Fundargerð Skólanefndar 61

61. fundur

Fundur haldinn í ráðhúsinu, mánudaginn 14. júní 2004 kl. 16:30

Mætt voru:Sigríður Kristinsdóttir, Bryndís Hólmarsdóttir, Elín Magnúsdóttir, Valdís Kjartansdóttir, Margrét Ingólfsdóttir, Snæfríður Svavarsdóttir, Guðmundur Ingi Sigbjörnsson, Arnbjörg Stefánsdóttir, Brynja Baldursdóttir, Jóhann Morávek og Stefán Ólafsson.
Gengið var til dagskrár og eftirfarandi tekið fyrir:

1. Fundargerð 60. fundar
Engar athugasemdir gerðar.

2. Tillögur að daglegri skólabyrjun og skólalokum í Hafnar- Heppu- og Nesjaskóla
Ekki er gert ráð fyrir að skólabyrjun að morgni breytist frá því sem nú er. Skólaakstur á þeim tíma verður því óbreyttur. Tillaga skólanna þriggja er að skólalok verði um kl. 14:00 í Nesjaskóla, kl.14:40 í Hafnarskóla og kl. 14:45 í Heppuskóla alla fimm daga vikunnar. Fram kom í máli skólastjórnenda Hafnar- og Heppuskóla að þetta kalli á skólamáltíðir á föstudögum. Rætt um þau áhrif sem þessi tillaga hefur, bæði fyrir íbúa í dreifbýli og þéttbýli auk þess kostnaðar sem þetta hefur í för með sér. Skólanefnd sammála fram kominni tillögu skólastjórnenda um tímaramma skólanna.

3. Tillögur nefndar um mötuneytismál nemenda
Við störf sín fór nefndin meðal annars yfir minnisblað framkvstj. fræðslu- og félagssviðs sem hefur að geyma viðtöl við leikskólastjóra Krakkakots og Lönguhóla, eigendur Hótels Hafnar, matráðs í mötuneyti Nesjaskóla og eiganda Kaffihornsins. Einnig var metin reynslan af úthýsingu matargerðar fyrir Hafnarskóla og Heppuskóla. Tekin voru til umfjöllunar drög framkvstj., dagsett 25. maí 2004, þar sem fram koma nokkrir valkostir. Eftir nákvæma yfirferð og umfjöllun leggur nefnd um mötuneytismál til að eftirfarandi leið verði valin:
• Leikskólarnir efli samstarf sitt um mötuneytismál. Allur hádegismatur komi frá Krakkakoti en morgun- og síðdegishressing frá hvorum leikskóla fyrir sig.
• Mötuneyti Nesjaskóla taki alfarið að sér mötuneytismál grunnskólanna þriggja.
• Matur verði keyrður út í skólana í þar til gerðum hitakössum og skammtað á diska í hverri stofnun fyrir sig.
• Komið verði upp aðstöðu til að neyta matar í Hafnarskóla og Heppuskóla.
• Að hádegismat loknum verði öll mataráhöld keyrð aftur í Nesjaskóla þar sem þau verði þvegin og komi svo aftur til baka með matnum næsta dag.
• Akstur með mat og mataráhöld verði boðinn út.
Eftir tveggja ára reynslu verði árangur af þessari leið metinn og í framhaldinu tekin ákvörðun um hvort halda skuli áfram á sömu leið eða verkefnið boðið út.

