Fundargerð Skólanefndar 60

60. fundur

Fundur haldinn í ráðhúsinu, miðvikudaginn 18. maí 2004 kl. 16:10

Mætt voru : Sigríður Kristinsdóttir, Bryndís Hólmarsdóttir, Elín Magnúsdóttir, Valdís Kjartansdóttir, Elín Oddleifsdóttir, Margrét Ingólfsdóttir, Snæfríður Svavarsdóttir, Guðmundur Ingi Sigbjörnsson, Arnbjörg Stefánsdóttir, Brynja Baldurssdóttir, Brynja Kristjánsdóttir og Stefán Ólafsson.


Gengið var til dagskrár og eftirfarandi tekið fyrir:

1. Fundargerð 59. fundar
Engar athugasemdir gerðar.

2. Tillögur um breytingar á reglum leikskólanna
Margrét og Snæfríður fóru yfir útsend gögn sem varða þetta mál. Nokkrar umræður urðu um tillögur að breytingum. Skólanefnd tók vel í fram komnar hugmyndir að breytingum og leggur til að starfsmenn leggi fram formlegar tillögur um breyttar reglur og leggur áherslu á að þær verði kynntar stjórnum foreldrafélaga leikskólanna áður en þær koma fyrir skólanefnd. (Margrét og Snæfríður viku af fundi)

3. Tillögur um breytingar á tímasetningu skólaaksturs fyrir Hafnar-, Heppu- og Nesjaskóla í tengslum við breyttan tímaramma.
Guðmundur og Stefán gerðu grein fyrir þeim tillögum sem eru til umræðu, sbr. yfirlitsblað þar að lútandi. Fram kom í máli Guðmundar að þessi ósk sé fyrst og fremst fram komin til að lengja þann matartíma sem nemendur í Heppuskóla fá á hverjum degi. Með þessum breytingum sé stefnt að því að byrja fyrr fremur en að lengja skóladaginn fram eftir degi. Einnig benti Guðmundur á þann möguleika að bæta við einni kennslustund á föstudögum og einnig hugsanlega lengingu aðra daga. Sagði hann aukið val, sem sé skylda samkv. aðalnámskrá, geta haft þessi áhrif en það gerir allt skipulag á stundaskrá erfiðara. Hins vegar verði allt gert til að koma í veg fyrir lengingu. Brynja Kr. benti á að ekki væri æskilegt að fara fyrr af stað úr Öræfum en nú er. Elín Oddleifsdóttir taldi mjög hæpið að skólaakstur geti allur hangið saman Benti hún og á að foreldrar barna sem lengst eiga að sækja eigi mjög erfitt með að sætta sig við að farið verði fyrr á morgnana en nú er. Taldi hún nauðsynlegt að hefja um það umræðu að einn til tvo daga verði tvöfaldur skólaakstur þannig að yngri börnin fari fyrr heim úr skóla en eldri nemendur þá daga. Skólanefnd sammála því að taka ekki endanlega afstöðu í þessu máli fyrr en stundatöflur liggja fyrir þannig að ljóst sé á hvaða tíma skólalok geta orðið sem hafa afgerandi áhrif á skólaakstur. Elín Oddleifsd. lagði á það áherslu að skólaakstur verði að laga sig að skólastarfinu en ekki öfugt.

4. Ósk um að 13 ára börn verði áfram í Grunnskólanum í Hofgarði og stundi þar sitt 8. bekkjar nám.
Tekið fyrir bréf, dags. 10. maí 2004, undirritað af Ullu R. Pedersen og Ragnari Frank Kristjánssyni. Í bréfinu segir orðrétt í upphafi bréfs: „Við leggjum til að 13 ára börn úr Öræfum haldi áfram skólagöngu í Hofgarði skólaárið 2004-2005, og óskum eftir því að skólanefnd taki tillögu okkar til umræðu.” Brynja Kristjánsd. sagði að miðað við viðtöl sín við foreldra í Öræfum vildu þeir hafa þetta sem val, þ.e. hvort börnin færu í 8. bekk Heppuskóla eða yrðu áfram í Grunnsk. í Hofgarði eitt ár í viðbót. Fram kom í máli hennar að sumir foreldrar vildu senda börn sín strax á næsta skólaári í Heppuskóla. Einnig benti hún á að foreldrar í vesturhluta Öræfa vildu senda börn sín á Klaustur í skóla fremur en að senda þau austur á Höfn. Brynja sagði einnig að ósk um 8. bekk kæmi ekki frá kennurum í Hofgarði. Framkvstj. fræðslu- og félagssviðs fór yfir minnisblað sitt, dags. 18. maí 2004. (Elín Oddleifsd. vék af fundi) Skólanefnd er því sammála að vísa þessu máli til ákvörðunar bæjarráðs. Faglegur ávinningur af breytingu þeirri sem óskað er eftir í ofangreindu bréfi er ekki sjáanlegur. Þá hefur þetta í för með sér verulega aukin útgjöld fyrir sveitarfélagið. (Brynja Kr. vék af fundi)


