Fundargerð menningarmálanefndar 60

60. fundur

Fundur haldinn í menningarmálanefnd í fundarsal Frumkvöðlaseturs í Nýheimum

miðvikudaginn 27. október 2004 kl. 16:00.

Mætt voru:  Hermann Hansson, Ágústína Halldórsdóttir, Bryndís Hólmarsdóttir, Guðlaug Hestnes og Þorbjörg Arnórsdóttir. Einnig Gísli Sverrir Árnason.

Gengið var til dagskrár og eftirtalið tekið fyrir:

1.      Fundargerð síðasta fundar

Fundargerð síðasta fundar, 15. september, lögð fram til kynningar.

2.      Öryggismál safna

Tilefni umræðu um öryggismál var innbrot í Gömlubúð 24. sept. sl. Lögð voru fram gögn um skemmdir á húsnæði og munum. Jón Stefán Friðriksson mætti á fundinn til að gera grein fyrir tillögum sem hann hefur unnið að beiðni forstöðumanns um ástand og úrbætur í öryggismálum safnanna. Fór sú vinna fram að höfðu samráði við bæjarstjóra og VÍS. Jón lagði fram greinargerð sem hann hefur unnið varðandi Gömlubúð,Vöruhús, Pakkhús, Fundarhús Lónmanna, Nýheima og verbúð í Miklagarði. Í greinargerðinni komu fram mismunandi tillögur eftir húsum og von er á verðtilboðum frá þremur aðilum í uppsetningu og rekstur ýmissa kerfa. Í Nýheimum er þó engra aðgerða þörf því þar eru ný, fullkomin kerfi. Málið verður tekið til umræðu á ný þegar tilboð hafa borist.

3.      Staða bókhalds 27. október 2004

Kynnt var yfirlit frá fjármálastjóra þar sem fram kemur að ráðstafað hefur verið 87,36% af fjárheimildum stofnunarinnar miðað við endurskoðaða fjárhagsáætlun. Hefur rekstur upplýsingamiðstöðvar þá verið færður inn í bókhald Menningarmiðstöðvar. Forstöðumaður fór yfir hvernig útlitið væri til áramóta. Er ekki annað að sjá en að fjárhagsáætlun muni standast.

4.      Fjárhagsáætlun 2005

Stefnt var að því að leggja fram fyrstu drög á fundinum en ekki vannst tími til þess. Forstöðumaður benti þó á að endurskoðuð fjárhagsáætlun 2004 ætti að gefa vísbendingu um fjárhagsáætlun 2005 að óbreyttum rekstri.

5.      Ráðstöfun stofnfjármuna

Kynnt var staða málsins, kaup á búnaði og undirbúningur breytinga og viðgerða á Mánagarði og Sindrabæ. Einnig var rætt um hugsanlegt framhald á stofnstyrkjum og samþykkt að leggja þá tillögu sem til umræðu var fram við bæjarráð. Einnig var farið yfir áherslur varðandi endurnýjun menningarsamnings sveitarfélaganna á Austurlandi og ríkisins sem nú er unnið að.

Menningarmálanefnd lýsir yfir eindregnum stuðningi sínum við að samið verði á ný við menntamálaráðuneytið um menningarmál á Austurlandi og stuðning við menningarmiðstöðvarnar fjórar, bæði stofnstyrki og rekstrarstyrki.

6.      Fundur með forsætisráðherra

Lagt var fram minnisblað frá fundinum sem haldinn var í Nýheimum 16. október sl. Þar voru rædd fjögur verkefni á sviði menningarmála: Jöklasetur, Þórbergssetur, Hafnarvík-Heppa og menningarsamningur fyrir Austurland. Fundarmenn fögnuðu þessum fundi og þeim metnaðarfullu áformum sem felast í verkefnunum.

7.      Tónleikar FÍT

Lagt fram bréf frá Félagi íslenskra tónlistarmanna með boði um ýmsa tónleika í vetur. Samþykkt að Inga Jónsdóttir og Guðlaug Hestnes hefðu með val á tónleikum að gera.

8.      Starfsáætlun menningarmálanefndar

Lögð fram drög að funda- og verkefnaáætlun nefndarinnar í vetur.

9.      Djúpavogsferð

Ákveðið hefur verið að sækja menningarmálanefnd Djúpavogs heim 10. nóvember n.k. Farið var yfir skipulag ferðarinnar.

10.  Önnur mál

·  Kynnt voru drög að samningi um eignarhald og varðveislu Akureyjar SF 52 sem unnin eru í samráði við eigendur skipsins, bæjarstjóra og Útvegsmannafélag Hornafjarðar. Menningarmálanefnd lýsti yfir ánægju með samninginn og samþykkti hann fyrir sitt leyti.

·  Sagt var frá því að Sigurður Einarsson, sem ættaður er af Mýrum, hefði gefið Menningarmiðstöðinni vel á þriðja hundrað málverka eftir sjálfan sig. Menningarmálanefnd færir Sigurði hjartans þakkir fyrir þessa höfðinglegu gjöf.

·  Guðlaug óskaði eftir því að kynningarskilti um Höfn sem verið hefur við Lónsafleggjara yrði sett upp að nýju.

·  Guðlaug sagði frá mikilli hrifningu Sigurðar Rúnars Jónssonar á hljómburði í Nýheimum, húsið væri eitt það besta til hjóðupptöku á landinu og hljófærið einnig frábært.

·  Formaður kynnti bréf forstöðumanns dags. 12. október 2004 þar sem hann segir upp starfi sínu.

Fleira ekki gert, fundi slitið kl. 18:25