Guðmundur greindi frá því að nokkrum erfiðleikum væri bundið að koma “matsal” fyrir í Heppuskóla þannig að allir nemendur geti matast í einu lagi. Stefán greindi frá viðræðum við Ingólf Einarsson, eiganda Kaffihornsins, um þann möguleika að taka að sér mötuneyti fyrir Heppuskóla og nota veitingastaðinn um leið sem matsal. Sagðist hann þurfa 50 – 60 fasta viðskiptavini og að matartími þyrfti að vera fyrir kl. 12. Margrét benti á að það þurfi að ræða það í leikskólanum hvernig best sé að útfæra mötneytismál þeirra skóla. Elín benti á að þegar nýr leikskóli var byggður hafi verið stefnt að einu mötuneyti fyrir báða leikskólana. Margrét sagði að aldrei hafi verið sá háttur á að matur hafi komið alla daga vikunnar frá mötuneyti Krakkakots til Lönguhóla en taldi eðlilegt að að stefna að því að sameiginlegur matur verði 4 daga vikunnar. Fram kom í máli skólanefndarmanna að eðlilegast sé að maturinn komi allur frá einum og sama aðilanum. Skólanefnd sammála tillögu nefndar um mötuneytismál með þeirri breytingu að liðurinn sem snýr að leikskólunum verði: “Leikskólarnir efli samstarf sitt um mötuneytismál. Hádegismatur komi frá Krakkakoti en morgun- og síðdegishressing frá hvorum leikskóla fyrir sig.” (Guðmundur og Arnbjörg viku af fundi)

4. Mat á starfi Lönguhóla og Krakkakots – skýrslur Rannsóknarstofnunar Kennaraháskóla Íslands
Í skýrslunum er gerð grein fyrir mati á starfi leikskólanna tveggja. Matið tók mið af þeim þáttum sem tilgreindir eru í verksamningi milli sveitarfélagsins og Rannsóknarstofnunar KÍ. Í samræmi við þann samning var einkum hugað að skipulagi leikskólastarfsins, starfsmannahaldi, samskiptum, tengslum uppeldis- og menntastarfsins við Aðalnámskrá leikskóla, sérstöðu leikskólanna, innra mati, og samstarfi við nærliggjandi leikskóla.
Snæfríður sagðist vera sammála mörgum ábendingum sem fram koma í skýrslunni og að þær verði teknar til athugunar og hlutir lagfærðir. Margrét sagðist ekki vera fyllilega ánægð, hafa verið með vonir um betri skýrslu, þ.e. vonir um að hafa meira gagn af henni. Einnig benti hún á að ekki hafi allar athugasemdir, sem leikskólastjórar gerðu, verið teknar til greina af skýrsluhöfundum. Stefán benti á ýmis atriði sem hann taldi að gagn mætti hafa af, læra af því sem fram kemur. Sigríður gerði að umtalsefni samvinnu leikskólanna sem hún taldi ástæðu til að auka og um leið að skólarnir ynnu eftir sömu hugmyndafræðinni. Skólanefndarmenn bentu á að margt jákvætt í starfi leikskólanna kæmi fram í skýrslunum. Undir þessum lið var rætt um að skólanefnd mundi heimsækja leikskólana í haust. (Margrét og Snæfríður viku af fundi)

5. Skóladagatal Tónskóla Austur-Skaftafellssýslu
Jóhann Morávek fór yfir útsend gögn. Skólanefnd samþykkir skóladagatal Tónskólans með þeim breytingum að haustþing tónskólakennara (2 dagar) verði tekið af starfsdögum en ekki kennsludögum. (Jóhann sat fundinn undir þessum lið)

6. Önnur mál
• Samræmd próf í 10. bekk (og að hluta til 9. bekk) í maí 2004. Tekin voru próf í sex greinum, íslensku (49 nem. (af samtals 51) í 10. bekk þreyttu próf), stærðfræði (44 nem. í 10. bekk þreyttu próf), ensku (47 nem. í 10. bekk þreyttu próf), dönsku (39 nem. í 10. bekk þreyttu próf), náttúrufræði (20 nem. í 10. bekk þreyttu próf) og samfélgsgreinum (19 nem. í 10. bekk þreyttu próf). Að auki þreyttu sex nemendur í 9. bekk samræmd próf, fimm í einni grein og einn í tveimur greinum.

Fundi slitið kl.19:15