5. Beiðni um að ráða aðstoðarkennara í stað stuðningsfulltrúa í Hafnarskóla
Í bréfi, dags. 10. maí 2004, fer skólastjóri Hafnarskóla „fram á að fá að ráða þrjá aðstoðarkennara við skólann næsta skólaár í staðinn fyrir stuðningsfulltrúa.” Arnbjörg fór yfir málið og sagði meðal annars að starf stuðningsfulltrúa, eins og það er skipulagt í dag, gangi ekki sem skyldi þó að þeir væru að sinna starfi sínu af kostgæfni. Einnig benti hún á mikinn fjölda nemenda sem þörfnuðust mikillar námsaðstoðar og um leið skorti fólk í skólanum til að sinna þessum börnum. Framkvæmdastjóri sviðsins fór yfir málið og gerði grein fyrir ýmsum þáttum sem það varða, svo sem stöðu stuðningsfulltrúa almennt, atriðum sem snúa að kjaramálum, skyldu um að auglýsa stöður kennara, auknum kostnaði samfara hugsanlegum breytingum með því að ráða aðstoðarkennara í stað stuðningsfulltrúa, líkleg áhrif til lækkunar á almennum grunnskólaframlögum Jöfnunarsjóðs, reynslu annarra sveitarfélaga og fyrirkomulagi þeirra. Einnig ræddi hann faglegan ávinning af þessu starfi og ítrekaði að koma þurfi betra skipulagi á stöðu stuðningsfulltrúa og verksvið þeirra. Það mál sé hins vegar ekki eingöngu bundið við okkar sveitarfélag. Elín M. velti upp spurningunni hvers vegna þessi miklu námsvandamál séu að koma upp þegar nemendur eru komnir í 4. og 5. bekk. Hafa þau ekki komið upp fyrr spyr hún. Brynja B. benti á að mikið hefði verið unnið með sértæk vandamál núverandi 4. bekkjar meðan þau voru í Nesjaskóla. Guðmundur tók undir orð Arnbjargar um skort á fagmenntuðu fólki til að sinna börnum sem þurfa mikla og sértæka aðstoð. Spunnust undir þessum lið miklar umræður um samstarf foreldra og skóla, misjafna stöðu barna, agavandamál í skólum og möguleika skólanna til að bregðast við þeim.
Þrír skólanefndarmenn af fjórum styðja þessa ósk skólastjórnenda Hafnarskóla og vísar nefndin henni til ákvörðunar bæjarráðs. (Guðmundur vék af fundi)

6. Erindi Lýðheilsustöðvar – bætt mataræði, aukin hreyfing barna og unglinga
Erindið kynnt.

7. Önnur mál
• Bréf Kvenfélagsins Vöku. Í bréfinu er mótmælt fyrirhugaðri lokun leikskólans Óla priks. Skólanefnd sér ekki ástæðu til að endurskoða afstöðu sína til lokunar Óla priks.
• Staðan í starfsmannamálum grunnskólanna. Stefán gerði grein fyrir stöðunni eins og hún er á þessari stundu.
• Kynnt að samnið hefur verið við sálfræðingana Birgi Þór Guðmundsson og Wilhelm Norðfjörð til tveggja ára. Unnið er að samningi við Þórunni Halldórsdóttur talmeinafræðing.
• Ákvörðun um lengda viðveru. 19 börn hafa verið í lengdri viðveru á yfirstandandi skólaári, flest 14 börn í einu. Skólanefnd leggur til að boðið verði upp á þessa þjónustu næsta skólaár.
• Kynnt bréf menntamálaráðuneytisins um auglýsingar fyrirtækja í grunnskólum.
• Skólanefndarmönnum og leikskólastjórum afhent skýrsla Rannsóknar-stofnunar Kennaraháskóla Íslands – mat á starfi leikskólanna Lönguhóla og Krakkakots.
• Greint frá samantekt menntamálaráðuneytisins – Niðurstöður úttekta á sjálfsmatsaðferðum grunnskóla 2001 – 2003 sem einnig er að finna á heimasíðu ráðuneytisins.



Fundi slitið kl.18:50