Fundargerð Skólanefndar

39. fundur

Fundur haldinn í Heppuskóla og ráðhúsinu, miðvikudaginn 3. apríl 2002 kl. 16.10

Mætt voru: Egill Jón Kristjánsson, Guðrún Guðmundsdóttir, Guðbjörg Ómarsdótir, Elín Magnúsdóttir, Sigurlaug Gissurardóttir, Guðmundur Ingi Sigbjörnsson, Magnús J. Magnússon, Ingibjörg Jónasdóttir, Sigurður Kr. Sigurðsson, Stefán Ólafsson.



Gengið var til dagskrár og eftirfarandi tekið fyrir:



1. Kynning á foreldrakönnun í Heppuskóla

Guðmundur Ingi og Magnús gerðu grein fyrir helstu niðurstöðum í foreldrakönnun sem framkvæmd var í skólanum á foreldradegi þann 22. febrúar. Könnunin er hluti af mati á skólastarfi sem öllum skólum ber að sinna. Niðurstöður voru almennt jákvæðar fyrir skólann. Voru fundarmenn ánægðir með könnunina og það brautryðjendastarf sem skólinn ynni að á þessu sviði (Magnús og Guðmundur viku af fundi)



2. Tillaga þriggja manna starfshóps

Á 38. fundi skólanefndar, haldinn 20. febrúar 2002, var skipaður þriggja manna starfshópur sem í sitja þær Ingunn Jónsdóttir, Elín Magnúsdóttir og Guðný Svavarsdóttir. Hlutverk starfshópsins var að skoða ásamt framkvæmdastjóra sviðsins möguleika á því að flytja kennslu nemenda í 4. bekk úr Hafnarskóla í Nesjaskóla frá og með næsta skólaári. Var þetta gert með hliðsjón af fram komnum óskum foreldraráðs Nesjaskóla.



Þriggja manna starfshópur leggur eftirfarandi samþykkt sína fyrir skólanefnd:

“Allar breytingar á skipan skólamála kalla á vandaðan undirbúning, gott samráð við starfsfólk og mikilvægi þess að ná almennri sátt um breytingarnar. Þá þarf það og að liggja fyrir að breytingarnar leiði af sér framfarir fyrir skólastarfið í heild.

Flutningur á einum bekk á milli skóla er ekki einangrað mál heldur snertir allt starf hins þrískipta grunnskóla. Í viðtölum við skólastjórnendur í Nesjaskóla, Hafnarskóla og Heppuskóla kom skýrt fram að full ástæða sé til að skoða vandlega ýmsa þætti í rekstri og skipulagi skólanna. Einkum var þeim ofarlega í huga faglegt samstarf og betri árangur í skólastarfi. Jafnframt kom fram sú skoðun að full ástæða væri til að skoða nánar ýmsa þætti er varða fyrirkomulag við stjórnun skólanna þriggja. Vegna samstarfs grunnskólanna og Tónskólans þarf einnig að huga vel að þeim áhrifum sem breytingar á skipulagi kunna að hafa á fyrirkomulag tónlistarkennslu.

Sú þrískipting grunnskólans sem við byggjum á er að ljúka sínu 6. skólaári. Á þessum tíma hafa komið fram bæði kostir þessa skipulags og ókostir. Næsta verkefni í skólamálum er að lagfæra ókostina og treysta betur það sem vel hefur tekist til með. Skólanefnd felur starfsmönnum skólaskrifstofu ásamt skólastjórnendum Nesja-, Hafnar- og Heppuskóla að vinna áfram að skoðun á samstarfi skólanna þriggja og skipulagi stjórnunar með það að leiðarljósi að ná fram bættum árangri faglega og fjárhagslega.

Fara þarf fram nákvæm skoðun og úttekt á starfsemi skólanna áður en teknar verða ákvarðanir um flutning. Slík úttekt tekur meiri tíma en svo að henni verði lokið fyrir vorið. Skólanefnd telur því hvorki tímabært né æskilegt að flytja kennslu nemenda í 4. bekk úr Hafnarskóla í Nesjaskóla strax næsta vetur.”

Skólanefndarmenn voru allir sammála ofangreindri samþykkt starfshópsins.



3. Starfsmannamál

Eins og staðan er núna vantar 4 kennara í Hafnarskóla og 1 Heppuskóla.


4. Önnur mál

· Greint frá vinnu við verkefnið skólaskóga og samvinnu við Lionsklúbba staðarins um væntanlegt skógræktarsvæði.

· Greint frá umsóknum í Endurmenntunarsjóð grunnskóla. Sótt var um styrk til þriggja verkefna sem voru “Lífsleikni fyrir kennara mið- og unglingastigs”, “Námskeið í náttúrufræði fyrir kennara yngri barna” og “Skipulögð kennsla og vinnubrögð”. Öll verkefnin hlutu styrk og nemur styrkupphæð samtals krónum 630.000.



Fundi slitið kl. 18:05