram. Samþykkt þessi verður send til menntamálaráðuneytisins, Sambands íslenskra sveitarfélaga og Sambands sveitarfélaga á Austurlandi.

7. Önnur mál

Rafræn innritun nýnema í framhaldsskóla vorið 2005 Greint frá ákvörðun menntamálaráðuneytisins um að nemendur sem eru að ljúka 10. bekk í vor sæki um skólavist í framhaldsskólum á netinu. Auglýsingar og kostun í skólum, samþykkt stjórnar Heimilis og skóla Kynnt samþykkt stjórnar Heimilis og skóla frá 19. mars 2005 sem beina þeim tilmælum til sveitarfélaga í landinu að þau setji sér stefnu um auglýsingar og kostun í skólum sem gildi fyrir alla skóla í viðkomandi sveitarfélagi.

Greint frá tilboði frá IMG með milligöngu Fræðslunets Austurlands um námskeið í stefnumótunarvinnu. Skólanefnd leggur áherslu á að haldið verði námskeið af þesu tagi hver sem fenginn verður til þess.

Fundi slitið kl. 18:40