Fundargerð Menningarmálanefndar 54

54.fundur

Fundur haldinn í menningarmálanefnd í Nýheimum miðvikudaginn 11. febrúar 2004 kl. 16:00.

Mætt voru: Hermann Hansson formaður, Bryndís Hólmarsdóttir, Þorbjörg Arnórsdóttir og Ágústína Halldórsdóttir. Einnig Gísli Sverrir Árnason og Inga Jóna Halldórsdóttir.

Gengið var til dagskrár og eftirtalið tekið fyrir :

1. Fundargerð síðasta fundar
Fundargerð síðasta fundar, 14. janúar, til kynningar.

2. Þórbergssetur
Lögð voru fram ýmis gögn er tengjast stofnun setursins s.s. skipulagsskrá og samstarfssamning-ur við níu menningar- og rannsóknarstofnanir. Þorbjörg Arnórsdóttir kynnti málið frekar og sagði frá áformum um uppbyggingu, rannsóknir og aðra starfsemi. Stefnt er að opnun sýningar um æfi og störf Þórbergs vorið 2005. Málþing verður haldið í Norræna húsinu í Reykjavík á afmælisdegi skáldsins 12. mars. Það verður samstarfsverkefni Þórbergsseturs og Esperanto-félagsins.

3. Upplýsingamiðstöð ferðamanna
Atvinnumálanefnd hefur óskað eftir athugun á möguleikum þess að færa upplýsingamiðstöð ferðamanna inn til Menningarmiðstöðvar Hornafjarðar í Nýheimum. Málið var rætt út frá ýmsum sjónarhornum. Framundan er frekari athugun á þessari hugmynd á vegum Menningarmiðstöðvar og bæjaryfirvalda. Fram kom að fyrstu viðbrögð stjórnar Ferðamálafélags Austur-Skaftafellssýslu við þessari hugmynd eru mjög jákvæð. Von er á formlegri afstöðu félagsins.
Menningarmálanefnd lýsir yfir áhuga sínum á að þetta verkefni verði að veruleika. Mikilvægt er að vanda allan undirbúning og tryggja fjárhagslegan grunn svo vel takist til með framkvæmdina.

4. Samningar og styrkir
Lagðir voru fram eftirfarandi samningar:
• Milli Þórbergsseturs og Menningarmiðstöðvar Hornafjarðar dags. 15. jan. 2004 um heimildaöflun og skráningu fyrir Þórbergssetur.
• Milli Sveitarfélagsins Hornafjarðar og Menningarmiðstöðvar Hornafjarðar dags. 15. jan. 2004 um vinnu við stofnun Jöklaseturs.

Einnig voru kynntir eftirfarandi styrkir:
• 50.000 kr. frá Menningarsjóði Austur-Skaftfellinga til útgáfu á skýrslum Jóns Ívarssonar kaupfélagsstjóra.
• 100.000 kr. frá Menningarsjóði VÍS til kaupa á konsertflygli í Nýheima.
• Eitt starf í 6 mánuði frá Svæðisvinnumiðlun Austurlands til skráningar ljósmyndasafns.

5. Uppgjör ársins 2003
Lögð voru fram drög að ársuppgjöri Menningarmiðstöðvar Hornafjarðar 2003. Þar kemur fram að niðurstaða ársreiknings stofnunarinnar er 33,173.285 kr. en fjárhagsáætlun gerði ráð fyrir 33,125.000 kr. Munar því aðeins 48.285 kr. að áætlun hafi staðist eða 0,15%.

6. Listasafn - stefnumótun
Inga Jónsdóttir mætti á fundinn og fór yfir helstu áherslur í starfi listasafnsins á næstunni. Lagðar voru fram hugmyndir um ýmsar sýningar, samstarfsverkefni o.fl.

7. Viðburðir framundan
Lögð var fram viðburðaskrá fyrir febrúar og mars. Þar kennir ýmissa grasa, m.a. sagt frá sýningu Einars Jónssonar í Pakkhúsinu og stórtónleikum með Heru o.fl. í Nýheimum 2. mars.

8. Bréf til kynningar
Bréf bæjarráðs dags. 9. janúar 2004 um fornleifaskráningu í Skaftafelli.
Bréf forstöðumanna í Nýheimum til bæjarráðs dags. 26. janúar 2004 um rekstur í Nýheimum.

9. Önnur mál
• Sagt var frá væntanlegri úthlutun styrkja frá Menningarráði Austurlands og menningarþingi á Djúpavogi 4. mars n.k. Einnig heimsókn norskra gesta í tengslum við það.
• Menningarmálanefnd heimilar kaup á ljósmyndasafni Jóhönnu Valgerðar að því tilskyldu að Menningarmiðstöðin tryggi fjármagn til þess úr eigin rekstri og/eða með styrkjum.
• Sagt var frá hugmyndum um heimsókn grænlenskra skólabarna hingað næsta vetur í framhaldi af nýstofnuðu vinabæjarsamstarfi við Sisimiut.

Fleira ekki tekið fyrir,
fundi slitið kl. 18.15

Hermann Hansson
Bryndís Hólmarsdóttir
Þorbjörg Arnórsdóttir
Ágústína Halldórsdóttir

Inga Jóna Halldórsdóttir
Gísli Sverrir Árnason